Matayɔ 20 - Mʉkpanganɨa nɔ Agɔmɛ ɔ ƗtakɨtakɨYeso enjo isisenio yɔ ɓombi ɓɔ tɛa 1 Ɓʉngama ngʉɓɔ akʉʉ ɔ ɓisi, ɓa ngbanga ndʉ gue mʉngana ngɨa a꞉hʉna kʉbaa wɔ mijabibo angɔ. Ɓisi mʉngana, a꞉chwɛa ta nɔ igbandindi ɓɔ cha, akɔnɨsa ahata ɓombi ngʉɓa ɓakɨa tɛa amati ɔ kʉbaa ngɨananɨ angɔ. 2 Ɓɔ꞉kɔnɔ nɔ ɓombi ɓɔ tɛa ɓɔ, a꞊ɓinjekio mombi nɔ mombi mʉkaya wɔ agyɛgyɛ mʉngana akɔ ɓisi mʉngana. Ambise ɔngɔ, ɔ꞉ɓʉtʉma akɔ tɛa amati ɔ kʉbaa ngɨangɔ. 3 Tɨa nɔ saa ɔ ɓeetu ngɨyɔ ikuɓa, ɔ꞉chwɛa akyɛndanaka, nɔ, ɔ꞉tɛna ɓata ɓombi nga ɓɔmɔ ɓɛmaakɛ ta ɓʉtʉʉ asɔkɔ ɓɔ. 4 Ga ɨyɔ naɓɔ ɓɔ: ‹Inu, seni akɨa tɛa kʉ inani amati ɔ kʉbaa ngɨasɛmɨ. Na꞊ninjo mʉkaya ta ndʉ aka yɔsisekio-ɔɔ.› 5 Kʉdɔ, ɓɔ꞉ngwɨa kyɛnda ɓɔsa. Nɔ musoti, ɔ꞉sa ɓata kʉ akyɛndanaka. Ɔ꞉titio ɓata ɓombi nga ɓɔmɔ kʉ ɓɔ ɓɨsa kʉ inani akʉbaa. Tɨa nɔ ɓasaa ɨsaɓɔkʉ, ɔ꞉tɔtitio ɓata ɓombi nga ɓɔmɔ kʉɓanɨ. 6 Tɨa tinetine ndʉ ɓasaa tɛkɛɓɛ nɔ mʉngana, ɔ꞉tɔsa ɓata kʉ akyɛndanaka. Ɛ꞉tɛna ɓata ɓombi nga ɓɔmɔ kʉ ɓɛmaakɛ. Ɔ꞉ɓuɓokuo ɓɔ: ‹Nɛsaakɔ ɓɛmaakɛ ɓʉtʉʉ ɓanɨ, dɔtanɨ?› 7 Ga ɨɓɔ nayɔ ɓɔ: ‹Mombi pɔ mʉngana ɔ꞉tinjomʉ tɛa.› Kʉdɔ, ɔ꞉ɓusigio ɓɔ: ‹Seni inu, kʉ akɨa tɛa inani amati ɔ kʉbaa ngɨasɛmɨ.› 8 Tɨta nepasɨ ɓɔ dʉʉ, ga makwɔ kʉbaa nɔ kapita ngɨangɔ ɓɔ: ‹Isoko ɓombi ɓɔ tɛa, nɔ, wɔɓinjekio mombi nɔ mombi mʉkaya ngʉwangɔ. Wapʉnga nɔ ɓombi ngʉɓa ɓɛ꞉kɔ ambise, wɔpipio nɔ ʉɓa ɓɛ꞉kɔ pɛngɛ pɛɨ.› 9 Kʉdɔ, ɓombi ngʉɓa ɓa꞉pʉnga tɛa nɔ saa ngɨyɔ tɛkɛɓɛ nɔ mʉngana, ɓɛ꞉ka, nɔ mombi nɔ mombi, ɓɔ꞉minjo agyɛgyɛ mʉngana. 10 Ndʉ ɓombi ngʉɓa ɓa꞉pʉnga tɛa nekuɓa yɛta dɨ, ɓɛ꞉ka ɨɓɔ, ɓa꞉ɓio ayongo ga ɓaɓinjo mʉkaya tɨa ʉja nɔgbɛ anagaaka ɓangɛ. Yakamɛngana, ɓɔ꞉tɔɓinjekio ɓata ɨɓɔ kʉ ɓagyɛgyɛ nganangana. 11 Ɨyɛ ɓa꞉sɨka ɓagyɛgyɛ ngʉɓɔnanɨ ɓɔ gba, ɓɔ꞉pʉnga ndʉndwanakɨa makwɔ kʉbaa, akɔsugo ɓɔ: 12 ‹Wenjo ɓombi ngʉɓa ɓɛ꞉kɔ akɔ tɛa mbise ɓagyɛgyɛ ngbanga nesu, dɔtanɨ? Ngbinga ngɨa ɨɓɔ, ɓɔ꞉kɨɔ-ɔɔ tɛa ta saa mʉngana ɓɔ ngbe. Kanga dɔ tɨa isu, ngʉɓa tɛsaakɨɔ tɛa saakɨa, nɔ, ɨpá yɔ꞉tijio anɔ ndʉtʉ!