Malɨkɔ 14 - Mʉkpanganɨa nɔ Agɔmɛ ɔ Ɨtakɨtakɨ

Ɓɔsingekio Yeso lidimi

¹ Ya꞉ɓio yɔtukoeni tɨta makwaa kapɨnɨ akɔɓɔya akɔ ʉmbɔ wɔ chwɛa aɓubaya, ʉwa, wɔ mɨkatɨ ngɨyɛ yangɔmʉ nɔ ɓʉtɨ ɓɔta ɓufuise. Ɓakumukumu ɨhɔ nɔ ɓapananakɨa ɓɔ mapanʉ, ɓa꞉ɓio ahata ɨgbaa ngɨyɛ ɓamʉfa-ɔɔ Yeso aɓaɗi, nɔ ɓɔ꞉mʉwa.

² Dɔ ɓa꞉ɓio asugo ɓɔ, ɓa꞉tɨmʉfamʉ pɛpɛ ta aɓisi ɓɔ ʉmbɔ, akumo ɓɔ ɓombi ɓatɨsɨkanakɨamʉ.

Moi ɔto Yeso nɔ malaji

³ Atɨ Yeso ɓa꞉ɓio anɔ Bɛtania, atɨ mombi mʉngana ɨya a꞉ɓio jɛnɛ nɔ keɓukeɓu, ino ɓɔ Simoni. Tɨa angbinga ɔ dyakaka, ga moi mʉngana inani ambɛnɨ ɓɔ ngbuu. Moi ngɨananɨ, a꞉ɓio ɔpoteni supa wɔ malaji wɔ ɨgabʉ ɓʉmʉ, ʉwa, ɓa꞉ʉtambanaka nɔ mawʉa kɔta maɗo nɔgbɛ. Ɔ꞉ɓundo monu kɔ supa, ga ɨyɔ nɔ Yeso malaji amʉtʉ ɓɔ fʉɔ fʉɔ.

⁴ Yaka ngɨyɛnɛnɨ, ya꞉kɨa ɓombi ngaɓɔmɔ ananɨ ta ɓɨɓɨ. Ɓɔ꞉ɓokwonoko ati eɓo ɓɔ: «Ɔyanakiso-sɨ malaji wɔ ɨgabʉ ɓanɨ dɔtanɨ?

⁵ Ambɔ ɓɔʉgabɔ pɨ ta gaba akɔ ɓagyɛgyɛ lɨmɨa ɗietu, nɔ ɓagyɛgyɛ ɓɔngɔ, ɓɔɓinjekio ɓajanga. Kʉdɔ, ɓa꞉kwɨa moi ngɨananɨ ʉnganga kingono.»

⁶ Yakamɛngana, ga Yeso naɓɔ ɓɔ: «Sɨeni-sɨ moi ngɨa sɨanɨ! Ná-sɨ nayɔ adamaniso ayaka yɔ ɨmanɨ? Ɨyɔ, ɔ꞉nakɨɔ ɨmɨ ta yaka yɛta iɗo.

⁷ Inu náɓio nɔ ɓajanga masi ta maɓomu, nákwanana naɓɔ akɔsalɨa angbinga muɓomu ngɨa nábayaa-ɔɔ. Yakamɛngana, ɨmɨ, nangɔɓio ɨhɔ nenu masi maɓomu.

⁸ Ɨyɔ, ɔ꞉kɨɔ ta yaka ngɨyɛ yɔkwananɔ pɛngɛ nɛmɨ akɨa. Ɔ꞉naɓasakɔ ɨmɨ, nɔ malaji akɔtambanaka ndʉtʉ ngɨyɛsɛmɨ, pɛɨ ngɨa ɓa꞊nahʉna suo-ɔɔ.

⁹ Ya ɓanɨ, ɨmɨ, nanenu asigio ɓɔ akɔ lindu lɔ dɔdɔ liɓomu, aki ɓaɓɨɓɨakɨa sina-ɛɛ Ɨsaʉ yɛta Iɗo, ɓa꞊ɓɨchwa uduɓa wɔ yaka ngɨyɛ moi ngɨa ɔ꞉kɨɔ, kʉ chwanɨ, nayɔ akɔtunguo.»

