Matayɔ 27 - Mʉkpanganɨa nɔ Agɔmɛ ɔ Ɨtakɨtakɨ

Ɓɔsɔ nɔ Yeso apɛɨ ɔ ngama Pilato

¹ Tɨa nekuɓa yɔngɔ nɔ igbandindi, ɓakumukumu ɓaɓomu, ɨhɔ nɔ ɓatataɓasie ɓɔ Ɓayuda, ɓa꞉wolio ubua akio mʉkɔmbʉ ngʉwɔ nɨwa Yeso.

² Ɨyɛ ndʉ ɓa꞉mʉsanga, ɓɔ꞉sa nayɔ aninjo atɨ Pilato, ngama ɔ ihoi yɔ Yudɛa, Mʉlɔma wɔngɔ.

Yuda ɔnjenjono

³ Angbinga ngɨa Yuda, ngɨa a꞉mʉgaba, ɛ꞉na-ɔɔ ɓɔ, ɓɔkio mʉkɔmbʉ tɨa kioni ɓɔ ɓɨwa Yeso, ɔ꞉pʉnga nɨdya ikoko nɔgbɛ amʉtɨma. Ɔ꞉sɨka ɓagyɛgyɛ ɓatɛkɛɓɛ ɓaatʉ ngʉɓɔnanɨ, nɔ, ɔ꞉sa naɓɔ atosio ɓakumukumu, nɔ, ɓatataɓasie ɓɔ Ɓayuda.

⁴ Ga ɨyɔ naɓɔ ɓɔ: «Na꞉kɨa pɛ ɓʉɓɨɓɨ akɔgaba mombi ngɨa ɔkɨamʉ ɨkyɛmʉ.» Yakamɛngana, ɨɓɔ ɓɔ꞉mutosio ɓɔ: «Hoo, ɨyɛnɛnɨ yangɔmʉ ɓata yaka nga yeso. Yɔnakanga tɨta ʉwɛ!»

⁵ Kʉdɔ, Yuda a꞉ngbengo ɓagyɛgyɛ ngʉɓɔnanɨ, inani amati ɔ ɨkáá yɔ Asɔɓɨɨ, nɔ, ɔ꞉sa anjenjono ga dɔɔ.

⁶ Ɓakumukumu, ɓɔ꞉ɓʉgwakyoko, ga ɨɓɔ ɓɔ: «Mapanʉ ngʉkeso ka꞉tɨgbɛmɨa gbɛmɨanɨ amaya ɨkananja yɔ ɓagyɛgyɛ ngʉɓa, amati ɔ ikpoko yɔ ɨkáá yɔ Asɔɓɨɨ. Dɔ, ya ɓagyɛgyɛ ngʉɓa ɓɔnjwakiso naɓɔ menike.»

⁷ Kʉdɔ, ɓɔ꞉mɔmanakɨa, nɔ ɓɔwolio ubua, nɔ, ɓɔ꞉tɔkaya nɔ ɓagyɛgyɛ ɓɔngɔ tɨa ʉmʉwa wɔ hʉna ɓɛɛka. Ʉmʉwa ngʉwɔnanɨ, wa꞉ɓio kʉbaa wɔ mombi mʉngana, ngɨa a꞉tɨmeyo lɨkɔchɔ.

⁸ Kwananɨ, ʉmʉa ngʉwɔnanɨ, wa-ɔɔ anɨsokonio ɓɔ «Kʉbaa ɔ Menike», akɔɓɔya kʉndʉ ɓʉɓʉnʉ.

⁹ Yaka ngɨyɛnɛnɨ, ya꞉kyananakɨa akpatanakɨa nɔ yaka ngɨyɛ ɨgbɛ Yɛlɛmɨa, a꞉sugo jɛnɛ ɓɔ: «Ɓa꞉sɨka ɓagyɛgyɛ ɓatɛkɛɓɛ ɓaatʉ, ya ɨgabʉ ngɨyɛ Ɓaɨsalaɛlɛ ɓa꞉mʉgabiso nayɔ.

¹⁰ Ɓɔ꞉kaya naɓɔ kʉbaa wɔ mombi mʉngana, ngɨa a꞉tɨmeyoko lɨkɔchɔ, ngbanga ndʉ aka MAKWƆƁƗƗ a꞉nasigio jɛnɛ-ɔɔ.»