› 13 Yakamɛngana, makwɔ kʉbaa, ɔ꞉tɔsio mombi mʉngana ati eɓo ɓɔ: ‹Ha gue, ɓʉɓɨɓɨ ngʉɓa nɔ꞉nakɨɔ ɓeno tanɨ? Tɔkɔnɔmʉ pɛngɛ ndɨ nɔwɛ akɔ mʉkaya wɔ agyɛgyɛ ta mʉngana? 14 Kʉɓanɨ, Sɨka agyɛgyɛ ngɨasɔɔ, nɔ, wɔsa! Ɨmɨ akɛ, nɔbayɔ aninjo mombi ngɨa nɔ꞉mʉsɨkɔ pɛngɛ ambise, mʉkaya ngbanga ta nɔ ʉwɛ. 15 Ya-sɨ tanɨ? Nɔkwananɔmʉ ndɨ akɨa nɔ lɨkyɛmʉ ngɨlɛsɛmɨ, ndʉ aka nabaya-ɔɔ? Adiga, wanɨkwa imi, dɔ, na ndɨ mombi ata iɗo?›» 16 Yeso ɔ꞉musigio ɓata ɓɔ: «Yaɓanɨ, ɓombi ɓɔ mbise, ɓa꞊ɓio sina ɓombi ɓɔ pɛɨ. Nɔ, ɓombi ɓɔ pɛɨ, ɓɛ꞊ka sina tɨa ɓombi ɓɔ mbise.» Yeso ɔɓɨanɨɔ ingwo machaa kaatʉ ( Mlk 10:32-34 ; Luk 18:31-34 ) 17 Angbinga ngɨa Yeso a꞉ɓio-ɔɔ anɨsa anɔ Yelusalɛma, ɛ꞉soko ɓatitima ngʉɓangɔ tɛkɛɓɛ nɔ ɓapɨnɨ anɔ ambamba, ɔ꞉pʉnga naɓɔ asigio ta nɔ kyɛnda ɓɔ: 18 «Kanganɨeni iɗo! Ɨtakɨtakɨ ngɨyɛ tanɨsa anɔ Yelusalɛma. Nɔ, inani Ɨmɨ, Mwana ngɨyɔ Mombi ɓabinagaba akɔ lɨkɔndɔ lɔ ɓatataɓasie ɓɔ ɓakumukumu, ɨhɔ nɔ ɓapananakɨa ɓɔ mapanʉ. Ɨɓɔ, ɓabikio mʉkɔmbʉ ɓɔ ɓɨnawa ta nɨwa. 19 Mbise ɔngɔ, ɓɔ꞊nenjo alɨkɔndɔ lɔ ɓombi ngʉɓa ɓangɔmʉ Ɓayuda. Kʉdɔ, Ɓa꞊nanononoko, nɔ, ɓɔ꞊naɓɛnda pimbo. Nɔ, ɓɔ꞊naɓakaka akʉʉ ɔ mʉsalaba. Yakamɛngana, akɔ ɓisi ɓɔ kaatʉ, na꞊jʉkana akɔ ingwo jʉkananɨ.» Inye ɔ Yɔanɨ nɔ Yakɔɓɔ ɔtɨɔ ɓana ɓangɔ ɓʉngama ( Mlk 10:35-45 ) 20 Ambise ɔngɔ, inye ɔ ɓana ɓɔ Jɛbɛdayɔ, ɔ꞉mɨsɨnganɨa Yeso ga sɛɛ, ɨyɔ, ɨhɔ tɨa nɔ ɓana ɓangɔ ɓapɨnɨ. Inye eɓo ɔ꞉gbʉkʉmɨa nɔ mau ananɨ apɛɨ angɔ, akʉnda nayɔ anɨta ɨkyɛmʉ. 21 Ga Yeso nayɔ ɓɔ: «Ɨna! Wakʉnda ɨmanɨ?» Ɔ꞉mutosio ɓɔ: «Hii Aba, injo ɓaka ʉpanʉ ɓɔ ngbinga ngɨa waɓio-ɔɔ akɔ Ɓʉngama ngʉɓɔsɔɔ, ɓana ngʉɓɔsɛmɨ ɓa ɓapɨnɨ aɓɛ, mʉngana iwolo akɔ ɨkɔndɔ yɔ guɔngɔ, nɔ ɨyɔmɔ, ɔtɔwolo akɔ ɨkɔndɔ yɔ aɗeku.» 22 Ga Yeso naɓɔ ɓɔ: «Heɓe, inu ɓague!, Yaka ngɨyɛ nátatanɨa ɓɔ kpɛ, nángɔmʉ anɨmbɨa. Ʉpata wɔ ɓʉkaɓʉkaɨ, ngʉwa ɨmɨ nanɨsa anɨmwa, inu, nákwanana ndɨ kʉɔ nawɔ anɨmwa?» Ɓɔ꞉mutosio ɓɔ: «Iii, tamwa mwanɨ.» 