Tito 3 - Mʉkpanganɨa nɔ Agɔmɛ ɔ Ɨtakɨtakɨ

Uɓei wɔ ɨtakɨtakɨ ngʉwɔ ɓaklisito

¹ Tungwiso ɓombi ngʉɓa ɓa꞉baya Yeso ɓɔ, ɓɨnapɨana ɛsɨ ɔ ʉpanʉ wɔ ɓangama, nɔ ɓanɛbaya, nɔ, sɔkɔmʉ aɓio nɔ mʉtʉ wɔta ɓʉmʉ. Ɓɔkwananɔ aɓio masi maɓomu ta ɓɔndanɛ akɨa yaka yɛta manjanja.

² Ɓatɨsigiomʉ mombi yaka yɛta ɓɨɓɨ, nɔ, ɓiɓio nɔ majɨɔ nɔ ɓʉkʉnda nɔ ɓangɛ. Ɓɨpananiso mʉtɨma wɔta uɗo nɔ ɓombi ta ɓaɓomu.

³ Dɔ, gʉtʉ isu, ta꞉ɓio jɛnɛ pɛɨ kʉ amati ɔ ɓujangijangi, sɔkɔmʉ akumo Asɔɓɨɨ. Ta꞉sɨa ɨngbaa sɨanɨ nɔ, tɔ꞉ɓio ɓabaya ɓɔ migbo di di di yɔ ɓʉtɨpɨ ɓɔ dɔdɔ nɔ mʉsasa wɔ ndʉtʉ. Ta꞉ɓio amati ɔ ɓʉɓɨɓɨ, nɔ tɔ꞉ɓio kʉ nɔ imi yɛta ɓɨɓɨ. Ɓombi ɓa꞉ɓiomʉ ɓata nesu akʉnda, nɔ isu tɔɓio kʉ ayaana ati eso.

⁴ Yakamɛngana, ngbinga ngɨa Asɔɓɨɨ Muheiso ngɨyeso a꞉pananiso-ɔɔ iɗo iɗo ngɨangɔ, nɔ ɓʉkʉnda ngʉɓangɔ akʉʉ ɔ ɓombi,

⁵ a꞉tɨheiso akɔ ɓʉɓɨɓɨ, sɔkɔmʉ dɔ ta꞉ɓio ngbingbii, yakamɛngana, ta akʉʉ ɔ ikoko ngɨangɔ. A꞉tɨheiso nɔ nesu aninjo uɓei wɔ ɨtakɨtakɨ, ɨngbaa akɔ mipo kɔ uɓatiso ɨhɔ nɔ Mʉtɨma wɔta Tu.

⁶ Asɔɓɨɨ a꞉tinjo Mʉtɨma wɔta Tu ngʉwɔnanɨ ʉja nɔgbɛ, ɨngbaa akɔ Yeso Klisito, Muheiso ngʉweso.

⁷ A꞉kɨa ɓanɨ, akpatanakɨa nɔ ɨjɨɔ ngɨangɔ, nesu anataniso ɓombi ɓɔta ngbingbii amesu kangɔ. Nɔ, ɔtɨsɨa anɨnɨanɨa nɔ uɓei wɔ mago nɔ mago, ʉwa, ta꞉napɨana-ɔɔ mʉtɨma.

⁸ Yaka ngɨyɛ nɔnasigio aka, ya ta ingono. Nakʉnda ɓɔ ɓʉpanɨa yaka ngɨyɛnɛnɨ nɔ angu, ambɔ ɓombi ngʉɓa ɓa꞉báya Asɔɓɨɨ, ɓinjono akɨa ɓuɗo nɔ kɛkɛɛ. Mapanʉ ngʉka ka maɗo, nɔ, ka nɔ ɨjangɨa akɔ ɓombi ɓaɓomu.

⁹ Yakamɛngana, watɨkumonokiomʉ ɗuɗuono akʉʉ ɔ yaka yɛta ɓʉtʉʉ, nɔ akʉʉ ɔ nɔtonokio yɔ lɨfananja, gʉtʉ pɔ yakana mangoi, nɔ, ɗuɗuono akʉʉ ɔ mapanʉ kɔ Musa. Dɔ, yaka ngɨyɛnɛnɨ yangɔmʉ nɔ dada, nɔ ya kʉ ɓʉtʉʉ.

¹⁰ Mombi mʉngana ɔpʉngeni akumoniso nagbonyonoko ati ɔ ɓaklisito, mʉgbɛma machaa kapɨnɨ, ɓɔ ɨsɨa ta sɨa. Ɔyaeni anʉka, wɔmʉchwɛiso amatɨ ambaja ta chwɛiso.

¹¹ Dɔ, wanɨmbɨa iɗo ɓɔ, ɨkananja yɔ mombi ndʉ ɨyananɨ, a꞉sɨa jɛnɛ ɨngbaa yɛta iɗo sɨanɨ. Tɛa ngɨangɔ ya ta akɨa ɓʉɓɨɓɨ, nɔ anapɨana mʉkɔmbʉ ɨyɔ makwɔngɔ.

Mapanʉ ngʉka kɔ mupipio nɔ ɓokuo

¹² Ngbinga ngɨa na꞊natʉmɨa suo mombi mʉngana ati ɔ atɨ Alatɛma, nɔ Tikiko, kɨa angu anɨka nɛmɨ agbʉka anɔ Nɨkɔpɔlɨ. Dɔ, na꞉kwaisio pɛ ɓɔ, nabi achaniso angbinga ngɨa ɔ sɛsʉ yɛta ɨja inani.

¹³ Kyananakɨa kyɛnda ngɨyɛ atɨ Jɛnasɨ ngɨa a juji ata mʉja, ɨɓɔ nɔ Apolo iɗo, ambɔ ɓatɨjangamʉ ɨkyɛmʉ pɔ mɛngana.

¹⁴ Ɓombi ngaɓeso amati ɔ baya, ɓɨkanio ɓaka kʉɔ anɨsɨnganaka akyananaka iɗo, iɗo ambɔ ɓiɓio ɓaka kʉ adaa ngɨa ɓakutoko-ɔɔ lɨpɨ lɔ ɓangɨɔ ngɨlɛ lɛta lɨkpɔkpɔ. Iɗo ambɔ, uɓei ngʉweɓo wiɓio tɨa kʉ nɔ ɨjangɨa nɔgbɛ.

¹⁵ Ɓombi ɓaɓomu ngʉɓa ta ɨhɔ naɓɔ, ɓɔnaɓukuo kʉ ɓokuoni. Ɓɔkuo kʉ nɔ ɓawai ɓeso amati ɔ báya. Ɨjɨɔ ngɨyɔ Asɔɓɨɨ yiɓio ɨhɔ nenu ɓaɓomu-ɛ.