Yuda ɔmanɔ akɔgaba Yeso

¹⁰ Yuda ngɨa a꞉ɓio ino kʉ ɓɔ Ɨsɨkalɨɔta, mʉngana ɔ ɓatitima tɛkɛɓɛ nɔ ɓapɨnɨ, ɔ꞉sa akɔgbʉka ɓakumukumu ayaka yɔ gaba Yeso.

¹¹ Ɨyɛ ndʉ, ɓɔ꞉ka yaka ngɨyɛ ɛ꞉ka naɓɔ anʉngakɨa ɓɔ gba, kʉdɔ, ɓɔ꞉kwa ɨgyagya, nɔ, ɓɔ꞉kɔnɔ naɓɔ ga ɓaminjo ɓagyɛgyɛ. Kʉdɔ, ɔ꞉pʉnga ɨyɔ tɨta ahata ɨngbaa yɔ gaba Yeso.

Yeso ɔdyɔ idyo yɔ ʉmbɔ ɨhɔ nɔ ɓakpata

¹² Ya꞉ɓio ananɨ tɨa ɓisi ɓɔ mʉpʉnganɨa wɔ ʉmbɔ wɔ mɨkatɨ ngɨyɛ yangɔmʉ nɔ ɓʉtɨ ɓɔta ɓufuise. Kʉ nɔ ɓisi ngʉɓɔnanɨ, ɓa꞉ɓiwa mwana ɔ kɔndɔlɔ ɔ ʉmbɔ wɔ chwɛa aɓubaya, kʉ nɔ ɓisi ngʉɓɔnanɨ. Ɓatitima ɓɛ꞉ka akɔɓokiso Yeso ɓɔ: «Wakʉnda ɓɔ tɨsa nɔwɛ atambanakɨa ʉmbɔ gbanɨ?»

¹³ Kʉdɔ, ɔ꞉tʉma ɓombi ɓapɨnɨ ati eɓo, nɔ, ɔ꞉ɓusigio ɓɔ: «Seni inani amati ɔ gʉlʉ, nábijono nɔ atɨ gue mʉngana ɔtʉmbeni ʉpata wɔ mipo. Mʉkpateni ɨyɔ!

¹⁴ Aki abikumonio-ɛɛ, sigieni makwɔ ɨkáá ngɨyɛnɛnɨ ɓɔ: ‹Mʉpananakɨa anɔwɛ anɨta ɓɔ: Ɨda ngɨyɛ a꞊dya-ɔɔ ʉmbɔ wɔ chwɛa aɓubaya ɨhɔ nɔ ɓakpata ngʉɓangɔ ya gbanɨ?›

¹⁵ Ɨyɔ, anɨpanaka mbɛnɨ ata mʉja amati ɔ ɨkáá mɛngana yɛta ikongo ɓɔ. Mbɛnɨ ngɨananɨ a꞊ɓio mʉtambanakɛ muɗo, nɔ yaka iɓomu tɨta ʉndanɛ. Nábi nesu atambanakɨa ɨda yɔ ʉmbɔ inani.»

¹⁶ Ɨyɛ ndʉ ɓakpata ɓa꞉ngwɨa kyɛnda, nɔ, ɓɔ꞉ɓɔya inani amati ɔ gʉlʉ, ɓɔ꞉gbʉka yaka iɓomu ta ndʉ aka Yeso a꞉ɓusigio-ɔɔ. Kʉdɔ, ɓɔ꞉pʉnga tɨta tambanakɨa ʉmbɔ wɔ chwɛa aɓubaya.

Yeso ɔɓɨɔ ɓɔ ɓanɨsa nayɔ agaba

¹⁷ Tɨa nɔ ɨpasɨ ɓɔ dʉʉ, Yeso ɔ꞉tɔɓɔya tɨa ɨyɔ, ɨhɔ nɔ ɓatitima tɛkɛɓɛ nɔ ɓapɨnɨ.

¹⁸ Tɨa akɔ angbinga ngɨa ɓa꞉ɓio-ɔɔ adyakaka akɔ mɛja, ga ɨyɔ naɓɔ ɓɔ: «Ingono, nanenu asigio, mombi mʉngana, ati eno, ɨya tadyakaka ɨhɔ nayɔ aka, anɨsa nɛmɨ agaba.»

