Matayɔ 28 - Mʉkpanganɨa nɔ Agɔmɛ ɔ Ɨtakɨtakɨ

Yeso ɔjʉkana akɔ ingwo

¹ Ɓisi ngʉɓɔnanɨ ɓɔ Homuo ɓa꞉chana. Akɔ igbandindi yɔ ɓisi ɓɔ mʉkpanganɨa wɔ pɔsʉ, Malɨa Magadala, ɨɓɔ nɔ ayoo angɔ Malɨa, ɓɔ꞉sa akanga ɓʉnjaʉ.

² Ta gagaa ngɨananɨ, akpʉkʉma ata mʉja ɔ꞉chana amati ɔ ɨkʉmbʉ ngɨyɛnɛnɨ. Malaika wɔ Makwɔɓɨɨ, ɔ꞉jo anɨngwa akʉʉ ɔ ɓisi, ɛ꞉ka akeliso ikopi amonu kɔ ɓʉnjaʉ, nɔ, ɔ꞉wolo akʉʉ ɔngɔ ga jikomu.

³ Malaika ngɨananɨ, a꞉ɓio ajɛa nɔgbɛ, ndʉ ɨyɛ ʉgbaa wangɛnana-ɔɔ. Nɔ, lɨpʉkʉ ngɨlangɔ, la꞉ɓio tu nɔgbɛ.

⁴ Anɨna ɓanɨ, ɓasʉda ngʉɓa ɓa꞉ɓio apɛmakɨa ɓʉnjaʉ, ɓɔ꞉kwa ʉɓá, nɔ, ɓɔ꞉pʉnga gʉgʉma, nɔ, ɓɛ꞉ka ngbanga ndʉ mɨnda.

⁵ Yakamɛngana, malaika wɔ Asɔɓɨɨ wɔ꞉ɓusigio ɨɓɔ ɓoi ngʉɓɔnanɨ ɓɔ: «Natɨkumomʉ! Nanɨmbɨa ɓɔ, nɛ́꞉kɔ ahata Yeso, ɨya ɓa꞉mʉɓakaka pɛ akɔ mʉsalaba.

⁶ Angɔmʉ ɓata ɨyɔ aka! Ɔ꞉jʉkanɔ akɔ ingwo jʉkananɨ, ngbanga kʉndʉ a꞉sugo jɛnɛ. Ikeni anɨna ɨda ngɨyɛ, ɓa꞉mukwaiso pɛ-ɔɔ.

⁷ Seni gagaa atɨ ɓakpata ngʉɓangɔ, nɔɓusigio ɓɔ, ɔ꞉jʉkanɔ akɔ ingwo jʉkananɨ, ati ɔ mɨnda. Nɔ, ɨtakɨtakɨ ngɨyɛ, anɨsa nenu aɓɛtaka anɔ Galilaya, nɔ, nábimɨna tɨa kʉ inani. Ɨsaʉ ngɨyɛ nɔ꞉ɓio akʉnda nenu anʉngɨa, ɨyɛnɛnɨ.»

⁸ Ɓoi ɓa꞉ngwa ananɨ aɓʉnjaʉ tɨta gagaa, ɨbɔ, tɨa kʉ nɔ ʉɓá, ɨhɔ tɨa kʉ nɔ ɨgyagya. Ɓɔ꞉sa bangʉ anʉngakɨa ɓakpata ɨsaʉ ngɨyɛnɛnɨ.

⁹ Pɔ gbalakɨa, ga Yeso ananɨ apɛɨ ɔ ɓoi ngʉɓɔnanɨ ɓɔ wɛɛ, ga ɨyɔ ɓɔ: «Nɛ́kɔ kʉ inani!» Kʉdɔ, ɓɔ꞉mɨsɨnganɨa, ɓɔ꞉gbʉkʉmakɨa nɔ mau, nayɔ apoto mɨtɨndɨ.

