Malɨkɔ 3 - Mʉkpanganɨa nɔ Agɔmɛ ɔ Ɨtakɨtakɨ

Yeso ɔheiso mombi akɔ ɓisi ɓɔ nuhomuo

¹ Yeso a꞉kumonio ɓata kʉ amati ɔ ɨkáá yɔ nɨta. Inani, ya꞉ɓio nɔ mombi mʉngana, ngɨa ɨkɔndɔ ya꞉muwo.

² Ɓombi ngʉɓa ɓa꞉ɓio ananɨ, ɓɔ꞉pʉnga kanga Yeso ɓɔ ngba ngba ngba, anɨna ɓɔ aheiso ndɨ mombi ngɨananɨ aɓisi ɓɔ nuhomuo heisoo. Ɨɓɔ, ɓa꞉ɓio ahata ɓɔ ɓa꞊napɨa Yeso nɔ mʉkɔmbʉ nɔ ɨngbaa nga yino tanɨ.

³ Ga Yeso nɔ mombi ngɨa ɨkɔndɔ ya꞉muwo ɓɔ: «Ha gue, ɨmaa ɓɔ gba, ananɨ ati ɔ ɓombi.»

⁴ Kʉdɔ, ɔ꞉ɓuɓokuo tɨa ɓɔ: «Amati ɔ mapanʉ ngʉkeso, yabayanɨa ndɨ bayanɨanɨ akɔkɨa yaka yɛta iɗo, pɔ ɓʉɓɨɓɨ akɔ ɓisi ɓɔ nuhomuo, ga pɔ akɔheiso mombi, pɔ nayɔ anɨwa?» Ɓague ɓɔ꞉gbaa ta ɓɔ woo.

⁵ Kʉdɔ, Yeso ɔ꞉ɓʉkanga nɔ ajwa ata ɓɨɓɨ, ɔ꞉dya ikoko nɔgbɛ amʉtɨma, akɔnɨna ɓɔ ɓangɔmʉ akʉnda báya amati ɔ mɨtɨma ngɨyeɓo pɔ bele. Mbise ɔngɔ, Yeso ɔ꞉musigio ɓɔ: «Ha gue, yomo ɨkɔndɔ.» Ɔ꞉yomo ɨkɔndɔ ga gɔ, nɔ, yɔ꞉mʉhɛa ta hɛa.

⁶ Ta gagaa ngɨananɨ, Ɓafalisayɔ ɓɔ꞉chwɛa inani amati ɔ ɨkáá yɔ nɨta, nɔ, ɓɔ꞉sa amɔmanakɨa ɨhɔ nɔ ɓombi ɓɔ ɨtandɛ ngɨyɔ ngama Hɛlɔdɛ. Ɓa꞉sa asingekio idimi yɔ nɨwa Yeso.

Ambaja ɔ ɓombi ɛkɔ akpata Yeso

⁷ Yeso ɨhɔ nɔ ɓakpata ngʉɓangɔ ɓɔ꞉ngwa ananɨ anɨsa nɔ ʉgbaa mesu aipuu ngɨyɛ yɛta ɨja. Ambaja ɔ ɓombi ata mʉja ambise angɔ tɨa hooo, anɨngwa alihoi di di di ndʉ anɔ Galilaya, nɔ anɔ Yudɛa.

⁸ Ɓombi nga ɓɔmɔ ɓaja ɓa꞉ngwa anɔ Yelusalɛma, nɔ anɔ Idumaya, nɔ alihoi ngɨlɛ la amondu wɔ Yɔlɔdanɨ, nɔ amutii wɔ Tilo, nɔ Sɨdɔna. Ambaja ngɨananɨ muɓomu ɛ꞉ka atɨ Yeso, dɔ, ɓɔ꞉ka yaka iɓomu ngɨyɛ a꞉ɓio akɨa.

⁹ Kʉdɔ, Yeso ɛ꞉ta ɓakpata nayɔ anɨkɨa nɔ mwana ɔ ɨngbɔɔ, dɔ, ambaja ngɨananɨ atɨmutitomʉ.

¹⁰ Ya꞉ɓio ɓanɨ dɔ, a꞉heiso ɓombi ɓaja, kʉdɔ, ɓombi ɓɔ ɓakaɓu ngaɓɔmɔ ɓaɓomu ɓɔ꞉hata nɔ angu, ɓɔ ɓɨmʉpoto gɔ gʉtʉ ta poto.

