Ɓalɔma 5 - Mʉkpanganɨa nɔ Agɔmɛ ɔ Ɨtakɨtakɨ

Klisito anesu anujonokiso nɔ atɨ Asɔɓɨɨ

¹ Ɨtakɨtakɨ ngɨyɛ, dɔ Asɔɓɨɨ a꞉tɨsɨka tɨa sɨkanɨ ndʉ ɓombi ɓɔta ngbingbii apɛɨ angɔ, ingbaa akɔ báya, isu nɔ atɨ Asɔɓɨɨ, ta tɨa nɔ majɨɔ amati ɔ Makweso Yeso Klisito.

² Ya ɨngbaa akɔ báya, ɨyɛ Yeso, atɨganɨa-ɔɔ ɨngbaa yɔ majɨɔ kɔ Asɔɓɨɨ, ʉka isu, ta-ɔɔ ɓɛmaɛ akʉʉ ɔngɔ. Kʉɓanɨ, isu, tanɔ ɨmbʉka, nɔ, tanɨkwa ɨgyagya, nɔ napɨana mʉtɨma, dɔ, tanɨnɨanɨa nɔ ʉbɨba wɔ Asɔɓɨɨ.

³ Akʉʉ ɔ yaka ngɨyɛnɛnɨ, ta kʉ nɔ ɨgyagya akɔ ikoko ngɨyɛ tanɨdya, dɔ, ɨyɔ akɛ, yanesu aninjo aɓio nɔ mʉtɨma wɔta ʉta.

⁴ Mʉtɨma wɔta ʉta ngʉwɔnanɨ wenjo mombi báya yɔ ingono, nɔ, báya yɔ ingono yɔngɔ, yenjo tɨa mombi akɔɓio nɔ yaka ngɨyɛ anapɨa-ɔɔ mʉtɨma akʉʉ ɔngɔ.

⁵ Yaka ngɨyɛnɛnɨ, mombi anapiana-ɔɔ mʉtɨma, yangenjiso soni, dɔ, Asɔɓɨɨ a꞉to ɓʉkʉnda ngʉɓangɔ amati ɔ mɨtɨma ngɨyeso, ɨngbaa akɔ Mʉtɨma wɔta Tu ngʉwa a꞉tinjo.

⁶ Dɔ, angbinga ngɨa ta꞉ɓio-ɔɔ sɔkɔmʉ nɔ angu pɔ bele, Yeso a꞉wekio ɓombi ɓɔta ɓɨɓɨ, akɔ angbinga ngɨa Asɔɓɨɨ a꞉tambanaka.

⁷ Ya ndɨ ɓʉkaɨ akɔbaya awekio mangɛ, gʉtʉ mangɛ ɔngɔ ɔɓieni ta mombi ata ngbingbii? Adiga mombi eneni abaya bayanɨ, aniwekio mombi ata iɗo.

⁸ Yakamɛngana, Asɔɓɨɨ a꞉tɨpana ɓʉja ɓɔ ɓʉkʉnda ngʉɓangɔ pananɨ, dɔ Yeso, a꞉tɨwekio angbinga ngɨa isu, ta꞉ɓio-sɨ-ɔɔ ta amati ɔ ɓʉɓɨɓɨ.

⁹ Ɨtakɨtakɨ ngɨyɛ, tanɨnɨanɨa ndʉ ɓombi ɓɔta ngbingbii apɛɨ Asɔɓɨɨ, ɨngbaa akɔ ingwo yɔ Yeso. Ɨyɛnɛnɨ, yakɔpana aɓʉmba ɓɔ, a꞊tɨɓwanakiso sina ɓwanakisoni, ambɔ ʉnganga wɔ Asɔɓɨɨ watɨkwamʉ akʉʉ eso.

