Liike 3 - Buamu Laa

Zãn Batiisi bòo lɛ á ɛ́ buie

¹ Ɛ́ pɛ̃hṹ lɛ á Rɔmu bɛ́zu-bɛhɔ́ Tibɛɛre ɛ́ hàarí wi mí bɛ́záanú lɔ́líe pírú àá hùanúlán hũn, hɔ́rɔsí ɛ̀ Pɔnse Pilaate ɛ́ temu iè Zudee pɛ̃̀hɛ̃ Kuvɛrɛnɛɛre, ɛ̀ Herɔɔde ɛ́ temu iè Kalile pɛ̃̀hɛ̃ bɛ́zuú, ɛ̀ ɓà zuú Filiipu ɛ́ ɓiɛ temu iè hɔ̀ Yituree àá hɔ́ Tarakoniite pɛ̃̀hɛ̃ bɛ́zuú, à Lizaniase ɛ́ ɓiɛ̀ temu iè hɔ Abilɛne pɛ̃̀hɛ̃ bɛ́zuú,

² ɛ̀ Aanɛ àá Kayiifu ɛ́ temu hàarí iè Dɔfĩn khɛ̃́ndàariè hándíe. Ɛ́ Dɔfĩn wo hàarí khɛ́ àá ɔ́ Zɛkɛri yɛ̀nù Zãn lɛ wi le ńɲiherà hũn.

³ Ápe Zã́n ɛ́ wo hàarí hĩ́nà bɔ̀ lè Zurudɛ̃n vṹn pɛ̃̀hɛ̃ míkùi ǹ ɛ́ bie ɛ̀ lɛ́ ɓɛ́ nìnbirìe ǹ nɛ ɓɛ zɛ̀ní ɓɛ́ tĩɛ̀ ɛ̀ ɓɛ̀ fùansí hɔ́ bɔ̀koohɛ̃ wénlɔ́ ǹ ɛ̀ ɓɛ́ lɛ́ ɓɛ́te ɛ̀ ɓɛ̀ líiníkɛ hɔ́ ɲumu hũn, ɛ̀ Dɔfĩn ɛ̀ dé sɛ́wɛ́rí lɛ́ ɓà ǹ peɓɛ̀ bɔ̀koohɛ̃ bòo hũn.

⁴ Hɔ̀pe si ɛ́ wɔ́ kɛ̀a bòo lɛ ɛ́ hɔ́ dàa wɛ̃́ á Dɔfĩn bɔ̀háanírɔ Ezayi biehĩ́ vɛ̃hṹ hũn ɛ́ nɛ làa: «Nìnbírɔ dɔ̀ tɛmu ɛ́ tɛ̀ lè ńɲiherà hũn ɛ́ nɛ làa: Mì wookɛ á Ɲunsɔ wṹn, Mì niiníkɛ piè wṹ-cíini.

⁵ Mì pí hɔ́ kɔ̀nkṹuhɛ̃ míkùi, ɛ̀ hɔ̀ ɓúkùo àá hɔ́ ɓúké-cíini míkùi ɛ́ mí khɛ̀ síɛní. Ɛ̀ hɔ̀ wũuhɛ̃ lɛ kɔnkɔníkɛa ɛ́ mí tenikɛ, ɛ̀ hɔ̀ wṹuhɛ̃ lɛ yí sãa ɛ́ mí wóokɛ.

⁶ Ɛ̀ ɓɛ̀ nìnbirìe ɓɛ́kùi ɛ́ ɓén mi bòo lɛ ɛ́ Dɔfĩn ɛ́ mii dàá fuení ɓɛ́ nìnbirìe ǹ.»

⁷ Ɛ́ ɓɛ́ nìzã̀amáa ɛ́ hṹn ɓen àá Zãn viì nɛ a líiníkɛ ɓɛ́ hɔ̀ ɲumu hũn. Ɛ́ Zãn zɔn bie lɛ́ ɓà ǹ ɛ́ nɛ làa: «Mìpe ńkĩnlɛ̀a lɛ! Á wieni ɛ́ te miɛ bɔ́ nɛ mí dɛ̀ ɛ́ zè ɛ̀ mì ɛ́ kɛ́ hɔ́ Dɔfĩn tĩcĩ̀nín lɛ vaá-ɓen?»

