Pananiso 1 - Mʉkpanganɨa nɔ Agɔmɛ ɔ Ɨtakɨtakɨ

Yaka ngɨyɛ Yeso apananiso

¹ Ɨtaɓʉ ngɨyɛ, yanɔ yaka yɔ ɓaɗi ngɨyɛ Yeso Klisito a꞉ɨpananiso aɓʉmba. Asɔɓɨɨ a꞉mʉpana ɨyɔ Klisito yaka yɔ ingono ngɨyɛnɛnɨ, dɔ ɨɓɨakɨa ɓabaya ngʉɓangɔ yaka ngɨyɛ yɔsisekio suo anɨka. Ɨyɔ Klisito a꞉tʉma malaika ngʉwangɔ atɨ baya angɔ Yɔanɨ, ɓɔ ɨmʉpananiso yaka ngɨyɛnɛnɨ.

² Kʉdɔ, Yɔanɨ a꞉sugo ɓɔ: «Yaka iɓomu ngɨyɛ nɛ꞉nɔ, ya ingono ta Yaka yɔ Asɔɓɨɨ, nɔ ya yaka ngɨyɛ Yeso Klisito a꞉chwɛɨa ɓʉdɛmʉ ɓɔngɔ.»

³ Ɨgyagya nɔ mombi ngɨa apopoko nɔ iso ɓɔ waa waa, nɔ ɨgyagya nɔ ɓombi ngʉɓa ɓanʉka yaka ngɨyɛ ɨgbɛ yɔ Asɔɓɨɨ. Ɨgyagya nɔ ɓombi ngʉɓa ɓapoto yaka ngɨyɛ ya꞉tɛndanakɨa aka, dɔ angbinga ngɨa ɔ yaka ngɨyɛnɛnɨ akɔkyananakɨa a tɨa tinene.

Ɓɔɓokuo ɓakanisa ɓɔ Ajia

⁴ Ɨmɨ Yɔanɨ akɛ, nanenu atɛndakɨa inu, ɓakanisa mɛɗɨanɛka ngʉɓa inani aihoi yɔ Ajia. Ɨjɨɔ nɔ majɨɔ kiɓio nenu, anɨngwa atɨ Asɔɓɨɨ ngɨa a-ɔɔ, ɨya a꞉ɓio nɔ ɨya suo anɨka, nɔ anɨngwa akɔ mɨtɨma mɛɗɨanɛka ngɨyɛ ya apɛɨ ɔ ɨda yɔ ɓʉngama ngʉɓangɔ,

⁵ nɔ anɨngwa atɨ Yeso Klisito. Ɨyɔ Yeso ngɨa a dɛmʉ ngɨa angɔnatananakamʉ, ɨyɔ ngɨa a tapio ɔ jʉkana akɔ ingwo, nɔ ɨyɔ ngɨa, a ngama ɔ ɓangama ɓɔ dɔdɔ. Ɨyɔ, anɔ ɓʉkʉnda nesu, nɔ a꞉tɨɓwanakiso akɔ ɓʉɓɨɓɨ ngʉɓeso ɨngbaa amenike ngʉkangɔ.

⁶ Tɨa kʉɓanɨ, ɨyɔ, a꞉tɨmaya amati ɔ ɨfananja yɔ Ɓʉngama ngʉɓɔ Asɔɓɨɨ, nɔ tɔɓio tɨa ɓakumukumu, dɔ tɨmʉkyananakɨa Asɔɓɨɨ ngɨa a Ɨsɛ. Yeso Klisito ɨsɨka ʉbɨba, nɔ ɔɓio nɔ angu amati ɔ mago nɔ mago. Yaɓanɨ.

⁷ Kangeni, ɨyɔ, akɔnɨka amati ɔ lɨkʉɓa, mombi muɓomu a꞊mɨna, gʉtʉ ta ʉɓa, ɓa꞉muchweyo nɔ uchagbu. Nɔ akʉʉ ɔ angɔ, mababa maɓomu ngʉkɔ dɔdɔ, ka꞊kumonio didima. Iii! Yaɓanɨ.

⁸ Ga Asɔɓɨɨ Makwɔɓɨɨ ngɨa Angu Muɓomu, ngɨa a-ɔɔ, ɨya a꞉ɓio, nɔ ɨya suo anɨka, ɓɔ: «Ɨmɨ na Alfa nɔ kʉ Ɔmɛga.»

Yɔanɨ anɨna Klisito amati ɔ ʉbɨba

⁹ Ɨmɨ nduku eno Yɔanɨ, ɨngbaa akɔɓio ɨkyɛmʉ mɛngana nɔ atɨ Yeso, ɨmɨ na ta ɨhɔ nɔ inu amati ɓʉkaɓʉkaɨ, amati ɔ Ɓʉngama ngʉɓɔ Asɔɓɨɨ, nɔ akɔɓio nɔ mʉtɨma wɔtɔ ʉta. Ɓa꞉sa nɛmɨ amati ɔ uji ngʉwɔ Patɛmɔ, dɔ na꞉ɓɨakɨa Ɨsaʉ ngɨyɛ Asɔɓɨɨ, nɔ na꞉ɓio dɛmʉ ɔ ingono wɔ Yeso.

