Malɨkɔ 15 - Mʉkpanganɨa nɔ Agɔmɛ ɔ Ɨtakɨtakɨ

Ɓɔchaniso Yeso apɛɨ ɔ Pilato

¹ Tɨa nekuɓa yɔngɔ nɔ igbandindi, ɓakumukumu ɓa꞉wolio ubua ɨɓɔ nɔ ɓagʉgʉ, nɔ ɓapananakɨa ɓɔ mapanʉ, nɔ ubua uɓomu ngʉwa wɔta ʉja. Ɨyɛ ndʉ ɓa꞉sanga Yeso, ɓɔ꞉sa nayɔ, nɔ, ɓɔ꞉tɔminjo ngama Pilato.

² Kʉdɔ, Pilato a꞉muɓokuo ɓɔ: «Ʉwɛ, wa ndɨ ngama ɔ Ɓayuda?» Yeso ɔ꞉mutosio ɓɔ: «Ʉwɛ, wɔsugo sugoni.»

³ Ɓakumukumu, ɓɔ꞉mʉchɔngɨa akʉʉ ɔ yaka ɨja nɔgbɛ.

⁴ Ga Pilato ɓata nayɔ kʉ ɓɔ: «Wangɔmʉ ndɨ asamʉa? Ɨnadɔ, chɔngɨa iɓomu ngɨyɛ ɓangɛ ɓanɔwɛ asingekio ayɛ!»

⁵ Yakamɛngana, sɔkɔmʉ ɓata Yeso itosio ɨkyɛmʉ pɔ bele. Yɔ꞉mʉkyaka Pilato ta kyaka.

Ɓɔkio mʉkɔmbʉ ngʉwɔ Yeso ɓɔ iwo

⁶ Akɔ mago maɓomu, angbinga ɔ Ʉmbɔ wɔ chwɛa aɓubaya, ɨyɔ ngama, a꞉tɨɓuɓoyo mombi ɔ boloko mʉngana, ngɨa ɓaɓio nɔ taa yɔngɔ.

⁷ Inani aboloko, ya꞉ɓio nɔ mombi mʉngana ino ɓɔ Balaba, ɨya, ɓa꞉mʉfa, ɨhɔ nɔ ɓangʉa ngaɓɔmɔ, dɔ, a꞉wa mombi, ngbinga ngɨa ɓa꞉chweiso-ɔɔ gbongbo.

⁸ Ambaja ɔ ɓombi ɛ꞉ka ga tutee, nɔ, ɓɔ꞉pʉnga anɨta Pilato, ɓɔ ɨɓʉkɨa kʉndʉ akyɔɓʉkyaka pɛɨ.

⁹ Ga Pilato naɓɔ ɓɔ: «Nákʉnda ndɨ ɓɔ nɨniɓoyo ngama wɔ Ɓayuda?»

¹⁰ Dɔ, a꞉ɓio anɨmbɨa iɗo ɓɔ, ɓakumukumu ɓa꞉gaba Yeso ta akɔ yaka yɔ imi.

¹¹ Yakamɛngana, ɓakumukumu ɓɔ꞉pɔpɨa ambaja ɔ ɓombi ɓɔ, ɓɨta Pilato akɔɓoo ta Balaba.

¹² Pilato ɔ꞉toyo ɓata aɓokuo ɓɔ: «Ná dɔ tɨa akʉnda ɓɔ, ɨmɨ, nɨkɨa mombi ngɨyeno akɛ, nánayɔ anisoko ɓɔ ngama wɔ Ɓayuda, tanɨ?»

¹³ Ɓɔ꞉gbɔngwana tʉɓɨa ɓɔ: «Mʉɓakaka akʉʉ ɔ mʉsalaba!»

¹⁴ Pilato ɔ꞉ɓuɓokuo ɓɔ: «Ɔ꞉kɨɔ dɔ-sɨ ɓʉɓɨɓɨ nga ɓeno tanɨ?» Yakamɛngana, ɨɓɔ, ɓɔ꞉tʉɓɨa tɨa ɓʉmʉ nɔgbɛ ɓɔ: «Mʉɓakaka akʉʉ ɔ mʉsalaba!»

