Ɓalɔma 4 - Mʉkpanganɨa nɔ Agɔmɛ ɔ Ɨtakɨtakɨ

Isisenio ngɨyɔ Abalama

¹ Isu, tasugo tanɨ akʉʉ ɔ kuku Abalaama? Ɨyɔ, ɛ꞉nɨanɨa ndɨ nɔ báya ɨngbaa akɔ ndʉtʉ?

² Yɔɓieni jɛnɛ ɓɔ Asɔɓɨɨ a꞉sɨka Abalaama ndʉ mombi ata ngbingbii apɛɨ angɔ ɨngbaa akɔ kyananakɨa mapanʉ, ambɔ ɨyɔ akɛ, a꞉sisekio jɛnɛ aniwo aɗia. Yakamɛngana, yangɔmʉ ɓanɨ atɨ Asɔɓɨɨ.

³ Dɔ, amati ɔ Mabii ya꞉tɛndanakɨa ɓɔ: Abalaama a꞉baya Asɔɓɨɨ, kʉdɔ, ɨyɔ Asɔɓɨɨ, a꞉mʉsɨka ndʉ mombi ata ngbingbii, akpatanakɨa ta nɔ báya ngɨangɔ.

⁴ Mombi ɔkɨeni tɛa, ɔsisekio ta nɔ mʉkaya. Mʉkaya wɔngɔ, wangɔmʉ ndʉ ɓɔminjo akɔ ɨjɨɔ, dɔ, yɔsisekio pɛngɛ ta ɓɔ ɓiminjo ɓanɨ.

⁵ Yakamɛngana, mombi ɔnapɨeni báya ta akɔ Asɔɓɨɨ ngɨa anacho mombi ata ɓɨɓɨ anɨka mombi ata ngbingbii, Asɔɓɨɨ a꞊mʉsɨka ndʉ mombi ata ngbingbii ta sɨkanɨ, gʉtʉ ta ɓɔ ɔkɨenimʉ tɛa pɔ mɛngana.

⁶ Ya ngbanga ta ndʉ Dawidi akɔpana ɨgyagya yɔ mombi ngɨa Asɔɓɨɨ anayɔ akɔsɨka ndʉ mombi ata ngbingbii, sɔkɔmʉ ɨngbaa akɔ mʉkyananakɨa:

⁷ «Ɨgyagya nɔ ɓombi ngʉɓa Makwɔɓɨɨ a꞉ɓɨpaakɨa mɨkyananakɨa yɛta gbaɨ, nɔ, ɔkutoko ɓʉɓɨɓɨ ngʉɓeɓo ta kutoko!

⁸ Ɨgyagya nɔ mombi ngɨa Makwɔɓɨɨ angɔmʉ ɓata apopoko mboi yɔ ɓʉɓɨɓɨ ngʉɓangɔ!»

⁹ Ɨgyagya ngɨyɛnɛnɨ, ya ndɨ ta akɔ ɓombi ngʉɓa ɓa꞉kiiso ɨgʉnɨ, ga pɔ ɓɔ ya kʉ akɔ ɓombi ngʉɓa ɓa꞉kiisomʉ ɨgʉnɨ? Tɔ꞉ɓio ɓɔ tɔsugeni ɓɔ, Asɔɓɨɨ a꞉sɨka jɛnɛ Abalaama ndʉ mombi ata ngbingbii, akpatanakɨa ta nɔ báya ngɨangɔ.

¹⁰ Asɔɓɨɨ a꞉mʉsɨka ndʉ mombi ata ngbingbii ngbinga nga eno tanɨ? Ga pɔ pɛɨ ga pɔ mbise ɔ kiiso ɨgʉnɨ? Ya꞉ɓiomʉ ambise, yakamɛngana, ya꞉ɓio pɛɨ ɨyɔ, akiiso ɨgʉnɨ.

