Malɨkɔ 5 - Mʉkpanganɨa nɔ Agɔmɛ ɔ Ɨtakɨtakɨ

Yeso ɔchweiso mɨtɨma yɔ madu amati ɔ mombi

¹ Kʉdɔ, atɨ Yeso nɔ ɓakpata ɓa꞉tapʉa amondu ɔ ipuu yɔ Galilaya, inani aihoi yɔ Ɓagɛlasɛ.

² Yeso a꞉chwɛa ta aɨngbɔɔ ndʉ aka, mombi mʉngana ngɨa a꞉ɓio nɔ mɨtɨma yɔ madu amati angɔ, ɔ꞉ɓʉchwɛanɨa anɨngwa amanjaʉ ga mbʉlɛɛ. Ɛ꞉ka apɛɨ ɔ Yeso, ga ɨyɔ ga tɨgba!

³ Ɨyɔ mombi ngɨananɨ, a꞉ɓio tɨta inani amanjaʉ. Mombi pɔ mʉngana a꞉ɓiomʉ ɓata adaa ngɨa ɓamʉsanga-ɔɔ gʉtʉ ta nɔ selegeni.

⁴ Dɔ, ɓɔ꞉mʉsangeni jɛnɛ nɔ mangbenje amɨtɨndɨ, nɔ ɓaselegeni alɨkɔndɔ, ɔ꞉ɓʉtɨna ta tɨna ɓɔ tu tu tu. Gʉtʉ ta mombi ɔ ɓangbelu, a꞉ɓio tii, adaa ngɨa amʉfa-ɔɔ.

⁵ Ngbinga muɓomu naɓutu kʉndʉ musoti, a꞉ɓio ɨyɔ ambambanio, nɔ, nachokoo, nɔ, kionoko lɨpɨ nɔ makopi ɓɔ chʉa chʉa, tɨta inani amanjaʉ, nɔ alɨkpangba.

⁶ Kʉdɔ, ɔ꞉tɛna Yeso ta ɗu, ga ɨyɔ bangʉ ɓɔ njʉa njʉa, ga gbʉkʉ ananɨ apɛɨ angɔ.

⁷ Ga ɨyɔ nɔ Yeso nɔ iso yɛta ɓʉmʉ ɓɔ: «Ɨyeso nenu yɔkwɔ-sɨ tanɨ, ha Yeso ngɨa Mwana wɔ Asɔɓɨɨ ngɨa Akʉʉ Nɔgbɛ-i! Nɔnandɨanɨɔ akɔ ino yɔ Asɔɓɨɨ, kikiliki, watɨnakyananakamʉ ɓaka.»

⁸ Asugo ɓanɨ, dɔ Yeso a꞉minjo ʉpanʉ ɓɔ: «Ʉwɛ, mʉtɨma wɔ idu ngʉwa, chwɛa amati ɔ mombi ngɨa!»

⁹ Ɨyɔ Yeso, ɔ꞉muɓokuo ɓɔ: «Wa ino tanɨ?» Ɔ꞉mutosio ɓɔ: «Na ino ɓɔ Ndiba, dɔ ta ɓaja.»

¹⁰ Nɔ, ɔ꞉mʉkʉnganakɨa Yeso nɔgbɛ ɓɔ atɨmʉkponyomʉ ɓaka amati ɔ ihoi ngɨyɛnɛnɨ.

¹¹ Ɨnadɔ, mutunduga wɔ ɓanɛmbʉ wɔta ʉja wa꞉ɓio akɔdyakanaka, ta aɨkpangba, tinene kʉ ananɨ.

¹² Mɨtɨma yɔ madu ngɨyɛnɛnɨ, yɔ꞉mʉkʉnganakɨa Yeso asugo ɓɔ: «Atɨtʉma ɓaka amati ɔ ɓanɛmbʉ ngʉɓa aki, tɨkumonio amati eɓo.»