¹⁵ Kʉdɔ, Pilato a꞉baya naɓɔ akɔkwiso ɨgyagya. Ɔ꞉ɓuɓoio Balaba, nɔ, ɔ꞉ɓɛndiso Yeso pimbo. Ɔ꞉tɔɓinjo ɨyɔ ga, ɓɨmʉɓakaka akʉʉ ɔ mʉsalaba.

Ɓasʉda ɓɔnononoko Yeso

¹⁶ Kʉdɔ, ɓasʉda ɓa꞉sa nɔ Yeso, amati ɔ ɨmbaa ngɨa atɨ ngama andei, nɔ, ɓe꞉sokono ati ɔ ndiba ngɨyeɓo ɓaɓomu.

¹⁷ Ɓɔ꞉mupeniso kanjʉ ata ngbʉ ga bɔyɔ, nɔ, ɓɔ꞉mʉbangana ɨgaɨ yɔ ɓʉngama amʉtʉ, ɨyɛ ɓa꞉ɨkɨa ndʉ apeɓu wɔ maɓʉ.

¹⁸ Kʉdɔ, ɓɔ꞉pʉnga nayɔ ɓokuo ɓɔ: «Tɔnaɓokuo! Ʉwɛ, ngama wɔ Ɓayuda!»

¹⁹ Ɓɔ꞉mʉɓɛnda nɔ igbiti yɔ ʉmbamba amʉtʉ, ɓɔ꞉mutokoko nɔ maɗaʉ, nɔ ɓɔ꞉pʉnga agbʉkʉmakɨa nɔ mau apɛɨ angɔ, ndʉ ɓiɓio nayɔ abibiso.

²⁰ Ɨyɛ ndʉ ɓa꞉pipo nayɔ ayapakiso ɓanɨ, ɓɔ꞉muɗuo Yeso kanjʉ ngɨananɨ, nɔ, ɓɔ꞉mutosio lɨpʉkʉ ngɨlangɔ. Kʉdɔ, ɓɔ꞉sa nayɔ tɨa aɓakaka akʉʉ ɔ mʉsalaba.

Ɓɔɓakakɔ Yeso amʉsalaba

²¹ Kʉdɔ, ɓɔtɔjono nɔ atɨ Mʉkɨlɛnɛ mʉngana ino ɓɔ Simoni, ɨsɛ ɔ atɨ Alɛkɨjandɛlɛ nɔ Lʉfʉsɨ. A꞉ɓio yangɔ achana anɔ ɨngbaa, ɔ꞉ngweni andei. Ɓasʉda ɓɔ꞉mʉfa, nɔ, ɓɔmutumbiso mʉsalaba ngʉwɔ Yeso, nɔ ɓʉkaɓʉkaɨ ga ti.

²² Ɓɔ꞉sa nɔ Yeso akɔ ɨda mɛngana ngɨyɛ ɓaɨsoko ɓɔ Gɔlɔgɔta, ɨsɨ yɔngɔ ɓɔ: «Ɨda yɔ Ikpokoo yɔ mʉtʉ».

²³ Ɓɔ꞉kanio ga ɓamumwiso ʉkyɛpʉ ngʉwa ɓa꞉mataka nɔ ɨkyɛmʉ yɛta koi, yakamɛngana, ɨyɔ Yeso sɔkɔmʉ ɨmwa pɔ nɨmwa.

²⁴ Kʉdɔ, ɓa꞉tɔmʉɓakaka tɨa amʉsalaba, nɔ, ɨɓɔ ɓasʉda ɓɔ꞉pakana lɨpʉkʉ ngɨlangɔ ingbaa nalɔ anʉya agbanda.

²⁵ Ya꞉ɓio tɨa saa ɓeetu ngɨyɔ ikuɓa, ngbinga ngɨa ɓa꞉mʉɓakaka-ɔɔ amʉsalaba.

²⁶ Akɔpananiso ɛsɨ yɔ mʉkɔmbʉ ngʉwangɔ, ɓa꞉tɛndakɨa mabii mʉngana nɔ ɨkʉʉ yɔngɔ ɓɔ: «Ngama ɔ Ɓayuda».

