Malɨkɔ 16 - Mʉkpanganɨa nɔ Agɔmɛ ɔ Ɨtakɨtakɨ

Yeso ɔchwɛɔ aɓʉnjaʉ

¹ Ɨyɛ ndʉ ɓisi ɓɔ nuhomuo ngʉɓɔ Ɓayuda ɓa꞉chɨla nayɔ, atɨ Malɨa Magadala, nɔ Malɨa ngɨa inye wɔ Yakɔɓɔ, dɔ tɨa nɔ moi ngakɔmɔ ino ɓɔ Salɔmɛ, ɓɔ꞉kaya malasji, anɨsa akɔɓasaka Yeso nawɔ.

² Ta akɔ ɓisi ɓɔ mʉkpanganɨa wɔ pɔsʉ nɔ igbandindi, akɔ magou kɔ ɨpá, ɓoi ngʉɓɔnanɨ ɓɔ꞉sa inani aɓʉnjaʉ.

³ Ɓa꞉ɓio andɨanɨa ati eɓo ɓɔ: «Anɨ dɔ akɛ, a꞊tɨkelisio ikopi ngɨyɛ ya aumongu wɔ ɓʉnjaʉ?»

⁴ Yakamɛngana, ɨyɛ ɓa꞉tɨna ajwa ɓɔ, ɓɛ꞉na ikopi yɛta ɨja ngɨyɛnɛnɨ, itutuwe tɨta anambamba.

⁵ Ɨyɛ ndʉ ɓa꞉kumonio amati ɔ ɓʉnjaʉ, ɓɔ꞉tɛna tɨa nɛgbama mʉngana ɓɔ, ɨyɔ, ɓawele aɨkɔndɔ yɔ gue ɔngɔ, ɔpɛnɨeni kanjʉ ata tu. Ga ʉɓá naɓɔ pɨ ɓee!

⁶ Ga ɨyɔ naɓɔ ɓɔ: «Nátɨkwamʉ ʉɓá, nákɔhata Yeso mʉnajalɛtɨ ɨya, ɓa꞉mʉɓakaka pɛ amʉsalaba, ɔ꞉jʉkanɔ ɨyɔ akɔ ingwo jʉkananɨ. Angɔmʉ ɓata aka, kangeni gʉtʉ-sɨ ta ɨda ngɨyɛ ɓa꞉mʉnapɨa pɔngɔ-ɔɔ.

⁷ Yakamɛngana, seni akɔɓɨa ɓakpata ngʉɓangɔ nɔ Pɛtɛlɔ ɓɔ, anɨsa naɓɔ aɓɛtaka anɔ Galilaya, nɔ, ɓabimɨna tɨa kʉ inani, ngbanga ndʉ aka a꞉ɓʉɓɨa jɛnɛ-ɔɔ.»

⁸ Kʉdɔ, ɓa꞉chwɛa bangʉ, inani aɓʉnjaʉ, ndʉtʉ naɓɔ anʉnda tɨa kya kya kya, nɔ, yɔɓʉkyaka ta kyaka. Sɔkɔmʉ ɓɨ꞉ɓɨa mombi pɔ mʉngana yaka ngɨyɛnɛnɨ, dɔ, ɓa꞉ɓio nɔ ʉɓá. [

Yeso ɔchwɛanɨɔ Malɨa Magadala

⁹ Akɔ ɓisi ɓɔ Asɔɓɨɨ ngʉɓɔnanɨ, a꞉chwɛa-ɔɔ nayɔ aɓʉnjaʉ, ɨyɔ, Yeso ɔ꞉tɔchwɛanɨa-sɨ ta Malɨa Magadala ngɨa a꞉muchweiso jɛnɛ mɨtɨma yɔ madu mɛɗɨanɛka.

¹⁰ Tɨa ɨyɔ akɛ a꞉sa akɔchwɨa ɓangɛ ngʉɓa ɓa꞉tɨkɨa naɓɔ ɨhɔ nɔ atɨ Yeso, uduɓa ngʉwɔnanɨ. Ɨnadɔ, ɨɓɔ, ɓa꞉ɓio ta amati ɔ didima, nɔ ndɨa.

