Ɓalɔma 9 - Mʉkpanganɨa nɔ Agɔmɛ ɔ Ɨtakɨtakɨ

Asɔɓɨɨ akɛ achwa ɓana ɓɔ Ɓaɨsalaɛlɛ

¹ Yaka ngɨyɛ nakɔsugo ya ingono, dɔ, Klisito amati asɛmɨ. Itungwio ngɨyɛ amati ɔ mʉtɨma ngʉwɔsɛmɨ, ɨngbaa aMʉtɨma wɔta Tu, yanɛmɨ anɨmbiiso ingono ɓɔ nangɔmʉ asugo mʉjɛɛ.

² Akɔsugo ɓanɨ, ɨmɨ, nanɨdya ikoko yɛta ɨja, amati ɔ mʉtɨma ngʉwɔsɛmɨ, ɨhɔ nɔ ɓʉkaɓʉkaɨ ngʉɓa ɓangɔmʉ nɔ mupipio.

³ Yaɓio gɔ pɛngɛ iɗo nɔgbɛ ɓɔ nɨgbanganɨa gbanganɨanɨ, nɔ, nɔnagbonyonoko nɔ Klisito, akʉʉ ɓanduku ɓɔsɛmɨ ngʉɓa ta꞉chwɛa naɓo ɓɔ kpɛ.

⁴ Ɨɓɔ, ɓa ɓana ɓɔ Ɓaɨsalaɛlɛ ngʉɓa Asɔɓɨɨ a꞉ɓʉsɨka aɓio ndʉ ɓana ɓangɔ. Asɔɓɨɨ a꞉ɓʉpananiso ʉbɨba ngʉwangɔ, nɔ, ɔ꞉kɨa agɔmɛ ɨhɔ naɓɔ, nɔ, ɔ꞉ɓinjo mapanʉ. Ɔ꞉ɓʉpanɨa ɓɔ ɓamʉbibiso tanɨ, nɔ naɓɔ, akɔpanaka lɨkyɛmʉ lɨja.

⁵ Ɨɓɔ, ɓa ɓanɔnɔ ɓɔ ɓɛsɛngʉʉ ɓeɓo ngʉɓa Asɔɓɨɨ a꞉ɓʉchwa jɛnɛ, nɔ, Klisito ɔ꞉tɔnɔtanɨa ndʉ mombi, ɓata kʉ amati ɔ ɨfananja ngɨyeɓo. Ɨyɔ, akɛ, a akʉʉ ɔ ɓayaka ɓaɓomu, nɔ, kʉ Asɔɓɨɨ ngɨa anɔ ʉbɨba amati ɔ mago nɔ mago-ɛ! Yaɓanɨ.

⁶ Nangɔmʉ akʉnda asugo ɓɔ yaka ngɨyɛ Asɔɓɨɨ a꞉panaka, ya꞉kyananakɨamʉ. Dɔ, sɔkɔmʉ ɓombi ɓaɓomu ngʉɓa ɓa꞉nɔtanɨa amati ɔ ɨfananja ngɨyɔ Ɓaɨsalaɛlɛ akɛ, ɓa Ɓaɨsalaɛlɛ ingainga.

⁷ Dɔ, sɔkɔmʉ ɓombi ɓaɓomu ngʉɓa ɓa꞉nɔtanɨa amati ɔ ɨfananja ngɨyɔ Abalama akɛ, ɓa ɓana ɓangɔ ingainga ɓɔ kpɛ, dɔ Asɔɓɨɨ a꞉sigio Abalaama ɓɔ: «Ɓanɔnɔ ngʉɓɔsɔɔ, ɓa꞊chwɛa sina ta akɔ ɓʉa ngʉɓɔ Isaka.»

⁸ Ɨyɛnɛnɨ, yasugo ɓɔ: sɔkɔmʉ ɓana ngʉɓa ɓakyɔnɔtanɨa ngbanga ndʉ ɨyɛ mombi anɔta-ɔɔ akɛ, ɓa ɓana ɓɔ Asɔɓɨɨ. Yakamɛngana, ɓana ɓɔ Asɔɓɨɨ ingainga, ya ta ɓana ngʉɓa ɓa꞉nɔtanɨa ɨngbaa akɔ yaka ngɨyɛ Asɔɓɨɨ a꞉panaka jɛnɛ.

⁹ Ngbinga ngɨa Asɔɓɨɨ a꞉panaka jɛnɛ-ɔɔ Abalaama, ɓɔ: «Amati ɔ igo ngɨyɛ ya꞊nɨka, nɛ꞊ka ɓata suo andɔɔ aka ta ɨkanɨ, akɔ angbinga kʉndʉ ɨya, nɔ, Sala a꞊ɓio suo tɨa nɔ mwana ata gue.»

¹⁰ Sɔkɔmʉ yaka iɓomu ɨyɛnɛnɨ, Lɛbɛka ngbanga kʉɓanɨ, a꞉nɔta ɓana ɓapɨnɨ ta nɔ gue mʉngana, kuku Isaka.