¹³ Kʉdɔ, Yeso ɔ꞉titio mɨtɨma yɔ madu ngɨyɛnɛnɨ achwɛa nɔ nɨsa akumonio amati ɔ ɓanɛmbʉ. Anɨngwa ananɨ amugbundu wɔ ɨkpangba, mutunduga wɔ ɓanɛmbʉ ngʉwa wa꞉ɓio tinetine ndʉ ɓanama ɛlɔfʉ ɓepini, wɔnanjana nɔ bangʉ ga waa, nɔ, wɔsa anɨkwa nɔ jiokio amati ɔ ipuu.

¹⁴ Angbinga ngɨa ɓapɛmakɨa ɓɔ ɓanɛmbʉ ɓɛ꞉na-ɔɔ yaka ngɨyɛnɛnɨ, ɓɔ꞉sa bangʉ akɔɓɨakɨa ɨsaʉ ngɨyɛnɛnɨ agʉlʉ, nɔ alɨkʉmbʉ. Kʉdɔ, ɓombi ɓɛ꞉ka anɨna yaka ngɨyɛnɛnɨ ya꞉kyananakɨa.

¹⁵ Ɨyɛ ɓombi ɓɛ꞉ka ananɨ Yeso a꞉ɓio-ɔɔ ɓanɨ, ɓɔ꞉gbʉka mombi ɔ mɨtɨma yɔ madu ngɨananɨ tɨta ɓawele, nɔ, mʉkatanɛ ɓɔ pisi, nɔ, mupenyonoke tɨa kʉ iɗo. Kʉdɔ, ya꞉ɓʉkiso ta ʉɓá.

¹⁶ Ɓombi ngʉɓa ɓɛ꞉na yaka ngɨyɛnɛnɨ ya꞉kɨanɨa nɔ mesu, ɓɔ꞉pʉnga ngakɨa ɓangɛ yaka ngɨyɛ yejeyo ɓanɛmbʉ, nɔ mombi ɔ mɨtɨma yɔ madu.

¹⁷ Kʉdɔ, ɓɔ꞉mʉkʉnganakɨa Yeso ɓɔ ɨɓʉngwɨa ɓaka ɨɓɔ ananɨ andaɓʉ ʉngwɨanɨ.

¹⁸ Ɨyɛ ndʉ ɓa꞉ɓio tɨa aɗeto aɨngbɔɔ, mombi ngɨananɨ a꞉mʉchwɛiso mɨtɨma yɔ madu, ɔ꞉mʉkikelekio Yeso ɓɔ ɓiɓio ɓaka tɨta nayɔ.

¹⁹ Sɔkɔmʉ Yeso ɔ꞉báya yakamɛngana, ɔ꞉mʉngɨa ɓɔ: «Pɔ, ɨndɔ tɔa-sɨ ta andɔɔ, aki ɓandɔɔ ɓa-ɛɛ, nɔ, wɔɓʉchwɨa tɔdʉ ɔ yaka iɓomu ngɨyɛ Makwɔɓɨɨ ɔ꞉nakɨa aka ɔ꞉nɛnɨa-ɔɔ ikoko, nɔ aka, ɔ꞉napananiso-ɔɔ iɗo iɗo ngɨangɔ.»

²⁰ Kʉdɔ, ɔ꞉sa yangɔ, nɔ, ɔ꞉pʉnga ɓɨakɨa yaka iɓomu ngɨyɛ Yeso a꞉kɨa akʉʉ angɔ, amati ɔ ihoi yɔ Dɛkapɔlɨ. Nɔ yaka ngɨyɛnɛnɨ, ya꞉mbangɨa ɓombi ɓaɓomu ta mbangɨa.

Yeso ɔheiso mwana ɔ Yailo nɔ moi ngɨa apoto ɨpʉkʉ ngɨangɔ

²¹ Ambise ngɨananɨ, Yeso a꞉tɔa ɓata nɔ ɨngbɔɔ kʉ amondu ɔ ipuu ngɨyɛnɛnɨ. Ndʉ a꞉chwɛa amati ɔ ɨngbɔɔ, ga ambaja ɔ ɓombi ɓata kʉ ɓɔ kyɛɛ ananɨ anɔ ambamba angɔ. Ɨyɔ-sɨ ta ananɨ anɔ ambamba ɔ ipuu.