¹⁹ Kʉdɔ, ɓɔ꞉kwa ikoko, mombi nɔ mombi ati eɓo, ɔ꞉muɓokuo ɓɔ: «Ya ndɨ dɔ ɨmɨ? Ya ndɨ dɔ ɨmɨ?»

²⁰ Ga Yeso naɓɔ ɓɔ: «Ya ta mʉngana ati eno, ɔ ɓombi tɛkɛɓɛ nɔ ɓapɨnɨ. Mombi ɔngɔ adyakaka ta ɨhɔ nɛmɨ amati ɔ sanɨ aka.»

²¹ Ɨmɨ Mwana ngɨyɔ Mombi, nɔmanɔ aniwo ngbanga ta ndʉ aka Mabii ka꞉tɛndanakɨa-ɔɔ akʉʉ asɛmɨ. Yakamɛngana, ikoko pɛpɛ dɔ akɔ mombi ngɨa anɛmɨ agaba! Ambɔ mombi ngɨananɨ, a꞉tɨnɔtanɨamʉ gɔ jɛnɛ pɔ nɔtanɨa!

Yeso ɔpʉngɔ nɨdya idyo yɔ ʉmbɔ ɨhɔ nɔ ɓakpata

²² Akɔ angbinga ngɨa ɓa꞉ɓio-ɔɔ tɨa adyakaka, Yeso ɔ꞉sɨka mʉkatɨ, nɔ, ɔ꞉bibiso Asɔɓɨɨ, ɔ꞉ʉɓundo, nɔ ɔ꞉ɓinjekio ɓakpata. Nɔ ɔ꞉ɓusigio ɓɔ: «Sɨkeni, ɨyɛnɛnɨ, ya ndʉtʉ ngɨyɛsɛmɨ!»

²³ Mbise ɔngɔ, ɔ꞉tɔsɨka tɨa ʉpata, nɔ, ɔ꞉bibiso ɓata Asɔɓɨɨ, ɔ꞉tɔɓinjo, nɔ, ɓɔ꞉mwa ta ɓaɓomu.

²⁴ Kʉdɔ, a꞉ɓio naɓɔ ɓɔ: «Ʉkyɛpʉ ngʉwakɛ, wa menike ngʉkɔsɛmɨ, ʉka, kɔ Agɔmɛ ngɨyɔ ɨtakɨtakɨ, ʉka ka꞊njɨlaka akɔ yaka yɔ ɓombi ɓaja.

²⁵ Nanenu asigio ta ingono, na꞊ngɔmwa sina ɓata ʉkyɛpʉ ngʉwa, akɔɓɔya ta aka na꞊mwa sina-ɔɔ, ʉwa, wɔ ɨtakɨtakɨ akɔ Ɓʉngama ngʉɓɔ Asɔɓɨɨ.»

Pɛtɛlɔ ɔmanɔ atata Yeso

²⁶ Tɨa ananɨ, ɓɔ꞉sʉa ʉmbɔ wɔ bibiso Asɔɓɨɨ. Mbise ɔngɔ, ɓɔ꞉chwɛa, nɔ ɓɔ꞉sa aɨkpangba yɔ Mijeituni.

²⁷ Ga Yeso naɓɔ ɓɔ: «Inu ɓaɓomu, nɔmanɔ suo anɨkwa ambamba. Dɔ, ya꞉tɛndanakɨa ɓɔ: ‹Na꞊wa mʉpɛmakɨa wɔ ɓakɔndɔlɔ. Nɔ, mutunduga wɔ ɓakɔndɔlɔ, wɔ꞊gbengono.›

²⁸ Gʉtʉ ɓanɨ, na꞊jʉkana akɔ ingwo ta jʉkananɨ, nɔ, nabi nenu aɓɛtaka tɨta anɔ Galilaya.»

²⁹ Ga Pɛtɛlɔ nayɔ ɓɔ: «Gʉtʉ báya ngɨyɛ ɓombi ngʉɓɔmɔ ɓaɓomu yɔkweni akʉʉ asɔɔ, pɛpɛ akɔ ɨmɨ, pɔ bele.»

³⁰ Yeso ɔ꞉mutosio ɓɔ: «Nanɔwɛ asigio ingono ɓɔ, naɓutu ngɨyɔ ɓʉɓʉnʉ, pɛɨ ngɨa kɔɓɔ anatɨa-ɔɔ machaa kapɨnɨ, ʉwɛ Pɛtɛlɔ, wa꞊natata machaa kaatʉ.»

