Matayɔ 3 - Mʉkpanganɨa nɔ Agɔmɛ ɔ Ɨtakɨtakɨ

Yɔanɨ ngɨa atɨɓatisa enjo mapanʉ

¹ Akɔ angbinga ngɨananɨ, Yɔanɨ ngɨa a꞉tɨɓatisa, a꞉chwɛanɨa amukengu, amati ɔ ihoi yɔ Yudɛa. A꞉ɓio atʉɓɨa mʉsɨna ɓɔ:

² «Nécheni mʉkyananakɨa ngʉweno, dɔ, Ɓʉngama ɓɔ Asɔɓɨɨ, ɓa tɨa tinene!»

³ Ta Yɔanɨ mʉngana ngɨananɨ, ɨyakɛ ɨgbɛ Isaya a꞉ngaka jɛnɛ yaka akʉʉ angɔ ɓɔ: «Mombi akɔtʉɓɨa amukengu ɓɔ: ‹Tambanakeni lɨngbaa ngɨlɔ Makwɔɓɨɨ! Liyomokeni ɓɔ gɔ gɔ gɔ!›»

⁴ Yɔanɨ a꞉ɓipɛnɨa ɨpʉkʉ ngɨyɛ ɓa꞉ɨkɨa nɔ mata kɔ ngamɨa, nɔ, ɔ꞉ɨnamangana nɔ muki wɔ ʉmba wɔ nama aɨɓʉnɨ. Idyo ngɨangɔ, ya꞉ɓio ɓanɛmɛnɛ, ɨhɔ nɔ ɓɛʉ.

⁵ Ɓombi ɓa꞉ɓingwa ta ndʉ anɔ Yelusalɛma, nɔ akɔ lihoi liɓomu ngɨlɔ Yudɛa, nɔ, ɨlɔ Yɔlɔdanɨ, anɨsa aki a꞉ɓio-ɛɛ.

⁶ Ɓɔ꞉pʉnga panjaka ɓʉɓɨɓɨ ngʉɓeɓo aɓʉmba, nɔ Yɔanɨ ɔ꞉ɓʉɓatiso amati ɔ lisini ngɨa ino ɓɔ Yɔlɔdanɨ.

⁷ Ndʉ ɛ꞉na Ɓafalisayɔ, nɔ Ɓasadukayɔ ɓaja, anɨka anɨkwa uɓatiso, ga ɨyɔ naɓɔ ɓɔ: «Inu, ʉmbɛkɛ wɔ ɓasɨɨ ngʉwa, anɨ akɛ ɔnititio atʉgbʉa ʉnganga ngʉwɔ Asɔɓɨɨ, wa suo anɨka?

⁸ Pananiseni-gɔ tɨa ɓɔ, nɔ́necho mʉkyananakɨa ngʉweno ta nɔ ingono.

⁹ Nátɨkwakanakamʉ ɓakai asugo ɓɔ: ‹Haa! Ta pɛpɛ isu ɓanɔnɔ ɓɔ Abalaama!› Dɔ, nanenu asigio ingono ɓɔ, Asɔɓɨɨ akwanana kʉɔ achweiso ɓanɔnɔ ɓɔ Abalaama, ta amati ɔ makopi ngʉka.

¹⁰ Ta ingono, angbaka a tɨa mʉgɛ, akɔɓɛtɨa kwaka matɨ, alitindindi lɔngɔ. Ɓʉtɨ ɓuɓomu ngʉɓa ɓangɔmomʉ lipumo lɛta liɗo, ɓaɓʉkwaka kwakanɨ, nɔ, ɓɔɓugiso amati ɔ dyaa.»

¹¹ Ɨmɨ, nanenu akɔɓatiso amati ɔ mipo, ɓɔ dɔ nácheni mʉkyananakɨa. Yakamɛngana, mombi ngɨa a꞊nɨka ambise asɛmɨ, anɔ angu nɔgbɛ nɛmɨ anagaaka. Nɔ ɨmɨ, nɔsisekiomʉ pɔ bele, achweiso lɨkpakʉ ngɨlangɔ. Ɨyɔ, a꞊nɨɓatiso suo nɔ Mʉtɨma wɔta Tu, nɔ dyaa.

¹² Ɨyɔ, anɔ lungu alɨkɔndɔ apɔpa mʉpʉnga. Nɔ, a꞊momiso mʉpʉnga amati ɔ ɨkáá yɔ masɔɔ ngɨangɔ. Yakamɛngana, a꞊giso lifoko amati ɔ dyaa ngɨyɛ, yangɔmʉ nɔ mupipio.

Yɔanɨ ɔɓatiso Yeso

¹³ Ɓisi mʉngana, Yeso a꞉sa akɔ ihoi yɔ Galilaya, ɔ꞉ɓɔya amutii wɔ Yɔlɔdanɨ, aki Yɔanɨ a꞉ɓio-ɛɛ, dɔ, ɨkwa uɓatiso alɨkɔndɔ langɔ.

¹⁴ Yakamɛngana, Yɔanɨ ɔ꞉yaa-sɨ ta yaa, ga ɨyɔ ɓɔ: «Pɔ bele! Ɨmɨ akɛ, nɔsisekio anɨkwa uɓatiso alɨkɔndɔ lɨsɔɔ. Ʉwɛ, wɛkɔ tɨa andamɨ dɔtanɨ?»

¹⁵ Ga Yeso nayɔ aka ɓɔ: «Baya pɨ ʉwɛ ta baya. Dɔ, nɔ ɨngbaa ngɨyɛnɛnɨ, ɨyɛ takwanana-ɔɔ akyananakɨa yaka ngɨyɛ Asɔɓɨɨ akʉnda ɓɔ tɨkɨa.» Kʉdɔ, ɨyɔ Yɔanɨ, a꞉mʉɓatisa tɨa kʉ ɓatisa.

¹⁶ Ɨyɛ Yeso a꞉kwa nayɔ uɓatiso ɓanɨ, ta gagaa ngɨananɨ, ɔ꞉chwɛa amipo. Kʉdɔ, ɓisi ɓɔ꞉gananɨa, nɔ, ɛ꞉na Mʉtɨma wɔta Tu ngʉwɔ Asɔɓɨɨ, anujo ndʉ anjua, nɔ, wɔ꞉wolo akʉʉ angɔ ga jikomu.

¹⁷ Kʉdɔ, iso mɛngana, yɔkanɨa anɨngwa akʉʉ ɔ ɓisi, asugo ɓɔ: «Mwana ngɨasɛmɨ ɨyakɛ, ɨyɔ ɓʉkʉnda. Nanɨkwa ɨgyagya akʉʉ angɔ nɔgbɛ!»