Matayɔ 24 - Mʉkpanganɨa nɔ Agɔmɛ ɔ Ɨtakɨtakɨ

Yeso ɔsugo ɓɔ ɨkáá yɔ Asɔɓɨɨ ya꞊pajanɨa

¹ Angbinga ngɨa Yeso a꞉chwɛa-ɔɔ aɨkáá yɔ Asɔɓɨɨ, ɓakpata ngʉɓangɔ ɓɛ꞉ka anambamba angɔ, ga ɨɓɔ nayɔ ɓɔ: «Eeɓe, ɨna-sɨ aki ɓa꞉tuɓoko-ɛɛ ɨkáá yɔ Asɔɓɨɨ!»

² Kʉdɔ, Yeso ɔ꞉ɓusigio ɓɔ: «Nanenu asigio ingono ɓɔ, iɓomu ngɨyɛnɛnɨ nánɨna aka, ikopi pɔ mɛngana ya꞊ngɔtukoo sina ituɓoke akʉʉ ɔ ikopi ngayɛmɔ, dɔ, ɓa꞊kʉpanja sina ta panja!»

Lisisenio ngɨlɔ ɓisi ɓɔ mupipio

³ Angbinga ngɨa Yeso a꞉ɓio-ɔɔ ɓawele akʉʉ ɔ ɨkpangba yɔ Mijeituni, ɓakpata ngʉɓangɔ ɓɔ꞉mɨsɨnganɨa-si tɨta ɨɓɔ, ga ɨɓɔ nayɔ ɓɔ: «Atɨɓɨa-sɨ angbinga ngɨa yaka ngɨyɛnɛnɨ, ya꞊kyananakɨa sina-ɔɔ. Nɔ, kɔkɔ nga ino tanɨ, ɨya, apananiso nɨka ngɨyɛsɔɔ, nɔ, mupipio wɔ dɔdɔ?»

⁴ Yeso ɔ꞉ɓutosio ɓɔ: «pɛmanɨeni pɛmanɨanɨ, mombi pɔ mʉngana a꞉tɨnɨpɛtamʉ!

⁵ Dɔ, ɓombi ɓaja ɓɛ꞊ka sina nɔ ino yɛsɛmɨ, ɨɓɔ asugo ɓɔ: ‹Ɨmɨ akɛ na Klisito!› Ɓombi ngʉɓɔnanɨ, ɓa꞊pɛtaka sina ɓombi ɓaja!

⁶ Akɔ angbinga ngɨananɨ, nɔ́꞊ka sina masaʉ ɓɔ, ɗite lɔdʉanɔ aɓamʉwa di di di. Gʉtʉ ɓanɨ, nátɨkwamʉ ʉɓá, dɔ, yɔkwananɔ ɓɔ yɨkɨanɨ-sɨ ta ɓanɨ. Yakamɛngana, ya꞊ngɔɓiomʉ-sɨ mupipio wɔ dɔdɔ.

⁷ Ɨbaba yɔ ɓombi mɛngana, ya꞊chwɛa sina ɗite akɔ ɨbaba yɔ ɓombi ngayɛmɔ. Nɔ, ɓʉngama ɓɔ꞉chwɛa ɗite kʉ akɔ ɓʉngama ngaɓɔmɔ. Ayende a꞊kwa akɔ lɨkʉmbʉ di di di, ɨhɔ nɔ akpʉkʉma akɔchana.

⁸ Yaka ngɨyɛnɛnɨ iɓomu, ya꞊ɓio-sɨ ta ndʉ ɨyɛ ʉnɔtʉ wadʉa-ɔɔ moi ɔ ɓʉa.

⁹ Akɔ angbinga ngɨananɨ, ɓa꞊pʉnga nenu gabaka, dɔ, ɓɨnɨdyiso ɓʉkaɓʉkaɨ, nɔ, ɓɨnɨmaa. Nɔ, mababa kɔ ɓombi maɓomu ka꞊nɨyaa akʉʉ ɔ ino yɛsɛmɨ.

