Filimɔnɔ 1 - Mʉkpanganɨa nɔ Agɔmɛ ɔ Ɨtakɨtakɨ

Ɓokuo

¹ Ɨmɨ Pɔlɔ, na iyani akɔ boloko akʉʉ ɔ kyananakɨa Yeso Klisito. Ɨmɨ akɛ, nɔnatɛndakɨɔ ʉbalʉa ngʉwa, isu nɔ nduku eso Tɨmɔtɛɔ. Tɔnatɛndakɨɔ ʉwɛ Fɨlɛmɔnɔ, ʉbalʉa ngʉa, ʉwɛ, awai eso ɔ ɓʉkʉnda, ngɨa takɔkɨa tɛa ɨhɔ nenu.

² Tɔnɨtɛndakɨɔ inu ɨhɔ nɔ kanisa ngɨa ajonokio ananɨ andɔɔ, inu nɔ atɨ mʉsaɨ weso Apɨa, nɔ awai eso Alɨkɨpɔ ngɨa taɓɛndana ɗite lɔ báya ɨhɔ naɓɔ.

³ Asɔɓɨɨ Aba ngɨyeso, ɨhɔ nɔ Makwɔɓɨɨ Yeso Klisito ɓɨnutio ɨjɨɔ nɔ majɨɔ-ɛ.

Pɔlɔ ɔtosio Asɔɓɨɨ ʉbɨba akʉʉ ɔ Fɨlɛmɔnɔ

⁴ Nduku asɛmɨ Fɨlɛmɔnɔ, nakyɔnachwa ino masi ta maɓomu amati ɔ nɨta ngɨyɛsɛmɨ, nɔ, tosio Asɔɓɨɨ ngɨasɛmɨ ʉbɨba akʉʉ asɔɔ.

⁵ Dɔ, nakyɔka suo ɨsaʉ yɔ báya ngɨyɛsɔɔ akɔ Makwɔɓɨɨ Yeso, nɔ ɓʉkʉnda ngʉɓɔsɔɔ akɔ ɓombi ɓɔ Asɔɓɨɨ ɓaɓomu.

⁶ Ɨmɨ, nanɨta Asɔɓɨɨ ɓɔ báya ngɨyɛ yanesu ajonokiso isu nɔwɛ, yinjo masɔɔ kɔta maɗo. Kʉɓanɨ, ʉwɛ, wapananiso ɓombi aɓʉmba iɗo iɗo iɓomu ngɨyɛ tanayɔ ɨhɔ nɔ atɨ Klisito.

⁷ Nduku asɛmɨ, na꞉kwa pɛ ɨgyagya nɔgbɛ nɔ, yɔ꞉nasungo kʉ nɔ mʉtɨma, dɔ, ɓʉkʉnda ngʉɓɔsɔɔ ɓe꞉njo pɔngɔ ɓaklisito iguegue.

Pɔlɔ ɛtɔ Fɨlɛmɔnɔ ɓɔ ɨtɛtɨa Onisimo iɗo

⁸ Kʉdɔ, gʉtʉ ndʉ amati ɔ Klisito, nanɔ ʉpanʉ nɔwɛ akɔtitio ɓɔ kɨa yaka sɨpakaa,

⁹ yakamɛngana, nɛnɔ iɗo ɓɔ nɨnɛta ɨkyɛmʉ ta amati ɔ ɓʉkʉnda. Ya ɨmɨ, Pɔlɔ ngɨa na tɨa mʉdɔɓɛ, nɔ ɨtakɨtakɨ ngɨyɛ, na tɨa kʉ iyani akɔ boloko akɔ yaka yɔ Yeso Klisito.

¹⁰ Nanɔwɛ akikelekio akʉʉ mwanasɛmɨ Onisimo. Ɨyɔ, a mwanasɛmɨ amati ɔ báya, ɨya, nɛ꞉nɨanɨa pɛ nayɔ iyani aboloko.

¹¹ A꞉ɓio pɔngɔ pɛɨ, inani andɔɔ ta ɨkyɛmʉ yɛta ɓʉtʉʉ. Yakamɛngana, ɨtakɨtakɨ ngɨyɛ, a tɨa nɔ dada akɔ isu nɔwɛ ɓaɓomu.

¹² Ɨtakɨtakɨ ngɨyɛ, nakʉnda ɓata nayɔ atoiso ta inani andɔɔ, nɔ ɨyɔ, a tɨa ndʉ mʉtɨma ngʉwɔsɛmɨ makwɔngɔ ɓɔ kpɛ.

¹³ Iyani na-ɛɛ aboloko akʉʉ ɔ yaka yɔ Ɨsaʉ yɛta Iɗo, nakyɔtatanɨa suo ɓɔ tiɓio gɔ pɛngɛ nɔ Ɔnɛsɨmɔ ta iyani, dɔ, iɓio ɓaka nɛmɨ asalakɨa amʉdaka wɔsɔɔ.