^11-12 Pɛɨ ngɨa ɓɔ ɓana ngʉɓɔnanɨ ɓangɔnɔtanɨeni kɔmʉ-ɔɔ, ga pɔ kɨa yaka sɨpakaa yɛta iɗo, pɔ ɨyɛ yɛta ɓɨɓɨ, Asɔɓɨɨ a꞉musigio Lɛbɛka akʉʉ eɓo ɓɔ: «Mutatamusie a꞊kyananakɨa sina gwa ngɨa mwana.» A꞉sugo ɓanɨ, dɔ, yaka ngɨangɔ a꞉kwaisio jɛnɛ akɔnɨchwa ɓombi yiɓio ta ɓanɨ. Nɔ, yangɔmʉ akpatanakɨa nɔ mʉkyananakɨa wɔ mombi, yakamɛngana, ta nɔ nisoko ngɨangɔ.

¹³ Ngbanga ndʉ ya꞉tɛndanakɨa amati ɔ mabii ɓɔ: «Na꞉kʉnda jɛnɛ Yakɔɓɔ, yakamɛngana, nɔ꞉yaa Ɛsaʉ»

¹⁴ Tasugo dɔ-sɨ tanɨ? Asɔɓɨɨ a ndɨ mombi ngɨa angɔkio yaka ngbingbii? Pɔ bele!

¹⁵ Kʉɓanɨ, Asɔɓɨɨ a꞉sigio Musa ɓɔ: «Mombi ngɨa na꞊kʉnda nayɔ anɨnɨa ikoko, nɔmɨnɨa, nɔ, mombi ngɨa na꞊kʉnda nayɔ apananiso iɗo iɗo, nɔmʉpananiso.»

¹⁶ Yasugo ɓɔ, iɗo iɗo ngɨa Asɔɓɨɨ, yangɔmʉ akpatanakɨa nɔ ɓʉkʉnda ɓɔ mombi, ga pɔ kɛkɛɛ ngɨangɔ, yakamɛngana, ya ta ingbaa akɔ ikoko ngɨangɔ.

¹⁷ Amati ɔ Mabii, Asɔɓɨɨ asigio ngama ɔ Misili ɓɔ: «Na꞉napɨa akɔɓio ndʉ ngama ɔ Misili ta nɔ tɛlɨ, ɓɔ dɔ ɨngbaa akɔ ɓʉngama ngʉɓɔsɔɔ, ɨmɨ, nɨpananiso angu ngɨasɛmɨ, nɔ, ɓɨɓɨakɨa ino ngɨyɛsɛmɨ akɔ dɔdɔ muɓomu.»

¹⁸ Kʉɓanɨ, mombi ngɨa Asɔɓɨɨ akʉnda nayɔ anɨnɨa ikoko, ɔmɨnɨa, nɔ mombi ngɨa akʉnda nayɔ aninjo mʉtʉ wɔta ɓumu, ɔminjo.

Ikoko nɔ ʉnganga wɔ Asɔɓɨɨ

¹⁹ Yɛmɔ, wanaɓokuo ɓɔ: «Yɔɓieni dɔ-sɨ ɓanɨ, Asɔɓɨɨ akyɔnapɨa ɓombi nɔ mʉkɔmbʉ tɨa dɔtanɨ? Dɔ, anɨ akɛ akwanana anacho ɓʉkʉnda ngʉɓangɔ?»

²⁰ Yakamɛngana, tɨa ʉwɛ mombi ɓʉtʉʉ, waɓio tɨa ndʉ anɨ akɔnɨchwa pasi nɔ Asɔɓɨɨ? Ɨkyɛmʉ ngɨyɛ ɓɔɨmeyo nɔ tʉmɔ, yɛneni yaɓokuo ndɨ mombi ngɨa ɔɨmeyo ɓokuoni ɓɔ: «Wɔnakɨɔ ɓanɨ dɔtanɨ?»

²¹ Mombi ɔ meyo lɨkɔchɔ, akɨa nɔ tʉmɔ ta ndʉ aka akʉnda-ɔɔ. Ɔkʉndeni ta nɔ mʉɓɔngɔ wɔ tʉmɔ mʉngana, akwanana meyo ɨkyɛmʉ yɔ ɨgabʉ ga pɔ ɨkyɛmʉ yɛta ɓʉtʉʉ.

²² Kʉɓanɨ, Asɔɓɨɨ a꞉kʉnda jɛnɛ apananiso ʉnganga, nɔ, nimbiiso angu ngɨangɔ. Yakamɛngana, a꞉ɓio kʉ nɔ mʉtɨma wɔta ʉta ʉja nɔgbɛ, akʉʉ ɔ ɓombi ngʉɓa, ɓa꞉sisekio jɛnɛ anɨdya mʉkɔmbʉ, nɔ, anɨtanɨa ɓɔ ɓɨdʉka nɔ ʉnganga ngʉwangɔ.

