Ɓalɔma 8 - Mʉkpanganɨa nɔ Agɔmɛ ɔ Ɨtakɨtakɨ

Uɓei ɨhɔ nɔ mʉtɨma wɔta Tu

¹ Kʉɓanɨ, ɨtakɨtakɨ ngɨyɛ, Asɔɓɨɨ angɔmʉ ɓata anapɨa ɓombi ngʉɓa ɓa ɨkyɛmʉ mɛngana amati ɔ Yeso Klisito nɔ mʉkɔmbʉ pɔ bele.

² Dɔ, mapanʉ kɔ Mʉtɨma wɔta Tu, ngʉka kenjo uɓei amati ɔ Yeso Klisito, ka꞉nachʉchwakiso ʉwɛ, amati ɔ mapanʉ kɔ ɓʉɓɨɓɨ, nɔ ʉka kɔ ingwo.

³ Asɔɓɨɨ a꞉kyananakɨa yaka ngɨyɛ ya꞉kyaka mapanʉ kɔ Musa ta kyaka, dɔ, ndʉtʉ ya꞉janga angu ɔ kyananakɨa mapanʉ ngʉkɔnanɨ, akpatanakɨa nɔ ɓʉyadɔɓa ngʉɓangɔ. Asɔɓɨɨ a꞉kio mʉkɔmbʉ wɔ ɓʉɓɨɓɨ kioni, ʉwa, wakɔkɨa tɛa amati ɔ ɓombi, ɨngbaa akɔtʉma mwana ngɨangɔ ingainga, anɔtanɨa nɔ ndʉtʉ ngbanga ndʉ ɨyɛ yɔ ɓombi ɓɔta ɓʉɓɨɓɨ, akʉʉ ɔ nunguso ɓʉɓɨɓɨ.

⁴ A꞉kɨa ɓanɨ, iɗo ambɔ angu ngɨa ɔ mapanʉ ɨkyananakɨa akʉʉ eso, ndʉ aka yɔsisekio-ɔɔ amati ɔ uɓei ngʉweso, isu ngʉɓa tangɔmʉ ɓata akɔkyɛndaka akpatanakɨa nɔ ndʉtʉ ngɨyeso ndʉ ɓombi, yakamɛngana, tɨa Mʉtɨma wɔta Tu akɛ, wanesu akyɛndakiso.

⁵ Mʉtɨma wɔ ɓombi ngʉɓa ɓakyɛndakiso uɓei ngʉweɓo, akɔkpatanakia nɔ mʉsasa wɔ ndʉtʉ, ɨtungwio ngɨyeɓo yakpataka kʉ mʉsasa ngʉwɔnanɨ. Yakamɛngana, mʉtɨma wɔ ɓombi ngʉɓa ɓakɔkpataka iso yɔ Mʉtɨma wɔta Tu, ɓahata ɨɓɔ kʉ yaka ngɨyɛ Mʉtɨma wɔta Tu wanaɓɔ akɔtitio.

⁶ Ɨnadɔ, mombi ɔkpatakeni mʉsasa ngʉwangɔ wɔ ndʉtʉ, yamutito ta akɔ ingwo, yakamɛngana, Mʉtɨma wɔta Tu wenjo ɨwɔ uɓei nɔ majɨɔ.

⁷ Ɓombi ngʉɓa ɓakpataka mʉsasa wɔ ndʉtʉ, ɓa ɓakwa ɓɔ Asɔɓɨɨ. Ɓangɔkyananakɨamʉ mapanʉ ngʉkangɔ, dɔ, ɓangɔkwanamʉ nakɔ akyananakɨa pɔ kʉɓanɨ.

⁸ Ɓombi ngʉɓa ɓakɔkpataka mʉsasa wɔ ndʉtʉ ngɨyeɓo, ɓangɔkwananamʉ anɨkataa Asɔɓɨɨ pɔ bele.

⁹ Yakamɛngana, inu, nangɔmʉ ɓata ɛsɨ ɔ mʉsasa wɔ ndʉtʉ, tɨa Mʉtɨma wɔta Tu akɛ wakyɛndakiso uɓei ngʉweno, yɔɓieni ɓɔ Mʉtɨma wɔ Asɔɓɨɨ wa ingainga amati eno. Mombi muɓomu ngɨa angɔmʉ nɔ Mʉtɨma wɔ Klisito amati angɔ, ɨyɔ, angɔmʉ mombi ɔ Klisito.

¹⁰ Yakamɛngana, ndʉ Klisito aɓio amati eno, gʉtʉ ndʉtʉ ngɨyeno yɔweni akʉʉ ɔ ɓʉɓɨɓɨ kʉ ititi, Mʉtɨma wɔta Tu ngʉwa amati eno, waninjo uɓei ta injoni, dɔ, Asɔɓɨɨ anɨsɨka tɨa ndʉ ɓombi ɓɔta ngbingbii.

