Malɨkɔ 2 - Mʉkpanganɨa nɔ Agɔmɛ ɔ Ɨtakɨtakɨ

Yeso ɔheiso jɨkɛsɨ

¹ Ambise ɔ makwaa bele, Yeso ɔ꞉tɔwa ɓata ta anɔ Kapalanaumu. Ɨyɛ ndʉ yɛmbɨanɨa ɓɔ a ananɨ andei,

² ga ambaja ɔ ɓombi ata mʉja ɓɔ hɨtɔɔ. Ɓɔ꞉huo ambɛnɨ nɔ ananɨ apɛɨ ɔ ɨkáá, sɔkɔmʉ mwana ɔ ɨda itukoo pɔ bele gʉtʉ ta anɔ umongu. Ɔ꞉pʉnga naɓɔ akɔninjo mapanʉ kɔ Asɔɓɨɨ.

³ Ɓague ɓɔgɨna ɓɛ꞉ka nɔ jɨkɛsɨ atɨ Yeso, ɓɔmʉtʉmbeni tʉmba.

⁴ Yakamɛngana, ya꞉ɓio ɓʉkaɨ, akɔɓɔya nɔ mombi ngɨananɨ apɛɨ ɔ Yeso, dɔ ambaja ɔ ɓombi a꞉ɓio mʉja. Kʉdɔ, ɓague ngʉɓɔnanɨ, ɓa꞉ɗeto tɨta akʉʉ ɔ ʉpaʉ, nɔ, ɓɔ꞉gana ihoo mɛngana yɛta ɨja ngbingbii ta aka Yeso a꞉ɓio-ɔɔ. Ɓɔ꞉diso kalagba ngɨa mombi ɔ kaɓu a꞉ɓio-ɔɔ mʉkwaise inani ambɛnɨ ga kputuku.

⁵ Ɨyɛ ndʉ Yeso ɛ꞉na ɨkananja yɔ báya ngɨyɛnɛnɨ, ga ɨyɔ nɔ jɨkɛsɨ, ɓɔ: «Ɛɛ mwana asɛmɨ, ɓʉɓɨɓɨ ngʉɓɔsɔɔ ɓɛpaanakɨɔ ɨpaanakɨanɨ.»

⁶ Ngana ngana ɔ ɓapananakɨa ɓɔ mapanʉ ngʉɓa ɓa꞉ɓio ɓaweleke gbɛgbɛ ananɨ, ɓɔ꞉pʉnga yakananaka amati eɓo ɓɔ:

⁷ «Gue ngɨa, ɔ꞉sugo-sɨ ɓanɨ dɔtanɨ? Ɨyɛnɛnɨ, ya sɛyaka Asɔɓɨɨ! Anɨ akɛ ɛneni ɛpaakɨa mombi ɓʉɓɨɓɨ, yɔkɔɓienimʉ ta Asɔɓɨɨ nangana?»

⁸ Ambɛnɨ gɔ ɓɔ pe, amati ɔ mʉtɨma ngʉwangɔ, ɨyɔ Yeso, ɛ꞉mbɨa itungwio ngɨyeɓo ta ɨmbɨanɨ. Kʉdɔ, ɔ꞉ɓuɓokuo ɓɔ: «Ɨkananja yɔ itungwio ngɨyɛ nánayɔ amati eno ɓanɨ, yɛkɔ gbanɨ?

⁹ Ɨmanɨ dɔ-sɨ, ya siasia, ga pɔ asigio jɨkɛsɨ ɓɔ: ‹Ɓʉɓɨɓɨ ngʉɓɔsɔɔ ɓɛpaanakɨɔ ɨpaanakɨanɨ›, ga pɔ ɓɔ: ‹Ɨmaa, nɔ, sɨka kalagba ngɨasɔɔ, nɔ, kyɛndaka?›

¹⁰ Ɛɛ, ɨmbɨeni dɔ iɗo ɓɔ, Mwana ngɨyɔ Mombi, anɔ ʉpanʉ wɔ nɨpaakɨa ɓʉɓɨɓɨ amati ɔ dɔdɔ ngɨa.» Ga Yeso nɔ jɨkɛsɨ ɓɔ:

¹¹ «Ha gue, nanɔwɛ asigio ɓɔ, ɨmaa, nɔ, sɨka kalagba ngɨasɔɔ, nɔ, wɔtɔwa andɔɔ andei.»