¹⁰ Ya꞉ɓio akɔ ɓisi ɓɔ Makwɔɓɨɨ mʉngana, ɨyɛ Mʉtɨma wɔ Asɔɓɨɨ wanapoto-ɔɔ, nɔ nɔ꞉ka iso mɛngana yɛta ɓʉmʉ ndʉ ɨpanda, akɔchwɛa ambise asɛmɨ.

¹¹ Iso ngɨyɛnɛnɨ, ya꞉ɓio asugo ɓɔ: «Tɛndakɨa yaka ngɨyɛ wanɨna ayɛ, amati ɔ ɨtaɓʉ, kʉdɔ, waɨtʉmɨa ɓakanisa mɛɗɨanɛka ngʉɓa: Ɛfɛsɔ, Sɨmʉlʉna, Pɛlɛgamɔ, Tʉatɛla, Saladɨ, Filadelefia nɔ Laɔdɨkɨa.»

¹² Kʉdɔ, na꞉natana ga pɛɨ, dɔ nɨna mombi ngɨa anɛmɨ anʉngɨa yaka. Nɔ꞉tɛna tɨa mɨbɨnga yɔ ɔlɔ mɛɗɨanɛka, nɔ ɓatala akʉʉ ɔngɔ.

¹³ Nɔ, ananɨ ati ɔ mɨbɨnga yɔ ɓatala ngɨyɛnɛnɨ, nɔ꞉tɛna ɨkyɛmʉ mɛngana ndʉ Mwana ngɨyɔ Mombi. A꞉ɓio ɔpɛnɨeni kanjʉ ata mʉta, nɔ ɔ꞉namangana mʉkaɓa wɔ ɔlɔ aɨgʉngʉ.

¹⁴ Mʉtʉ ngʉangɔ nɔ ndii ɓɔ tuu nɔgbɛ ndʉ pamba. Mesu ngʉkangɔ ka꞉ɓio ɓɔ ngelengele ndʉ magou kɔ dyaa.

¹⁵ Mɨtɨndɨ ya꞉ɓio ɓɔ ngelengele, ndʉ ɓa꞉ɨkɨa nɔ ikopi yɔ dada, ngɨyɛ ɓa꞉ɨpombo amati ɔ dyaa yɛta ɨja. Nɔ iso ngɨangɔ, ya꞉ɓio anʉkanɨa ndʉ ɨpʉmbʉ yɔ dunga ɔ lisini ata mʉja.

¹⁶ A꞉poto ndata mɛɗɨanɛka aɨkɔndɔ yɔ gue ɔngɔ. Nɔ mbɔtɨa ata mʉhɛtɛ mabɔbɔ ɓɔ pikapika amonu ngʉkangɔ, nɔ a꞉ɓio mesu ɓɔ ngbɛkɛngbɛkɛ ndʉ ɨpa yɔ musoti.

¹⁷ Ɨyɛ ndʉ na꞉mɨna, ga ɨmɨ ɓɔ hɨngbɔngbɔ ananɨ amɨtɨndɨ yangɔ ndʉ mʉnda. Yakamɛngana, ɔ꞉napɨa ɨkɔndɔ ngɨangɔ yɔ gue ɔngɔ akʉʉ asɛmɨ, ga ɨyɔ ɓɔ: «Watɨkumomʉ! Ɨmɨ akɛ, na mombi ɔ pɛɨ nɔ kʉ ɨmɨ akɛ, na ambise.

¹⁸ Ɨmɨ, na auɓei. Ɨmɨ, na꞉wo yakamɛngana, ɨtakɨtakɨ ngɨyɛ, na ɓata kʉ auɓei tɨa amati ɔ mago nɔ mago. Ɨmɨ, nanɔ ʉpanʉ akʉʉ ingwo nɔ akʉʉ ɓombi ngʉɓa ɓa aɓʉbɨɨ.

¹⁹ Kʉɓanɨ, tɛndakɨa yaka ngɨyɛ wɛ꞉nɔ, ɨyɛ ya-ɔɔ nɔ ɨyɛ yɛ꞊ka suo ambise ɔngɔ.

²⁰ Ndata mɛɗɨanɛka ngɨyɛ wɛ꞉nɔ aɨkɔndɔ yɔ gue ɔngɔ ngɨyɛsɛmɨ, nɔ mɨbɨnga yɔ ɓatala yɔ ɔlɔ mɛɗɨanɛka, ya yaka yɔ ɓaɗi. Ɨsɨ yɔngɔ ya ɓɔ: ndata mɛɗɨanɛka ya ɓamalaika ɓɔ ɓakanisa mɛɗɨanɛka, nɔ mɨbɨnga yɔ ɓatala mɛɗɨanɛka, ya ɓakanisa mɛɗɨanɛka ngʉɓɔnanɨ.»