¹¹ Nɔ ndɨ Mʉtɨma wɔ Asɔɓɨɨ ngʉwa wa꞉jʉkaniso Yeso akɔ ingwo, waɓio amati eno, kʉɓanɨ, ɨyɔ ngɨa a꞉jʉkaniso Klisito, a꞊ninjo uɓei amati ɔ ndʉtʉ ngɨyeno yɔ ingwo, ɨngbaa akɔ Mʉtɨma wɔta Tu ngʉwangɔ, ʉwa amati eno.

¹² Kʉɓanɨ inu ɓanduku, tanɔ yaka ngɨyɛ tɔkwananɔ kɨa, yakamɛngana, yangɔɓiomʉ akpatanakɨa nɔ yaka ngɨyɛ mʉsasa wɔ ndʉtʉ ngɨyeso wanesu atitio akɔkɨa.

¹³ Dɔ, nɔɓieni akɔkpataka mʉsasa wɔ ndʉtʉ, na꞊dʉka dʉkanɨ. Yakamɛngana, nɔweni mʉsasa wɔ ndʉtʉ ɨngbaa akɔ Mʉtɨma wɔta Tu, naɓio ɓata sɨ kʉ akɔ uɓei.

¹⁴ Dɔ, mombi muɓomu ngɨa akyɛndakiso uɓei ngʉwangɔ nɔ Mʉtɨma wɔ Asɔɓɨɨ, ɨyɔ a mwana ɔ Asɔɓɨɨ.

¹⁵ Inu, nɛ́꞉nɨanɨamʉ nɔ mʉtɨma wɔ ɓubaya, ga pɔ ʉwa wanikumoniso ɓata kʉ amati ɔ ʉɓá. Yakamɛngana, nɛ꞉nɨanɨa nɔ Mʉtɨma wɔ Asɔɓɨɨ, ngbinga ngɨa ɨyɔ, a꞉nɨsɨka-ɔɔ akɔɓio tɨa ndʉ ɓana ɓangɔ ingainga ɓɔ kpɛ. Kʉdɔ, takwanana nayɔ tɨa anɨsoko ɓɔ «Aba!»

¹⁶ Mʉtɨma ngʉwɔnanɨ ingainga, ɨhɔ nɔ mʉtɨma ngʉweso, ɨɓɔ ɓanesu achwɛa ɓʉdɛmʉ ɓɔ, ta ɓana ɓɔ Asɔɓɨɨ.

¹⁷ Nɔ yɔɓieni ɓɔ ta ɓana ɓangɔ, isu, ta꞊dya sina mʉgyɛndɔ wɔ maɓɨɨ, ngʉwa a꞉panaka jɛnɛ ɓombi ɓangɔ, tɨa kʉ ɨhɔ nɔ atɨ Klisito. Kʉɓanɨ, tanɨdya ikoko ɨhɔ nayɔ, iɗo ambɔ, tɛ꞊nɨanɨa sungo tɨa kʉ nɔ ʉbɨba ɨhɔ nayɔ.

Ʉbɨba ngʉwa Asɔɓɨɨ a꞉tɨpanaka

¹⁸ Yanɛmɨ anɨnɨa ndʉ ikoko ngɨyɛ tanɨdya ɨtakɨtakɨ ngɨyɛ, yangɔkwananamʉ aɓio ngbanga nɔ ʉbɨba ngʉwa Asɔɓɨɨ, a꞊tɨpananiso sina aɓʉmba.

¹⁹ Ɓayaka ɓaɓomu ngʉɓɔ Asɔɓɨɨ a꞉ɓʉkɨa adɔdɔ, ɓakɔɓɛtɨa nɔ mʉsasa nɔgbɛ, angbinga ngɨa Asɔɓɨɨ a꞊pananiso sina-ɔɔ ʉbɨba ngʉwɔ ɓana ɓangɔ aɓʉmba.

²⁰ Ɓayaka ngʉɓɔnanɨ, ɓa꞉napɨanɨa ɛsɨ ɔ ɓʉngama ɓɔta gbaɨ, sɔkɔmʉ akpatanakɨa nɔ ɓʉkʉnda ɓeɓo, yakamɛngana, akʉʉ ɔ mombi ngɨa a꞉ɓʉkɨaniso ɓanɨ. Ɨnadɔ yaka ngɨyɛ, ɓanapɨana-ɔɔ mʉtɨma ya ɓɔ:

²¹ ɓisi mʉngana, ɓayaka ngʉɓɔnanɨ ɓɔ dɔdɔ, ɓa꞊chʉchwaka sina abubaya ngʉɓa ɓanaɓɔ ayanakiso ta chʉchwakani. Kʉdɔ, ɓa꞊jonokio sina ɨhɔ nɔ ɓana ɓɔ Asɔɓɨɨ akɔɓio ɓaɓoonokie, nɔ amati ɔ ʉbɨba ngʉweɓo.