Ɓɔsɔ nɔ Yeso apɛɨ ɔ mʉkɔmbʉ atɨ Pilato

¹¹ Kʉdɔ, ɓa꞉sa nɔ Yeso apɛɨ ɔ ngama Pilato, ɨyɔ ngama ɔ꞉muɓokuo ɓɔ: «Ʉwɛ wa ndɨ ngama ɔ Ɓayuda?» Yeso ɔ꞉mutosio ɓɔ: «Ʉwɛ, wɔsugo sugoni!»

¹² Ananɨ, ɨɓɔ ɓakumukumu, nɔ ɓatataɓasie ɓɔ Ɓayuda, ɓɔ꞉pʉnga anapɨa Yeso nɔ mʉkɔmbʉ. Yakamɛngana, sɔkɔmʉ ɨɓutosio yaka.

¹³ Ga Pilato nayɔ ɓɔ: «Wangɔ ndɨ, ʉwɛ anʉka mʉkɔmbʉ ngʉwa ɓanɔwɛ anapɨa nawɔ ʉpɛ ɓɔ?»

¹⁴ Yakamɛngana, sɔkɔmʉ Yeso ɨmutosio yaka pɔ mɛngana. Yɔ꞉mʉkyaka ɓata ɨyɔ ngama Pilato, tɨa kʉ nɔgbɛ.

¹⁵ Akɔ ɓisi ɓuɓomu ngʉɓɔ Ʉmbɔ wɔ chwɛa aɓubaya, ya꞉ɓio gbali ɔ ngama ɔ ihoi, aɓoo mombi ɔ boloko mʉngana, ɨya, ambaja ɔ ɓombi a꞉tɨmʉbaya ɓɔ ɓɨmuɓoo.

¹⁶ Nɔ, akɔ angbinga ngɨananɨ, ya꞉ɓio nɔ mombi ɔ boloko mʉngana ino ɓɔ Balaba, ɨya, a꞉tɨmbɨanɨa nɔgbɛ.

¹⁷ Pilato ɔ꞉ɓokuo ɓombi ngʉɓa ɓa꞉mɔmanɨa ananɨ ɓɔ: «Nɔ́bayɔ ɓɔ nɨnɨɓoio anɨ, ati ɔ ɓombi ngʉɓaɓɛ? Ga Yeso Balaba, ga pɔ Yeso ngɨa ɓamisoko kʉ ɓɔ Klisito?»

¹⁸ Dɔ, a꞉ɓio anɨmbɨa iɗo ɓɔ, ɓa꞉gaba Yeso ta akɔ yaka yɔ imi.

¹⁹ Angbinga ngɨa Pilato a꞉ɓio-ɔɔ ɓawele akɔ ɓuwolo ngʉɓangɔ ɓɔ kio mʉkɔmbʉ, moi angɔ ɔ꞉mʉtʉmakɨa iso, ɓɔ: «Ʉwɛ, watɨkumoniomʉ amati ɔ ayaka yɔ mombi ata ngbingbii ngɨananɨ, angɔmʉ nɔ mʉkɔmbʉ! Dɔ, naɓutu, nɔ꞉kwaamʉ tɔɔ maɗo pɔ bele, ɨmɨ anʉtakanaka lɨwɔtɔ akʉʉ angɔ!»

²⁰ Ɓakumukumu, nɔ ɓatataɓasie ɓɔ Ɓayuda, ɓa꞉pɔpɨa ambaja ɔ ɓombi, ɓɔ ɓɨta Pilato aɓoo ta Balaba, nɔ, nɨwa Yeso ta asini.

²¹ Ngama Pilato, ɔ꞉tɔɓuɓokuo ɓata ɓɔ: «Ati eɓo ɓapɨnɨ, anɨ ɨya nákʉnda ɓɔ nɨnɨɓoio ɨyɔ?» Ɓɔ꞉mutosio ɓɔ: «Balaba!»

²² Pilato ɔ꞉ɓuɓokuo ɓata ɓɔ: «Andɔ Yeso ngɨa ɓamisoko kʉ ɓɔ Klisito, nɨmʉkɨa tanɨ?» Ɨɓɔ, ɓaɓomu, ɓɔ꞉mutosio ɓɔ: «Ɓɨmʉɓakaka akʉʉ ɔ mʉsalaba!»