²³ Ngbanga kʉɓanɨ, ɛ꞉mbiiso ɓʉja ɓɔ ʉbɨba ngʉwangɔ, akʉʉ ɔ ɓombi ngʉɓa a꞉ɓɨnɨa jɛnɛ ikoko, nɔ, ɔ꞉ɓʉtambanaka kʉ pɛɨ, aɓio ɨhɔ nayɔ amati ɔ ʉbɨba.

²⁴ Ɨyɛnɛnɨ, ya akʉʉ eso ngʉɓa a꞉tɨsoko sɔkɔmʉ ta ati ɔ Ɓayuda, yakamɛngana, ɨhɔ kʉ nɔ ɓombi ngʉɓa ɓangɔmʉ Ɓayuda.

²⁵ Ya ngbanga ndʉ ya꞉tɛndanakɨa amati ɔ ɨtaɓʉ ngɨyɔ ɨgbɛ Hɔsɛa ɓɔ: «Ɓiga ngʉɓa ɓa꞉ɓiomʉ ɓombi ɓɔsɛmɨ, na꞊ɓisoko sina tɨa ɓɔ ɓombi ɓɔsɛmɨ. Nɔ ɨbaba yɔ ɓombi ngɨyɛ na꞉ɓiomʉ naɓɔ akʉnda, na꞊ɓisoko tɨa ɓɔ ɓʉkʉnda ɓɔsɛmɨ»

²⁶ Nɔ akɔ ɨda ngɨyɛ ɓa꞉ɓiɓisoko-ɔɔ ɓɔ: «Nángɔmʉ ɓombi ɓɔsɛmɨ. Ɓa꞊nisoko sina tɨa ɓɔ ɓana ɓɔ Asɔɓɨɨ ngɨa anɔ uɓei amati angɔ.»

²⁷ Ɨgbɛ Isaya a꞉tʉɓɨa nɔ iso yɛta ɓomu akʉʉ ɔ Ɓaɨsalaɛlɛ ɓɔ: «Gʉtʉ ndʉ Ɓaɨsalaɛlɛ ɓa ɓombi ɓaja ndʉ sasaɨ a lisini, ɓiga ngʉɓa ɓɛ꞊nɨanɨa sina nɔ ɓʉhɛa ɓa ta bele.

²⁸ Dɔ Makwɔɓɨɨ a꞊ngɔgbalɨamʉ sina akɨa yaka ngɨangɔ asugo jɛnɛ akʉʉ ɔ dɔdɔ.»

²⁹ Ngbanga kʉndʉ Isaya a꞉pʉnga jɛnɛ pɛɨ asugo ɓɔ: «Makwɔɓɨɨ ngɨa anɔ angu muɓomu, ɔsɨenimʉ jɛnɛ ɓombi nganangana ɓɔ ɨfananja ngɨyeso, ambɔ yaka ya꞉tɨkɨa kʉndʉ ɨyɛ Sɔdɔmʉ, ambɔ ya꞉natana nesu kʉndʉ ɨyɛ Gɔmɔla.»

Ɓʉhɛa ɨngbaa akɔ báya

³⁰ Tasugo dɔ sɨ tanɨ? Asɔɓɨɨ a꞉ɓʉsɨka ɓombi ngʉɓa ɓangɔmʉ Ɓayuda, ndʉ ɓa ngbingbii ta ɨngbaa akɔ báya. Ɨnadɔ, ɨɓɔ ɓa꞉ɓiomʉ pɔ akʉnda anatana ɓombi ɓɔta ngbingbii.

³¹ Nɔ ɓata Ɓaɨsalaɛlɛ, nɔ ʉgbaa nga weɓo, ɓa꞉ɓio ahata anɨka ngbingbii amesu kɔ Asɔɓɨɨ, ɨngbaa akyananakɨa mapanʉ, yakamɛngana, sɔkɔmʉ yɛnɨanɨa nɔ ɓangbɔɔ.

³² Yɛnɨanɨamʉ nɔ ɓangbɔɔ dɔtanɨ? Dɔ ɨɓɔ, ɓa꞉hatamʉ anɨka ngbingbii amesu kɔ Asɔɓɨɨ ɨngbaa akɔ báya, yakamɛngana, ɓa꞉hata ta ɨngbaa akɔ mʉkyananakɨa. Ɨɓɔ, ɓa꞉gbʉsana akʉʉ ɔ ikopi ngɨyɛ yɛta ɨgbʉsanise.

³³ Ngbanga ndʉ ɓa꞉tɛndakɨa amati ɔ Mabii ɓɔ: «Nakɔnapɨa ikopi yɛta ɨgbʉsanise akɔ gʉlʉ ɔ Siona, ikopi ngɨyɛ yakwisiso kwisisoni. Yakamɛngana, mombi ngɨa a꞉mʉbaya, mombi ɔngɔ angɔwomʉ sina soni pɔ bele.»