Bɔ̀zɛ̃́níriè 12 - Buamu Laa

À hṹnu àá ɔ́ wìlaàsɔ wìsũmúi bòo

¹ Ɛ́ hɔ́ miikɛ yéréké bòo dɔ̀ ɛ́ yòó mɔn hɔ̀ hóohũn: hṹnu dɔ̀ ɛ́ zɔn lè wurù kɛ̀a ie pɔnkɔ̀rɔ́ bòo sí, ɛ̀ lè ńpĩ́ihṹ ɛ́ siɛ wi piè zehĩ́ fìi hũn, ɛ̀ lè bɛ́záanú pɛ́cɛ́rɛ́ lɛ á yìe ɛ́ ńpĩ́inàwuò pírú àá bɔ̀nbɔ̀ ɲu ɛ́ wi nin.

² Àpe hṹnu sɔ ɛ́ hṹn púo wi ɛ́ tenlɔ́ van dɛ̃un, ɛ́ hɔ́ lɛ á ɛ́ te, ɛ́ hɔ́ tenlɔ́ víɛ ɛ́ lɛ́ á ɛ́ wũamɛkɛ.

³ Ɛ́ hɔ́ yéréké bòo bɔ̀ɓuɛ̀ dɔ̀ ɛ́ bĩniɛ yòó mɔn hɔ̀ hóohũn: à iè wìlaàsɔ wìsũmúi wìmiì wìbɛbɛhɔ́ dɔ̀ lɛ dàa ɲúuhɛ̃ hùuɲu àá ńwṹa pírú, ɛ̀ dúrɔ ńɲún ɛ́ yìe bɛ́záanú múnséré.

⁴ Ɛ́ piè fìzṹnú ɛ́ káaniɛ hɔ̀ hóohũn ńpĩ́inàwuò ńsankɛà hĩ̀tĩ ɲún-cóoní ɛ́ síɛniɛ lé sṹsùnù. Á wo ɓɛrɛ dɛ̃̀ àpe hṹnu lɛ ɛ́ mii te híɛhɔ́ ɛ́ cɛ̀ ɛ́ mii ɛ̀ mìí ɔ́pe zĩncáahɔ́ lɛ á mii te ɛ̀ vĩ̀, pɛ̃̀hṹ lɛ kɛ́ á tɔn siɛ.

⁵ Ápe hṹnu ɛ́ tɔn bɛ́zikíi lɛ ɛ́ fɔ́ɓán à dí hɔ́ dàa míkùi nìɛ híɛhɔ́ àá hɛ̃nlɔ́ lànlè. Ápe zĩncáahɔ́ sɔ ńte siɛ lò, ɛ̀ ɓɛ̀ mɔ̀ à dàa yòó van Dɔfĩn viì pehɔ̀ bɛ́záanú wànlè hũn.

⁶ Kɛ́ hɔ́ ɓen kɛ́ ápe hṹnu, à khie zɔ̀ van lè ɲi-herà hũn, lè viì lɛ ɛ́ Dɔfĩn sɛ́sɛ́a lè kanlén dɔ̀ piè bòo hũn ɛ́ nɛ ɓɛ ɛ̀ díiniɛ yán fúu wihĩ́ khĩɛ-pírú-ɲu àá ɓaàtĩ (1 260).

⁷ Ɛ́ hɔ́ hĩɛ̀ dɔ̀ ɛ́ yòó hĩ́nà hɔ̀ hóohũn. Á mɛlɛkɛ wì-bɛhɔ́ Misiɛle àá mí mɛlɛkɛɓɛ ɛ́ sɛ̃́ɓán àá ɔ́pe wìlaàsɔ wìsũmúi , àpe wìlaàsɔ wìsũmúi àá mí mɛlɛkɛɓɛ ɛ́ ɓiɛ̀ sɛ̃́ɓán àá ɓɛ́ ɛ́ dàa ɛ́ sɛ.

⁸ Kɛ́ ápe wìlaàsɔ wìsũmúi ɛ́ den yí yí pànkɛ́ wɛ̀, ápe àá mí mɛlɛkɛɓɛ kaǹlén ɛ́ wo bĩniɛ yí wé hɔ́pe hóohũn wɛ̀.

⁹ Ápe wìlaàsɔ wìsũmúi sɔ ɛ́ ɓɛ́ mɔ̀ ɛ́ tɛ́ líeniɛ. Àpe ɛ́ temu iè ɔ̀pe hóonú wìkĩ́i, àpe lɛ ɛ́ ɓɛ́ wóo ve nɛ ɲɛɓúukɛ tàá Sitũanɛ; àpe lɛ ɛ́ te ɓɛ sṹsùnù nìɛ ɓɛ́kùi ɛ́ khɛ̃̀níkɛ ɛ̀ vĩ́iní. Ɛ́ ɓɛ́ tɛ́ á síɛniɛ lè sṹsùnù, àpe àá mí mɛlɛkɛɓɛ.

