Tito 1 - Mʉkpanganɨa nɔ Agɔmɛ ɔ Ɨtakɨtakɨ

Pɔlɔ ɔɓokuo Tito

¹ Ɨmɨ Pɔlɔ, baya ɔ Asɔɓɨɨ nɔ titima ɔ Yeso Klisito, ɨmɨ akɛ, nɔnatɛndakɨɔ ʉbalʉa ngʉwa. Asɔɓɨɨ a꞉natʉma ɓɔ ɓombi ngʉɓa a꞉ɓʉchwa, ɓɨbaya Yeso nɔ nɔɓʉpanɨa tɨa mapanʉ kɔ ingono, ʉka, kakpatanakɨa nɔ báya.

² Kʉdɔ, ɓɛ꞊nɨanɨa nɔ yaka ngɨyɛ ɓa꞉napɨanɨa-ɔɔ mʉtɨma akɔ uɓei wɔ mago nɔ mago ɨhɔ nɔ Asɔɓɨɨ. Ɨyɔ, Asɔɓɨɨ ngɨa angɔmʉ nɔ pɛtanaka, a꞉tɨpanaka jɛnɛ ta pɛɨ ɨyɔ akɨa dɔdɔ, ɓɔ, a꞊tinjo sina uɓei ngʉwɔ mago nɔ mago.

³ Nɔ, akɔ angbinga ngɨa a꞉tambanaka jɛnɛ kʉ pɛɨ, ɨyɔ, Asɔɓɨɨ ɛ꞉mbiiso ɓombi yaka ngɨangɔ, ɨngbaa aɓɨakɨa Ɨsaʉ yɛta Iɗo. Ɨsaʉ ngɨyɛnɛnɨ, ɨyɔ, Asɔɓɨɨ, muheiso ngʉweso, a꞉nenjo tɨa ɨmɨ ʉpanʉ ɓɔ nɨɓɨakɨa ɓangɛ.

⁴ Ʉwɛ Tito, nɔnatɛndakɨɔ ʉbalʉa ngʉwa, ʉwɛ, ndʉ mwana asɛmɨ ɓɔ kpɛ, amati ɔ báya ngɨyɛ ya꞉tɨjonokiso aɓio ɨkyɛmʉ mɛngana. Ɨjɨɔ, ɨhɔ nɔ majɨɔ ngʉka Asɔɓɨɨ Aba, nɔ ʉka kɔ Yeso Klisito, Muheiso ngʉweso, kiɓio ɨhɔ nɔwɛ-ɛ.

Ɓanɨchwa ɓatataɓasie ɓɔ kanisa anɔ Kɛlɛtɛ

⁵ Na꞉nasɨa pɔngɔ inani anɔ uji wɔ Kɛlɛtɛ, dɔ, pipiso migbo yɔ ɓatɛa ngʉɓa ɓɔ꞉tukoo tɨta ɓaɓomu. Nɔ, wɔchwa ɓatataɓasie ɓɔ kanisa amati ɔ ɓagʉlʉ nangana nangana, akpatanakɨa nɔ yaka ngɨyɛ ɨmɨ ingainga na꞉nasigio pɔngɔ.

⁶ Mombi ngɨa wa꞊mʉchwa aɓio mutatamusie wɔ Kanisa, iɓio mombi ngɨa ɓangɔmʉchwɛyokomʉ nɔ lɨngbaa lɔ ɓayaka. Ɔkwananɔ aɓio nɔ moi ta mʉngana. Ɓana ngʉɓangɔ ɓɔkwananɔ aɓio ɓaklisito, nɔ sɔkɔmʉ ʉɓa ɓaɓʉchweyoko ino amati ɔ yaka yɛta ɓɨɓɨ ɓɨɓɨ, ga pɔ mʉtʉ wɔta ɓʉmʉ.

⁷ Mutatamusie wɔ Kanisa, ɔkwananɔ aɓio mombi ngɨa ɓangɔmʉchwɛyokomʉ nɔ lɨngbaa lɔ ɓayaka, dɔ a mombi ngɨa anɨmaya tɛa yɔ Asɔɓɨɨ. Atiɓiomʉ mombi ɔ aɗia, pɔ mombi ɔ mʉtɨma wɔta gbi, pɔ mombi ɔ ɨdamʉ, atiɓiomʉ mombi ata ɓʉkaɓʉkaɨ, pɔ mombi ɔ hata ɓagyɛgyɛ nɔ lɨngbaa lɛta ɓɨɓɨ.