¹¹ Ɓombi ɓɔ mɨtɨma yɔ madu ɓɔ꞉mɨnɛni jɛnɛ, ɓɔ꞉gbʉkʉmɨa nɔ mau apɛɨ angɔ, nɔ, ɓɔ꞉pʉnga nachokoo asugo ɓɔ: «Ʉwɛ, wa mwana ngɨa Asɔɓɨɨ!»

¹² Yakamɛngana, ɔ꞉ɓʉgbɛma nɔ angu ɓɔ ɓatɨpanjamʉ ɨsaʉ yangɔ.

Yeso ɔchwɔ ɓatitima tɛkɛɓɛ nɔ ɓapɨnɨ

¹³ Mbise ngɨananɨ, Yeso ɔ꞉ɗeto akʉʉ ɔ ɨkpangba, nɔ e꞉soko ɓombi ngʉɓa a꞉ɓio akʉnda naɓɔ anɨchwa. Ɓombi ngʉɓɔnanɨ ɓɔ꞉mɨsɨnganɨa tɨa kʉ tinene.

¹⁴ Kʉdɔ, a꞉tɔchwa ɓombi tɛkɛɓɛ nɔ ɓapɨnɨ ati eɓo, akɔɓio ndʉ ɓatitima ɓangɔ, ʉɓa ɓa꞊ɓio ngbinga muɓomu tɨta ɨhɔ nayɔ. Nɔ, ɔ꞉ɓʉtʉma aɓɨakɨa ɓombi Ɨsaʉ yɛta Iɗo,

¹⁵ nɔ, ɔ꞉ɓinjo angu akɔchwɛiso mɨtɨma yɔ madu.

¹⁶ Mano kɔ ɓatitima tɛkɛɓɛ nɔ ɓapɨnɨ ngʉɓa a꞉ɓʉchwa ka ɓɔ: Simoni ngɨa Yeso a꞉mʉsʉa ino kʉ ɓɔ Pɛtɛlɔ.

¹⁷ Yɔtɛka ananɨ tɨa, atɨ Yakɔɓɔ ɨɓɔ nɔ manye Yɔanɨ, ɓana ɓɔ Jɛbɛdayɔ, ʉɓa Yeso a꞉ɓʉsʉa ino yɔ ɨndambʉ ɓɔ «Bɔanelege» nɔ igiliki ɨsɨ yɔngɔ ɓɔ ɓana ɓɔ mungito wɔ ʉgbaa,

¹⁸ nɔ Andɛlɛa, nɔ Filipo, nɔ Balatɨmayɔ, nɔ Matayɔ, nɔ Tɔma, nɔ Yakɔɓɔ, mwana ɔ Alʉfayɔ nɔ Tadei, nɔ Simoni, ngɨa a꞉tɨhata ɨpandasɨ akɔ ihoi ngɨangɔ,

¹⁹ nɔ Yuda Ɨsɨkalɨɔta, ɨya a꞉ɓio anɨsa agaba Yeso.

Ɓanduku ɓɔ Yeso ɓahata nayɔ anɨfa

²⁰ Ambise ɔngɔ, ɓɔ꞉tɔa andei. Ga ambaja ɔ ɓombi ɓata kwananɨ ga tuu. Ngbinga adaa ngɨa atɨ Yeso, ɨhɔ nɔ ɓakpata, ɓa꞉dya-ɔɔ mwana ɔ ɨkyɛmʉ, sɔkɔ tii.

²¹ Ɨyɛ ɓanduku ɓangɔ ɓɔ꞉ka yaka ngɨyɛnɛnɨ, ɓɔ꞉ngwɨa kyɛnda anɨsa nayɔ asɨka, nɔ, nayɔ atoiso andei, dɔ, ɓa꞉ɓio asugo ga ɔ꞉kwɔ ɓamu.

Ɓɔchwɔ Yeso mʉtɨma wɔ idu

²² Ɓapananakɨa ɓɔ mapanʉ ngʉɓa ɓa꞉ngwa anɔ Yelusalɛma, ɓa꞉ɓio ɨɓɔ asugo akʉʉ ɔ Yeso ɓɔ: «Gue ngɨa a꞉kwa pɛ badɨma ngɨyɔ Bɛlɛjɛbʉlɨ, nɔ, achweiso mɨtɨma yɔ madu amati ɔ ɓombi dɔ ɨyɔ ingainga a kʉ nɔ angu ɔ ngama ɔ ɓabɨɨ.»