23 Kʉdɔ, Yeso a꞉ɓutosio ɓɔ: «Ʉpata wɔ ɓʉkaɓʉkaɨ, inu, ná꞊ʉmwa sina mwanɨ! Yakamɛngana, yaka ngɨyɛ yɔ woliso ɓombi akɔ ɨkɔndɔ yɔ guɔngɔ, ga pɔ akɔ ɨkɔndɔ yɔ aɗeku ngɨyɛsɛmɨ, yɔnakangamʉ ɨmɨ. Yakamɛngana, lɨda ngɨlɛnɛnɨ, la ta akɔ ɓombi ngʉɓa Asɔɓɨɨ a꞉ɓʉchwa.» 24 Ati ngɨa ɓatitima ngʉɓɔmɔ tɛkɛɓɛ ɓɔ꞉ka-ɔɔ ɓanɨ, ɓɔ꞉ɓɨnɨa mʉtɨma wɔta ɓɨɓɨ nɔgbɛ. 25 Kʉdɔ, Yeso ɔ꞉ɓisoko ɨɓɔ ɓaɓomu, ga ɨyɔ naɓɔ ɓɔ: «Nánɨmbɨa iɗo ɓɔ, ɓangama ngʉɓɔ dɔdɔ ngɨa, ɓakyananaka ɓombi ɓʉmʉ ɓʉmʉ. Nɔ, ɓombi ɓɔta ɓakpɔkpɔ ɓɔ dɔdɔ ngɨa, ɓakʉnda ta pananiso ɓʉkaɓʉkaɨ ngʉɓeɓo. 26 Yakamɛngana, pɛpɛ dɔ ati eno, yɔkwananɔmʉ pɛngɛ ɓio ɓanɨ. Mombi ngɨa akʉnda ɓio ngama, ɨsɨkaniso ndʉ mombi ngɨa akyananakɨa ɓangɛ ɓaɓomu. 27 Nɔ mombi muɓomu ngɨa akʉnda aɓio mombi ɔ pɛɨ ati eno, a꞊ɓio ta baya eno. 28 Kʉɓanɨ, Ɨmɨ, Mwana ngɨyɔ Mombi nɛ꞉kamʉ ɓɔ dɔ ɓɨnakyananakɨa, yakamɛngana, nɛ꞉ka akyananakɨa ɓombi, nɔ, ninjo uɓei ngʉwɔsɛmɨ ndʉ mutebii, akɔheiso ɓombi ɓaja.» Yeso ɔheiso ɓombi ɓɔ mamɔmɔ ɓapɨnɨ ( Mlk 10:46-52 ; Luk 18:35-43 ) 29 Ɨyɛ atɨ Yeso, ɓa꞉ngwa ananɨ anɔ Yeliko, ga ambaja ɔ ɓombi ambise eɓo ɓɔ sioo. 30 Ɓombi ɓɔ mamɔmɔ ɓapɨnɨ, ɓa꞉ɓio ɓaweleke ananɨ anambamba ɔ ɨngbaa. Ɨyɛ ɓɔ꞉ka ɓɔ Yeso achana, ɓɔ꞉natɨa nɔ isó yɛta ɓʉmʉ ɓɔ: «Hii Makwɔɓɨɨ, Mwana ɔ ngama Dawidi! Atɨnɨa ɓaka ikoko!» 31 Angbinga, ngɨa ɓombi ɓɔ꞉ka-ɔɔ ɓanɨ, ɓɔ꞉ɓʉnyakɨa ɓɔ ɓɨgbaa. Yakamɛngana, ɓɛ꞉sɨngana natɨa tɨa nɔ pɛɨ, ɓɔ: «Hii Makwɔɓɨɨ, Mwana ɔ ngama Dawidi! Atɨnɨa ɓaka ikoko!» 32 Kʉdɔ, Yeso ɛ꞉maa, ɔ꞉ɓisoko, nɔ, ɔ꞉ɓuɓokuo ɓɔ: «Nákʉnda ɓɔ nɨnɨkɨa tanɨ?» 33 Ga ɨɓɔ nayɔ ɓɔ: «Hii Makwɔɓɨɨ! Takʉnda ɓɔ mesu ngʉkeso kɨgananɨa ɓaka.» 34 Yeso ɔ꞉ɓɨnɨa ikoko nɔgbɛ, nɔ, ɔ꞉ɓotoko mesu ngʉkeɓo. Ta gagaa ngɨananɨ, mesu kɔɓʉgananɨa. Kʉdɔ, ɓɔ꞉pʉnga kpata Yeso. |
© 2021, Wycliffe Bible Translators, Inc.
Wycliffe Bible Translators, Inc.