²² Mʉngana wɔ ɓangama ɓɔ ɨkáá yɔ nɨta ngɨyɔ Ɓayuda ino ɓɔ Yailo, ɛ꞉ka ananɨ ga buu. Ta ɨyɛ ɛ꞉na Yeso ɓɔ, ga ɨyɔ ɓɔ kpruu, ananɨ amɨtɨndɨ yangɔ.

²³ Nɔ ɔ꞉mʉndɨanɨa akɔsugo ɓɔ: «Kikiliki, mwana ata moi ngɨasɛmɨ a tinene akɔkio mʉtɨma! Ika ɓaka-sɨ nayɔ akɔnapɨya lɨkɔndɔ, ambɔ ɨhɛa, nɔ, ɔɓio ɓaka-sɨ kʉ auɓei.»

²⁴ Kʉdɔ, ɓɔ꞉sa nɔ Yeso tɨta ɨgbata mɛngana, mwana ɔ mombi ɔ꞉ɓʉndʉndɨyeni tɨta ɓɔ ndʉ.

²⁵ Ɨnadɔ, ya꞉ɓio nɔ moi mʉngana ananɨ, ɨya, a꞉kweso jɛnɛ kaɓu ɔ chwɛa menike, amati wɔ mago tɛkɛɓɛ nɔ kapɨnɨ.

²⁶ A꞉dya ikoko nɔgbɛ alɨkɔndɔ lɔ ɓamʉnganga ɓaja ngʉɓa ɓa꞉mʉtɔka. Ɔ꞉gaba lɨkyɛmɛ ngɨlangɔ tɨta liɓomu, nɔ, sɔkɔmʉ ɨ꞉hɛa pɔ kʉɓanɨ. Akʉʉ ɔ yaka ngɨyɛnɛnɨ, kaɓu ɔ꞉ɓio anɨsɨnganaka tɨa nɔpɛɨ nɔgbɛ.

²⁷ Ɨyɛ ndʉ moi ngɨananɨ ɔ꞉ka uduɓa wɔ Yeso, kʉdɔ, a꞉kumonio amati wɔ ambaja wɔ ɓombi ga ngbuu, ɛ꞉sɨngana ambise ɔ Yeso, nɔ, ɔ꞉mʉɓoto ɨpʉkʉ ngɨangɔ ga kpa.

²⁸ Dɔ, ɔ꞉ɓio ayakanaka amati angɔ ɓɔ: «Gʉtʉ nɔpoteni ta ɨpʉkʉ ngɨangɔ, nahɛya ta hɛyanɨ!»

²⁹ Ta gagaa ngɨananɨ, ga menike ɓɔ kakau, ga ndʉtʉ nayɔ ɓɔ sia, nɔ, ɛmbɨana amati angɔ ɓɔ ɔ꞉hɛyɔ hɛyanɨ.

³⁰ Kʉ gagaa ngɨananɨ, Yeso ɔ꞉kana ɓɔ angu ɔ꞉mʉchwɛɔ. Ɔ꞉natana ananɨ ati ɔ ambaja ɔ ɓombi, ga ɨyɔ naɓɔ ɓɔ: «Anɨ akɛ ɔ꞉napoto ɨpʉkʉ?»

³¹ Ɓakpata ngʉɓangɔ ɓɔ꞉mutosio ɓɔ: «Waɓokuo-sɨ ɨmanɨ ɓɔ anɨ akɛ ɔ꞉napoto, wɔɓieni anɨna aki mwana ɔ mombi ɔ꞉nandʉndɨyɔ-ɛɛ kʉtaa?»

³² Yakamɛngana, Yeso ɔ꞉pʉnga kangaka ananɨ a꞉ɓio-ɔɔ, ɓɔ ɨmbɨa-sɨ mombi ngɨa ɔ꞉mʉpoto.