¹² Ta gagaa ngɨananɨ, gue ngɨananɨ ɔ꞉ngwa ɨkʉʉ ga ɗasa, ɔ꞉sɨka kalagba, ga ɨyɔ ɓɔ kala, ta ananɨ apɛɨ ɔ ɓombi ɓaɓomu. Yaka ngɨyɛnɛnɨ, yɔ꞉mbangɨa ɓombi, nɔ, ɓɔ꞉pʉnga bibiso Asɔɓɨɨ. Ga ɨɓɔ ɓɔ: «Ta꞉ngɛnamʉ sina isu ɨkananja yɔ yaka ngɨyɛ!»

Yeso esoko Matayɔ, ɨya eno kʉ ɓɔ Lawi

¹³ Yeso a꞉ngwɨa ɓata kyɛnda anɨsa kʉ nɔ ʉgbaa mesu a ipuu ngɨyɔ Galilaya. Ambaja muɓomu ɔ꞉mɨkɨa ɓata ga hɨtɔɔ, nɔ, ɔ꞉pʉnga naɓɔ aninjo mapanʉ.

¹⁴ Kʉdɔ, ɨyɔ achana ta chana bɔ, ɔ꞉tɛna tɨa Lawi, mwana ɔ Alʉfayɔ, ɓawele aɨda yɔ lipisa manjanja. Ga ɨyɔ nayɔ ɓɔ: «Ha gue, anakpata!» Lawi ɔ꞉ngwa ɨkʉʉ ga vanga, nɔ, ɔ꞉pʉnga nayɔ akɔkpata.

¹⁵ Mbise ɔngɔ, atɨ Yeso ɓa꞉ɓio tɨa adyakaka akɔ mesu kɔ ɨkáá ngɨyɔ Lawi. Ɓa꞉ɓio inani nɔ ɓombi ɓaja, tɨa akɔ ɓandɔmbɛ ɓɔ lipisa manjanja, nɔ ɓombi ɓɔta ɓɨɓɨ, nɔ ɓakpata, dɔ, ɨkananja yɔ ɓombi ndʉ ʉɓonanɨ, ɓa꞉ɓimʉkpata ɓaja ɓɔ hooo.

¹⁶ Ɨyɛ ndʉ Ɓafalisayɔ, nɔ ɓapananakɨa ɓɔ mapanʉ, ɓa꞉mɨna adyakaka ɨhɔ nɔ ɓandɔmbɛ ɓɔ lipisa manjanja, nɔ ɓombi ɓɔta ɓɨɓɨ ngaɓɔmɔ, ga ɨɓɔ nɔ ɓakpata ngʉɓangɔ ɓɔ: «Makweno adyakaka ɨhɔ nɔ ɓandɔmbɛ ɓɔ lipisa manjanja, nɔ ɓombi ɓɔta ɓɨɓɨ ngʉɓa dɔtanɨ?»

¹⁷ Ɨyɛ ndʉ Yeso ɔ꞉ka ɓanɨ, ɔ꞉ɓusigio ɓɔ: «Ɓombi ɓɔta ɓʉmʉɓʉmʉ, ɓangɔmʉ ɨɓɔ nɔ taa yɔ mʉnganga. Yakamɛngana, ta ɓombi ɓɔ ɓakaɓu, akɛ ɓanɔ taa yɔngɔ! Ɨmɨ, nɛ꞉kamʉ anisoko ɓombi ɓɔta ngbingbii nɛmɨ akɔkpata, yakamɛngana, nɛ꞉ka ɨmɨ anisoko ɓombi ɓɔta ɓɨɓɨ.»

Yeso ɛkɔ nɔ kɔkɔ ɔ ɨtakɨtakɨ

¹⁸ Ɓisi mʉngana, ɓakpata ngʉɓɔ Yɔanɨ, nɔ Ɓafalisayɔ ɓa꞉ɓio anɨta, nɔ taa idyo akɔ angbinga. Ɓombi ɓɛ꞉ka aɓokuo Yeso ɓɔ: «Ɓakpata ngʉɓɔ Yɔanɨ ɨhɔ nɔ Ɓafalisayɔ ɓakyɔtaa idyo akɔ angbinga taanɨ, yakamɛngana, ɓakpata ngʉɓɔsɔɔ ɓangɔkyɔtaamʉ ɨɓɔ idyo akɔ angbinga dɔtanɨ?»

¹⁹ Yeso ɔ꞉ɓutosio ɓɔ: «Ɓombi ngʉɓa ɓakyɔɓisoko akɔ ʉmbɔ wɔ mʉsɨkana ɓakwanana ndɨ taa idyo, ɓɔɓieni-sɨ kʉ ɨhɔ nɔ atɨ swaɨ ɔ moi? Ngbinga ngɨa ɓa-sɨ-ɔɔ ta ɨhɔ nɔ atɨ swaɨ ɔ moi, ɓangɔkwananamʉ taa idyo pɔ bele.