¹¹ Mbise ngɨananɨ, ɔ꞉tɔkiiso tɨa ɨgʉnɨ. Nɔ kiiso ɨgʉnɨ ngɨyɛnɛnɨ, ya꞉ɓio ndʉ kɔkɔ ngɨa, akɔpananiso ɓɔ Asɔɓɨɨ a꞉mʉsɨka ndʉ mombi ata ngbingbii, ta akʉʉ ɔ báya ngɨangɔ, pɛɨ iyɔ akiiso ɨgʉnɨ. Kʉɓanɨ, ɨyɔ Abalama ɔ꞉natana aɓio tɨa ɨsɛ ɔ ɓombi ɓaɓomu ngʉɓa ɓa꞉baya, gʉtʉ ɓɔkiisenimʉ ɨgʉnɨ, ambɔ Asɔɓɨɨ ɨɓʉsɨka tɨa kʉndʉ ɓombi ɓɔta ngbingbii.

¹² Ngbanga kʉɓanɨ, a tɨa kʉ ɨsɛ ɔ ɓombi ngʉɓa ɓa꞉kiiso ɨgʉnɨ, sɔkɔmʉ ta ɓɔ dɔ ɓa꞉kiiso ɨgʉnɨ, yakamɛngana, dɔ, ɓakɔkpataka kʉ ɨngbaa mɛngana ngɨyɔ báya, ɨyɛ, kuku Abalaama a꞉kpataka jɛnɛ, ngbinga ngɨa a꞉ɓio-ɔɔ ta ɓɔ angɔkiisenimʉ ɨgʉnɨ.

Yaka ngɨyɛ Asɔɓɨɨ apanaka ɓombi ɓɔ báya

¹³ Asɔɓɨɨ a꞉panaka jɛnɛ Abalaama, ɨhɔ nɔ ɓanɔnɔ ɓangɔ, ga a꞊ɓinjo dɔdɔ ndʉ mʉgyɛndɔ wɔ maɓɨɨ weɓo. Ya꞉ɓiomʉ ɓɔ dɔ a꞉kyananakɨa mapanʉ, yakamɛngana, ya꞉ɓio ta dɔ Asɔɓɨɨ a꞉mʉsɨka ndʉ mombi ata ngbingbii, ɨngbaa akɔ báya.

¹⁴ Yɔɓieni pɛngɛ ɓɔ ta ɓombi ngʉɓa, ɓakyananakɨa mapanʉ akɛ, ɓɛ꞊nɨanɨa nɔ mʉgyɛndɔ wɔ maɓɨɨ ngʉwɔnanɨ, ɨyɛnɛnɨ yakɔsugo ɓɔ báya ngɨyeso yangɔmʉ nɔ dada, nɔ ɨkyɛmʉ ngɨyɛ Asɔɓɨɨ a꞉panaka yaɓio ɓʉtʉʉ.

¹⁵ Mapanʉ kakɔjʉkaniso ta ʉnganga wɔ Asɔɓɨɨ. Yakamɛngana, mapanʉ kɔɓienimʉ, yaka ngɨyɛ ɓundo mapanʉ, yangɔɓiomʉ pɛngɛ kʉɓanɨ.

¹⁶ Kʉɓanɨ, yaka ngɨyɛ Asɔɓɨɨ a꞉panaka ndʉ apɛpɛ, yakɔkpatanakɨa nɔ báya, ɓɔ dɔ ɓombi ɓɨnɨanɨa nayɔ ɨngbaa akɔ ɨjɨɔ ngɨangɔ. Yaka ngɨyɛnɛnɨ a꞉ɨpanaka, ya ingono, nɔ, ya akɔ ɓana ɓɔ Abalaama ta ɓaɓomu. Yiɓio Ɓayuda ngʉɓa ɓa꞉kyananakɨa mapanʉ, ga pɔ ɓombi ɓaɓomu ngʉɓa ɓa꞉baya Asɔɓɨɨ ngbanga ndʉ Abalama. Nɔ ɨyɔ Abalama, ɔ꞉natana aɓio tɨa kuku ngɨyeso ɓaɓomu.