¹¹ Ngbinga ngɨa ɓa꞉kɔ-ɔɔ ɓɔ Yeso a uɓei, nɔ ɓɔ, ɔ꞉mɨnɔ pɛngɛ ɨyɔ ɨnanɨ, sɔkɔmʉ-sɨ ɓɨ꞉mʉbaya.

Yeso ɔchwɛanɨɔ ɓakpata ɓapɨnɨ

¹² Mbise ɔngɔ, Yeso ɔ꞉tɔɓʉchwɛanɨa ɓakpata ɓapɨnɨ, ɨɓɔ anɨsa andei. Ɨyɔ, anɨnɨanɨa tɨa ndʉ mombi ngananɨ kʉ di.

¹³ Ɨɓɔ ɓakpata ngʉɓɔnanɨ, ɓɔ꞉tɛka ɓata kʉ aɓɨa ɓangɛ ɨsaʉ, yakamɛngana, sɔkɔmʉ ɨɓɔ ɓɨbaya-sɨ kʉɓanɨ.

Yeso ɔchwɛanɨa ɓatitima tɛkɛɓɛ nɔ mʉngana

¹⁴ Yeso ɔ꞉tɔchwɛanɨa dɔ tɨa ɓatitima tɛkɛɓɛ nɔ mʉngana, ɨɓɔ adyakaka. Ɔ꞉ɓʉyayo, akʉʉ ɔ janga báya, nɔ mʉtɨma wɔta ɓʉmʉ ngʉweɓo. Dɔ, ɓa꞉bayamʉ yaka yɔ ɓiga ngʉɓa ɓɛ꞉na Yeso, ambise ɔ jʉkana akɔ ingwo.

¹⁵ Kʉdɔ, a꞉tɔɓusigio tɨa ɓɔ: «Ɨndɔ seni akɔ dɔdɔ muɓomu, nɔ, nɔ꞉ɓɨakɨa ɓombi ɓaɓomu Ɨsaʉ yɛta Iɗo.

¹⁶ Mombi ngɨa a꞊bayanakɨa, nɔ, ɓɔ꞊mʉɓatisa, ɛ꞊nɨanɨa nɔ ɓʉhɛa. Yakamɛngana, ɨya a꞉ngɔbayanakɨamʉ, a꞊kumonio amʉkɔmbʉ.

¹⁷ Ɨneni ɓakɔkɔ di di di ngʉɓa mombi ngɨa anabaya ɨmɨ, aɓio akɔkɨa: Mombi ɔngɔ, a꞊chwɛiso mɨtɨma yɔ madu akɔ ino ngɨyɛsɛmɨ, ɔ꞊yaka mɨyakɨa ngayɔmɔ yɔ ɨtakɨtakɨ.

¹⁸ Ɔpoteni sɨɨ nɔ lɨkɔndɔ, ga pɔ nɨmwa ɨkyɛmʉ yɛta ɓɨɓɨ, ya꞊ngɔmʉkɨamʉ ɨkyɛmʉ. A꞊napɨa lɨkɔndɔ akʉʉ ɔ ɓombi ɓɔ ɓakaɓu, nɔ ɓɔ꞊hɛa.»

Yeso ɔtɔwɔ atɨ ɨsɛ

¹⁹ Ɨyɛ ndʉ Yeso Makwɔɓɨɨ, a꞉pipo naɓo asigio yaka ngɨyɛnɛnɨ, ɔ꞉tʉmbanɨa akʉʉ ɔ ɓisi, nɔ, ɔ꞉sa awolo aɨkɔndɔ yɔ angu ngɨyɛ Asɔɓɨɨ.

²⁰ Kʉdɔ, ɨɓɔ ɓakpata ɓa꞉sa apanja ɨsaʉ ngɨyɛnɛnɨ ʉmʉa uɓomu. Makwɔɓɨɨ ɔ꞉ɓʉsalɨa amati ɔ tɛa ngɨyeɓo, nɔ, ɛ꞉njiso mapanʉ ngʉkeɓo angu, ɨngbaa akɔkɨa ɓakɔkɔ di di di.]