³¹ Ɨyɔ, Pɛtɛlɔ ɔ꞉kpakpa ta ɓɔ ndi, ɓɔ: «Gʉtʉ yɔɓieni ta ɓɔ ɨmɨ, niwo ɨhɔ nɔwɛ, pɛpɛ ɨmɨ nɔwɛ atata, fi fili fi.» Ɨɓɔ ɓaɓomu, ɓɔ꞉kwakɨa asugo ta yaka mɛngana ngɨyɛnɛnɨ.

Yeso anɨta Asɔɓɨɨ anɔ Gɛtɛsɛmanɨ

³² Ɓɔ꞉tejoo tɨa aʉmʉa ngʉwa wa꞉ɓio ino ɓɔ Gɛtɛsɛmanɨ. Ga ɨyɔ nɔ ɓakpata ɓɔ: «Inu, uwolokeni aka, angbinga ngɨa ɨmɨ, na꞊ɓio akɔnɨta Asɔɓɨɨ.»

³³ Yakamɛngana, a꞉sɨka ta atɨ Pɛtɛlɔ nɔ Yakɔɓɔ nɔ Yɔanɨ, kʉdɔ, ɔ꞉pʉnga tɨa nɨkwa ʉɓá, ɨhɔ nɔ mbambanio.

³⁴ Ga ɨyɔ naɓɔ ɓɔ: «Mʉtɨma wɔnasioko nɔ ikoko tinene nɔ ingwo. Inu, tukoeni aka, nɔ, ɓieni ta ɓaɓɨsɨnɨ.»

³⁵ Mbise ɔngɔ, ɨyɔ anɨsɨngana ta nɔ pɛɨ ndʉ aka, ɔ꞉kwa aɨsɨ ga kpu, nɔ, ɔ꞉potio nɨta ɓɔ: «Yiɓio gɔ pɛngɛ adaa ngɨa, angbinga ngɨa ɔ ikoko akɛ, akɛlɔ-ɔɔ kɛlanɨ, mba!»

³⁶ Ga ɨyɔ ɓata ɓɔ: «Iii, akɔ ʉwɛ, Aba, yaka yɛta ɓʉkaɨ yangɔmʉ. Akelisio ɓaka ʉpata wɔ ɓʉkaɓʉkaɨ ngʉwa kelisioni. Yatiɓiomʉ dɔ ndʉ ɓʉkʉnda ɓɔsɛmɨ, yakamɛngana, yiɓio ndʉ ɓʉkʉnda ɓɔsɔɔ.»

³⁷ Ɨyɛ, a꞉tɔa nayɔ agbʉka ɓakpata, ɔ꞉ɓʉgbʉka ɓɔfanani tɔɔ. Ga ɨyɔ nɔ Pɛtɛlɔ ɓɔ: «Hoo, ha Simoni! Ɨyɛ yɔ tɔɔ yɔkwɔ pɛpɛ-sɨ tanɨ? Wangɔɓiomʉ gʉtʉ pɛngɛ ɓaɓɨsɨnɨ ta amati ɔ saa mʉngana ɓʉtʉʉ?

³⁸ Ɓieni ta ɓaɓɨsɨnɨ, nɔ, anɨta Asɔɓɨɨ, dɔ, nátɨkumoniomʉ ikanio! Mʉtɨma wa ɨwɔ ta nɔ angu, yakamɛngana, ndʉtʉ yanɔ majɛjɛ.»

³⁹ Ɔ꞉ɓʉsɨa ɓata, nɔ, ɔtoyo ɓata kʉ nɨta mɛngana ngɨyɛnɛnɨ.

⁴⁰ Ɔ꞉tɔa ɓata aki ɓakpata ɓa꞉ɓio-ɛɛ, nɔ, ɔ꞉ɓʉgbʉka ta atɔɔ. Dɔ, mesu ka꞉ɓio naɓɔ tɨa ngbangii ngbangii nɔ tɔɔ. Sɔkɔmʉ pɔ ɓɨmbɨa ɓɔ, ɓa꞉mutosio tanɨ.

