Kolɔɔsi Siè 2 - Buamu Laa

¹ Ń den wɛ nɛ mi dũń sãàní kɛ́ nìń hɔ̀ sɛrɔ́ lɛ ɛ́ hie cɛ̃̀un ɛ̀ sɛ mi bòo hũn, àá hɔ́ Laodiise ńdɛsĩ̀riè bòo hũn, àá ɓɛ́pe ńdɛsĩ̀riè ɓɛ́kùi lɛ yɛ̀rɛ́ yìi ɲɛùn yí bè niǹ lɔ̀n yí mi bòo hũn.

² Nín sɛ kɛ̀amu bòo lɛ ɛ́ wé ɛ̀ peɓɛ̀ tĩɛ̀ ɛ̀ hièní, ɛ̀ ɓɛ̀ cɛ ɓán lè wanminu hũn, ɛ̀ ɓɛ̀ tí àá hɔ́ bɔ̀dũmunù, ɛ̀ ɓɛ̀ dàá dũń hɔ́ Dɔfĩn bòo lɛ hàarí tànkɔ̀niɛ, lɛ iè ɔ̀pe Kirisa kùusɔ.

³ Ápe Kirisa ɛ́ temu iè hɔ̀pe bɔ̀dũmunù àá hɔ́ hɛciri lɛ ɛ́ hɔ́ yírɛ́ míkùi ɛ́ zɔn tànkɔ̀niɛ wi nin.

⁴ Nín hɔ̀pe sí ɛ̀ bie lɛ́ miɛ ǹ bòo lɛ ɛ́ wé ɛ̀ nìnbírɔ dɔ̀ ɛ̀ bí khɛ̃̀ní miɛ ɛ̀ yí nin àá mí bentĩɛ̀ wɛ̀.

⁵ Ɛ́ hɛ̀rí kɛ́ hɔ́ tɛkɛ̀a hũn ɛ́ ń mí ɓánlɔ̀n àá miɛ, ɛ̀ lè mɛkɛ̃nì hũn ɛ́ ń wi àá miɛ. Ɛ́ ń wo wɛ niǹte iè hɔ̀ lɛ ɛ́ mí wóò wé hɔ́ bòo míkùi àá mí híɛhɔ́, ɛ̀ mì ńdɛsĩ̀nlɔ́ ɛ́ lò fɛ́sí dɛ̃̀ sãa ɔ̀ Kirisa ǹ.

Lè mɛkɛ̃nì lɛ ɛ́ wóò yí-e Kirisa ǹ bòo

⁶ Ɛ́ kɛ̀a bòo lɛ ɛ́ mí dàa tɛ̀ ɛ́ wɔ́ á Yiezu Kirisa àá mí Ɲunsɔ, ɛ́ mí wo cɛ dìń ɔ̀ ǹ,

⁷ ɛ̀ mì fɛ́sí dìń piè lɔ̀n, ɛ̀ mì mɛkɛ̃nì míkùi ɛ̀ wé piè lɔ̀n, ɛ̀ mì cɛ dìń hɔ́ ńdɛsĩ̀nlɔ́ hũn ɛ̀ ɓáaníɓán àá hɔ́ kɛ̀ránlɔ́ lɛ ɛ́ mí yú, ɛ̀ mí wóo vɛ àá híɛhɔ́ àá Dɔfĩn bɛrikɛ dénlɔ́.

⁸ Mì ɓɛ́ɓɛ́ míte ǹ nɛ nìnbírɔ dɔ̀ ɛ̀ bí yí miɛ ɛ̀ vĩ mí hùrɔ́ hũn àá mí nì-khɛ̃̀níkɛà biehĩ́ lɛ ɲún mí, lɛ iè ɓɛ̀ nìnbirìe bɔ̀dũmunù biehĩ́. Hɔ̀pe nìnbirìe bɔ̀dũmunù sɔ ɛ́ wóò lé àá peɓɛ̀ làndɛ́a bòo hũn, àá lé dímíɲɛ́ bòo hũn, kɛ́ hɔ́ yáà lé àá Kirisa viì wɛ̀.

⁹ Iè hɔ̀ lɛ ɛ́ bòo lɛ ɛ́ Dɔfĩn te dàa wi míkùi ɛ́ ɲunù ɛ́ tú wi-e pe Kirisa kùusɔ ǹ.

¹⁰ Á iè ɔ̀pe Kirisa temu lɛ́ ɛ́ mí dàa ɲɛ̀ àá hɔ́ bòo míkùi, àpe ɛ́ temu iè ɓɛ̀lɛ ɛ́ lé ɲunù ɛ́ lɛ́ nin ɓɛ́kùi àá ɓɛ́ pànkɛ́ ɓàasiè ɓɛ́kùi Ɲunsɔ.