²² Ɨnadɔ, tanɨmbɨa ɓɔ akɔɓɔya ɓʉɓʉnʉ, ɓayaka ɓɔ dɔdɔ ɓaɓomu, ɓanɨdyana menu nɔ huɓo ndʉ ɨyɛ moi ɔ ɓʉa akɨa-ɔɔ apɛɨ ɔ ʉnɔtʉ,

²³ yakamɛngana, sɔkɔmʉ dɔ ta ɨɓɔ nangana. Nɔ gʉtʉ ta isu, ngʉɓa ta꞉baya, ta kʉ ahuɓo, akɔɓɛtɨa nɔ mʉsasa, ɓɔ Asɔɓɨɨ ɨtɨtɛtɨa ndʉ ɓana ɓangɔ, nɔ ndʉtʉ ngɨyeso yɔɓio tɨta iɓoonokie kʉ ingono. Ɨnadɔ, tanɔ Mʉtɨma wɔta Tu amati eso, ʉwa, wa ndʉ mupita wɔ ʉbɨba ngʉwa ɓa꞊tinjo sina, ɨyɛ ya, ɓʉhɛa ɓɔ ndʉtʉ ngɨyeso.

²⁴ Dɔ, tɛ꞉nɨanɨa nɔ ɓʉhɛa ta ɨngbaa akɔ yaka ngɨyɛ ta꞉napɨana-ɔɔ mʉtɨma ɓɔ, Asɔɓɨɨ a꞊tɨheiso sina heisoni. Mombi ɛnɨanɨeni nɔ ɨkyɛmʉ ngɨyɛ a꞉napɨana-ɔɔ mʉtɨma tɨa ɨnɨanɨanɨ, angɔkwanana ɓata nɨsɨnganaka anapɨana mʉtɨma akʉʉ ɔngɔ. Tɨa anɨ ɓata-sɨ ati eso, anapɨana mʉtɨma akʉʉ ɨkyɛmʉ, ɔɓieni nayɔ tɨa kʉ anɨna?

²⁵ Yakamɛngana, tɔɓieni anapɨana mʉtɨma akʉʉ ɔ ɨkyɛmʉ ngɨyɛ tangɔmʉ nayɔ anɨna, tiɓio gɔ nayɔ akɔɓɛtɨa tɨa nɔ mʉtɨma wɔta ʉta nɔgbɛ.

²⁶ Mʉtɨma wɔta Tu, wakyɔtɨkɨa isingo ngbanga kʉɓanɨ, dɔ isu ta ɓadɔɓa. Ɨna-sɨ, tangɛmbɨa pɔ nɨta Asɔɓɨɨ ndʉ aka, yɔsisekio-ɔɔ. Kʉdɔ, tɨta Mʉtɨma wɔta Tu ingainga akɛ, wakyɔtɨtɨa, ɨngbaa akɔ huɓo ngɨyɛ monu, kangɔkwananamʉ akɔsugo.

²⁷ Kʉɓanɨ, Asɔɓɨɨ ngɨa ɛna yaka iɓomu ngɨyɛ amati ɔ mʉtɨma, akwanana tɨa kʉ anɨmbɨa yaka ngɨyɛ Mʉtɨma wɔta Tu, wanayɔ asigio, dɔ ɨyɔ Mʉtɨma ngʉwɔnanɨ, wakyɛtɨa ɓombi ngʉɓa ɓa꞉mʉbaya, akpatanakɨa nɔ ɓʉkʉnda ɓa Asɔɓɨɨ.

²⁸ Tanɨmbɨa iɗo ɓɔ, yaka iɓomu yakɔkyananakɨa ta akɔ iɗo iɗo yɔ ɓombi ngʉɓa ɓanɔ ɓʉkʉnda akɔ Asɔɓɨɨ, ʉɓa, a꞉ɓisoko akpatanakɨa nɔ yaka ngɨyɛ a꞉kwaisio jɛnɛ.

²⁹ Ɓombi ngʉɓɔnanɨ, Asɔɓɨɨ a꞉ɓɨmbɨa jɛnɛ pɛɨ, kʉdɔ a꞉ɓʉchwa jɛnɛ kʉ pɛɨ aɓio ndʉ isisenio yɔ mwana angɔ. Iɗo ambɔ ɨyɔ Mwana angɔ, iɓio tɨa ndʉ tapio atɨ ɔ ɓanduku ɓaja.