²⁰ Ya꞊ɓio sungo nɔ ɓisi mʉngana, ʉɓa ɓa꞊ɓungusio-ɔɔ swaɨ ɔ moi, ambɔ kyɛnda ngɨyeɓo ataa idyo akɔ angbinga, tɨa ɨyɛnɛnɨ.

²¹ Mombi pɔ mʉngana angɔkwananamʉ akutoko ɨnjanjaka yɔ ɨpʉkʉ nɔ ɨɗaka ngɨyɛ ɨtakɨtakɨ. Dɔ, ɔkɨeni ɓanɨ, ɨɗaka ngɨyɛ ɨtakɨtakɨ, yanatʉa ɨpʉkʉ ngɨyɛ ɨnjanjaka ta natʉa, nɔ, ihoo yɛ꞊ka tɨa ɨja nɔgbɛ.

²² Nɔ, mombi pɔ mʉngana angɔkwananamʉ nuto ʉkyɛpʉ wɔ ɨtakɨtakɨ amati ɔ lɨkɔchɔ lɛjɛnɛ, ngɨlɛ ɓa꞉lɨkɨa nɔ mamba kɔ ɓanama. Dɔ, ɔkɨeni ɓanɨ, ʉkyɛpʉ ngʉwɔnanɨ wanatʉa ɨkɔchɔ ta natʉa. Kʉdɔ, ʉkyɛpʉ wayanaka, ɨhɔ nɔ lɨkɔchɔ kʉtaa. Yɔkwananɔ anuto ʉkyɛpʉ wɔ ɨtakɨtakɨ, kʉ amati ɔ ɨkɔchɔ yɔ ɨtakɨtakɨ.»

Ɓisi ɓɔ homuo ngʉɓɔ Ɓayuda

²³ Akɔ ɓisi ɓɔ nuhomuo mʉngana ngʉɓɔ Ɓayuda, atɨ Yeso ɨhɔ nɔ ɓakpata ngʉɓangɔ, ɓa꞉ɓio akɔchana ɨngbaa aɓakʉbaa ɓɔ nganɔ. Ɨɓɔ, akɔchana ta chana, ɓakpata ɓɔ꞉pʉnga buoko lɨkʉjʉ lɔ nganɔ.

²⁴ Kʉdɔ, Ɓafalisayɔ ɓa꞉muɓokiso Yeso ɓɔ: «Ɓakpata ngʉɓɔsɔɔ ɓa-sɨ akɨa yaka ngɨyɛ mapanʉ kagbɛmɨa akɔ ɓisi ɓɔ nuhomuo ta kɨa dɔtanɨ?»

²⁵ Ga Yeso naɓɔ ɓɔ: «Inu, ná꞉ngɔpopoko ndɨ sina amati ɔ Mabii, yaka ngɨyɛ Dawidi a꞉kɨa ɨhɔ nɔ ɓafandɔngɔ ngbinga ngɨa a꞉ɓio-ɔɔ nɔ taa, nɔ sɔkɔmʉ nɔ ɨkyɛmʉ yɛta ɨdyɛ?

²⁶ Inu, ná꞉ngɔpopoko ndɨ sina ɓɔ akɔ angbinga ngɨyɔ kumukumu ngɨa ata mʉja ino ɓɔ Abɨatalɨ, Dawidi a꞉kumonio aɨkáá yɔ Asɔɓɨɨ ta ɓɔ ngbuu. Inani, ɔ꞉dya mɨkatɨ ngɨyɛ ɓa꞉ɨnapɨa apɛɨ ɔ Asɔɓɨɨ, nɔ, enjekio kʉ nɔ ɓafandɔngɔ. Ina dɔ, mɨkatɨ ngɨyɛnɛnɨ pɛpɛ, ta ɓakumukumu nangana akɛ, ɓa꞉tɨɨdya jɛnɛ.»

²⁷ Kʉdɔ, Yeso ɔ꞉ɓusigio ɓata ɓɔ: «Ɓa꞉kɨa ɓisi ɓɔ nuhomuo ayaka yɔ mombi. Ɓa꞉kɨamʉ mombi akɔ yaka yɔ ɓisi ɓɔ nuhomuo.

²⁸ Ɨnadɔ, Ɨmɨ, Mwana ngɨyɔ Mombi akɛ, na ingainga makwɔ ɔ ɓisi ɓɔ nuhomuo.»