Malɨkɔ 13 - Mʉkpanganɨa nɔ Agɔmɛ ɔ Ɨtakɨtakɨ

Tɔwa ngɨyɔ Yeso

¹ Ngbinga ngɨa Yeso a꞉ɓio-ɔɔ achwɛa amati ɔ ɨkáá yɔ Asɔɓɨɨ, mʉkpata wangɔ mʉngana, ɔ꞉musigio ɓɔ: «Mʉpananakɨa, ɨna makopi ngʉka nɔ lɨkáá lɨta lɨkpɔkpɔ ngɨlɛ!»

² Ga Yeso nayɔ ɓɔ: «Sɨ wanɨna lɨkáá lɨta lɨkpɔkpɔ ngɨlɛ kʉtaa! Ikopi pɔ mɛngana ya꞊ngɔtukoo sina ituɓoke akʉʉ ɔ ikopi ngayɛmɔ, dɔ, ɓa꞊kʉpanja sina ta panja!»

Mʉpʉnganɨa wɔ ɓʉkaɓʉkaɨ

³ Angbinga ngɨa Yeso a꞉ɓio-ɔɔ ɓawele akʉʉ ɔ ɨkpangba yɔ Mijeituni, amondu ɔ ɨkáá yɔ Asɔɓɨɨ. Atɨ Pɛtɛlɔ, nɔ Yakɔɓɔ, nɔ Yɔanɨ nɔ Andɛlɛa ɓɔ꞉sɨka Yeso, nɔ, ɓɔ꞉ɗɔana-sɨ tɨta ɨɓɔ naɓɔ anambamba ɓɔ kɛlɛ, nɔ, ɓomuɓokuo ɓɔ:

⁴ «Atɨɓɨa-sɨ angbinga ngɨa yaka ngɨyɛnɛnɨ, ya꞊kyananakɨa sina-ɔɔ. Nɔ kɔkɔ nga ino tanɨ, ɨya, isu tapemiso-ɔɔ ɓɔ ya tɨa tinene akyananakɨa?»

⁵ Yeso ɔ꞉ɓutosio ɓɔ: «Pɛmanɨeni pɛmanɨanɨ, mombi pɔ mʉngana a꞉tɨnɨpɛtamʉ!

⁶ Dɔ ɓombi ɓaja ɓɛ꞊ka sina nɔ ino yɛsɛmɨ, asugo ɓɔ: ‹Ɨmɨ akɛ na Masia.› Nɔ ɓa꞊pɛtaka sina ɓombi ɓaja.

⁷ Ngbinga ngɨa, ná꞊pʉnga sina-ɔɔ anʉka masaʉ kɔ ɗite, nɔ awɨa ɔ ɗite, ná꞊tɨmbambanienimʉ. Dɔ, yɔkwananɔ ɓɔ yɨkɨanɨa-sɨ ta ɓanɨ. Yakamɛngana, ya꞊ngɔɓiomʉ-sɨ mupipio wɔ dɔdɔ.

⁸ Ɨbaba yɔ ɓombi mɛngana, ya꞊chwɛa sina ɗite akɔ ɨbaba yɔ ɓombi ngayɔmɔ. Nɔ, ɓʉngama, ɓɔ꞉chwɛa ɗite kʉ akɔ ɓʉngama ngaɓɔmɔ. Ayende a꞊kwa alɨkʉmbʉ di di di, ɨhɔ nɔ akpʉkʉma akɔchana. Ɨyɛnɛnɨ iɓomu, ya꞊ɓio ta ndʉ mʉkpanganɨa wɔ ɓʉkaɓʉkaɨ ɓɔ ʉnɔtʉ.

Yeso ɔsugo yaka akʉʉ kyananaka ɓombi

⁹ Pɛmanɨeni pɛmanɨanɨ. Ɓa꞊nimaiso sina apɛɨ ɔ mʉkɔmbʉ, nɔ, ɓɔ꞊nɨɓɛnda pimbo amati ɔ lɨkáá lɔ nɨta ngɨlɔ Ɓayuda. Akʉʉ yaka yɛsɛmɨ, ɓa꞊nichaniso sina amʉkɔmbʉ, apɛɨ ɔ ɓangama ngʉɓa ɓɔta ɓakpɔkpɔ, ambɔ ɨnɨanɨeni nɔ angbinga naɓɔ anʉngakɨa yaka ngɨyɛ ɨmɨ Yeso, na꞉kɨa akɔ uɓei ngʉweno.

¹⁰ Apɛɨ ɔ yaka iɓomu, yɔkwananɔ ɓɔ ɓɨɓɨakɨa Ɨsaʉ yɛta Iɗo akɔ mababa kɔ ɓombi maɓomu.

¹¹ Angbinga ngɨa ɓa꞊nɨfa sina-ɔɔ, nɔ, ɓɔ꞊sa nenu apɛɨ ɔ mʉkɔmbʉ, nátɨmbambanɨenimʉ, ɓɔ nábisugo inani tanɨ, sugeni yaka ngɨyɛ ya꞊nɨkɨa gbɛgbɛ ta ananɨ. Dɔ yaka yɔngɔ, yangɔchwɛanɨamʉ nenu, yakamɛngana, yachwɛanɨa nɔ Mʉtɨma wɔta Tu.