¹⁰ Yeso ɔ꞉ɓusigio ɓɔ: «Natɨkumenimʉ! Seni aɓɨakɨa ɓanduku ɓɔsɛmɨ ɓɔ ɓɨsa anɔ Galilaya. Ɓabinɛna inani.»

Ɓasʉda ɓenjo ɨsaʉ

¹¹ Angbinga ngɨa ɨɓɔ ɓoi ɓa꞉ɓio-ɔɔ anɨsɨnganaka nɔ kyɛnda, mukpekpe yɔ ɓapɛmakɨa ɓɔ꞉sa anɔ Yelusalɛma, anʉngakɨa ɓakumukumu yaka iɓomu, ngɨyɛ ya꞉kyananakɨa.

¹² Ɨɓɔ ɓakumukumu, ɨhɔ nɔ ɓatataɓasie, ɓɔ꞉mɔmanakɨa, nɔ, ɓɔwolio ubua. Mbise ɔngɔ, ɓɔ꞉kana aninjo ɓasʉda ɓagyɛgyɛ ɓaja nɔgbɛ.

¹³ Ga ɨɓɔ ɓɔ: «Inu, sugeni ta ɓɔ: ‹Ɓakpata ngʉɓangɔ, ɓɛ꞉kɔ nayɔ aniɓo naɓutu, angbinga ngɨa tɔ꞉ɓio-ɔɔ isu atɔɔ.›

¹⁴ Ngama ɔ ihoi ɔkeni ɨsaʉ ngɨyɛnɛnɨ, isu akɛ, tanɨsa ayakanaka nayɔ, nɔ, tɔkwananakiso yaka yɔngɔ. Inu, ɓieni mʉtɨma ta ɓɔ dɨɨ.»

¹⁵ Kʉdɔ, ɓasʉda ɓa꞉sɨka ɨɓɔ tɨa kʉ ɓagyɛgyɛ. Nɔ, ɓɔ꞉kɨa ngbanga kʉndʉ ɓa꞉ɓusigio. Ɨsaʉ ngɨyɛnɛnɨ, ya꞉nanjana ati ɔ Ɓayuda, akɔɓɔya kʉndʉ ɓʉɓʉnʉ.

Yeso ɔchwɛanɨɔ ɓakpata ngʉɓangɔ

¹⁶ Ɓakpata tɛkɛɓɛ nɔ mʉngana, ɓa꞉sa anɔ Galilaya, tɨa kʉ aɨkpangba, ngɨyɛ Yeso a꞉ɓʉpanaka.

¹⁷ Ngbinga ngɨa ɓa꞉mɨna-ɔɔ, ɓɔ꞉gbʉkʉmakɨa nɔ mau apɛɨ angɔ. Yakamɛngana, ɓombi ngaɓɔmɔ ati eɓo, ɓa꞉ɓio ta nɔ ɓajatuoko.

¹⁸ Yeso ɔ꞉ɓɨsɨnganɨa, ga ɨyɔ naɓɔ ɓɔ: «Ɓʉngama ɓuɓomu ngʉɓa akʉʉ ɔ ɓisi, nɔ ʉɓɔ dɔdɔ kʉtaa, Aba ngɨasɛmɨ a꞉nenjo pɔngɔ ɨɓɔ ɨmɨ tɨa injoni.

¹⁹ Kʉɓanɨ, seni amati ɔ mababa kɔ ɓombi maɓomu, nɔ́ɓʉnecho anɨka ɓakpata ngʉɓɔsɛmɨ. Nɔ, nɔ́ɓʉɓatisa akɔ ino yɔ Aba, nɔ Mwana, nɔ Mʉtɨma wɔta Tu.

²⁰ Ɓʉpanɨeni akyananakɨa mapanʉ maɓomu ngʉka, na꞉ninjekio pɔngɔ. Ɨmbɨeni iɗo ɓɔ, ɨmɨ ingainga, na꞊ɓio ɨhɔ nenu masi ta maɓomu, akɔɓɔya ta amupipio wɔ dɔdɔ ɓɔ kpru.»