¹¹ Ɛ́ mí ńcɛɓánlɔ́ àá ɔ́pe Kirisa ɛ́ lɛ́ ɛ́ mí iè nìnbirìe lɛ ɛ́ fũ̀a àá fũ̀arɔ́ lɛ ɛ́ nìnbirìe ɛ́ yí teń yí wé, kɛ́ hɔ́ iè fũ̀arɔ́ lɛ ɛ́ lé àá ɔ́pe Kirisa viì, hɔ̀pe fũ̀arɔ́ lɛ ɛ́ wóò leń ɔ́ nìnbírɔ ɛ̀ lé piè bɔ̀koohɛ̃ wénlɔ́ hũn.

¹² Ɛ́ hɔ́ lɛ ɛ́ ɓɛ́ ɛ́ líiniɛ miɛ hɔ̀ ɲumu hũn, ɛ́ mí iè pe ɛ́ ɓɛ́ wo páaniɛ wũ̀nɛ àá ɔ́ Kirisa kɛ̀amu. Ɛ̀ hɔ̀ lɛ ɛ́ mí dàa yòó lɔ́ hɔ́ ɲumu hũn, ɛ́ mí iè pe ɛ́ ɓiɛ̀ paaniɛ vìé lɔ́ hɔ́ húmú hũn àá ɔ́pe Kirisa kɛ̀amu, iè hɔ̀ lɛ ɛ́ mí dũmuasɛ̃̀ kɛ́ Dɔfĩn lɛ ɛ́ vìeniɛ ɔ̀pe Kirisa ɛ́ lɔ́ hɔ́ húmú hũn ɛ́ dàa hɔ pànkɛ́.

¹³ Hṹn àá híɛhɔ́ ɛ̀ mì hṹn dɛ̃̀ kɛ̀a ie nìnbirìe lɛ ɛ́ húrunkɛ hɔ̀ bɔ̀koohɛ̃ lɛ ɛ́ mí hṹn wé bòo hũn, àá hɔ́ lɛ ɛ́ mí yí fũ̀a bòo hũn. Kɛ́ kɛ̀a sáalɛ, ɛ́ Dɔfĩn ɛ́ den lɛ́ ɛ́ mí páaniɛ khũ̀a yìe wi àá ɔ́ Kirisa. Hɔ̀ ɛ́ dɔ́ ké bɔ̀koohɛ̃ míkùi sɛ́wɛ́rí ɛ́ lɛ́ kie ǹ.

¹⁴ Ɛ́ lépe vɛ̃hṹ lɛ ɛ́ hṹn zɛ̃́ní kɛ́ ké ɛ́ wɔ́ khɔn iè hɔ̀ lɛ ɛ́ ké yí ɲí Dɔfĩn bòo ɛ́ hɔ́pe Dɔfĩn ɛ́ wo ɓɔ́ ɲún. Hɔ̀ bòo lɛ ɛ́ wɛ̃́ wi lepe vɛ̃hṹ sɔ hũn ɛ́ den hṹn zɛ̃́ní kɛ́ ké wɔ́ khɔn ɛ́ ɓɛ́ wo sãawi ɛ̀ ɓɛ̀ biení ké lɔ̀n. Kɛ́ Dɔfĩn ɛ́ den ɓaa lèpe vɛ̃hṹ sɔ lè ɓáalén dãanù lɔ̀n.

¹⁵ Ɛ́ ɓɛ́ pànkɛ́ ɓàasiè ɓɛ́kùi àá ɓɛ́ ɲúuhɛ̃ ɓàasiè ɓɛ́kùi ɛ́ Dɔfĩn ɛ́ wo yáakɛa pànkɛ́. Hɔ̀ ɛ́ mɔ̀ ɓɛ̀ ɛ́ lɔ́ tɛ́viɛniɛ yíe ɛ́ ɓɛ́ nìnbiriè ɓɛ́kùi ɛ́ mɔn. Ɛ́ Hɔ́ iè pe wo ɛ́ zɛ̃́ní kɛ̀amu kɛ́ mí Zuú ɛ́ yú hɔ́ pànkɛ́ peɓɛ̀ lɔ̀n lè ɓáalén dãanù lɔ̀n.

¹⁶ Ɛ́ kɛ̀amu, ɛ́ mí bí nɛ nìnbírɔ dɔ̀ ɛ̀ bie nɛ mí wɔ́ khɔn hɔ̀ bòo lɛ ɛ́ mí wóò dí tàá hɔ̀lɛ ɛ́ mí wóò ɲu bòo hũn, tàá sɛ́rí dɔ̀ bòo hũn, tàá ńpĩ́ihṹ minlɔ́ bòo hũn, tàá lè ńvũunín sí bòo hũn wɛ̀.