¹² Angbinga ngɨananɨ, mombi a꞊gaba sina ta manye ɓɔ kpɛ akɔ ingwo. Nɔ, ɨsɛ ɔ mwana, ɔ꞊gaba mwana angɔ. Ɓana ɓa꞊natanɨa ɓɛsɛ ɓeɓo, nɔ, ɓɔ꞊ɓʉgabaka akɔ ingwo.

¹³ Ɓombi ɓaɓomu, ɓa꞊nɨyaa akʉʉ ɔ ino yɛsɛmɨ. Yakamɛngana, mombi ngɨa ɛ꞊maa ɓʉmʉ akɔɓɔya amupipio, ɛ꞊nɨanɨa nɔ ɓʉhɛa.

Ɓombi ɓadya ɓʉkaɓʉkaɨ nɔgbɛ

¹⁴ Ngbinga ngɨa nɛ꞊na sina-ɔɔ Ɓʉɓɨɓɨ ngʉɓa ɓapipenekio, ɓɔ꞉mɨmaiseni tɨta ɨda yɛta tu anɨka awolo tɨa aɨda ngɨyɛ ɓɔsisekiɔmʉ-ɔɔ ɓio. (Mombi ngɨa apopoko yaka ngɨyɛ, ɨɨpemiso ɨsɨ yɔngɔ pemisoni.) Néneni tɨa yaka ngɨyɛnɛnɨ, yanɨtanɨa ɓɔ ɓombi ngʉɓa ɓa꞊ɓio amati ɔ ihoi yɔ Yudɛa, ɓɨsa nɔ bangʉ alɨkpangba.

¹⁵ Nɔ, mombi ngɨa a꞊ɓio akʉʉ ɔ ɨkáá, a꞊tujomʉ ɓata pɔ nujo, asɨka ɨkyɛmʉ ambɛnɨ.

¹⁶ Mombi ngɨa a꞊ɓio akʉbaa, a꞊tɨtɔa tii ɓata andei, akɔsɨka ɨpʉkʉ yɔ sɛsʉ ngɨangɔ.

¹⁷ Ikoko akɔ ɓoi ngʉɓa ɓa꞊ɓio sina nɔ maa, nɔ akɔ ʉɓa, ɓa꞊ɓio amwiso ɓana maɓɛɨ, angbinga ngɨananɨ!

¹⁸ Ɨteni Asɔɓɨɨ ɓɔ yaka ngɨyɛnɛnɨ, yatiɓiomʉ angbinga wɔ sɛsʉ.

¹⁹ Dɔ makwaa ngʉkɔnanɨ, ka꞊ɓio sina nɔ ikoko yɛta ɨja. Akɔnɨngwa ta amʉkpanganɨa wɔ dɔdɔ ngɨa Asɔɓɨɨ a꞉kɨa, akɔɓɔya kʉndʉ ɓʉɓʉnʉ, ɨkananja yɔ ɓʉkaɓʉkaɨ ndʉ ʉɓɔnanɨ, ɓa꞉ngɛnɨanɨamʉ sina. Nɔ, ɓa꞊ngɛnɨanɨamʉ sina ɓata pɔ kʉɓanɨ.

²⁰ Makwɔɓɨɨ ɔ꞉kɔdodenimʉ jɛnɛ makwaa ngʉkɔnanɨ aɓio gbi, ambɔ mombi pɔ mʉngana, angɛnɨanɨa sina nɔ ɓʉhɛa. Akudodo gbi, akɔ yaka yɔ ɓombi ngʉɓangɔ a꞉ɓʉchwa jɛnɛ kʉ pɛɨ.

²¹ Akɔ angbinga ngɨananɨ, mombi ɔnɨɓɨeni ɓɔ: ‹Kangeni! Klisito ɨyakɛ!› Ga pɔ ‹Kangeni! Ɨyɔ, ɨya inani!› Nátɨmʉbayenimʉ.

²² Dɔ, ɓombi ɓɔ mʉjɛɛ ɓaja ɓa꞊chwɛanɨa sina nɔ ino yɔ Klisito, pɔ nɔ ino yɔ magbɛ kɔ Asɔɓɨɨ. Nɔ, ɓa꞉kɨa sina ɓakɔkɔ nɔ yaka yɛta ɨmbangɛ di di di, ahata ta ɓɔ ɓeneni ɨhɔɨ, ɓikwisiso ɓombi ngʉɓa Asɔɓɨɨ a꞉ɓʉchwa jɛnɛ.

²³ Pɛmanɨeni pɛmanɨanɨ! Ɨmɨ, nɔ꞉nɨchwɔ pɛpɛ dɔ machwei tɨta pɛɨ!

²⁴ Sina ta akɔ makwaa ngʉkɔnanɨ, tɨa ambise ɔ ikoko yɛta ɨja ngɨyɛnɛnɨ, ga ɨpá ta umomo ɓɔ ɗɨyɛ.

