Matayɔ 2 - Mʉkpanganɨa nɔ Agɔmɛ ɔ Ɨtakɨtakɨ

Ɓombi ɓɔ nɨmbɨmbɨanaka ɓɛkɔ akɔbibiso mwana Yeso

¹ Yeso a꞉nɔtanɨa anɔ Bɛtɛlɛmʉ, amati ɔ ihoi yɔ Yudɛa, angbinga ngɨa ɔ ngama Hɛlɔdɛ. Mbise ɔ nɔtanɨa ngɨangɔ, ɓombi ɓɔ nɨmbɨmbɨanaka, akʉʉ ɔ yaka yɔ ndata, anɨngwa ta aki ɨpá yachwʉchwaka-ɛɛ, ɓɛ꞉ka ananɨ anɔ Yelusalɛma.

² Kʉdɔ, ɓa꞉ɓokuo ɓɔ: «Mwana ngɨa ɔ꞉nɔtanɨɔ akɔɓio ngama ata mʉja ɔ Ɓayuda a tɨa gbanɨ? Tɛ꞉na pɔngɔ ʉndata ngʉwangɔ, ajɛa aki ɨpá yachʉchwaka-ɛɛ. Kʉdɔ isu, tɛ꞉kɔ tɨa kʉ nayɔ akɔbibiso.»

³ Ɨyɛ ndʉ ngama Hɛlɔdɛ ɔ꞉ka yaka ngɨyɛnɛnɨ, ɔ꞉mbambanio nɔgbɛ, ɨhɔ nɔ ɓombi ɓɔ Yelusalɛma ɓaɓomu.

⁴ Ɔ꞉ɓʉmɔma ɓangama ɓaɓomu ngʉɓɔ ɓakumukumu, nɔ ɓapananakɨa ɓɔ mapanʉ, naɓɔ aɓokuo ɓɔ yɔ꞉kwananɔ jɛnɛ ɓɔ Klisito ɨnɔtanɨa gbanɨ.

⁵ Kʉdɔ, ɓa꞉mutosio ɓɔ: «Akɔ gʉlʉ ɔ Bɛtɛlɛmʉ, amati ɔ Yudɛa. Tanɨmbɨa, dɔ, ɨgbɛ a꞉tɛndakɨa ɓɔ:

⁶ ‹Ʉwɛ Bɛtɛlɛmʉ, amati ɔ ihoi yɔ Yudɛa, ʉwɛ, wangɔmʉ gʉlʉ ata yaya amati ɔ ɓagʉlʉ ngʉɓɔ ihoi yɔ Yudɛa, dɔ, amati asɔɔ ngama a꞊nɔtanɨa, ɨya, a꞊kanga ɓombi ngʉɓɔsɛmɨ ingainga ɓɔ kpɛ, Ɓaɨsalaɛlɛ.›»

⁷ Kʉdɔ, Hɛlɔdɛ a꞉ɓisoko ɨɓɔ ɓombi ɓɔ nɨmbɨmbɨanaka ngʉɓɔnanɨ, ɨngbaa aɓaɗi, dɔ, ɓɨmʉngɨa ta ingono angbinga ngɨa, ʉndata ngʉwɔnanɨ wa꞉chwɛanɨa pɔngɔ-ɔɔ.

⁸ Mbise ɔngɔ, ɔ꞉ɓʉtʉma anɔ Bɛtɛlɛmʉ, ga ɨyɔ naɓɔ ɓɔ: «Seni, nɔ́pemiso ta ingono, ɨsaʉ yɔ mwana ngɨananɨ. Ngbinga ngɨa námɨna-ɔɔ, nɛ́꞊ka kʉɔ nɛmɨ akɔɓɨa, dɔ, nɨsa kʉɔ ɨmɨ nayɔ akɔbibiso.»

⁹ Ambise wɔ nʉka yaka ngɨyɛ ngama a꞉sugo, ɓɔ꞉ngwa yeɓo. Ambenigɔ ɓɔ pe, ʉndata ngʉwɔnanɨ, ɓa꞉wɨna nɔ ʉgbaa mesu aki ɨpá yachʉchwaka-ɛɛ, wɔ꞉ɓʉnatɨnganɨa tɨa apɛɨ. Ga ɨwɔ ga tɨngbɨ, inani akʉʉ ɔ ɓisi, ngbingbii ta akɔ ɨda ngɨyɛ mwana a꞉ɓio-ɔɔ.