²³ Pilato ɔ꞉tɔɓuɓokuo ɓata ɓɔ: «Ɔ꞉kɨɔ dɔ-sɨ ɓʉɓɨɓɨ nga ɓeno tanɨ?» Yakamɛngana, ɓɛ꞉sɨnganaka atʉɓɨa tɨa ɓʉmʉ ɓɔ: «Ɓɨmʉɓakaka akʉʉ ɔ mʉsalaba!»

²⁴ Angbinga ngɨa Pilato ɛ꞉na-ɔɔ ɓɔ, angɔmʉ ɓata adaa ngɨa akɨa-ɔɔ ɨkyɛmʉ, nɔ, ɓombi ɓa tɨa asɨkanakɨa, ɔ꞉to mipo. Kʉdɔ, ɔ꞉gyaɓana lɨkɔndɔ ananɨ apɛɨ ɔ ɓombi. Ga ɨyɔ ɓɔ: «Yaka yɔ menike kɔ mombi ngɨakɛ, yɔnakangamʉ ɓata ɨmɨ. Yɔnɨkanga tɨta inu!»

²⁵ Ɓombi ɓaɓomu ɓɔ꞉tosio ɓɔ: «Yakɨa dɔ ɨma, mʉkɔmbʉ wɔ menike ngʉkangɔ, wiɓio akʉʉ eso, nɔ ɓana ɓeso kʉtaa!»

²⁶ Kʉdɔ, Pilato ɔ꞉ɓuɓoio Balaba, nɔ, ɔ꞉ɓɛndiso Yeso pimbo. Ɔ꞉tɔɓinjo ɨyɔ ga, ɓɨmʉɓakaka akʉʉ ɔ mʉsalaba.

Ɓasʉda ɓɔyapakiso Yeso

²⁷ Ɓasʉda ngʉɓɔ ngama Pilato, ɓɔ꞉sa tɨa nɔ Yeso amati ɔ ɨkáá ngɨyeɓo yɛta ɨja. Nɔ ɨɓɔ ɓaɓomu, ɓɔ꞉mukunguo ga kuu.

²⁸ Ɓɔ꞉muɗuo lɨpʉkʉ ngɨlangɔ, ɓɔ꞉mupeniso tɨa kanjʉ ata ngbʉ.

²⁹ Kʉdɔ, ɓa꞉guɓo apeɓu ɔ maɓʉ ngɨa ɓa꞉mʉbangana amʉtʉ, ndʉ ɨgaɨ yɔ ɓʉngama. Nɔ, ɓɔ꞉muɓotiso mutupo aɨkɔndɔ yɔ guɔngɔ. Ɓɔ꞉pʉnga gbʉkʉmakɨa apɛɨ angɔ, ɓɔɓieni nayɔ ayapakiso ɓɔ: «Tɔnaɓokuo! Ʉwɛ, ngama ɔ Ɓayuda!»

³⁰ Ɓɔ꞉mutokoko nɔ maɗaʉ, nɔ, ɓɔ꞉sɨka mutupo ngʉwɔnanɨ, ɓɔ꞉mʉɓɛnda nawɔ amʉtʉ ɓɔ mba, mba.

³¹ Ɨyɛ ndʉ ɓa꞉pipo nayɔ ayapakiso ɓanɨ, ɓɔ꞉muɗuo kanjʉ ngɨananɨ, nɔ, ɓɔ꞉mutosio lɨpʉkʉ ngɨlangɔ. Kʉdɔ, ɓɔ꞉sa nayɔ tɨa aɓakaka akʉʉ ɔ mʉsalaba.

Ɓɔɓakɔ Yeso akʉʉ ɔ mʉsalaba

³² Angbinga ngɨa ɨɓɔ ɓasʉda, ɓa꞉chwɛa-ɔɔ ananɨ, ɓɔ꞉jonokio nɔ atɨ Simoni, mombi mʉngana wɔ ɨkʉmbʉ yɔ Kɨlɛnɛ. Ɓɔ꞉mutumbiso mʉsalaba ngʉwɔ Yeso nɔ ɓʉkaɓʉkaɨ ga ti.