¹⁰ Akɔ angbinga ngɨananɨ, ɓombi ɓaja ɓa꞊sɨa báya ngɨyeɓo. Ɓɔ꞊pʉnga yaana, nɔ, gabanaka tɨta ati eɓo.

¹¹ Magbɛ maja kɔ mʉjɛɛ, ka꞊chwɛanɨa sina, nɔ, kɔpɛtaka ɓombi ɓaja.

¹² Dɔ, ɓʉɓɨɓɨ ɓɛ꞊ka sina tɨa ɓʉja nɔgbɛ, nɔ, ɓʉkʉnda ngʉɓɔ ɓombi ɓaja ɓɔdɔɓanaka.

¹³ Yakamɛngana, mombi ngɨa ɛ꞊maa ɓʉmʉ akɔɓɔya amupipio, ɛ꞊nɨanɨa nɔ ɓʉhɛa.

¹⁴ Ɓa꞊ɓɨakɨa Ɨsaʉ yɛta Iɗo ngɨyɛnɛnɨ, yɔ Ɓʉngama ngʉɓɔ akʉʉ ɔ ɓisi, adɔdɔ muɓomu, iɗo ambɔ mababa kɔ ɓombi maɓomu, ɓɨchwɛa ɓʉdɛmʉ ɓɔngɔ chwɛanɨ. Kʉdɔ, ambise ɔngɔ, mupipio wɛ꞊ka dɔ tɨa.

Ɓʉkaɓʉkaɨ ɓɔbeluo

¹⁵ Tɨa ngbinga ngɨa nɛ́꞊na-ɔɔ ‹Ɓʉɓɨɓɨ ngʉɓa ɓapipenekio, ɓɔmɨmaiseni tɨta aɨda ngɨyɛ ta Tu, ʉɓa ɓayangiso yaka tɨta yangiso, ndʉ aka ɨgbɛ Danyɛlɛ, a꞉sugo jɛnɛ-ɔɔ›. (Mombi ngɨa apopoko yaka ngɨyɛ, ɨɨpemiso ɨsɨ yɔngɔ pemisoni.)

¹⁶ Néneni tɨa yaka ngɨyɛnɛnɨ, yanɨtanɨa ɓɔ ɓombi ngʉɓa ɓa꞊ɓio amati ɔ ihoi yɔ Yudɛa, ɓɨsa nɔ bangʉ alɨkpangba.

¹⁷ Nɔ, mombi ngɨa a꞊ɓio akʉʉ ɔ ɨkáá, a꞊tɨjomʉ ɓata pɔ nujo, asɨka ɨkyɛmʉ ambɛnɨ.

¹⁸ Mombi ngɨa a꞊ɓio akʉbaa, a꞊tɨtɔa tii ɓata andei, akɔsɨka ɨpʉkʉ yɔ sɛsʉ ngɨangɔ.

¹⁹ Ikoko akɔ ɓoi ngʉɓa ɓa꞊ɓio sina nɔ maa, nɔ akɔ ʉɓa, ɓa꞊ɓio amwiso ɓana maɓɛɨ, angbinga ngɨananɨ!

²⁰ Ɨteni Asɔɓɨɨ ɓɔ, ɓisi ngʉɓa nabi-ɔɔ bangʉ, yatiɓiomʉ angbinga wɔ sɛsʉ, ga pɔ ɓisi ɓɔ Homuo ngʉɓɔ Ɓayuda.

²¹ Dɔ ngbinga ngɨananɨ, ɓʉkaɓʉkaɨ ngʉɓa ɓɔta ɓʉja nɔgbɛ, ɓɛ꞊ka sina. Akɔnɨngwa ta amʉkpanganɨa wɔ dɔdɔ, akɔɓɔya kʉndʉ ɓʉɓʉnʉ, ɨkananja yɔ ɓʉkaɓʉkaɨ ɓɔngɔ, ɓa꞉ngɛnɨanɨamʉ sina. Nɔ, ɓa꞊ngɛnɨanɨamʉ sina ɓata pɔ kʉɓanɨ.