⁴¹ Ɔ꞉ka ɓata kyɛnda ngɨyɔ ɓeetu, ga ɨyɔ naɓɔ ɓɔ: «Eeɓe, ná ta amati ɔ tɔɔ, nɔ, nuhomuono! Angbinga ɔndanɔ dɔ tɨa ʉndananɨ-e! Ɨna, mwana ngɨyɔ mombi ɨyananɨ, ɓɔ꞉mʉgabɔ ɓanɨ alɨkɔndɔ lɔ ɓombi ɓɔta ɓɨɓɨ-e!

⁴² Jʉkaneni, tɨseni! Ineni-sɨ, mombi ngɨa ɔ꞉nagabɔ ɨyakɛ, a tɨa tinene-a!»

Ɓɔfɔ Yeso

⁴³ Ta gagaa ngɨananɨ, Yeso ta ɓɔ angɔpipenimʉ akɔyaka, ga Yuda ɓɔ buu, mʉngana wɔ ɓakpata tɛkɛɓɛ nɔ ɓapɨnɨ ngʉɓangɔ. Ɨyɔ, a꞉ɓio ananɨ tɨa ɨhɔ nɔ ndiba ɔ ɓombi ɓɔ ɗite, tɨa akɔ mbɔtɨa, tɨa akɔ mangbe. Ɓangama ɓɔ ɓakumukumu nɔ ɓapananakɨa ɓɔ mapanʉ, ɨhɔ nɔ ɓagʉgʉ ɓɔ Ɓayuda, akɛ ɓa꞉tʉma ɓombi ngʉɓɔnanɨ.

⁴⁴ Yuda ngɨa a꞉mʉgaba a꞉ɓio ɓɔ enjekieni ɓangbanga ɓɔ: «Mombi ngɨa nabimuɓokuo nayɔ anɨmwa ɨngʉngʉ, ambɔ ɨyɔ ɨyananɨ, mufeni ta nɨfa, nɔ, nɔsa nayɔ ta nɨsa.»

⁴⁵ Ɨyɛ a꞉ɓɔya nayɔ, ɛ꞉sɨngana tinene nɔ Yeso, ga ɨyɔ ɓɔ: «Ha mʉpananakɨa!» Nɔ, ɔ꞉mʉmwa ɨngʉngʉ ta ɓanɨ.

⁴⁶ Kʉdɔ, ga ɓombi ngʉɓɔnanɨ, lɨkɔndɔ akʉʉ ɔ Yeso ga hrii, ga ɨɓɔ nayɔ ɓɔ kwɨ.

⁴⁷ Mombi mʉngana atɨ ɔ ɓakpata ngʉɓa ɓa꞉ɓio ananɨ, ɔ꞉chwɛiso mapi ga fʉa. Nɔ, ɔ꞉mʉtɨna mombi ɔ tɛa mʉngana ɔ ɓakumukumu uchwei ga chwaa.

⁴⁸ Kʉdɔ, ga Yeso naɓɔ ɓɔ: «Ya tanɨ ɨyɛ nɔ́꞉nɛkɨɔ-ɔɔ ɓɔ ngbutungbutu, nɔ mapi, nɔ mangbe, nɛmɨ anɨfa ndʉ niɓio mombi ɔ ndiɓo ɓanɨ?

⁴⁹ Sɨ maɓisi maɓomu ta꞉ɓio pɔngɔ ta ɨhɔ nenu, ɨmɨ, akɔpanɨa amati ɔ ɨkáá yɔ Asɔɓɨɨ ngɨyɛ yɛta ɨja, sɔkɔmʉ nɨnafa pɔ ɓisi pɔ mʉngana. Yakamɛngana, ya ta dɔ yaka ngɨyɛ ya꞉tɛndanakɨa amati ɔ Mabii, yɨkyananakɨa.»

⁵⁰ Kʉdɔ, ɓakpata ɓaɓomu ɓɔ꞉mʉsɨa, nɔ, ɓɔ꞉nanjana nɔ bangʉ ga waa.

⁵¹ Ta nɛgbama mʉngana ngɨa akɛ a꞉ɓio ɓɔ ɔpɛnɨeni malɨkana, ɛ꞉sɨnganaka kpataka Yeso ambise. Ɓɔ꞉kanio ga ɓamʉfa,

⁵² yakamɛngana, ɔ꞉ɓʉsɨa nɔ ɨpʉkʉ ga vu, ga ɨyɔ bangʉ munduu ga gɔɓɔɓɔ.