⁸ Ɛ́ mí lɛ́ nɛ mi bɔ̀werà ɛ̀ zɛ̃́ní kɛ́ mí zɛ̀niɛ mì tĩɛ̀, ɛ̀ mì bí wóo bie nɛ hɔ lɛ á Abarahaamu ɛ́ iè mì zĩkĩ́n ɛ́ hɔ́ wo ɓaa wɛ̀. Ɛ́ nin bie lɛ́ miɛ ǹ nɛ Dɔfĩn dɛ̀ ɛ́ lɛ́ ɛ́ hɔ́pe sɛ̃̀nlɛ̀a lɛ ɛ́ mí loo ɛ́ wé Abarahaamu hũn nìɛ.

⁹ Lè pupuiè ɛ́ wo zĩ̀nikɛa sɛ́sɛ́a vɔ́ ɛ́ mii ɓúukɛ hɔ vɛ̃̀hɛ̃ ɛ̀ síɛ vɛ líi pehɔ̀ nɛhĩ́ ǹ: ɛ́ vɛ̃̀hṹ yée vɛ̃̀hṹ lɛ yáà hɛ bie lɛ sãa ɛ́ ɓɛ́ ɓén ɓúu ɛ́ tɛ́ dé hɔ́ dũń hũn.

¹⁰ Ɛ́ ɓɛ́ nìzã̀amáa ɛ́ hṹn ɔ̀ Zãn ɛ̀ dìekɛnin ɛ́ nɛ làa: «Ɛ́ hɔ́ wo iè ńɓùo ɛ́ ké fɔ́ɓán ɛ̀ kè wé?»

¹¹ Á wóò zɔ kɔ̃́ní ɓɛ́ ɛ́ nɛ làa: «Àlɛ kɛ́ á dàa pɔnkɔniɛ̀ bɔ̀nbɔ̀ ɲu, à lɛ́ lé dìcóoní àlɛ yí dàa pɔnkɔ̀rɔ ǹ, àlɛ kɛ́ á dàa díe à sãankɛ hɔ àá ɔ́lɛ ɛ́ yí dàa díe.»

¹² Ɛ́ ɓɛ́ lànpó-fériè dɔ̀ ɛ́ ɓiɛ̀ van ɓɛrɛ nɛ ápe Zãn ɛ̀ ńlíiníkɛ ɓɛ́ hɔ̀ ɲumu hũn; ɛ́ ɓɛ́ zɔn ɛ́ ɔ̀ dìenin ɛ́ nɛ làa: «Kɛ̀ránlɔ, ńɓùo iè pe ɛ́ képe ɛ́ fɔ́bán ɛ̀ kè wé?»

¹³ Á zɔn kɔ̃́niɛ ɓɛ̀ ɛ́ nɛ làa: «Mì bí nɛ nìnbírɔ dɔ̀ ɛ̀ sàaní pɔní hɔ́ lɛ á fɔ́ɓán à sàani wɛ̀.»

¹⁴ Ɛ́ ɓɛ́ sɛ̃̀nɛ̀dɔ́síɓɛ́ dɔ̀ ɛ́ ɓiɛ̀ zɔn ɛ́ ɔ̀ dìenin ɛ́ nɛ làa: «Ɛ̀ kèpe lò, ńɓùo iè pe ɛ́ ké fɔ́ɓán kè wé?» Á zɔn bie lɛ́ ɓà ǹ nɛ làa: «Mì bí mɛmɛkɛ nìnbírɔ dɔ̀ tàá mì bí ɓúu piè ɲunù ɛ̀ fé màa wɛ̀, kɛ́ mí wóo lɛ́ nɛ mi sàanín ɛ̀ yí miɛ.»

¹⁵ Ɓɛ̀ nìnbirìe ɛ́ hàarí ɛ́ hìé àá ɓɛ́ tĩɛ̀ míkùi, kɛ́ ɓɛ́ ɛ́ ɓɛ́te ɛ̀ dìekɛnin ɓɛ́ tĩɛ̀ hũn àpe Zãn bòo hũn, nɛ wɔ́ khɔn àpe ɛ́ temu iè ɔ̀pe Kirisa.