¹⁴ Yakamɛngana, yangɔmʉ iɗo akɔ ɨmɨ, akɨa yaka ta kɨa nɔ mʉtʉ wɔsɛmɨ, sɔkɔmʉ nɨnaɓokuo-sɨ ʉwɛ pɛɨ. Dɔ, mombi ɔɓieni nɔwɛ apananiso mʉkyananakɨa wɔta uɗo ɓanɨ, wangɔminjomʉ tɨa ʉpanʉ. Yakamɛngana, wamʉsɨa ta ɨyɔ ingainga akɨa ndʉ aka akʉnda-ɔɔ.

¹⁵ Adiga, Ɔnɛsɨmɔ a꞉nasɨa pɔngɔ ta akɔ angbinga mʉngana, iɗo ambɔ ɓieni tɨta ɨhɔ nayɔ angbinga muɓomu.

¹⁶ Dɔ, ɨtakɨtakɨ ngɨyɛ, ɨyɔ, angɔmʉ ɓata ta baya ɓʉtʉʉ, ɔchanɔ tɨa kʉ nɔ baya, a tɨa nduku wɔ ɓʉkʉnda. Ɨmɨ, nanayɔ akʉnda nɔgbɛ, yakamɛngana, yɛtɔ ɓɔ ʉwɛ, mʉkʉnda tɨa nɔgbɛ achana. Wamʉkʉnda-sɨ ndʉ abʉasɔɔ mombi, nɔ ɓata tɨa kʉndʉ nduku amati ɔ Makwɔɓɨɨ.

¹⁷ Yɔɓieni ɓɔ ʉwɛ, Wánɔ ɓʉkʉnda nɛmɨ, mʉtɛtɨa Ɔnɛsɨmɔ ta ndʉ wiɓio nɛmɨ atɛtɨa ɨmɨ ɓɔ kpɛ.

¹⁸ Ɔ꞉nakɨeni jɛnɛ gɔ pɔ ɓʉɓɨɓɨ, ga pɔ ɓɔ anɔ uɓu wɔsɔɔ, napɨa yaka yɔngɔ tɨta amʉtʉ wɔsɛmɨ.

¹⁹ Ta ɨmɨ Pɔlɔ akɛ, nɔtɛndakɨɔ yaka ngɨyɛ nɔ lɨkɔndɔ lɨsɛmɨ ɓɔ kpɛ: «Ɨmɨ na꞊natosio lɨkyɛmʉ lɔngɔ tosioni.» (Watɨɓʉsaamʉ dɔ ɓɔ ʉwɛ, wa kʉ nɔ uɓu nga wɔsɛmɨ, ya, uɓei ngʉwɔsɔɔ.)

²⁰ Yaɓanɨ, ʉwɛ nduku asɛmɨ, nɔnakikelekio ɓɔ anasalɨa ɓaka salɨanɨ akɔ ino yɔ Makwɔɓɨɨ, nɔ, wɔnɔdiso ɓaka mʉtɨma kʉ disoni, akɔ ino yɔ Klisito.

²¹ Angbinga ngɨa na-ɔɔ nɔwɛ atɛndakɨa ʉbalʉa ngʉwa, na ta anɨmbɨa ɓɔ wa꞊kɨa yaka ngɨyɛnɛnɨ ta kɨanɨ, nɔ, wa꞊kɨa ɓata ɨjanana anagaaka ɨyɛ nɔnɛtɔ.

²² Nɔ ɓata, nanɔwɛ anɨta kʉ ɓɔ anatambanakɨa ɨda yɔ ɓʉkwaa, dɔ, nanɔ báya ɓɔ akʉʉ ɔ nɨta ngɨyeno, Asɔɓɨɨ anaganɨa suo ɓata-sɨ ɨngbaa ta ganɨanɨ akɔtɔwa inani ná-ɛɛ.

Ɓokuo ngɨyɔ mupipio

²³ Ɛpafala ngɨa a aboloko akʉʉ ɔ Yeso Klisito, ɨhɔ nɛmɨ aka, ɔnaɓokuo kʉ ɓokuoni.

²⁴ Nɔ ɓata atɨ Malɨkɔ, nɔ Alɨsɔtalɨkɔ, nɔ atɨ Dɛma nɔ Luka, ngʉɓa takɔkɨa naɓɔ tɛa, ɓɔnaɓokuo kʉ ɓokuoni.

²⁵ Ɨjɨɔ yɔ Makwɔɓɨɨ Yeso Klisito yiɓio ɨhɔ nenu amɨtɨma-ɛ.