¹⁰ Ya ɓanɨ, ngbinga ngɨa ta꞉ɓio jɛnɛ-ɔɔ ɓakwa ɓɔ Asɔɓɨɨ, ɨyɔ, a꞉tɨjonokiso nayɔ ɨngbaa akɔ ingwo yɔ mwana angɔ. Ndʉ taɓio ɓɔ tɔjonokieni naɓo ɓanɨ, yakɔsugo ingono ɓɔ Asɔɓɨɨ a꞊tɨheiso ta heisoni ɨngbaa akɔ uɓei ngʉwɔ mwana angɔ.

¹¹ Yakamɛngana, akʉʉ ɔ ɨyɛnɛnɨ iɓomu, tɔkwananɔ anɨkwa ɨgyagya nɔ Asɔɓɨɨ ɨngbaa akɔ Makweso Yeso Klisito ngɨa, a꞉tɨjonokiso ɨtakɨtakɨ ngɨyɛ ɨhɔ nɔ atɨ Asɔɓɨɨ tɨa jonokisoni.

Adamʉ nɔ Klisito

¹² Ngbanga kʉɓanɨ, ɓʉɓɨɓɨ ɓa꞉kumonio amati ɔ dɔdɔ ɨngbaa akɔ mombi mʉngana, kʉdɔ, ɓʉɓɨɓɨ ɓɔngɔ, ɓe꞉njo tɨa ingwo. Ingwo yɛ꞉ka akʉʉ ɔ ɓombi ɓaɓomu ta nɔ ɨngbaa mɛngana ngɨyɛnɛnɨ, dɔ ɨɓɔ ɓaɓomu, ɓa꞉kɨa ɓʉɓɨɓɨ.

¹³ Ɓʉɓɨɓɨ ɓa꞉ɓio akɔ dɔdɔ ta pɛɨ ngɨa Asɔɓɨɨ e꞉njo-ɔɔ mapanʉ alɨkɔndɔ lɔ Musa. Yakamɛngana, mapanʉ kɔɓienimʉ, ɓangɔkwanana asugo yaka akʉʉ ɔ ɓʉɓɨɓɨ.

¹⁴ Ɨnadɔ, anɨngwa akɔ angbinga ngɨa ɔ Adamʉ, aɓɔya akɔ Musa, ingwo ya꞉ɓio tɨta apananiso angu ngɨangɔ, gʉtʉ ta akʉʉ ɔ ɓombi ngʉɓa ɓa꞉kɨamʉ ɓʉɓɨɓɨ, ngbanga nɔ ʉɓa Adamʉ a꞉kɨa, akɔɓundo ʉpanʉ wɔ Asɔɓɨɨ. Adamʉ a꞉ɓio isisenio yɔ mombi ngɨa ɔsisekio jɛnɛ anɨka.

¹⁵ Yakamɛngana, apɛpɛ ɔ ɨjɨɔ ngɨa Asɔɓɨɨ angɔmʉ ngbanga nɔ ɓʉɓɨɓɨ ngʉɓɔ Adamʉ. Ya ingono ɓɔ, ɓombi ɓaja, ɓa꞉wo akʉʉ ɔ ɓʉɓɨɓɨ ɓɔ mombi mʉngana, ngɨa ta ananɨ. Yakamɛngana, ɨjɨɔ ngɨa Asɔɓɨɨ a꞉tinjo yanɔ dada ata mʉja nɔgbɛ. Asɔɓɨɨ a꞉tinjo apɛpɛ ngɨananɨ akɔ ɨjɨɔ, ɨngbaa akɔ mombi mʉngana, Yeso Klisito. Asɔɓɨɨ a꞉pananiso ɨkɔndɔ kpala ngɨangɔ, nɔ iɗo iɗo akɔ ɓombi ɓaja, ɨngbaa akɔ Yeso Klisito.

