Malɨkɔ 11 - Mʉkpanganɨa nɔ Agɔmɛ ɔ Ɨtakɨtakɨ

Yeso ɔkumonio anɔ Yelusalɛma

¹ Tɨa ananɨ, atɨ Yeso ɓa꞉ɓio tɨa tinetine akumonio anɔ Yelusalɛma. Ɓa꞉ɓio tɨa tinene nɔ Bɛtɛfagɛ nɔ Bɛtania, nɔ anɔ ambamba ɔ ɨkpangba yɔ Mijeituni. Kʉdɔ, a꞉tʉma ɓakpata ngʉɓangɔ ɓapɨnɨ apɛɨ.

² Ga ɨyɔ naɓɔ ɓɔ: «Seni akɔ ɨkʉmbʉ ngɨyɛ ya apɛɨ eno ayɛ. Ta gagaa aka ná꞊ɓio-ɔɔ akumonio, nabigbʉka mwana ɔ punda mʉngɛ ananɨ. Mombi pɔ mʉngana, angɔɗetomʉ akʉʉ ɔngɔ. Muɓoeni, nɔ, nɛ́ka nayɔ iyani.

³ Ndʉ mombi aniɓokuo ɓɔ: ‹Dɔtanɨ, nɔkɨɔ ɓanɨ?› Musigieni ɓɔ: ‹Makwɔɓɨɨ anɔ taa yɔngɔ. Mbise ɔngɔ, amʉtʉma aka, ta ɨtakɨtakɨ ngɨyɛ.›»

⁴ Kʉdɔ, ɓa꞉sa ta ɓanɨ, nɔ, ɓɔ꞉gbʉka mwana ɔ punda mʉngɛ ta aɓei ɓɔ, anɔ ambamba ɨngbaa, tinene nɔ umongu mʉngana ɓɔ. Kʉdɔ, ɓa꞉muɓoo ga paa.

⁵ Ngana ngana ɔ ɓombi ngʉɓa ɓa꞉ɓio ananɨ, ɓɔ꞉ɓuɓokuo ɓɔ: «Ɨmanɨ nákɔkɨa ananɨ? Nákɔɓoo mwana ɔ punda ngɨananɨ, dɔtanɨ?»

⁶ Ɨɓɔ, ɓɔ꞉ɓutosio ngbanga ta ndʉ aka Yeso a꞉sugo-ɔɔ, kʉdɔ, ɓɔ꞉ɓʉsɨa ɓɔ ɓɨsa nayɔ.

⁷ Kʉdɔ, ɓa꞉mɨkɨa Yeso nɔ mwana ɔ punda ngɨananɨ. Ɓɔ꞉nawaka lɨpʉkʉ ngɨleɓo akʉʉ ɔngɔ, ga ɨyɔ ɓɔ jikomu, ananɨ akʉʉ ɔngɔ.

⁸ Ɓombi ɓaja ɓɔ꞉pʉnga anawaka lɨpʉkʉ ngɨleɓo anɔ ɨngbaa ga wɛnjɛ wɛnjɛ, ɓɔmɔ ɓɔ꞉nawaka mbanjʉ ngɨa ɓa꞉ɓio atinyoko ta ananɨ amutii mutii.

⁹ Kʉndʉ ɓombi ngʉɓa ɓa꞉ɓio anɨsa apɛɨ, kʉndʉ ʉɓa, ɓa꞉ɓio naɓɔ akpata ambise, ɓɔ꞉pʉnga natɨa ɓɔ: «Hɔjana! Asɔɓɨɨ ukiokio mombi ngɨa anɨka akɔ ino yɔ Makwɔɓɨɨ!

¹⁰ Asɔɓɨɨ ukiokio ɓʉngama ngʉɓa ɓa꞊nɨka, ɓʉngama ngʉɓa abaa ngɨyeso Dawidi! Hɔjana akɔ ʉmʉa ngʉwa wa akʉʉ nɔgbɛ!»

¹¹ Ɨyɛ ndʉ Yeso a꞉yɛta mʉtɨndɨ anɔ Yelusalɛma, ɔ꞉tɔkumonio amati ɔ ɨkáá yɔ Asɔɓɨɨ. Ndʉ a꞉pipo nɨnaka ʉmʉa ɓɔ gba, ɔ꞉tɔsa tɨa mesu anɔ Bɛtania, ɨhɔ nɔ ɓatitima ngʉɓangɔ, dɔ, ya꞉ɓio tɨa angbinga ɔ ɨpasɨ.

Yeso ɔgbangɔ ɓʉtɨ ngʉɓa ɓangɔmʉ nɔ lipumo

¹² Nekuɓa yɔngɔ, ndʉ a꞉ɓio tɨa anɨngwa ananɨ anɔ Bɛtania, ɔ꞉pʉnga tɨa nʉkana taa.