¹⁶ Ɛ́ Zãn ɛ́ zɔn bie lɛ́ ɓà ǹ ɓɛ́kùi ɛ́ nɛ làa: «Ǹpe iè hɔ̀ ɲumu ɛ́ nín mì líiníkɛ hũn, kɛ́ álɛ vaá-ɓen niǹ máahṹ ɛ́ pànkɛ́ wi pɔ mi, hɛ̀rí piè naahĩ́ huuniɛ̀ ɛ́ lɛ iè niǹ ɲún fĩi àá ńsíɛ lúnlúsí ɛ̀ fuen. Ápe ɛ́ te miɛ ɓén tíiní àá lé Mɛkɛ̃n-Sãanu, à ɛ́ líiníkɛ miɛ hɔ̀ dṹn hũn.

¹⁷ À dàa mí bòo viɛlán mí núnú hũn, á ɓén tàa mí tóohɔ́, à ɛ́ viɛ mí siè, à khui hɔ bie ɛ́ vɛ́ kóo mí nɛ́nlé hũn, ɛ̀ hɔ̀ ńɲɛ́nkɛ̃́hĩ́ á khíi cĩ̀ní hɔ́ dṹn lɛ yáà hí hũn.»

¹⁸ Ɛ́ sí den iè hɔ̀pe biehĩ́ lɛ á Zãn ɛ́ dàa hàarí ɛ́ lè Bentĩnu ɛ̀ buie ɛ̀ lɛ́ ɓɛ́ nìnbiriè ǹ kɛ́ á lò ɛ́ hɔ́ bérɛ́ bɔ̀ɓuà bɔ̀kuì dɔ̀ ɛ̀ lɛ́ ɓà ǹ.

¹⁹ Kɛ́ á bɛ́zuú Herɔɔde ɛ́ den hàarí khie vúa ɓá zuú ɓà hṹnu Herodiade ɛ́ yan ɛ́ paa hɔ̀ bɔ̀koohɛ̃ dɔ̀ lɛ á hàarí ɛ́ wé lɔ̀n; ɛ́ Zãn ɛ́ den nɛ a yí fɔ́ɓán à wé hɔ́ wɛ̀.

²⁰ Ápe Herɔɔde ɛ́ wookɛa wɔ́ hɔ́ bɔ̀koohɔ́ dɔ̀ ɛ́ yòó sĩiniɛ: à lɛ́ ɛ́ ɓɛ́ ɓaa ɔ̀ Zãn ɛ́ van dɔ́ lé kɛ̀sí hũn.

Yiezu Kirisa ńlíiníɲumu bòo

²¹ Ɛ́ bòo lɛ ɛ́ ɓɛ́ nìnbirìe ɓɛ́kùi ɛ́ ɓɛ́te ɛ̀ lɛ́ á Zãn á ɛ́ ɓɛ̀ líiníkɛ hɔ ɲumu hũn, ɛ́ Yiezu ɓiɛ̀ van ɓɛrɛ lɛ́ míte ɔ̀ ǹ á líiniɛ hɔ̀ ɲumu hũn; ɛ́ hɔ́ lɛ ɛ́ Yiezu ɛ́ Dɔfĩn ɛ̀ hɛ̃nnin, ɛ́ hɔ́ hóohũn ɛ́ yòó hɛ́rɛ.

²² Ɛ́ lé Mɛkɛ̃n-Sãanu ɛ́ yòó lɔ́ ɓen síɛ piè lɔ̀n ɛ́ ɓɛ́ mɔn kɛ̀a ie ńmɛǹɓóohṹ bòo sí. Ɛ̀ hɔ̀ tɛmu dɔ̀ ɛ́ yòó tɛ̀ hɔ̀ hóohũn ɛ́ nɛ làa: «Kɔ́ iè niǹ Zuú lɛ ǹ wɛ àá niǹ tĩì míkùi, ń wɛ niǹte cɛ̃̀un kɔ̀ bòo hũn.»

Yiezu ɓà nɛnkɛ̃nù

²³ Yiezu ɛ́ hàarí mii ɓɛ́ mí tɔnlɔ́ fìi ɛ̀ piè lɔ́líe ɛ́ van dɛ̃un ɓénlán àá pírú (30) ɓà ńmà. Ɓɛ̀ nìbiriè hàarí wóo nùún ɛ̀ ɓɛ̀ nɛ ɓà yàá iè Zozɛɛfu lɛ iè Elii yɛ̀nù.