¹⁰ Ɛ́ ń wo ɲɛ́ lé tɛn-bɛhɔ́ dɔ̀ hɔ̀ hóohũn kɛ́ lé ɛ́ bie ɛ́ nɛ làa: «Kɛ̀a sáalɛ ɛ́ lè fuerɛ̀ pɛ̃̀hṹ ɛ́ wo ɓɛrɛ dɛ̃un, ɛ́ ké Dɔfĩn ɛ́ wo zɛ̃́niɛ mí pànkɛ́ àá mí bɛ́záanú. Kɛ̀a sáalɛ ɛ́ lé ɲunù ɛ́ wo wi piè Kirisa núnú hũn, àpe lɛ ɛ́ Hɔ́ munɛ, iè hɔ̀ lɛ ápe lɛ ɛ́ wóò ɓúukɛ ɓɛ kìe zɛ̀ɓɛ̀ ɲihĩ́ɛ ɛ́ ɓɛ́ mɔ̀ ɛ́ tɛ́ líeniɛ; àpe lɛ ɛ́ te peɓɛ̀ ɲihĩ́ɛ ɛ́ wóò ɓúukɛ sṹnúhṹn àá wiɛhɔ́ Dɔfĩn híɛhɔ́.

¹¹ Kɛ́ ɓɛ́pe kìe zɛ̀ɓɛ̀ ɛ́ den yú hɔ́ pànkɛ́ piè lɔ̀n ɔ̀ Pi-zuú cãani yènsénín àá lé Dɔfĩn bienù lɛ ɛ́ ɓɛ́ ɛ́ bie ɛ̀ lɛ́ ɓɛ́ nìnbirìe ǹ bòo hũn, ɓɛ̀ yí wɛní ɓɛ́ kùrù mɛkɛ̃nì fúu ɛ̀ vɛ zán hɔ́ húmú wɛ̀.

¹² Ɛ́ sí iè hɔ̀pe, ɛ́ kɔ́pe hóohũn, àá mípe nìɛ lɛ ɛ́ yòó wi yán ɛ̀ dàá wɛní míte. Kɛ́ kɔ́pe sṹsùnù àá kɔ́pe ɲun-behɔ́, mì yìi ɓén mi hɔ, iè hɔ̀ lɛ á Sitũanɛ ɛ́ ɓɛrɛ siɛ àá mí viì àá lé miikɛ tĩcĩ̀nín, à den dũ kɛ́ mí pɛ̃̀hṹ lɛ kɛ́ ɛ́ yí tóo wɛ̀.»

¹³ Ɛ́ hɔ́ lɛ á wìlaàsɔ wìsũmúi ɛ́ mii húi ɛ̀ ɓɛ̀ ɛ́ tɛ́ á síɛniɛ lè sṹsùnù, á khie bɔ̀ à hṹnu lɛ ɛ́ tɔn ɔ̀ bɛ́zikíi máahṹ ɛ́ ɲɛ.

¹⁴ Kɛ́ ɓɛ́ den khie lɛ́ denɓenù wìbɛhɔ́ ńmáa bɔ̀nbɔ̀ ɲu àpe hṹnu ǹ nɛ a dàá hĩ́ní yíe lan vɛ le vii lɛ ɛ́ ɓɛ́ sɛ́sɛ́a piè bòo hũn lè ńɲiherà hũn, bòo lɛ ɛ́ wé ɛ̀ ɓɛ̀ ɛ̀ díiní-ɛ yán fúu lɔ́líe bɔ̀nbɔ̀ tĩ àá mí tĩ́ihṹ, à hóonú ɛ̀ dàá bí dɛ̃ a wɛ̀.

¹⁵ Ápe wìlaàsɔ wìsũmúi ɛ́ khie bɔ̀ àpe hṹnu máahṹ ɛ́ hɔ̀ ɲumu ɛ̀ kṹun líení àá mí ɲunù kɛ̀a ie hɔ vṹn ɲumu lɛ ɛ́ vĩ̀ cɔ́ bòo sí, bòo lɛ ɛ́ wé ɛ̀ hɔ̀pe ɲumu sɔ ɛ̀ vĩ̀iní-ɛ ɛ̀ dàá lan.

¹⁶ Kɛ́ lé sṹsùnù ɛ́ fɔ́ á hṹnu ǹ; lè hɛ́rɛ mí ɲunù ɛ̀ lè vɛ̃̀ hɔ̀pe ɲumu lɛ á wìlaàsɔ wìsũmúi sɔ ɛ́ kṹun líení àá mí ɲunù.

¹⁷ Ápe wìlaàsɔ wìsũmúi sɔ tĩì ɛ́ hɛ̀ síɛ hĩ́nà ɔ̀ hṹnu ǹ; á wo khie cɔ́ van ɛ́ hɔ̀ hĩɛ̀ ɛ̀ tɛ́ àá ɔ́pe hṹnu hũn nìɛ lɛ ɛ́ kɛ́, ɓɛ̀pe lɛ ɓɛ́ɓɛa lè Dɔfĩn ɲunù bienù ǹ, ɛ̀ ɓɛ̀ lò téniɛ ɓɛ́ ɲún ɛ́ ɔ̀ Yiezu bòo lɛ á zɛ̃́niɛ ɛ̀ wé.

¹⁸ Ápe wìlaàsɔ wìsũmúi sɔ ɛ́ wo van dɛ̃̀ hɔ̀ ɲun-bɛhɔ́ ɲunù hã̀anì lɔ̀n.