²² Asɔɓɨɨ ɔ꞉kɔdodonimʉ jɛnɛ ngbinga ngɨananɨ a꞉ɓio gbi, ambɔ mombi pɔ mʉngana, angɛnɨanɨa sina nɔ ɓʉhɛa. Yakamɛngana, akʉdodo gbi, akɔ yaka yɔ ɓombi ngʉɓa, ɨyɔ, makwɔngɔ a꞉ɓʉchwa.

²³ Akɔ angbinga ngɨananɨ, mombi ɔnɨɓɨeni ɓɔ: ‹Kangeni! Klisito ɨyakɛ!› Ga pɔ ‹Kangeni! Ɨyɔ, ɨya aki!› Nátɨmʉbayenimʉ.

²⁴ Dɔ, ɓombi ɓɔ mʉjɛɛ ɓaja ɓa꞊chwɛanɨa sina, nɔ ino yɔ klisito, ga pɔ nɔ ino yɔ magbɛ kɔ Asɔɓɨɨ. Nɔ, ɓa꞉kɨa sina ɓakɔkɔ nɔ yaka yɛta ɨmbangɛ di di di ahata ta ɓɔ, ɓikwisiso gɔ tɨa kʉ nɔ, ɓombi ngʉɓa Asɔɓɨɨ a꞉ɓʉchwa jɛnɛ.

²⁵ Ɛɛ inu ɓague-e, Ɨmɨ, nɔ꞉nɨchwɔ pɛpɛ dɔ machwei, tɨta chwanɨ-e!

²⁶ Kʉɓanɨ, mombi ɔnɨsigieni ɓɔ: ‹Kangeni! Ɨyɔ, ɨya a amukengu-a!› Nátɨsenimʉ inani. Pɔ ɓɔ, ɓɔsugeni ɓɔ: ‹Kangeni! Amʉnaɓɛ aka amati ɔ ɨkáá ngɨyɛ!› Nátɨmʉbayenimʉ kʉɓanɨ.

²⁷ Dɔ, nɨka ngɨyɔ Mwana ngɨyɔ Mombi, ya꞊ɓio sina ndʉ ʉgbaá wɨngɛnana, ʉwa wapɔya dɔdɔ muɓomu, anɨngwa aki ɨpá yachʉchwaka-ɛɛ, yɔɓɔya ɓɔyanɨ kʉ aki yakwa-ɛɛ.

²⁸ Akɔ ɨda ngɨyɛ mʉnda wa-ɔɔ, ɓanoi ngʉɓa ɓadya mɨnda, ɓa꞊mɔmanakɨa tɨa kʉ ananɨ.

Nɨka ngɨyɔ Mwana ɔ Mombi

²⁹ Ta gagaa ambise ɔ ɓʉkaɓʉkaɨ ngʉɓɔnanɨ akɔsio, ‹ga ɨpá ta umomo ɓɔ ɗɨyɛ. Uyi, wɔ꞊sɨa jɛa tɨa kʉ sɨanɨ. Ga ndata iyani aɨsɨ ɓɔ mbi, mbi. Ɨkyɛmʉ iɓomu ngɨa angu, akʉʉ ɔ ɓisi, yɔ꞊gʉgʉma.›

³⁰ Kʉdɔ, kɔkɔ ngɨyɔ Mwana ɔ Mombi, a꞊chwɛanɨa tɨa akʉʉ ɔ ɓisi. Mababa kɔ ɓombi maɓomu ngʉka ɛsɨ ɨpá, ɓɔ꞊pʉnga ndɨndɨanaka. Ɓɔ꞊tɛna tɨa Mwana ɔ Mombi anɨka amati ɔ lɨkʉɓa, nɔ angu, ɨhɔ nɔ ʉbɨba ngʉwa wangɔmʉ aka.