Ɓɔkio mʉkɔmbʉ ngʉwɔ Yeso

⁵³ Kʉdɔ, ɓa꞉ɓɔya nɔ Yeso atɨ kumukumu ngɨa ata mʉja ga buu. Tɨa ananɨ, ɓangama ɓɔ ɓakumukumu ɓaɓomu, ɨhɔ nɔ ɓagʉgʉ ɓɔ Ɓayuda nɔ ɓapananakɨa ɓɔ mapanʉ ɓaɓomu, ɓɔ꞉mɔmanakɨa ananɨ ga kyɔ kyɔ kyɔ.

⁵⁴ Pɛtɛlɔ a꞉ɓio naɓɔ akpataka ta ambise ɗu ɓɔ kɛlɛ. Ɨyɛ, e꞉joo akɔ ɨmbaa ngɨyɔ kumukumu ngɨa ata mʉja, ɨyɔ, Pɛtɛlɔ ɔ꞉sa awolo atɛa dyaa, ɨhɔ nɔ ɓombi ɓɔ tɛa.

⁵⁵ Ɓakumukumu, ɨhɔ nɔ ubua ngʉwa wɔta ʉja, ɓa꞉ɓio ahata ɓadɛmʉ ɓɔ mʉjɛɛ, dɔ, ɓɨna ɨngbaa ngɨyɛ ɓamuwisiso nayɔ Yeso. Sɔkɔmʉ ɓɨ꞉na ɨngbaa yɔngɔ pɔ bele.

⁵⁶ Dɔ ɓombi ɓaja, ɓa꞉ɓio nayɔ asingekio ta mʉjɛɛ. Yakamɛngana, ɓa꞉ɓiomʉ anʉkana ati eɓo.

⁵⁷ Ɓombi nganangana, ɓa꞉sa nayɔ asingekio mʉjɛɛ asugo ɓɔ:

⁵⁸ «Tɔ꞉ka pɛ ɨyɔ asugo ɓɔ: ‹Ɨmɨ na꞊panja suo ɨkáá yɔ Asɔɓɨɨ ngɨyɛ, ɓa꞉kɨa nɔ lɨkɔndɔ. Ambise ɔ makwaa kaatʉ, nɔ꞊tuɓoko yɔmɔ, sɔkɔmʉ ɓata ɨyɛ lɨkɔndɔ lɔ ɓombi ɓa꞉ɨkɨa.›»

⁵⁹ Gʉtʉ ta nɔ ɨngbaa ngɨyɛnɛnɨ, sɔkɔmʉ mʉjɛɛ ngʉweɓo wɨjɛa pɔ bele.

⁶⁰ Mbise ɔngɔ, ɨyɔ kumukumu ngɨa ata mʉja, ɛ꞉maa ga gba, ati ɔ ambaja ɔ ɓombi, ɔ꞉potio ɓɔkwoko Yeso yaka. Ga ɨyɔ nayɔ ɓɔ: «Wangɔ ndɨ atosio ɨkyɛmʉ? Wa-sɨ ʉwɛ, asugo tanɨ akɔ chɔngɨa ngɨyɛ ɓanɔwɛ achɔngɨa nayɔ ɨpɛ ɓɔ?»

⁶¹ Yeso ɔ꞉gbaa ta ɓɔ woo, sɔkɔmʉ imutosio yaka pɔ mɛngana. Yakamɛngana, kumukumu ngɨa ata mʉja ɔ꞉muɓokuo ɓata kʉ ɓɔ: «Wa ndɨ Klisito, mwana Asɔɓɨɨ ngɨa ɓamubibiso?»

⁶² Kʉdɔ, Yeso a꞉ɓio nayɔ ɓɔ: «Ya ɓanɨ, nɛ́꞊na sina mwana ngɨyɔ mombi ɓawele aɨkɔndɔ yɔ guongɔ, yɔ Asɔɓɨɨ ngɨa ɔ angu, nɔ, anɨka amati ɔ lɨkʉɓa lɔ ɓisi.»

⁶³ Kʉdɔ, kumukumu ngɨa ata mʉja ɔ꞉natʉa lɨpʉkʉ ngɨlangɔ ga hua hua, ga ɨyɔ ɓɔ: «Tahata dɔ ɓata ɓadɛmʉ nga ɓeno tanɨ?

