Bɔ̀zɛ̃́níriè 11 - Buamu Laa

Ɓɛ̀ nìɛ ɓɛ̀ ɲu bòo lɛ ɛ́ ɓɛ́ mɔn ɛ́ bie Dɔfĩn bòo hũn

¹ Ɛ́ ɓɛ́ khie lɛ́ lé kã́anú dɔ̀ mi ǹ; lè ɛ́ dɛ̃̀ kɛ̀a ie lànlè lɛ ɛ́ ɓɛ́ wóò dàá màatɛ̃́ hɔ́ bòo ɛ̀ ɓɛ̀ ɛ́ bie lɛ́ mi ǹ ɛ́ nɛ làa: «Síɛ hĩ́ní vɛ màatɛ̃́ lé Dɔfĩn zũ-bɛhɔ́ àá lé miyiɛ́ leǹlén dúkéréké, ɛ̀ kɔ̀ mì ɓɛ̀ nìnbirìe lɛ ɛ́ zɔn wi yán ɛ́ hɔ̀pe Dɔfĩn ɛ̀ hɛ̃nnin.

² Kɛ́ lé Dɔfĩn zũ-bɛhɔ́ zĩínù dànkɔ̀ ɛ́ kɔ́ fùansínin ɛ̀ bí màatɛ̃́ wɛ̀, iè hɔ̀ lɛ ɛ́ Dɔfĩn ɛ́ lɛ́ lé ɓɛ̀ dàa bìɓuà dɔ̀ nìɛ ǹ; ɛ́ ɓɛ́pe ɛ́ wo ɓén nàa le Dɔfĩn lóo ɓɛ́ laahĩ́ hũn fúu ńpĩ́ihɛ̃ dɛ̀wɛ́ àá bɔ̀nbɔ̀ ɲu (42).

³ Ń ɓén lɛ́ ɛ́ niǹ nìɛ ɓɛ̀ ɲu lɛ ɛ́ niǹ bòo ɛ̀ bie ɛ́ zɔ hɔ yúrú tĩ̀ɛ ɛ̀ ɓɛ̀ ɛ́ bie hɔ bòo lɛ ɛ́ ɓɛ́ yú niǹ viì fúu wihĩ́ khĩɛ́ pírú-ɲu àá ɓaàtĩ (1 260).»

⁴ Ɓɛ̀pe nìɛ ɓɛ̀ ɲu sɔ ɛ́ iè hɔ̀ Olive vɛ̃̀hɛ̃ bɔ̀nbɔ̀ ɲu àá hɔ́pe pɛ̃̀ntĩ́hĩ́ bɔ̀nbɔ̀ ɲu lɛ wi hɔ Dɔfĩn lɛ iè lè sṹsùnù Ɲunsɔ híɛhɔ́.

⁵ Ɛ́ kɛ́ nìnbirɔ dɔ̀ ɛ́ cɛ̀ ɛ́ mii wé bɔ̀koohɔ́ àá ɓɛ́, ɛ́ dṹn ɛ́ zɔ́ lé àá peɓɛ̀ ɲihĩ́ɛ ɛ̀ lé cĩ̀ní ɓɛ́pe ɓà ńbíyanliè sɔ ɛ́ ɓé. Ũun, kɛ́ nìnbírɔ dɔ̀ ɛ́ cɛ̀ ɛ́ mii wé bɔ̀koohɔ́ àá ɓɛ́, ɛ̀ ɓàasɔ ɛ́ sãawi à ɓé kɛ̀a mu.

⁶ Ɓɛ̀ dàa hɔ pànkɛ́ lɛ ɛ́ dɛ̀ hɔ̀ hóohũn ɲunù ɛ́ híɛ bòo lɛ ɛ́ wé ɛ̀ hɔ̀ hóo ɛ̀ bí tè lè pɛ̃̀hṹ lɛ ɛ́ ɓɛ́ hɔ̀ Dɔfĩn bòo ɛ̀ háaní ɛ̀ lɛ́ ɓɛ́ nìnbirìe hũn. Ɛ̀ kɛ́ ɓɛ́ wɛ ɓɛ́te, ɛ̀ ɓɛ̀ dàa hɔ̀ pànkɛ́ lɛ dɛ̀ ɛ́ lɛ́ ɛ́ hɔ́ ɲumu ɛ́ zɛ̀ní ɛ́ wé cãani, ɛ̀ hɔ̀ bɔ̀sũmúa àá mí ɲúuhɛ̃ ɲúuhɛ̃ ɛ́ siɛ lé sṹsùnù lɔ̀n.