¹³ Ɔ꞉tɛna ɓʉtɨ mʉngana sɨ ta ɗu ɓɔ, nɔ manɨ ɓɔ bukubuku. Kʉdɔ, ɛ꞉sɨngana tinene naɓɔ, ga adiga abinana gɔ pɔ ipumo yɛta ɨdyɛ. Yakamɛngana, ɨyɛ a꞉ɓɔya tinene ɓɔ, ɔ꞉gbʉka ta manɨ ɓɔ kyɛɛ, akʉʉ ɔngɔ, dɔ, ya꞉ɓiomʉ ɨjɔ yɔ lipumo.

¹⁴ Kʉdɔ, ɔ꞉gbanga ɓʉtɨ ngʉɓɔnanɨ, ga ɨyɔ ɓɔ: «Gbɔnga! Ndʉ mombi a꞊dya sina ɓata ta ipumo yɛsɔɔ, maɓu!» Ɓakpata ngʉɓangɔ ɓɔ꞉ka yaka ngɨyɛnɛnɨ ta ʉkanɨ.

Yeso ɔkponyo ɓombi ɓɔ magabʉ amati ɔ ɨkáá yɔ Asɔɓɨɨ

¹⁵ Mbise ɔngɔ, ɓɔ꞉ɓɔya anɔ Yelusalɛma. Ndʉ a꞉kumonio tɨa amati ɔ ɨkáá yɔ Asɔɓɨɨ, ɔ꞉kponyo ɓombi ɓaɓomu ngʉɓa ɓa꞉ɓio agabanaka, nɔ ʉɓa ɓa꞉ɓio akayanakɨa. Ɔ꞉titoko ɓamɛja ngʉɓɔ ɓombi ngʉɓa ɓa꞉ɓio anachoko ɓagyɛgyɛ. Ɔ꞉tɔtitoko kʉ nɔ mawolo ngʉkɔ ɓiga ngʉɓa, ɓa꞉ɓio agaba ɓanjua.

¹⁶ Sɔkɔmʉ ɨsɨa mombi pɔ mʉngana, achana nɔ ɨkyɛmʉ ɨtʉmbɛ amati ɔ ɨkáá yɔ Asɔɓɨɨ.

¹⁷ Kʉdɔ, a꞉pʉnga ninjo mapanʉ akɔsugo ɓɔ: «Ya꞉tɛndanakɨa ndɨ-sɨ amati ɔ Mabii ɓɔ: ‹Ɨkáá ngɨyɛsɛmɨ, ya꞊ɓio ɨkáá yɔ nɨta, akɔ mababa kɔ ɓombi maɓomu?› Yakamɛngana, inu, nɔ́ɨnatakanakiso tɨa ɨda yɔ jonokio yɔ ɓombi ɓɔ ndiɓo!»

¹⁸ Ndʉ ɓangama ɓɔ ɓakumukumu nɔ ɓapananakɨa ɓɔ mapanʉ, ɓa꞉mʉkɔ ɨyɔ asugo ɓanɨ, ɓɔ꞉pʉnga ahata ɓɔ ɓamʉwa nɔ ɨngbaa nga yeno tanɨ. Yakamɛngana, ɓa꞉ɓio ɓata nayɔ kʉ akumo, dɔ, ʉpanʉ ngʉwangɔ wa꞉poto ɓombi ɓaja mɨtɨma potoni.

¹⁹ Ɨyɛ ndʉ ɨpasɨ ya꞉dʉa, atɨ Yeso ɨhɔ nɔ ɓakpata, ɓɔ꞉chwɛa aɓei ɔ gʉlʉ.

Angu ɔ báya nɔ nɨta Asɔɓɨɨ

²⁰ Ta nekuɓa yɔngɔ, ɨɓɔ achana anɔ ɨngbaa, ɓakpata ɓɛ꞉na ɓɔ ɓʉtɨ ngʉɓa Yeso a꞉ɓʉgbanga pɛ, ɓɔ꞉wo tɨta niwo, anɨngwa ta akɔ mii yɔngɔ.

²¹ Kʉdɔ, Pɛtɛlɔ a꞉tunguo yaka ngɨyɛ ya꞉ɓio ɓɔ yɔnganieni, akʉʉ ɔ ɓʉtɨ ngʉɓɔnanɨ. Ga ɨyɔ nɔ Yeso ɓɔ: «Mʉpananakɨa! Ɨna ɓʉtɨ ngʉɓa wa꞉ɓʉgbanga pɛ aki ɓɔwo-ɛɛ!»

²² Ga Yeso naɓɔ ɓɔ: «Ɓieni-pɨ ta nɔ báya akɔ Asɔɓɨɨ!