¹⁷ Ɛ́ hɔ́pe sí míkùi ɛ́ den iè hɔ̀ bòo lɛ vaá-ɓen pehɔ̀ ńwĩ́ihṹ, kɛ́ hɔ́pe bòo sɔ hɛ̀lɛ̀lɛ̀ ɛ́ den iè ɔ̀ Kirisa.

¹⁸ Ɛ́ mí bí nɛ ɓɛ nìnbirìe dɔ̀ lɛ ɛ́ wɛ ɓɛ́ sɛ̃́hṹ lɛ wóò ɲínkɛ ɓɛ́ te siɛnírɔ́ hũn, ɛ̀ ɓɛ̀ lò wɛ ɓɛ mɛlɛkɛɓɛ ɛ́ wóò ɓàanínin ɛ̀ bie nɛ mipe wɔ́ khɔn wɛ̀. Ɓàasiè sɔ ɛ́ den wóò dìń ɓàaní ɓɛ́te ǹ nɛ Dɔfĩn ɛ́ zɛ̃́niɛ bòo dɔ̀ ɛ́ lɛ́ ɓá ǹ. Ɛ́ ɓɛ́pe nìnbirìe sí ɓà ńmàa ɛ́ den iè nìɛ lɛ tú àá yèncànlè ɓɛ́ nìnbí-yáamu nùnlé hũn.

¹⁹ Ɓɛ̀ yáà cɛ dìń ɔ́ Kirisa lɛ temu iè pe ɲún wɛ̀. Hɔ́rɔsí kɛ́ á lò den iè ɔ̀pe Kirisa ɛ́ te hɔ tɛkɛ̀a míkùi ɛ́ zɛ̃́nkɛa nin dĩ̀niɛ ɛ́ hɔ́ dàa canɓán dɛ̃̀ sãa àá mí hũà sɛ̃̀mɛ́kɛlénɓɛ̀, ɛ̀ hɔ̀ ɛ́ tí yòó kɛ̀a bòo lɛ ɛ́ Dɔfĩn wɛ.

Mí húrun ɛ̀ mì vìé lɔ́ àá ɔ́ Kirisa

²⁰ Mí páaniɛ húrun àá ɔ́ Kirisa, ɛ́ mí wo fuerɛ lɔ́ lépe dímíɲɛ́ bòo pànkɛ́ núnú hũn. Ɛ́ hɔ́ iè ńɓúò ɛ́ mí dàa ɛ́ wé kɛ̀a bòo ɛ́ mí pɛ́wi ɛ́ wi lepe dímíɲɛ́ sɔ lɛ bòo pànkɛ́ núnú hũn, ɛ́ mí dàa tɛ̀ ɛ́ ɓɛ́ ɲɛ̀ hɔ̀pe làndɛ́a sí ɓà ńmàa mì lɔ̀n?

²¹ Hɔ̀pe làndɛ́a lɛ wóo nɛ: «Bí mìí hɔ́pe sí» tàá «Bí díndí hɔ́pe lɛ» tàá «Bí hɛ hɔpe lɛ ǹ wɛ̀»?

²² Ɛ́ hɔ́pe làndɛ́a sɔ sí míkùi ɛ́ den iè bòo lɛ ɛ́ wóò yaa ɛ́ hɔ́ bòo ɛ̀ bie. Hɔ̀ den iè ɓɛ̀ nìnbirìe ɛ́ te ɓɛ́ làndɛ́a àá ɓɛ́ kɛ̀ránlɔ́.

²³ Hɔ̀pe wo bɔn kɛ́ hɔ́pe làndɛ́a sɔ ɛ́ dɛ̃̀ kɛ̀a bòo lɛ ɛ́ bɔ̀dũmunù ɛ́ wi nin, iè hɔ̀ lɛ ɛ́ hɔ́ wóo bie hɔ́rɔ àá mí Dɔfĩn wṹn bènlɔ́ bòo àá hɔ́ te siɛnírɔ́ bòo àá lé sɛ̃́hṹ ɲínkɛrɔ́ bòo. Kɛ́ hɔ́ den tũ̀nú dɔ̀ mí iè hɔ̀ lɛ ɛ́ hɔ́ yí dɛ̀ à nìnbírɔ ɛ́ yá si á yá wé hɔ́ bòo lɛ ɛ́ piè nìnbí-yáamu ɛ́ wɛ wɛ̀.