²⁵ Uyi, wɔ꞊sɨa jɛa tɨa kʉ sɨanɨ. Ga ndata iyani aɨsɨ ɓɔ mbi mbi. Ɨkyɛmʉ iɓomu ngɨa angu, ɨyɛ, ya akʉʉ ɔ ɓisi yɔ꞊gʉgʉma.

²⁶ Kʉdɔ, ɓɛ꞉na sina tɨa Mwana ngɨyɔ Mombi amati ɔ lɨkʉɓa lɔ ɓisi, ɨyɔ, tɨa nɔ angu ata mʉja ɨhɔ nɔ ʉbɨba.

²⁷ Nɔ kʉdɔ, ɨyɔ Mwana ngɨyɔ Mombi, a꞊tʉma sina tɨa ɓamalaika ngʉɓangɔ akɔmɔmaka ɓombi ngʉɓangɔ a꞉ɓʉchwa jɛnɛ, alindu ɓɔgɨna ngɨlɛ aki ɓisi ɓɛpa-ɛɛ, akɔɓɔya ta amiɓo wɔ dɔdɔ.

Isisenio yɔ ɓʉtɨ ɓɔ mʉtɨnɨ

²⁸ Ʉpanʉ nga weno tanɨ, ʉwɛ, wanɨmbɨa amati ɔ isisenio ngɨyɛ ɓʉtɨ ɓɔ lipumo? Dɔ, angbinga ngɨa mɨtʉ yɔ mɨtapʉ yɔngɔ yɛka-ɔɔ kpala kpala, nɔ, manɨ kɔngɔ kɔpʉnga ɓaa, wɛmbɨa tɨta ɓɔ ngbinga ɔ igo a tinene.

²⁹ Kʉɓanɨ, ngbinga ngɨa nɛ́꞊na sina-ɔɔ yaka ngɨyɛnɛnɨ akyananakɨa, ɨmbɨeni iɗo ɓɔ Mwana ngɨyɔ Mombi a tɨa tinene anɔ umongu.

³⁰ Nanenu anʉngɨa ta ingono, ɓombi ngʉɓa ɓa ɓʉɓʉnʉ aka, ɓa꞊ngɔsio sina ɓaɓomu, pɛɨ ngɨa yaka ngɨyɛnɛnɨ iɓomu, yapʉnga-ɔɔ kyananakɨa.

³¹ Ɓisi nɔ dɔdɔ ɓa꞊chana sina chananɨ. Yakamɛngana, ʉpanʉ ngʉwɔsɛmɨ, wangɔchana sina pɔ bele.

³² Mombi pɔ mʉngana angɔmʉ anɨmbɨa ɓisi, ga pɔ angbinga ngɨa yaka ngɨyɛnɛnɨ, ya꞊kyananakɨa-ɔɔ. Gʉtʉ ta ɓamalaika ngʉɓa akʉʉ ɔ ɓisi, gʉtʉ kʉ nɔ ɨmɨ, Mwana ngɨa angɔ ingainga, tangɔmʉ anɨmbɨa kʉɓanɨ. Yakamɛngana, ta ɨyɔ Asɔɓɨɨ, Aba nangana akɛ anɨmbɨa.

Ɓombi ɓɨpɛmanɨa

³³ Pɛmanɨeni pɛmanɨanɨ, nɔ, nátɨkwaamʉ tɔɔ, dɔ inu, nángɔmʉ anɨmbɨa angbinga.

³⁴ Yaka ngɨyɛ, yɔ Ɓʉngama ngʉɓa akʉʉ ɔ ɓisi, ya꞊ɓio sungo ngbanga, ndʉ mombi ɔ lɨkyɛmʉ iɓio anɨsa kyɛnda yɛta ɗu. Pɛɨ ɨyɔ anɨngwa, ɔsɨa ɓombi ɓɔ tɛa nɔ ʉpanʉ akʉʉ ɨkáá ngɨangɔ. Nɔ, enjo mombi nɔ mombi ɨngbaa yɔ tɛa. Enjo ʉpanʉ, akɔ mʉpɛmakɨa akɔkanga umongu, naɓutu, kʉndʉ musoti.

³⁵ Kʉɓanɨ, inu pɛmanɨeni pɛmanɨanɨ! Dɔ, nángɔmʉ anɨmbɨa ɓɔ Makwɔ ɔ ɨkáá a꞊tɔa ngbinga nga ino tanɨ. Adiga ya꞊ɓio tɨa mbise nɔgbɛ, pɔ atɨ ɔ gʉndʉ, pɔ aka ɓakɔɓɔ ɓanatɨa-ɔɔ, ga pɔ nɔ igbandindi.

³⁶ Sɔkɔmʉ ɓaka ɔtɔweni ɓɔ gbututu, ɔtɔnɨgbʉka inu tɨa ɓakwaɛ.

³⁷ Yaka ngɨyɛnɛnɨ nɔnɨsigio, ya, akʉʉ eno ɓaɓomu. Pɛmanɨeni pɛmanɨanɨ!»