³³ Ambise ɔngɔ, ɓɔ꞉tɔɓɔya tɨa aɨda ngɨyɛ ɓaɨsoko ɓɔ Gɔlɔgɔta, ɨsɨ yɔngɔ ɓɔ «Ɨda yɔ Ikpokoo.»

³⁴ Tɨa inani, ɓɔ꞉minjo Yeso ʉkyɛpʉ ngʉwɔ ɓa꞉mataka nɔ angila. Yakamɛngana, angbinga ngɨa a꞉kana-ɔɔ, sɔkɔmʉ ɨmwa pɔ nɨmwa.

³⁵ Mbise ɔngɔ, ɓɔ꞉mʉɓakaka Yeso akʉʉ ɔ mʉsalaba. Nɔ, ɓasʉda ɓɔ꞉pakana lɨpʉkʉ ngɨlangɔ ingbaa nalɔ anʉya agbanda.

³⁶ Kʉdɔ, ɓa꞉woloko ta ananɨ, nayɔ akɔpɛmakɨa.

³⁷ Ɓa꞉tɛndakɨa yaka ngɨyɛ ɓa꞉mʉnapɨa-ɔɔ nɔ mʉkɔmbʉ, nɔ ɓɔ꞉ɨɓaka nɔ ɨkʉʉ yɔ mʉtʉ ngʉwangɔ, asugo ɓɔ: «Yeso ɨyakɛ, ngama ɔ Ɓayuda.»

³⁸ Ya꞉ɓio kʉ nɔ ɓombi ɓɔ ndiɓo ɓapɨnɨ, ngʉɓa ɓa꞉ɓʉɓakaka amʉsalaba, ɨhɔ nɔ atɨ Yeso. Mʉngana a꞉ɓio nɔ ʉgbaa ngʉwɔ guɔngɔ, ɨyɔmɔ nɔ ʉgbaa ngʉwɔ aɗeku.

³⁹ Ɓombi ngʉɓa ɓa꞉ɓio achana ananɨ, ɓɔ꞉pʉnga nayɔ asɛaka, nɔ, kpʉkʉma mɨtʉ ngɨyeɓo.

⁴⁰ Ga ɨɓɔ nayɔ ɓɔ: «Ɓɛ, ʉwɛ ngɨa wapanja ɨkáá yɔ Asɔɓɨɨ, nɔ, wɔɨtuɓoko ɓata ambise ɔ makwaa kaatʉ, heisono-sɨ tɨa ʉwɛ makwɔngɔ! Nɔ, wɔɓieni Mwana wɔ Asɔɓɨɨ, ujo amʉsalaba!»

⁴¹ Ɓakumukumu nɔ ɓapananakɨa ɓɔ mapanʉ nɔ ɓatataɓasie ɓɔ Ɓayuda, ɓɔ꞉mʉyapakiso kʉ yapakisoni. Ga ɨɓɔ ɓɔ:

⁴² «A꞉heiso pɔngɔ ta ɓangɛ, yakamɛngana, angɔmʉ ɓata aheisono ɨyɔ makwɔngɔ! Ɓɛ, sɔkɔmʉ-sɨ ɨyɔ akɛ a ngama wɔ Ɓaɨsalaɛlɛ? Ɛɛ! Ujo gɔ-sɨ ɓʉnʉ tɨa akʉʉ ɔ mʉsalaba, tɨa kʉɓanɨ, isu tɔ꞊mʉbaya!

⁴³ Dɔ, a꞉mʉnakambanɨa Asɔɓɨɨ, nɔ, a꞉sugo kʉ ɓɔ a Mwana angɔ. Ɛɛ! Yɔɓieni ɓɔ Asɔɓɨɨ ɔngɔ, amʉkʉnda, ɨmʉheiso tɨa!»

⁴⁴ Ɓombi ɓɔ ndiɓo ngʉɓa, ɓa꞉ɓʉɓakaka ɨhɔ nɔ atɨ Yeso, ɓɔ꞉mʉsɛaka kʉ ngbanga.

Ingwo ngɨyɔ Yeso

⁴⁵ Anɨngwa ɨpá amusoti, ga umomo ta ɓɔ ɗɨɛ, akɔ ɨkʉmbʉ iɓomu, aɓɔya ta akɔ angbinga ngɨa ɔ ɨsaɓɔkʉ wɔ ɨpasɨ.