⁶⁴ Sɨ nɔkɔ aki ɔ꞉sɛaka-ɛɛ Asɔɓɨɨ tɛ. Inu, nɛ́nɔ tanɨ?» Ga ɓombi ɓaɓomu ɓɔ: «Ɔsisekio ta nɔ ingwo!»

⁶⁵ Ɓombi ngaɓɔmɔ ati eɓo ɓɔpotio nayɔ tokoko nɔ maɗaʉ gbɛgbɛ ta ananɨ. Ɓɔ꞉mʉsanga mesu nɔ ʉgbaa wɔ ɨpʉkʉ, nɔ ɓɔ꞉potio nayɔ ɓɛnda makɔfɨ ɓɔ mba mba, nɔ, ɓɔ꞉muɓokiso ɓɔ: «Kwa ɨgbɛ, nɔ, wɔchwa mombi ngɨa ɔnaɓɛndɔ!» Nɔ ɓapɛmakɨa, ɓɔ꞉mʉtɛtɨa ta nayɔ natʉa lɨkɔndɔ ɓɔ hua hua.

Pɛtɛlɔ ɔtatɔ Yeso

⁶⁶ Angbinga ngɨa Pɛtɛlɔ a꞉ɓio-ɔɔ ta inani akɔ ɨmbaa, moi mʉngana, mombi ɔ tɛa ɔ kumu-kumu, ɛ꞉ka.

⁶⁷ Ɛ꞉na Pɛtɛlɔ ananɨ a꞉ɓio-ɔɔ atɛa dyaa, ɔ꞉mʉkanga ɓɔ ngbee, ga ɨyɔ nayɔ ɓɔ: «Ʉwɛ ananɨ wa-ɔɔ, ná꞉ɓio pɛ ta ɨhɔ nɔ atɨ Yeso ngɨa Mʉnajalɛtɨ.»

⁶⁸ Pɛtɛlɔ ɔ꞉tata mesu ta ɓɔ ngbakalʉ, ga ɨyɔ ɓɔ: «Nangɔmʉ ɨmɨ nayɔ anɨmbɨa, nɔ, nangɔmʉ anɨmbɨa ɓɔ wakʉnda asugo tanɨ.» Mbise ɔngɔ, ɔ꞉sa anambamba ɔ umongu ngʉwa wɔta ʉja. Nɔ, kɔɓɔ akɔnatɨa.

⁶⁹ Moi mʉngana ngɨa ta ananɨ, ɔ꞉tɔmɨna ɓata ta ɨnanɨ, ga ɨyɔ nayɔ ɓɔ: «Gue ngɨa, a ta mʉngana ɔ ɓombi ngʉɓɔnanɨ.»

⁷⁰ Pɛtɛlɔ ɔ꞉tata ɓata kʉ tata. Agbalanɨa ndʉ aka, ɓombi ngʉɓa ɓa꞉ɓio ananɨ, ɓɔ꞉musigio ɓata kʉ ɓɔ: «Ya ta ingono ɓɔ, ʉwɛ, wa mʉngana ɔ ɓombi ngʉɓɔnanɨ, dɔ ʉwɛ, wa kʉ Mʉgalilaya.»

⁷¹ Kʉdɔ, ɨyɔ Pɛtɛlɔ ɔ꞉kio silika ɓɔ: «Asɔɓɨɨ ɨnakɨa ɓʉɓɨɓɨ nɔsugeni mʉjɛɛ! Manja ta aba, ɨmɨ nangɔmʉ anɨmbɨa gue ngɨananɨ, nákɔsugo yaka yangɔ pɔ bele.»

⁷² Pɔ gbalanɨa ndʉ aka, kɔɓɔ ngɨyɔ ɓepini ɔ꞉natɨa ɓata. Nɔ, Pɛtɛlɔ ɔ꞉tunguo yaka ngɨyɛ Yeso a꞉musigio ɓɔ: «Pɛɨ ngɨa kɔɓɔ anatɨa-ɔɔ machaa kapɨnɨ, wa꞊natata machaa kaatʉ.» Kʉdɔ, ɔ꞉chwɛa aɓei gagaa, nɔ, ɔ꞉potio tɨta ndɨa.