²⁷ Ɓa꞉ɓakaka Yeso akʉʉ ɔ mʉsalaba, ɨhɔ nɔ ɓombi ɓɔ ndiɓo ɓapɨnɨ, mʉngana nɔ ɨkɔndɔ yɔ gue ɔngɔ, wɔmɔ akɔ ɨyɛ aɗeku. [

²⁸ Yaka ngɨyɛ ɓa꞉tɛndakɨa amati ɔ Mabii ɓɔ: «Ɓa꞉mupoo-ɔɔ ɨhɔ nɔ ɓombi ɓɔta ɓɨɓɨ.» Ɨyɔ ɨyɛnɛnɨ ya꞉kyananakɨa.]

²⁹ Ɓombi ngʉɓa ɓa꞉ɓio achana ananɨ, ɓɔ꞉pʉnga nayɔ asɛaka, nɔ, kpʉkʉma mɨtʉ ngɨyeɓo. Ga ɨɓɔ nayɔ ɓɔ: «Ɓɛ! Ʉwɛ, ngɨa wapanjaa ɨkáá yɔ Asɔɓɨɨ, nɔ, wɔɨtuɓoko ɓata ambise ɔ makwaa kaatʉ!

³⁰ Heisono-sɨ tɨa ʉwɛ makwɔngɔ, nɔ, wɔjo inani amʉsalaba.»

³¹ Ɓakumukumu nɔ ɓapananakɨa ɓɔ mapanʉ, ɨɓɔ ati eɓo, ɓɔ꞉mʉyapakiso kʉ yapakisoo. Ga ɨɓɔ ɓɔ: «A꞉heiso pɔngɔ ta ɓangɛ, yakamɛngana, angɔmʉ ɓata aheisono ɨyɔ makwɔngɔ!

³² Ɨyɔ Klisito, ngama wɔ Ɓaɨsalaɛlɛ, ujo gɔ-sɨ ɓʉnʉ tɨa akʉʉ ɔ mʉsalaba, iɗo ambɔ tɨna, nɔ tɨbaya!» Ɓombi ngʉɓa ɓa꞉ɓʉɓakaka ɨhɔ nɔ atɨ Yeso, ɓɔ꞉mʉsɛaka kʉ sɛakanɨ.

Ingwo ngɨyɔ Yeso

³³ Ɨpá-sɨ ta amusoti, ga umomo ta ɓɔ ɗɨɛ, akɔ ɨkʉmbʉ iɓomu, akɔɓɔya ta akɔ angbinga ngɨa ɔ ɨsaɓɔkʉ wɔ ɨpasɨ.

³⁴ Ta akɔ angbinga ngɨananɨ ɔ ɨsaɓɔkʉ wɔ ɨpasɨ, Yeso ɔ꞉natɨa nɔ iso yɛta ɓʉmʉ akɔsugo ɓɔ: «Eloi, Eloi, lama sabakɨtana?» Ɨyɛ yasugo ɓɔ: «Asɔɓɨɨ ngɨa asɛmɨ, Asɔɓɨɨ ngɨa asɛmɨ, wɔ꞉nasɨa ɓanɨ dɔtanɨ?»

³⁵ Nganangana ɔ ɓombi ngʉɓa ɓa꞉ɓio ananɨ, nɔ, nʉka yaka ngɨyɛnɛnɨ, ɓɔ꞉sugo ɓɔ: «Ʉkeni, aki-ɛɛ asoko Ɛlɨa!»

³⁶ Mombi mʉngana ɔ꞉sɨka ɨkyɛmʉ mɛngana yɛta foufou, ɔsa nayɔ bangʉ anuno amati ɔ ʉkyɛpʉ wɔta koi. Ɔ꞉ɨnjenjiso amʉtʉ wɔ ʉmbamba, nɔ, ɔminjo Yeso ga ja. Ga ɨyɔ ɓɔ: «Ɓɛtɨeni! Tɨna-sɨ adiga Ɛlɨa ɛka nayɔ anudiso inani-ɛɛ ɨkanɨ.»