⁴⁶ Ɨyɛ ndʉ, ya꞉ɓio tɨa tinetine ndʉ saa ɔ ɨsaɓɔkʉ, Yeso ɔ꞉natɨa nɔ iso yɛta ɓʉmʉ, ɓɔ: «Eli! Eli! Lama sabakitani?» Ɨsɨ yɔngɔ ɓɔ: «Hii Asɔɓɨɨ ngɨasɛmɨ! Hii Asɔɓɨɨ ngɨasɛmɨ! Wɔ꞉nasɨɔ ɓanɨ, dɔtanɨ?»

⁴⁷ Ngana ngana ɔ ɓombi ngʉɓa ɓa꞉ɓio ananɨ, nɔ, nʉka yaka ngɨyɛnɛnɨ, ɓɔ꞉sugo ɓɔ: «Ʉkeni, aki-ɛɛ anisoko Ɛlɨa!»

⁴⁸ Ta gagaa ngɨananɨ, mʉngana ati eɓo ɔ꞉sa bangʉ asɨka ɨkyɛmʉ mɛngana yɛta foufou. Ɔ꞉ɨno amati ɔ ʉkyɛpʉ wɔta ʉkagbɛ, nɔ, ɔ꞉ɨbangana amʉtʉ wɔ ʉmbamba. Kʉdɔ, ɔ꞉munjenjio Yeso ɓɔ ɨmwa.

⁴⁹ Yakamɛngana, ɓangɛ ɓɔ꞉sugo ɓɔ: «Mʉsɨa-sɨ, tɨna-sɨ adiga Ɛlɨa ɛka nayɔ aheiso ta ɨkanɨ!»

⁵⁰ Kʉdɔ, Yeso a꞉tɔnatɨa tɨa ɓata nɔ iso yɛta ɓʉmʉ, nɔ, ɔ꞉kio mʉtɨma.

⁵¹ Ta gagaa ngɨananɨ, ɨpʉkʉ yɛta ɨja ngɨyɛ ɓa꞉njenjo amati ɔ ɨkáá yɔ Asɔɓɨɨ, yɔ꞉natʉanɨa akɔ magbaa kapɨnɨ ga hua, anɨngwa akʉʉ aɓɔya ta aɨsɨ. Ɨkʉmbʉ yɔ꞉gʉgʉma, nɔ, makopi kɔ꞉natʉanɨa.

⁵² Manjaʉ kɔ꞉gananakɨa, nɔ mɨnda yɔ ɓombi ɓɔ Asɔɓɨɨ ɨja, yɔ꞉jʉkanaka.

⁵³ Kʉdɔ, ɓa꞉chwɛa amanjaʉ, nɔ mbise ɔ Yeso a꞉jʉkana akɔ ingwo, ɓɔ꞉kumonio anɔ Yelusalɛma ɨkʉmbʉ yɛta tu. Inani, ɓombi ɓaja ɓɔ꞉ɓɨna ta ɨnanɨ.

⁵⁴ Ngama ɔ ɓasʉda ɔ Ɓalɔma, ɨhɔ nɔ ɓombi ngʉɓa ɓa꞉ɓio naɓɔ aɓɛtaka Yeso, angbinga ngɨa ɓɛ꞉na-ɔɔ akpʉkʉma ngɨa, a꞉chana akɔ ɨkʉmbʉ ɓanɨ, nɔ iɓomu ngɨyɛ ya꞉kyananakɨa, ɓɔ꞉kwa ʉɓá nɔgbɛ. Ga ɨɓɔ ɓɔ: «Ta ingono, mombi ngɨa akɛ, a꞉ɓio pɛ ta Mwana ɔ Asɔɓɨɨ!»

⁵⁵ Ɓoi ɓaja ɓa꞉ɓio ɓɛmaakɛ ɓɔ kɛlɛ, anɨna yaka ngɨyɛnɛnɨ ya꞉ɓio akyananakɨa. Ɓoi ngʉɓɔnanɨ, ɓa꞉pʉnga jɛnɛ akpatanaka Yeso, nɔ nayɔ akyananakɨa, anɨngwa ta anɔ Galilaya.

