Tito 2 - Mʉkpanganɨa nɔ Agɔmɛ ɔ Ɨtakɨtakɨ

Ʉpanʉ wɔ ingono akɔ ɓaklisito

¹ Yakamɛngana, pɛpɛ ʉwɛ, Tito, panɨa ɓombi ta yaka ngɨyɛ ya ngbanga nɔ mapanʉ kɔ ingono.

² Wa꞊ɓɨa ɓague ngʉɓa ɓa ɓatataɓasie ɓɔngɔ, ɓɔ ɓiɓio ɓombi ɓɔta ɓatayanɨɛ, ɓombi ɓɔ ninjiseniso ʉbɨba, ɓombi ɓɔ nɨmbɨɓɨanaka. Nɔ, ɓiɓio nɔ báya yɛta ɓʉmʉ, nɔ kʉnda ɓangɛ nɔ ingono, nɔ ɓio nɔ mʉtɨma wɔta ʉta.

³ Ngbanga kʉɓanɨ, wa꞊ɓɨa ɓoi ngʉɓa ɓa ɓatataɓasie ɓɔngɔ ɓɔ, ɓiɓio nɔ mʉkyananakɨa ngʉwa wɔsisekio apɛɨ ɔ Asɔɓɨɨ. Ɓʉɓɨa ɓɔ ɓɔkwananɔmʉ ayakanakɨa ɓangɛ, nɔ ʉkyɛpʉ watɨɓʉfamʉ ɓubaya. Nɔ ɓata, ɓiɓio ɓombi ɓɔta ɓinje ɓangɛ mapanʉ kɔta maɗo.

⁴ Iɗo ambɔ, ɓɨpanɨa ɓasaɓakyɛ ɓɔ ɓoi, akʉnda ɓaswaɨ ɓeɓo nɔ ɓana ɓeɓo.

⁵ Nɔ naɓɔ, apanɨa aɓio ɓoi ɓɔ nɨmbɨmbɨanaka, nɔ ɓoi ɓɔ mʉkyananakɨa wɔta uɗo. Kʉdɔ, ɓakwanana pɛmakɨa lɨkáá ngɨleɓo liɗo, nɔ ɓio kʉ iɗo, nɔ aɓio asɨ ʉpanʉ wɔ ɓaswaɨ ɓeɓo. Yɔkwananɔ aɓio ɓanɨ, dɔ, mombi atɨsɛakamʉ Ɨsaʉ yɔ Asɔɓɨɨ.

⁶ Ngbanga kʉɓanɨ, pananakɨa ɓandambʉ nɔ ɓasaɓakyɛ ambɔ ɓiɓio ɓombi ɓɔ nɨmbɨmbɨanaka,

⁷ akɔ lɨngbaa lɔ yaka liɓomu. Nɔ, yanɨtanɨa ɓɔ ʉwɛ ingainga, ɓio isisenio yɛta iɗo akɔ mʉkyananakɨa ngʉwɔsɔɔ uɓomu. Mapanʉ ngʉkɔsɔɔ kiɓio nɔ ingono, nɔ sɔkɔmʉ nɔ majɛjɛ pɔ bele.

⁸ Panɨa ta mapanʉ kɔta ngbingbii, sɔkɔmʉ adaa ngɨa mombi akʉyapakiso-ɔɔ. Iɗo ambɔ ɓamʉyaa ngʉɓeso ɓɨkwa soni, nɔ, ɓatɨɓiomʉ ɓata nɔ yaka yɛta ɓɨɓɨ pɔ mɛngana anapɨa akʉʉ eso.

⁹ Injo ɓabaya iguegue ɓɔ ɓɨnapɨana ɛsɨ ɔ ʉpanʉ wɔ ɓamakwɔɓeɓo amati ɔ lɨngbaa lɔ ɓayaka liɓomu, nɔ kɨa kʉ yaka ngɨyɛ yaɓɨkataa. Ɓatɨɓiomʉ naɓɔ anuɗuiso monu,

¹⁰ ga pɔ naɓɔ aniɓokio lɨkyɛmʉ. Yakamɛngana, ɓɨpananiso masi maɓomu ɓɔ, ɓa ngbingbii apɛɨ ɔ ɓamakwɔɓeɓo, ambɔ Ɨsaʉ yɛta Iɗo ngɨyɔ Asɔɓɨɨ Muheiso ngʉweso, yɨsɨka ʉbɨba angbinga ta muɓomu.

Ɨjɨɔ yɔ Asɔɓɨɨ

¹¹ Dɔ, Asɔɓɨɨ a꞉pananiso ɨjɨɔ ngɨangɔ, ɨyɛ, ya ndʉ itindindi yɔ ɓʉhɛa akɔ ɓombi ɓaɓomu.

¹² Ɨjɨɔ ngɨyɛnɛnɨ, yanesu apanɨa asɨa mʉkyananakɨa wɔta ɓɨɓɨ, nɔ mʉsasa wɔ dɔdɔ ngɨa. Angbinga ngɨa tasɨ-ɔɔ ta akɔ dɔdɔ ngia, tɔkwanana aɓio nɔ nɨmbɨmbɨanaka, nɔ aɓio ngbingbii, nɔ kɨa yaka ngɨyɛ yɛkataa Asɔɓɨɨ,

¹³ ngbinga ngɨa ta-ɔɔ aɓɛtɨa, ɓisi ɓɔta ɓuɗo ngʉɓa tanapɨana jɛnɛ-ɔɔ mʉtɨma. Ʉbɨba ngʉwɔ Asɔɓɨɨ ngɨyeso ata mʉja, nɔ Muheiso, Yeso Klisito, wa꞊chwɛanɨa sina nɔ ɓisi ngʉɓɔnanɨ.

¹⁴ Ɨyɔ, e꞉njono uɓei ngʉwangɔ aniwo akʉʉ ɔ eso, dɔ, ɨtɨɓwanakiso amati ɔ ɓʉɓɨɓɨ ɓuɓomu, nɔ, ɔtɨnacho anɨka ɨfananja ngɨangɔ yɛta ɨgyaɓanakɨɛ, ɨyɛ, yaɓio nɔ kɛkɛɛ akyananaka manjanja.

¹⁵ Yaka ngɨyɛ wɔkwananɔ apanɨa ɓombi, nɔ angu ɨyɛnɛnɨ: injo iguegue, nɔ, wɔɓʉgɔgaka nɔ angu nɔgbɛ. Mombi pɔ mʉngana atɨnɨnamʉ ɓʉtʉʉ.