³¹ Iso yɔ ɨpanda yɛta ɨja, yɔ꞊kanɨa sina akʉʉ ɔ ɓisi, kʉdɔ, ɔtʉma ɓamalaika ngʉɓangɔ anɨsa, amagbaa maɓomu ngʉkɔ dɔdɔ, akɔmɔmaka ɓombi ngʉɓangɔ a꞉ɓʉchwa.

Isisenio yɔ ɓʉtɨ ɓɔ lipumo

³² Ʉpanʉ nga weno tanɨ, ʉwɛ, wakɔpemiso amati ɔ isisenio ngɨyɛ ɓʉtɨ ɓɔ lipumo? Dɔ, angbinga ngɨa mɨtʉ yɔ mɨtapʉ yɔngɔ yɛka-ɔɔ kpala kpala, nɔ manɨ kɔngɔ kɔpʉnga ɓaa, wɛmbɨa tɨta ɓɔ ngbinga ɔ igo, a tinene.

³³ Kʉɓanɨ, ngbinga ngɨa nɛ́꞊na sina-ɔɔ yaka ngɨyɛnɛnɨ iɓomu akyananakɨa, ɨmbɨeni iɗo ɓɔ Mwana ngɨyɔ Mombi a tɨa tinene anɔ umongu.

³⁴ Nanenu anʉngɨa ta ingono, ɓombi ngʉɓa ɓa ɓʉɓʉnʉ aka, ɓa꞊ngɔsio sina ɓaɓomu, pɛɨ ngɨa yaka ngɨyɛnɛnɨ iɓomu, yapʉnga-ɔɔ kyananakɨa.

³⁵ Ɓisi nɔ dɔdɔ ɓa꞊chana sina chananɨ. Yakamɛngana, yaka ngɨyɛsɛmɨ ya꞊ɓio, ɨyɔ ta mago nɔ mago.

Asɔɓɨɨ nangana akɛ anɨmbɨa angbinga ɔ mupipio

³⁶ Mombi pɔ mʉngana, angɔmʉ anɨmbɨa ɓisi, pɔ angbinga ngɨa yaka ngɨyɛnɛnɨ, ya꞊kyananakɨa-ɔɔ. Kʉndʉ ɓamalaika ngʉɓa akʉʉ ɔ ɓisi, gʉtʉ kʉ nɔ ɨmɨ, Mwana ngɨa angɔ ingainga, tangɔmʉ anɨmbɨa kʉɓanɨ. Yakamɛngana, ta ɨyɔ Asɔɓɨɨ Aba nangana akɛ, anɨmbɨa.

³⁷ Ɓisi ngʉɓa Mwana ɔ Mombi, ɛ꞊ka sina-ɔɔ, yaka ya꞊kɨanɨa kʉndʉ ɨya ya꞉kɨanɨa jɛnɛ angbinga ɔ Nɔa.

³⁸ Dɔ, pɛɨ ngɨa mipo kɔta maja kɛ꞉ka-ɔɔ, ɓombi ɓa꞉ɓio ta adyakanaka, nɔ, mwakanaka. Nɔ, ɓa꞉ɓio kʉ asɨkana, nɔ, sɨkaniso ɓana ngʉɓeɓo ɓeɓoi, akɔɓɔya ta nɔ ɓisi ngʉɓa Nɔa akumonio-ɔɔ amati ɔ ɨngbɔɔ yɛta ɨja.

³⁹ Sɔkɔmʉ ɨɓɔ, atunguo yaka pɔ mɛngana, akɔɓɔya ta aka mipo kɔta maja, kɛ꞉ka-ɔɔ naɓɔ adʉka ɓaɓomu. Ya꞊ɓio sina kʉɓanɨ, angbinga ngɨa Mwana ngɨyɔ Mombi ɛ꞊ka-ɔɔ.

