Bɔ̀zɛ̃́níriè 10 - Buamu Laa

À mɛlɛkɛ àá lé vɛ̃hṹ dɛ̀cíi bòo

¹ Ɛ́ ń bĩniɛ mɔn ɔ̀ mɛlɛkɛ dɔ̀ lɛ pànkɛ́ wi kɛ́ á yòó lɔ́ hɔ́ hóohũn ɛ́ síɛ. À zɔn lè dùndùí kɛ̀a ie pɔnkɔ̀rɔ́ bòo sí; ɛ̀ lè hóo khɛ̃́nkhɔ́nú ɛ́ kíríkɛa piè ɲun; piè híɛhɔ́ ɛ́ dɛ̃̀ kɛ̀a ie wurù bòo sí, ɛ̀ piè zehĩ́ ɛ́ dɛ̃̀ kɛ̀a ie dṹn pɔnù bòo sí.

² Ɛ̀ lè vɛ̃hṹ dɛ̀cíi dɔ̀ lɛ hɛ́rɛ á dàa mí núnú hũn. Á síɛ bɔ̀ mí ńdóonín zeǹ hɔ̀ ɲun-bɛhɔ́ lɔ̀n, ɛ̀ piè ńmiinín zeǹ á bɔ̀ lè sṹsùnù lɔ̀n.

³ À zɔn wũamɛa cɛ̃̀un kɛ̀a ie zànkɛ́wòohṹ wũamɛà bòo sí. Ɛ́ hɔ́ lɛ á wũamɛa, ɛ́ hóo nɛ̀mɛ́kɛà hùuɲu ɛ́ ɓiɛ̀ zɔn bie ɛ́ ɲɛ́ nin.

⁴ Ɛ́ hɔ́ lɛ ɛ́ hɔ́pe hóo nɛ̀mɛ́kɛà hùuɲu sɔ tɛmu ɛ́ ɲɛ́ nin, ɛ́ ń hṹn wɛ ɛ́ nín siɛ wĩ́ hɔ́; kɛ́ ń den ɲɛ́ lé tɛmu dɔ̀ lɛ ɛ́ yòó lɔ́ àá hɔ́ hóohũn kɛ́ lé ɛ́ bie ɛ́ nɛ làa: «Hɔ̀pe bòo lɛ ɛ́ hɔ́ hóo nɛ̀mɛ́kɛà hùuɲu ɛ́ bie ɛ́ kɔ́ ɓɛ́ɓɛ́ nin ɛ̀ dàá kɔ́ hũn, kɛ́ kɔ́ bí wĩ́ hɔ́ wɛ̀.»

⁵ Ápe mɛlɛkɛ lɛ ɛ́ ń hṹn mɔn kɛ́ á dɛ̃̀ hɔ̀ ɲun-bɛhɔ́ àá lé sṹsùnù lɔ̀n ɛ́ hóoniɛ mí ńdóonín núnú ɛ́ yòoniɛ àá hɔ́ hóohũn,

⁶ à zɔn wĩ́ɛ hɔ̀pe Dɔfĩn lɛ yìe wi fúu ɛ́ yá vé lɔ̀n; Hɔ̀pe lɛ ɛ́ mɛ́ hɔ́ hóohũn àá hɔ́ bòo lɛ yòó wi yán míkùi, ɛ̀ Hɔ̀ mɛ́ lé sṹsùnù àá hɔ́ bòo lɛ ɛ́ wi pelè lɔ̀n míkùi, ɛ̀ Hɔ̀ mɛ́ hɔ́ ɲun-bɛhɔ́ àá hɔ́ bòo lɛ ɛ́ zɔn wi pehɔ̀ hũn míkùi; ápe mɛlɛkɛ sɔ ɛ́ wĩ́ɛ nɛ hɔpe bòo sɔ ɛ́ iè pe wo mii wé sáalɛ.

⁷ Ɛ́ pɛ̃̀hṹ lɛ kɛ́ á mɛlɛkɛ hùuɲulán ɛ́ zɔn ɛ́ mí bũì ɛ̀ pìɛ́, ɛ́ Dɔfĩn ɛ́ den wo ɛ́ tíiní lé fuerɛ̀ bòo lɛ hàarí tànkɔ̀niɛ ɲunù, kɛ̀a bòo lɛ ɛ́ Hɔ́ dàa hàarí bie hɔ̀ ɛ́ lɛ́ mí bɔ̀háaníriè ǹ, ɓɛ̀pe lɛ iè pehɔ̀ tɔntɛ́riè.

⁸ Ɛ́ lé tɛmu lɛ ɛ́ ń hṹn ɲɛ́ hɔ́ hóohũn ɛ́ sĩ̀n zɔn ɛ́ bie àá mi ɛ́ nɛ làa: «Khíi lan vɛ fé lé vɛ̃hṹ dɛ̀cíi lɛ ɛ́ hɛ́rɛ wi-e mɛlɛkɛ lɛ ɛ́ dɛ̃̀ hɔ̀ ɲun-bɛhɔ́ àá lé sṹsùnù lɔ̀n núnú hũn.»

⁹ Ɛ́ ń khie ɛ́ vɛ kãa ɔ̀pe mɛlɛkɛ kɛ́ nìń bie àá ɔ́ nɛ a lɛ́ lépe vɛ̃hṹ dɛ̀cíi sɔ. Á zɔn bie lɛ́ mì ǹ ɛ́ nɛ làa: «Fé lé, ɛ̀ kɔ̀ lɛ̀ lè vĩ̀: lè mii tĩiní kɔ́ ɲunù hũn kɛ̀a tɔ̀rɔ́ bòo sí, kɛ́ kɔ́ ɓen vɛ̃̀ lè, ɛ́ lé zɔ́ hiɛ̀ní kɔ́ vùkì hũn.»

¹⁰ Ɛ́ ń wo khie fɔ́ lépe vɛ̃hṹ dɛ̀cíi sɔ à mɛlɛkɛ núnú hũn ɛ́ yòó lɛ̀. Ɛ́ lé hɛ̀ tĩìniɛ niǹ ɲunù hũn kɛ̀a ie tɔ̀rɔ́, kɛ́ hɔ́ lɛ ɛ́ ń vɛ̃̀ lè vɔ́, ɛ́ lé hɛ̀ siɛ hiɛ̀ niǹ vùkì hũn.

¹¹ Ɛ́ ɓɛ́ wo bie lɛ́ mi ǹ nɛ làa: «Kɔ́ fɔ́ɓán ɛ̀ kɔ̀ bĩní bie Dɔfĩn bòo lɛ ɛ́ Hɔ̀ sɛ́sɛ́a dĩ̀niɛ ɓɛ̀ dàa nìɛ bìkuì bòo hũn, hɔ̀ cɛ̃̀mɛ̀náa bɔ̀kùi bòo hũn, hɔ̀ níiɓɛ̀ bɔ̀kùi bòo hũn àá ɓɛ́ bɛ́zɛ̀ɓɛ̀ bìkuì bòo hũn.»