²⁴ Á Elii ɛ́ iè Mataate yɛ̀nù, lɛ iè Levii yɛ̀nù lɛ iè Mɛlɛkii yɛ̀nù, lɛ iè Zanayi yɛ̀nù, lɛ iè Zozɛɛfu yɛ̀nù,

²⁵ lɛ iè Matatiase yɛ̀nù, lɛ iè Amɔɔsi yɛ̀nù, lɛ iè Nahumu yɛ̀nù, lɛ iè Ɛsilii yɛ̀nù, lɛ iè Nakayi yɛ̀nù,

²⁶ lɛ iè Maate yɛ̀nù lɛ iè Matatiasi yɛ̀nù, lɛ iè Semeyiinɛ yɛ̀nù, lɛ iè Zosɛɛke yɛ̀nù, lɛ iè Yoda yɛ̀nù,

²⁷ lɛ iè Yohana yɛ̀nù, lɛ iè Reza yɛ̀nù, lɛ iè Zorobabɛle yɛ̀nù, lɛ iè Seyatiɛli yɛ̀nù, lɛ iè Neri yɛ̀nù,

²⁸ lɛ iè Mɛlɛkii yɛ̀nù, lɛ iè Adii yɛ̀nù, lɛ iè Kozaamu yɛ̀nù, lɛ iè Ɛlimadaamu yɛ̀nù, lɛ iè Ɛre yɛ̀nù,

²⁹ lɛ iè Zozue yɛ̀nù, lɛ iè Eliezɛɛre yɛ̀nù, lɛ iè Zoriimu yɛ̀nù, lɛ iè Mataate yɛ̀nù, lɛ iè Levii yɛ̀nù,

³⁰ lɛ iè Simiɲɔn yɛ̀nù, lɛ iè Zuda yɛ̀nù, lɛ iè Zozɛɛfu yɛ̀nù, lɛ iè Yonaamu yɛ̀nù, lɛ iè Eliakiimu yɛ̀nù,

³¹ lɛ iè Meleya yɛ̀nù, lɛ iè Mena yɛ̀nù, lɛ iè Matata yɛ̀nù, lɛ iè Natan yɛ̀nù, lɛ iè Daviide yɛ̀nù,

³² lɛ iè Zese yɛ̀nù, lɛ iè Obɛde yɛ̀nù, lɛ iè Booze yɛ̀nù, lɛ iè Sala yɛ̀nù, lɛ iè Naasɔn yɛ̀nù,

³³ lɛ iè Aminadaabu yɛ̀nù, lɛ iè Ademiinɛ yɛ̀nù, lɛ iè Arɛɛni yɛ̀nù, lɛ iè Hɛserɔn yɛ̀nù, lɛ iè Perɛɛze yɛ̀nù, lɛ iè Zuda yɛ̀nù,

³⁴ lɛ iè Zakɔɔbu yɛ̀nù, lɛ iè Yizaake yɛ̀nù, lɛ iè Abarahaamu yɛ̀nù, lɛ iè Tera yɛ̀nù, lɛ iè Nahɔɔre yɛ̀nù,

³⁵ lɛ iè Seruke yɛ̀nù, lɛ iè Rehu yɛ̀nù, lɛ iè Pelɛɛke yɛ̀nù, lɛ iè Ebɛɛre yɛ̀nù, lɛ iè Sela yɛ̀nù,

³⁶ lɛ iè Kayinaamu yɛ̀nù, lɛ iè Arifasaade yɛ̀nù, lɛ iè Sɛɛmu yɛ̀nù, lɛ iè Nowe yɛ́nù, lɛ iè Lemɛɛke yɛ̀nù,

³⁷ lɛ iè Matuzalɛɛmu yɛ̀nù, lɛ iè Henɔɔke yɛ̀nù, lɛ iè Yerɛɛde yɛ̀nù, lɛ iè Malaleyɛɛle yɛ̀nù, lɛ iè Kenaamu yɛ̀nù,

³⁸ lɛ iè Enɔɔsi yɛ̀nù, lɛ iè Sɛɛti yɛ̀nù, lɛ iè Hɛdɛmɛ yɛ̀nù, à Hɛdɛmɛ ɛ́ Dɔfĩn ɛ́ te mɛ́.