¹⁷ Ya ta ɓanɨ ndʉ aka ɓa꞉tɛndakɨa-ɔɔ amati ɔ Mabii ɓɔ: «Dɔ ɨmɨ, na꞉napɨa aɓio ɨsɛ wɔ mababa kɔ ɓombi ɓaja». Abalama a abaa ngɨyeso apɛɨ ɔ Asɔɓɨɨ ngɨa a꞉mʉbaya. Ɨyɔ Asɔɓɨɨ akɛ, anɔ ʉpanʉ aheiso ɓombi ngʉɓa ɓa꞉sio, nɔ akɨa ɓayaka ngʉɓa ɓa꞉ɓiomʉ jɛnɛ pɛɨ akɔ uɓei, ɓɔ ɓiɓio tɨa ɓioni ɓʉɓʉnʉ.

¹⁸ Abalama a꞉baya, nɔ, ɔ꞉napɨana mʉtɨma akʉʉ ɔ yaka ngɨyɛ mombi angɔnapɨamʉ jɛnɛ-ɔɔ mʉtɨma, kʉdɔ, ɓɔ꞉mʉnapɨa aɓio tɨa ɨsɛ ɔ «mababa kɔ ɓombi ɓaja nɔgbɛ», akɔkpatanakɨa nɔ yaka ngɨyɛ Asɔɓɨɨ a꞉musigio jɛnɛ ɓɔ: «Ɓanɔnɔ ɓɔsɔɔ ɓa꞊ɓio sina ɓaja nɔgbɛ.»

¹⁹ Ɓáya ngɨyɛ Abalama ya꞉ɓio ta ɓumu, gʉtʉ ndɨ a꞉ɓio tɨa nɔ mago mɨa mʉngana. A꞉ɓio kʉ anɨmbɨa ɓɔ uɓei ngʉwangɔ ndʉ mombi, akɔɓɛtɨa tɨta ingwo, nɔ moi angɔ Sala kʉ ɨkatʉa.

²⁰ Ɨyɔ, a꞉ɓiomʉ nɔ ɓajatwoko akʉʉ ɔ yaka ngɨyɛ Asɔɓɨɨ a꞉mʉpanaka, nɔ, sɔkɔmʉ báya ngɨangɔ yɨ꞉dɔɓanaka kʉɓanɨ. Yakamɛngana, báya ngɨyɛnɛnɨ yangɔ, yɛ꞉ka ɓumu, nɔ, ɔ꞉pʉnga bibiso Asɔɓɨɨ.

²¹ A꞉kɨa ɓanɨ dɔ, a꞉ɓio anɨmbɨa nɔ ingono ɓɔ, Asɔɓɨɨ anɔ angu akɨa yaka ngɨyɛ a꞉sugo ɓɔ a꞊kɨa.

²² Yaka ngɨyɛ Asɔɓɨɨ a꞉mʉsɨka-ɔɔ ndʉ mombi ata ngbingbii, ɨyɔ, ingainga ɨyɛnɛnɨ.

²³ Yakamɛngana, yaka ngɨyɛ ɓɔ, «Asɔɓɨɨ a꞉mʉsɨka ndʉ mombi ata ngbingbii», ya꞉tɛndanakɨamʉ ta akʉʉ angɔ nangana.

²⁴ Yakamɛngana, ya꞉tɛndanakɨa kʉ akʉʉ eso ngʉɓa ɓa꞊tɨsɨka sina ndʉ ɓombi ɓɔta ngbingbii. Yaɓanɨ dɔ, isu, takɔbaya Asɔɓɨɨ ngɨa, a꞉jukaniso Yeso Makwɔɓɨɨ akɔ ingwo.

²⁵ Ɨyɔ Yeso, ɓa꞉mʉgaba aniwekio ɓʉɓɨɓɨ ngʉɓeso nɔ, ɓɔmʉjʉkaniso akɔ ingwo, dɔ, Asɔɓɨɨ ɨtɨsɨka ndʉ ɓombi ɓɔta ngbingbii apɛɨ angɔ.