³⁰ Ɓiga ngʉɓa Asɔɓɨɨ a꞉ɓʉchwa jɛnɛ pɛɨ, a꞉ɓisoko kʉ isokoni, nɔ ʉɓa a꞉ɓisoko, ɔɓʉkɨa aɓio tɨa kʉndʉ ɓombi ɓɔta ngbingbii amesu kangɔ, nɔ ʉɓa a꞉ɓʉkɨa aɓio ndʉ ɓa ngbingbii, ɔ꞉tɔɓʉbibiso tɨa kʉ bibisoni.

Ɓʉkʉnda ngʉɓa Asɔɓɨɨ ɓa ɓʉja

³¹ Anɨna yaka ngɨyɛnɛnɨ iɓomu, tasugo tanɨ? Asɔɓɨɨ ɔɓieni nɔ ʉgbaa ngʉweso, tɨa anɨ dɔ atɨkɨa ɓata isu nɔ ɨkyɛmʉ?

³² Ɨyɔ ngɨa, a꞉kʉngʉamʉ gʉtʉ pɔ mukpekpe wɔ mwana angɔ, yakamɛngana, amʉgaba akɔ isu ɓaɓomu. Yakwa dɔ tɨa tanɨ ɓɔ atɨtinjomʉ lɨkyɛmʉ liɓomu ɨhɔ nɔ mwana angɔ?

³³ Anɨ ɨya a꞊napɨa sina ɓombi ngʉɓa Asɔɓɨɨ a꞉ɓʉchwa nɔ mʉkɔmbʉ? Pɔ mombi pɔ mʉngana! Asɔɓɨɨ, ɨyɔ ingainga akɛ, a꞉ɓʉkɨa akɔɓio ndʉ ɓombi ɓɔta ngbingbii amesu kangɔ.

³⁴ Anɨ dɔ ɨya a꞊kwanana sina akio mʉkɔmbʉ ngʉweɓo? Pɔ mombi pɔ mʉngana! Dɔ Yeso Klisito akɛ a꞉wo, nɔ ɓata kʉ ɨyɔ akɛ, a꞉jʉkana akɔ ingwo, nɔ, a tɨa ɓawele aɨkɔndɔ yɔ guongɔ ngɨa Asɔɓɨɨ, nesu akɔnɨtɨa inani apɛɨ angɔ

³⁵ Anɨ ɨyakɛ atɨnagbonyoko isu nɔ ɓʉkʉnda ɓɔ Klisito? Ga pɔ ikoko, ga pɔ ɓʉkaɓʉkaɨ, ga pɔ kyananaka yɛta ɓumu ɓumu, ga pɔ taa, ga pɔ munduu, ga pɔ ɗite, ga pɔ ingwo?

³⁶ Ya ngbanga ndʉ ɓa꞉tɛndakɨa amati ɔ Mabii ɓɔ: «Ɓakyɔhata nesu amaa masi maɓomu ta akʉʉ asɔɔ. Ɓɔɓio nesu akyananaka ndʉ ɓakɔndɔlɔ ngʉɓa ɓanɨsa naɓɔ akio lɨmɨyɔ.»

^37-39 Amati ɔ yaka ngɨyɛnɛnɨ iɓomu, isu takyɔnagaaka nagaakanɨ, ta akɔ angu ɔ mombi ngɨa a꞉tɨkʉnda. Dɔ ɨmɨ, nanɨmbɨa iɗo ɓɔ yaka yangɔmʉ pɔ mɛngana ɨyɛ, yɛneni yatɨnagbonyonokiso nɔ ɓʉkʉnda ɓa Asɔɓɨɨ: yiɓio gʉtʉ ta ingwo, ga pɔ uɓei, gʉtʉ ɓamalaika, ga pɔ ɓangama ɓɔ naɓutu, ga pɔ yaka ngɨyɛ ɓʉɓʉnʉ, ga pɔ ɨyɛ ya sungo anɨka, ga pɔ ʉɓa ɓanɔ angu ɔ umomo, yiɓio gʉtʉ ta angu ngɨa akʉʉ ɔ ɓisi, ga pɔ ɨya iyani asɨ ɔ dɔdɔ, gʉtʉ pɔ ɨkyɛmʉ pɔ mɛngana ɨyɛ ɓa꞉ɨkɨa. Yaka yangɔmʉ gʉtʉ pɔ mɛngana ɨyɛ yɛneni yatɨnagbonyonokiso nɔ ɓʉkʉnda ngʉɓa Asɔɓɨɨ, a꞉tɨpananiso amati ɔ Makweso Yeso Klisito.