³⁷ Ɨyɔ, Yeso ɔ꞉natɨa nɔ iso yɛta ɓʉmʉ, nɔ, ɔ꞉kio mʉtɨma.

³⁸ Ɨyɛ a꞉kio nayɔ mʉtɨma ɓanɨ, ɨpʉkʉ yɛta ɨja ngɨyɛ ɓa꞉njenjo amati ɔ ɨkáá yɔ Asɔɓɨɨ, yɔ꞉natʉanɨa akɔ magbaa kapɨnɨ ga hua, anɨngwa akʉʉ nɔ akɔɓɔya ta aɨsɨ.

³⁹ Ngama wɔ ɓasʉda ngɨa ɛ꞉na aka akio-ɔɔ mʉtɨma apɛɨ angɔ ɓanɨ, ɔ꞉sugo ɓɔ: «Gue ngɨa a Mwana ɔ Asɔɓɨɨ ta ingono.»

Ɓadɛmʉ ɓɔ mʉsalaba

⁴⁰ Ananɨ, ya꞉ɓio nɔ mukpekpe yɔ ɓoi ɓɛmaakɛ ɓɔ kɛlɛ. Ya꞉ɓio atɨ Malɨa Magadala, Malɨa ngɨa inye wɔ nɛgbama Yakɔɓɔ nɔ Yɔsɛ, nɔ Salɔmɛ.

⁴¹ Ɨyɛ Yeso a꞉ɓio jɛnɛ-ɔɔ anɔ Galilaya, ɓoi ngʉɓa ɓa꞉tɨmʉkpatanaka nɔ nayɔ akyananakɨa, ʉɓɔnanɨ, tɨa kʉ nɔ ɓɔmɔ ɓaja, ʉɓa ɓa꞉sa naɓɔ inani anɔ Yelusalɛma.

Ɓɔmayɔ ndʉtʉ yɔ Yeso aɓʉnjaʉ

⁴² Ya꞉ɓio tɨa nɔ ɨpasɨ, yɔ ɓisi ngʉɓɔ, tambanakɨa ɓisi ɓɔ nuhomuo ngʉɓɔ Ɓayuda.

⁴³ Yɛjɛfʉ ngɨa wɔ Alɨmatɛa, a꞉ɓio mombi ata mʉja amati ɔ Ubua wɔ Ɨkʉʉ Nɔgbɛ. Ɨyɔ, a꞉ɓio kʉ aɓɛtɨa Ɓʉngama ɓɔ Asɔɓɨɨ. Kʉdɔ, a꞉sɨka iguegue anɨka atɨ Pilato anɨta ndʉtʉ yɔ Yeso.

⁴⁴ Pilato anʉka ɓɔ Yeso a tɨa muwe, yɔmʉkyaka ta kyaka. Kʉdɔ, ɔ꞉misoko ngama wɔ ɓasʉda, nɔ, ɔ꞉muɓokuo ɓɔ ɔwo ndɨ kʉ ɨjɛnɛ.

⁴⁵ Ndʉ ngama wɔ ɓasʉda a꞉minjo masaʉ ɓɔ gba, kʉdɔ, ɔ꞉tɔsɨa tɨa ɓɔ Yɛjɛfʉ ɨsɨka ndʉtʉ yɔ Yeso.

⁴⁶ Yɛjɛfʉ ɔ꞉kaya malɨkana, ɔ꞉diso Yeso amʉsalaba, nɔ, ɔ꞉mupokoɓoko nɔ malɨkana ngʉɔnanɨ. Kʉdɔ, a꞉mʉmaya amati ɔ ɓʉnjaʉ ngʉɓa ɓa꞉ɓʉchwa amati wɔ ikopi, nɔ ɔ꞉tutuo ikopi ananɨ aumongu wɔngɔ ga kugbu.

⁴⁷ Atɨ Malɨa Magadala nɔ Malɨa ngɨa inye wɔ Yɔsɛ, ɓa꞉ɓio ta ananɨ, anɨna ɓɔ, ɓɔ꞉mʉnapɨɔ gbanɨ.