⁴⁰ Ya꞊gbʉka sina ɓague ɓapɨnɨ akʉbaa, ɓa꞊sɨka mʉngana ati eɓo, nɔ ɨyɔmɔ, ɔtukoo.

⁴¹ Ya꞊gbʉka sina ɓoi ɓapɨnɨ adʉa mʉpʉnga, ɓa꞊sɨka mʉngana ati eɓo, nɔ ɨyakɔmɔ, ɔtukoo.

⁴² Kʉɓanɨ, pɛmanɨeni pɛmanɨanɨ! Dɔ, ɓisi ngʉɓa Makweno ɛ꞊ka sina-ɔɔ, nángɔmʉ inu, naɓɔ anɨmbɨa.

⁴³ Pemiseni iɗo, dɔ, makwɔ ɔ ɨkáá, ɨmbɨeni pɛngɛ angbinga ngɨa mombi ɔ ndiɓo ɛka-ɔɔ nayɔ, ambɔ akwaa ta ɓaɓɨsɨnɨ. Dɔ, ɓatɨɓundomʉ ɨkáá ngɨangɔ.

⁴⁴ Tɨa kʉɓanɨ, inu, masi maɓomu ɓieni ta aɓɛtɨa. Dɔ, nángɔmʉ anɨmbɨa angbinga ngɨa Mwana ngɨyɔ Mombi ɛ꞊ka-ɔɔ.

Isisenio yɔ mombi ɔ tɛa ata muɗo nɔ ɨya ata ɓɨɓɨ

⁴⁵ Anɨ akɛ a mombi ɔ tɛa ngɨa apɛmakɨa mapanʉ, ɨhɔ nɔ nɨmbɨmbɨanaka? Ya mombi ɔ tɛa mʉngana, ɨya, makwangɔ a꞉mʉnapɨa akɔkanga ɓaɓwaɓangɔ, nɔ, naɓɔ anʉpakɨa idyo akɔ angbinga ngɨa ɔsisekio.

⁴⁶ Ɨgyagya nɔgbɛ, nɔ mombi ɔ tɛa ngɨananɨ, angbinga ngɨa makwangɔ a꞊tɔa-ɔɔ, ɔ꞊tɔmʉgbʉka ta atɛa, ɓɔ ɗu.

⁴⁷ Nanenu aɓɨa ingono ɓɔ, ɨyɔ Makwangɔ, a꞊mʉnapɨa tɨa akanga lɨkyɛmʉ ngɨlangɔ tɨta liɓomu.

⁴⁸ Yakamɛngana, yɔɓieni ɓɔ mombi ɔ tɛa, a ɨya ata ɓɨɓɨ ɔngɔ, apʉnga tɨa yakanaka amati angɔ ɓɔ: ‹Makwasɛmɨ angɔmʉ atɔa ɨtakɨtakɨ ngɨyɛ.›

⁴⁹ Kʉdɔ, a꞊pʉnga tɨa ɓɛnda ɓabwa ɓangɔ ɓombi ɓɔ tɛa ngaɓɔmɔ, ɨhɔ tɨa nɔ dyakanaka, nɔ, mwakanaka alɨɓɔmbɔ lɔ lɨdamʉ.

⁵⁰ Kʉdɔ, makwangɔ a꞊tɔa tɨa akɔ ɓisi ngʉɓa angɔmʉ-ɔɔ atunguo, nɔ akɔ angbinga ngɨa angɔmʉ-ɔɔ apemiso pɔ pemiso.

⁵¹ Kʉdɔ, makwangɔ a꞊mʉɓɛnda ɓɨɓɨ, nɔ, ɔ꞊mʉmaya aboloko, ɨhɔ nɔ ɓombi ɓɔ pɛtanaka aki ya-ɛɛ, ta ndɨa nɔ dyana menu.