⁵⁶ Ati eɓo, ya꞉ɓio Malɨa ɔ Magadala, nɔ Malɨa ngɨa inye ɔ Yakɔɓɔ nɔ Yɛjɛfʉ, nɔ inye ɔ ɓana ɓɔ Jɛbɛdayɔ.

Ɓɔnapɨɔ ndʉtʉ yɔ Yeso amati ɔ ɓʉnjaʉ

⁵⁷ Ya꞉ɓio tɨa angbinga ɔ ɨpasɨ, mombi ɔ lɨkyɛmʉ mʉngana amati ɔ ɨkʉmbʉ yɔ Alɨmatɛa, ino ɓɔ Yɛjɛfʉ, ɛ꞉ka ga buu. Ɨyɔ, a꞉ɓio kʉ mʉngana ɔ ɓakpata ɓɔ Yeso.

⁵⁸ Ɨyɔ, Yɛjɛfʉ ɔ꞉sa atɨ ngama Pilato, nayɔ anɨta ndʉtʉ yɔ Yeso. Kʉdɔ, ngama Pilato ɔ꞉titio bɔ ɓiminjo ɨyɔ.

⁵⁹ Yɛjɛfʉ ɔ꞉sɨka ndʉtʉ yɔ Yeso, nɔ, ɔ꞉ɨpokoɓoko nɔ malɨkana.

⁶⁰ Nɔ, ɔ꞉ɨkwaiso amati ɔ ɓʉnjaʉ ɓangɔ ɓɔ ɨtakɨtakɨ, ʉɓa, a꞉ɓuchwiso amati ɔ ikopi. Ɔ꞉sɨka, ɔ꞉kuto ikopi yɛta ɨja ananɨ amonu kɔngɔ ga kagbu, nɔ, ɔ꞉sɨka ɔ꞉sa yangɔ.

⁶¹ Malɨa wɔ Magadala, nɔ Malɨa ngɨɔmɔ, ɓa꞉ɓio ɨɓɔ ɓaweleke tɨta ananɨ apɛɨ ɔ ɓʉnjaʉ.

Ɓɔnapɨɔ ɓasʉda apɛmakɨa ɓʉnjaʉ ɓɔ Yeso

⁶² Ambise ɔ ɓisi mʉngana, yasugo ɓɔ ɓisi ɓɔ nuhomuo, ɓakumukumu, nɔ Ɓafalisayɔ ɓɔ꞉jonokio atɨ Pilato.

⁶³ Ɓɔ꞉musigio ɓɔ: «Ha Makweso! Tɔtunguo yaka ngɨyɛ mombi ɔ mʉjɛɛ ngɨa a꞉sugo, ɨyɔ-sɨ ta uɓei, ɓɔ: ‹Ɓa꞊nawa suo, nɔ, ambise ɔ makwaa kaatʉ, nɔ꞊jʉkana akɔ ingwo.›

⁶⁴ Titio gɔ ɓɔ ɓɨpʉnga apɛmakɨa ɓʉnjaʉ aɓɔya ta aka makwaa kaatʉ ngʉkɔnanɨ kachana-ɔɔ. Dɔ, sɔkɔmʉ ɓanɨ, ɓakpata ngʉɓangɔ ɓɛ꞊ka nayɔ aniɓo, nɔ, ɓɔ꞉sa aɓɨakɨa ɓombi ɓɔ: ‹Ɔjʉkana akɔ ingwo jʉkananɨ, ati ɔ mɨnda.› Ɨkananja yɔ mʉjɛɛ ngʉwɔnanɨ, wa꞊nagaaka tɨa ʉwɔ pɛɨ nɔ ɓʉɓɨɓɨ tɨta nagaaka.»

⁶⁵ Pilato ɔ꞉tosio ɓɔ: «Sɨ nánɔ ɓasʉda, seni apɛmakɨa ɓʉnjaʉ, ndʉ aka yɔkwanana-ɔɔ.»

⁶⁶ Kʉdɔ, ɓɔ꞉sa a꞉dɨkpa ɓʉnjaʉ nɔ ikopi amonu kɔngɔ, nɔ, ɓɔ꞉sɨa ɓasʉda ananɨ naɓɔ apɛmakɨa.