⁷ Ɛ́ ɓɛ́ ɓen ɛ́ háaniɛ hɔ̀ Dɔfĩn bòo ɛ́ lɛ́ ɓɛ́ nìnbirìe ǹ vɔ́, á wìlaàsɔ lɛ siɛ ɛ́ lé àá lépe kṹ-bɛhɔ́ lɛ fĩ̀i mí hũn ɛ́ khíi tɛ́ hɔ́ hĩɛ̀ àá ɓɛ́, à ɛ́ yí hɔ́ pànkɛ́ peɓɛ̀ lɔ̀n, à ɛ́ ɓé ɓɛ́.

⁸ Ɛ́ peɓɛ̀ nìheemu ɛ́ ɓén kań lé lɔ́-bɛhɔ́ yàa khúie hũn, ɛ́ lépe lɔ́-bɛhɔ́ sɔ yèrè lɛ ɛ́ pelè bòo lɛ ɛ́ lé te dàa wi ɛ̀ zɛ̃́ní ɛ́ iè Sodɔɔmu àá Eziputi, lɛ iè pe viì lɛ ɛ́ ɓɛ́ ɛ́ ɓáa peɓɛ̀ Ɲunsɔ lè ɓáalén dãanù lɔ̀n nin.

⁹ Ɛ́ hɔ́ lóoniɛ̀ míkùi nìɛ dɔ̀ àá hɔ́ dàa míkùi nìɛ dɔ̀ àá hɔ́ níiɓɛ̀ míkùi nìɛ dɔ̀ àá hɔ́ cɛ̃̀mɛ̀náa míkùi nìɛ dɔ̀ ɛ́ ɓén húi peɓɛ̀ nìheemu fúu wihĩ́ bɔ̀nbɔ̀ tĩ àá mí tĩ́ihṹ, ɛ̀ ɓɛ̀ yá ɓén tɛ̀ ɛ́ ɓɛ́ ɛ́ wũ̀ń ɓɛ́ wɛ̀.

¹⁰ Ɛ́ ɓɛ́ sṹsùnù nìɛ ɛ́ ɓén wɛní ɓɛ́te peɓɛ̀ ɓénlɔ́ bòo hũn; ɓɛ̀ ɓén dí lé sɛ́rí, ɛ̀ ɓɛ̀ ɛ́ dé hɔ́ bũ̀ɲɛ́ ɛ́ lɛ́kɛ ɓán, iè hɔ̀ lɛ ɛ́ ɓɛ́pe Dɔfĩn bɔ̀háaníriè bìɛ ɲu sɔ ɛ́ hɛ̀ bieniɛ ɓɛ̀ sṹsùnù nìɛ lɔ̀n.

¹¹ Ɛ́ hɔ́pe wihĩ́ bɔ̀nbɔ̀ tĩ àá mí tĩ́ihṹ sɔ khíirɔ́ máahṹ, ɛ́ lé mɛkɛ̃nì sɔmu lɛ ɛ́ lɔ́ àá Dɔfĩn viì ɛ́ siɛ zɔn ɓɛ̀, ɛ́ ɓɛ́ wo hĩ́nà yòó dɛ̃̀ ɓɛ́ zehĩ́ lɔ̀n; ɛ́ ɓɛ́pe lɛ ɛ́ mɔn ɓɛ̀ ɓɛ́kùi ɛ́ hɛ̀ zɛrɛ cɛ̃̀un.

¹² Ɛ́ ɓɛ́pe Dɔfĩn bɔ̀háaníriè bìɛ ɲu sɔ ɛ́ ɲɛ́ lé tɛn-bɛhɔ́ dɔ̀ hɔ̀ hóohũn kɛ́ lé ɛ́ bie àá ɓɛ́ ɛ́ nɛ làa: «Mì ɓen yòó hũ̀nún!» Ɛ́ ɓɛ́ wo yòó cɔ́ kã́a hɔ̀ hóohũn lè dùndùí hũn kɛ́ ɓà ńbíyanliè ɛ́ dɛ̃̀ ɛ́ ɓɛ̀ húi ɛ̀ yòoní.

¹³ Ɛ́ pehɔ̀ yìi hũn, ɛ́ lé sṹsùnù ɛ́ siɛ zɛ̀ cɛ̃̀un, ɛ́ lépe lɔ́-bɛhɔ́ ńsankɛà yìe pírú ɛ́ san-cóoní ɛ́ wúa khie siɛ. Ɛ́ nìnbirìe muasie hùuɲu (7 000) ɛ́ húrun lèpe sṹsùnù zànlɔ́ sɔ hũn; ɛ́ ɓɛ́lɛ ɛ́ kɛ́ ɛ́ hɛ̀ zɛ́rɛ cɛ̃̀un ɛ́ ɓɛ́ wo lɛ́ hɔ́ ɓàarɔ́ hɔ̀ hóohũn Dɔfĩn.