²³ Kʉdɔ, Yeso ɔ꞉ɓisoko, nɔ, ɔ꞉pʉnga naɓɔ atosio yaka ngɨyɛnɛnɨ ɨngbaa akɔ isisenio ɓɔ: «Nɛna gbanɨ ɓɔ Sɨtanɨ akɔchwɛiso aɓwangɔ Sɨtanɨ amati ɔ mombi?

²⁴ Ɓamɨangama ɓɔpʉngeni nagbonyonoko tɨa ati eɓo, ambɔ ɓʉngama ngʉɓeɓo ɓɔmanɔ anɨkwa.

²⁵ Ya ndʉ ɓombi ɓɔnagbonyonokeni amati ɔ anja mʉngana, ambɔ anja ngɨyeɓo ɔpanjaɔ.

²⁶ Yɔɓieni dɔ tɨa ɓɔ Sɨtanɨ ɔpʉngɔ ɓɛndana kʉ nɔ ɨyɔ makwɔngɔ, ambɔ ɓʉngama ngʉɓangɔ ɓɔnagbonyonoko tɨa nagbonyonokoo. Nɔ ɨyangɔ, yɛpa tɨa kʉndʉ ananɨ.

²⁷ Mombi pɔ mʉngana angɔkumoniomʉ amati ɔ ɨkáá yɔ ginda, nɔ, ɔtʉpa lɨkyɛmʉ ngɨlangɔ angɔmʉsangenimʉ ɓɔ kpɛkɛkpɛkɛ. Tɨta ambise ngɨananɨ, ɨyɛ akwanana-ɔɔ tɨa tʉpa lɨkyɛmʉ amati ɔ ɨkáá ngɨangɔ!

²⁸ Ɛɛ, na dɔ nenu asigio ta ingono, Asɔɓɨɨ ɛ꞊paakɨa sina ɓombi ɓʉɓɨɓɨ ta ɓuɓomu, gʉtʉ ta lɨsɛya ngɨlɛ ɓa꞉ɓio ɓɔ ɓɔmʉsɛakeni.

²⁹ Yakamɛngana, pɛpɛ ta mombi ngɨa asɛaka Mʉtɨma wɔta Tu, ɓa꞊ngɔmɨpaakɨamʉ sina pɔ bele, nɔ, a꞊dya sina mʉkaya wɔ ɓʉɓɨɓɨ ngʉɓangɔ amati mago nɔ mago.»

³⁰ Yeso a꞉ɓusigio ɓanɨ, dɔ ɨɓɔ akɛ ɓa꞉pʉnga nayɔ anɨchwa mʉtɨma wɔ idu.

Anɨ akɛ a inye nɔ ɓamanye ɓɔ Yeso

³¹ Kʉdɔ, atɨ inye ɔ Yeso ɨhɔ nɔ ɓamanye ɓɔ꞉tɔɓɔya tɨa kʉ ananɨ, nɔ, ɓɛ꞉maaka ta aɓei ɓɔ. Ɓɔ꞉tʉma mombi nayɔ anisoko.

³² Ambaja ɔ ɓombi tɨa kyɔ kyɔ kyɔ, ɓaweleke ananɨ anambamba angɔ. Ga ɨɓɔ nayɔ ɓɔ: «Atɨ anʉ, ɨhɔ nɔ ɓana ɓɔ anʉ ʉɓa ɓanɔwɛ ahata, ɓɛmaakɛ aɓei-a.»

³³ Yeso ɔ꞉ɓutosio ɓɔ: «Atɨ ɨnaa nɔ ɓana ɓɛnaa ʉɓɔkanɨ?»

³⁴ Kʉdɔ, Yeso ɔ꞉kyɛndanakiso ɓajwa akʉʉ ɔ ɓombi ngʉɓɔnanɨ ɓa꞉ɓio ɓɔ ɓɔmʉkungueni. Ga ɨyɔ naɓɔ ɓɔ: «Ɨnaa, nɔ ɓana ɓɛnaa, ya inu ndʉ aka ná-ɔɔ aka,

³⁵ Dɔ, ɨnaa nɔ ɓana ɓɔ ɨnaa, ya mombi muɓomu ngɨa akɨa ɓʉkʉnda ngʉɓa Asɔɓɨɨ.»