⁸ Yakamɛngana, ɔkwananɔ aɓio mombi ɔ tɛtɨa ɓombi, mombi ngɨa akʉnda yaka aɓio iɗo. Iɓio nɔ nɨmbɨmbɨanaka, nɔ mombi ata ngbingbii, nɔ mombi ata tu, nɔ mombi ata mʉtayanɨɛ.

⁹ Ɔkwananɔ ɓotono nɔ mapanʉ kɔ Asɔɓɨɨ ɓʉmʉ, ngbanga kʉndʉ aka ɓa꞉mʉpanɨa-ɔɔ. Kʉɓanɨ, akwanana aninjo ɓombi iguegue, nɔ ʉpanʉ ngʉwɔnanɨ wɔta ngbingbii. Nɔ, aɓio tɨa kʉ adaa ngɨa apana-ɔɔ ɓiga ngʉɓa ɓayaa báya ʉpanʉ ngʉwɔnanɨ ɓɔ, ɨɓɔ ɓa꞉sɨa ɨngbaa sɨanɨ.

Pɛmanɨeni nɔ mapanʉ kɔ mʉjɛɛ

¹⁰ Dɔ yanɔ ɓombi ɓaja, nɔgbɛ Ɓayuda ngʉɓa ɓa꞉natana aɓio ɓaklisito, ʉɓa, ɓa꞉ɗɛa mapanʉ ɗɛanɨ. Ɓombi ngʉɓɔnanɨ ɓaɓomu, ɓapanɨa yaka kʉ gbaɨ, ɨyɛ yangɔsalɨamʉ ɓaklisito, nɔ ɓapɛtaka ɓombi nɔ yaka yɔ mʉjɛɛ.

¹¹ Ha gue, gbaiso ɓombi ngʉɓɔnanɨ ta gbaiso. Dɔ, ɓayanakiso báya yɔ ɓombi, aɓɔya akɔ mafini kʉ maɓomu. Ɓapanɨa ɓombi yaka ngɨyɛ yɔkwananɔmʉ, dɔ, ɓɨnɨanɨa nɔ ɓagyɛgyɛ, nɔ lɨngbaa lɛta ɓɨɓɨ.

¹² Ɨgbɛ mɛngana, Mʉkɛlɛtɛ wɔngɔ, a꞉sugo ɓɔ: «Ɓombi ɓɔ Kɛlɛtɛ ɓa masi maɓomu ta ɓombi ɓɔ ɓɔngɔ. Ɓa ndʉ ɓanama ɓɔta ɓʉkaɓʉkaɨ, nɔ ɓa kʉ ɓadɔɓa, nɔ ɓangbuka.»

¹³ Yaka ngɨyɛnɛnɨ a꞉sugo ya ta ingono. Kʉɓanɨ, ɓʉgɔgaka nɔ angu, ambɔ ɓɨnɨanɨa nɔ báya yɔ ingono.

¹⁴ Nɔ, ɓatɨkpatamʉ maduɓa kɔ mʉjɛɛ kɔ Ɓayuda. Nɔ ɓatɨkyananakɨamʉ mapanʉ kɔ ɓombi ngʉɓa ɓayaa yaka yɔ ingono.

¹⁵ Akɔ ɓombi ngʉɓa ɓa ɓagyaɓanakɨɛ, yaka ngɨyebo iɓomu ya kʉ ɨgyaɓanakɨɛ. Yakamɛngana, akɔ ɓombi ngʉɓa ɓangɔmʉ ɓagyaɓanakɨɛ nɔ sɔkɔmʉ nɔ báya, yaka iɓomu ya ta ɓɨɓɨ. Dɔ, itungwio nɔ mɨtɨma ngɨyeɓo ya ɓɨɓɨ.

¹⁶ Gʉtʉ ndʉ ɓabɨbana ɓɔ ɓanɨmbɨa Asɔɓɨɨ, yakamɛngana, mʉkyananakɨa wɔta ɓɨɓɨ ngʉweɓo, wakɔpananiso ɓɔ ɓangɔmɨmbɨa pɔ nɨmbɨa. Yaka ngɨyɛ ɨɓɔ ɓakɨa, yangɛkataamʉ pɔ nɨkataa, nɔ ɓa꞉ngɔkumomʉ ɨɓɔ mombi. Ɓangɔkwanana kɨa yaka yɛta iɗo pɔ mɛngana.