³³ Ndʉ moi ngɨananɨ ɛ꞉mbɨana yaka ngɨyɛ ya꞉chana amati angɔ ɓanɨ, ɔ꞉pʉnga gʉgʉma nɔ ʉɓá. Ga ɨyɔ amɨtɨndɨ yɔ Yeso ga kpru, nɔ, ɔ꞉mʉpanjanakɨa uɓei ngʉwangɔ uɓomu.

³⁴ Yakamɛngana, Yeso ɔ꞉musigio ɓɔ: «Mwana ata moi, báya ngɨyɛsɔɔ akʉʉ asɛmɨ yɔ꞉naheiso. Sa nɔ majɨɔ, nɔ, kaɓu ngɨasɔɔ ɨhɛa tɨta hɛa.»

³⁵ Angɔpipenimʉ-sɨ pɔ yaka, ɓombi ɓɛ꞉ka anɨngwa atɨ ngama ɔ ɨkáá yɔ nɨta akɔsugo ɓɔ: «Wa ɓata abɔmbaniso mʉpananakɨa akɔ yaka yɨmanɨ? Mwana asɔɔ ɔ꞉wo woni.»

³⁶ Yakamɛngana, sɔkɔmʉ Yeso ɨkpata yangɔ yaka ngɨyɛnɛnɨ, nɔ, ɔ꞉ngɨa ngama ɔ ɨkáá yɔ nɨta ɓɔ: «Ha gue, watɨkwamʉ ʉɓá, ɓio-pɨ ta nɔ báya.»

³⁷ A꞉báyamʉ pɔ ɓɔ mombi ɨmʉnapɨya, yɔkɔɓienimʉ ta atɨ Pɛtɛlɔ, nɔ Yakɔɓɔ ɨɓɔ nɔ manye Yɔanɨ.

³⁸ Kʉdɔ, ɓa꞉ɓɔya atɨ ngama ngɨananɨ ga buu. Inani, aɓuɗo a꞉ɓio tii, ɓombi akɔndɨa nɔ maɓuu tɨa hɔɔ.

³⁹ Ɔ꞉kumonio ambɛnɨ, ga ɨyɔ naɓɔ ɓɔ: «Yɔ꞉kwa-sɨ tanɨ, ɨyɛ ná-ɔɔ agbʉnda ɨpʉmbʉ nɔ ndɨa ɓanɨ? Mwana ngɨa angɔwomʉ, a ta atɔɔ.»

⁴⁰ Ɨɓɔ ɓɔ꞉sɨka yaka ngɨyɛnɛnɨ ta ndʉ majɛjɛ. Yakamɛngana, ɔ꞉ɓʉchwɛiso ta chwɛiso, nɔ, ɔ꞉sɨka atɨ ɨsɛ nɔ inye ɔ mwana, ɨhɔ nɔ ɓakpata ɓaatʉ ngʉɓa akyɛndaka naɓɔ, ɓɔ꞉kumonio ga ngbuu, inani mwana a꞉ɓio-ɛɛ.

⁴¹ Yeso ɔ꞉mʉpoto mwana ngɨananɨ ɨkɔndɔ, nɔ, ɔ꞉mʉngɨa ɓɔ: «Talɨta kʉmʉ.» Yasugo nɔ ʉɗaɗa ngʉwɔnanɨ ɓɔ mwana ata moi, nɔnɛtɔ ɓɔ jʉkana.

⁴² Ta gagaa ngɨananɨ, mwana ɔ ɓasaɓakyɛ ɔ꞉ngwa ɨkʉʉ ga vanga, nɔ, ɔ꞉pʉnga kyɛndanaka. A꞉ɓio nɔ mago tɛkɛɓɛ nɔ kapɨnɨ. Yaka ngɨyɛnɛnɨ, yɔ꞉ɓʉmbangɨa ɓombi nɔgbɛ.

⁴³ Yeso ɔ꞉ɓʉgbɛma nɔ angu nɔgbɛ ɓɔ ɓatɨngakɨamʉ mombi pɔ mʉngana yaka ngɨyɛnɛnɨ, nɔ, ɔ꞉ɓusigio ɓɔ ɓiminjo mwana ngɨananɨ idyo.