¹⁴ Ɛ́ lépe ńɲuunín lɔ̀nbiè ɛ́ iè pe wo khie kɛ̀a mu, kɛ́ lé ńtĩinín ɛ́ den temu wo vaá-ɓen kɛ̀a sáalɛ.

Lè bũì hùuɲulán pìɛrɔ́

¹⁵ Á mɛlɛkɛ hùuɲulán ɛ́ zɔn pìɛ mí bũì, ɛ́ hɔ́ tɛn-bɛhɛ̃ dɔ̀ ɛ́ yòó tɛ̀ hɔ̀ hóohũn ɛ́ nɛ làa: «Lè dímíɲɛ́ bɛ́záanú ɛ́ wo bòo khie sɛ̃̀ kè Ɲunsɔ Dɔfĩn àá mí Kirisa ǹ, àpe lɛ ɛ́ Hɔ́ munɛ, á wo ɓén dí mí bɛ́záanú fúu pɛ̃̀hṹ lɛ yá vé hũn.»

¹⁶ Ɛ́ ɓɛ́ nìkĩ́ihɛ̃ ɓénlé àá nìɛ ɓɛ̀ nɛ́ lɛ ɛ́ kɛsí hɔ́ Dɔfĩn híɛhɔ́ ɓɛ́ bɛ́záanú wànlɛ̀a lɔ̀n, ɛ́ lɔ́ siɛ ɓúnkɛasí ɓɛ́ híɛhɛ̃ lè sṹsùnù lɔ̀n ɛ́ dàa ɛ́ Dɔfĩn ɛ̀ ɓàanínin,

¹⁷ ɛ́ nɛ làa: «Ké kɔ̀ bɛrikɛ ɛ̀ dé kè Ɲunsɔ Dɔfĩn pànkɛ́ míkùi ɓàasɔ, kɔ̀pe lɛ hàarí wi, ɛ̀ kɔ̀ lò wi yán fúu kɛ̀a zoòni, iè hɔ̀ lɛ ɛ́ kɔ́ zɛ̃́niɛ kɔ̀ pànkɛ́ bɔ̀bɛhɔ́ ɛ́ dàa bɔ̀sí kɔ́ bɛ́záanú.

¹⁸ Hɔ̀ dàa bɔ̀ɓuà nìɛ tĩɛ̀ ɛ́ cɛ̃̀, kɛ́ kɛ̀a sáalɛ ɛ́ kɔ́pe kɔ̀ tĩcĩ̀nín ɛ́ ɓiɛ̀ siɛ hĩ́nà; ɛ́ lé yìi lɛ ɛ́ kɔ dàá lè ɓɛ̀ nìhiè lìe ɛ́ ɓɛrɛ dɛ̃un, lè iè pe yìi lɛ ɛ́ kɔ dàá sàaní kɔ́ tɔntɛ́riè àá kɔ́ bɔ̀háaníriè àá ɓɛ́lɛ bòo sɛ̃̀ kɔ ǹ ɓɛ́kùi, ɓɛ̀pe lɛ ɛ́ kɔ̀ mɛ̀ndɛ̃, ɓɛ̀lɛ ɛ́ mìníkɛa àá ɓɛ́lɛ ɛ́ ɓàakɛa; ɛ̀ lè lò iè lèpe yìi lɛ ɛ́ kɔ dàá yaakɛ ɓɛlɛ ɛ́ lè sṹsùnù ɛ̀ yaakɛ.»

¹⁹ Ɛ́ lé Dɔfĩn zũ-bɛhɔ́ lɛ ɛ́ van yòó wi hɔ hóohũn ɛ́ ɲunù hɛ́rɛ, ɛ́ hépe Dɔfĩn ɲɛbíi wiè ɛ́ zɔn mɔn lèpe zũ-bɛhɔ́ sɔ hũn. Ɛ́ hɔ́ hóo ɛ́ yòó ɲiiníkɛa ɛ̀ hɔ̀ ɛ́ zɔn wíríkɛa ɛ̀ hɔ̀ zɔn nɛ̀mɛ́kɛa ɛ̀ lè sṹsùnù ɛ́ siɛ zɛ̀, ɛ̀ hɔ̀ miikɛ hóo sɛ̃̀nlɛ̀a ɛ́ tɔ̀ siɛ.