¹⁶ Nɔ ɓata, apɛpɛ ngɨa Asɔɓɨɨ akʉ di, nɔ yaka ngɨyɛ ya꞉chwɛanɨa akʉʉ ɔ ɓʉɓɨɓɨ ɓɔ mombi mʉngana ngɨananɨ. Yaɓanɨ dɔ, mʉkɔmbʉ ngʉwa ɓa꞉kio akɔ yaka yɔ ɓʉɓɨɓɨ ɓɔ mombi mʉngana, we꞉njo tɨa mʉkɔmbʉ akʉʉ ɔ ɓombi ɓaɓomu. Yakamɛngana, apɛpɛ ɔ ɨjɨɔ ngɨyɛ Asɔɓɨɨ, e꞉njo tɨa ɓɔ ɓombi ɓɨnɨanɨa apɛɨ angɔ ndʉ ɓombi ɓɔta ngbingbii, gʉtʉ ndʉ ɓa꞉ɓio nɔ ɓʉɓɨɓɨ kʉ ɓʉja.

¹⁷ Ya ingono ɓɔ ingwo ya꞉pananiso angu ngɨangɔ akʉʉ ɔ mombi mʉngana, nɔ kʉ akʉʉ ɔ ɓʉɓɨɓɨ ɓɔ mombi mʉngana. Yakamɛngana, kʉ ɨngbaa akɔ mombi mʉngana, Yeso Klisito, ɨyɛ Asɔɓɨɨ e꞉njo-ɔɔ ɓombi yaka yɛta ɨja: ɓombi ɓaɓomu ngʉɓa ɓanɨnɨanɨa nɔ ɨjɨɔ yɛta ɨja ngɨa Asɔɓɨɨ, nɔ, apɛpɛ ɔ tɛa ngɨangɔ anacho ɓombi aɓio ngbingbii, ɓa꞊dya sina uɓei nɔ, ɓʉngama ɨngbaa akɔ Klisito.

¹⁸ Kʉɓanɨ, ɓakɔkio mʉkɔmbʉ wɔ ɓombi ɓaɓomu, akʉʉ ɔ ɓʉɓɨɓɨ ɓɔ mombi mʉngana. Ngbanga kʉɓanɨ, ɓombi ɓaɓomu ɓaɓaɓoonokie, nɔ, ɓanɔ uɓei akʉʉ ɔ mʉkyananakɨa, wɔta ngbingbii ngʉwɔ mombi mʉngana.

¹⁹ Nɔ ɓata kʉndʉ mombi mʉngana a꞉ɗɛa ʉpanʉ wɔ Asɔɓɨɨ, kʉdɔ, ɓombi ɓaja ɓɛ꞉ka ɓombi ɓɔta ɓɨɓɨ. Ya ngbanga kʉɓanɨ, mombi mʉngana a꞉kyananakɨa ʉpanʉ wɔ Asɔɓɨɨ, kʉdɔ, ɓombi ɓaja ɓɛ꞊nɨanɨa sina ndʉ ɓombi ɓɔta ngbingbii apɛɨ Asɔɓɨɨ.

²⁰ Ɨyɛ ndʉ mapanʉ kɛ꞉ka, kʉdɔ, ɓʉɓɨɓɨ ɓɛ꞉ka tɨa kʉ ɓʉja nɔgbɛ. Yakamɛngana, akɔ ɨda ngɨyɛ ɓʉɓɨɓɨ ɓa꞉nɔta-ɔɔ ɓʉja, ɨjɨɔ yɔ Asɔɓɨɨ yɛ꞉ka tɨa kʉ ɨja nɔgbɛ.

²¹ Kʉɓanɨ, ɨyɛ ndʉ ɓʉɓɨɓɨ ɓa꞉pananiso angu ngɨangɔ ɨngbaa akɔ ingwo, ngbanga kʉɓanɨ, ɨjɨɔ yɔ Asɔɓɨɨ ya꞉pananiso angu muɓomu akɔnacho ɓombi anɨka ngbingbii apɛɨ Asɔɓɨɨ, iɗo ambɔ ɓɨnɨanɨa nɔ uɓei wɔ mago nɔ mago, amatɨ ɔ Makweso Yeso Klisito.