²³ Ta ingono, nanenu asigio ɓɔ mombi ɔsigieni ɨkpangba ngɨyɛ ɓɔ: ‹Ɗuwonio, nɔ, wɔsa anɨkwa amati ɔ ipuu yɛta ɨja ɓɔ kyoo!› Mombi ɔngɔ, ɔɓienimʉ nɔ ɓajatwoko amati ɔ mʉtɨma ngʉangɔ, yakamɛngana, ɔbáya ɓɔ yaka ngɨyɛnɛnɨ yakyananakɨa, kʉdɔ, Asɔɓɨɨ a꞊mʉkɨa tisi ɨyɔ ta ɓanɨ.

²⁴ Ya akʉʉ ɔ yaka ngɨyɛnɛnɨ, ɨmɨ, nanisigio suo-ɔɔ ɓɔ, ɨkyɛmʉ iɓomu ngɨyɛ náhata ɨngbaa akɔ nɨta Asɔɓɨɨ, ɓieni nɔ báya ɓɔ nɛ́nɨanɨɔ nayɔ tɨa ɨnɨanɨanɨ, nɔ kʉ ɓɔ yakyananakɨa ta ndʉ ananɨ.

²⁵ Nɔ, angbinga ngɨa náɓio-ɔɔ ɓɛmaɛ ɓɔ gba anɨta, nɔ́ɓieni nɔ yaka yɔ ɓombi a mɨtɨma, ɨpaakɨeni ɓiga ngʉɓa ɓa꞉nɨkɨa inu ɓɨɓɨ ɨpaakɨanɨ. Kʉdɔ, Atɔ eno ngɨa akʉʉ ɔ ɓisi, a꞊nɨpaakɨa inu ɓʉɓɨɓɨ ngʉɓeno kʉ ɨpaakɨanɨ. [

²⁶ Yakamɛngana, ndʉ nángɔɓɨpaakɨamʉ ɨɓɔ, Atɔ eno ngɨa akʉʉ ɔ ɓisi, angɔnɨpaakɨamʉ inu, ɓʉɓɨɓɨ ngʉɓeno kʉɓanɨ.»]

Angu ngɨyɔ Yeso anɨngwa gbanɨ

²⁷ Atɨ Yeso ɨhɔ nɔ ɓakpata, ɓa꞉tɔa ɓata ta anɔ Yelusalɛma. Tɨa angbinga ngɨa ɨyɔ Yeso, a꞉ɓio-ɔɔ akyɛndanaka amati ɔ ɨkáá yɔ Asɔɓɨɨ, ɓakumukumu nɔ ɓapananakɨa ɓɔ mapanʉ, nɔ ɓagʉgʉ ɓɔ꞉mɨkɨa ga tutee.

²⁸ Ga ɨɓɔ nayɔ ɓɔ: «Yaka iɓomu ngɨyɛ wakɨa ɨpɛ ɓɔ, ya akɔ ʉpanʉ ngʉwɔkanɨ, nɔ, anɨ akɛ anɔwɛ akɔtitio akɨa ɓanɨ?»

²⁹ Yeso ɔ꞉ɓutosio ɓɔ: «Ɨmɨ, nanenu aɓokuo kʉ yaka, nɔ́natosieni, ɨmɨ, nɔnisigio dɔ tɨa ɓɔ nakɔkɨa yaka ngɨyɛnɛnɨ akɔ ʉpanʉ wɔ anɨ.

³⁰ Anaɓɨeni-sɨ ɓɔ ʉpanʉ ngʉwa Yɔanɨ a꞉ɓio aɓatiso nawo, wa꞉ngwa ndɨ akʉʉ ɔ ɓisi, ga pɔ ɓɔ wa꞉ngwana nɔ ɓombi?»

³¹ Yakamɛngana, ɓɔ꞉potio yakananaka ati eɓo akɔsugo ɓɔ: «Ndʉ tamutosio ɓɔ wa꞉ngwa akʉʉ ɔ ɓisi, atɨsigio ɓɔ: ‹Ayaka yɛmanɨ dɔ inu, ná꞉mʉbayɔmʉ jɛnɛ ɨyɔ?›

³² Andɔ tɔmutosieni-sɨ bɔ: ‹Wa꞉ngwa atɨ ɓombi›» (Ɨɓɔ ingainga ɓa꞉ɓio nɔ ʉɓá wɔ ɓombi, dɔ, ɓombi ɓaɓomu ɓa꞉ɓɨmʉsɨka ɨyɔ, Yɔanɨ ndʉ ɨgbɛ yɔ ingono yɔ Asɔɓɨɨ.)

³³ Kʉdɔ, ɓɔ꞉sa nayɔ atosio ɓɔ: «Tangɔmʉ anɨmbɨa.» Ga Yeso naɓɔ ɓɔ: «Gʉtʉ ɨmɨ, nangɔnisigiomʉ kʉɓanɨ ɓɔ, nakɔkɨa yaka ngɨyɛnɛnɨ nɔ ʉpanʉ, wɔ anɨ.»