¹⁰ Ɨyɛ ndʉ ɓa꞉wɨna ɓanɨ, ɓɔ꞉kwa ɨgyagya nɔgbɛ.

¹¹ Kʉdɔ, ɓa꞉kumonio ambɛnɨ, ɓɛ꞉na mwana, ɨhɔ, nɔ inye Malɨa. Ɓɔ꞉gbʉkʉmakɨa nɔ mau, nayɔ abibiso mwana. Mbise ɔngɔ, ɓɔ꞉ɓonoko makwe ngʉkeɓo, nɔ ɓɔ꞉minjo apɛpɛ, tɨa akɔ ɔlɔ, tɨa akɔ adʉdʉ, nɔ malasɨ.

¹² Ambise ɔngɔ, Asɔɓɨɨ ɔ꞉tɔɓusigio ɨngbaa alɨwɔtɔ ɓɔ, ɓatɨtɔwa tii ɓata ɨngbaa atɨ Hɛlɔdɛ. Kʉdɔ, ɓa꞉tɔwa andaɓʉ tɨta nɔ ɨngbaa nga yɛmɔ kʉ di.

Atɨ Yɛjɛfʉ nɔ Malɨa ɓɔsɔ nɔ Mwana anɔ Misili

¹³ Ɨyɛ ndʉ ɓombi ɓɔ nɨmbɨmbɨanaka ɓa꞉sa ɨɓɔ, malaika wɔ Makwɔɓɨɨ, wɔ꞉mʉchwɛanɨa Yɛjɛfʉ amati ɔ lɨwɔtɔ. Ga ɨyɔ nayɔ ɓɔ: «Ha gue! Ɔngwa ɨkʉʉ, sɨka atɨ mwana nɔ inye, wɔchwa naɓɔ bangʉ anɨsa anɔ Misili. Dɔ, Hɛlɔdɛ ahata ga amʉwa mwana ta nɨwa. Ɓieni ta inani, akɔɓɔya ta aka na꞊nisigio sina-ɔɔ ɓɔ tɔweni.»

¹⁴ Kʉɓanɨ, ta naɓutu ngɨananɨ, Yɛjɛfʉ ɔ꞉jʉkana, nɔ, ɔ꞉sɨka atɨ mwana nɔ inye, nɔ, ɓɔ꞉ngwɨa kyɛnda anɨsa anɔ Misili.

¹⁵ Kʉdɔ, ɓa꞉ɓio tɨta inani, akɔɓɔya ta aka Hɛlɔdɛ a꞉wo-ɔɔ. Ya꞉kyananakɨa ɓanɨ, akɔkpatanakɨa nɔ yaka ngɨyɛ Makwɔɓɨɨ a꞉ngaka jɛnɛ, ɨngbaa akɔ ɨgbɛ ngɨangɔ ɓɔ: «Nɛ꞉soko mwana ngɨasɛmɨ, anɨngwa anɔ Misili.»

Ngama Hɛlɔdɛ ɔtitio ɓɔ ɓɨmaa ɓana

¹⁶ Ɨyɛ ndʉ ngama Hɛlɔdɛ ɛ꞉na ɓɔ ɓombi ɓɔ nɨmbɨmbɨanaka, ɓɔ꞉mʉpɛtɔ pɛtanɨ, ɔ꞉huo nɔ ʉnganga ɓɔ kyɛɛ. Ɔ꞉tʉma ɓasʉda ɓɔ ɓɨsa anɔ Bɛtɛlɛmʉ, nɔ akɔ ɓagʉlʉ ɓaɓomu, ngʉɓɔ amutii wɔngɔ. A꞉ɓʉtʉma akɔmaa ɓana ɓegue ɓaɓomu ngʉɓɔ mago kapɨnɨ, nɔ, ɛsɨ ɔ mago kapɨnɨ. A꞉kɨa ɓanɨ, akpatanakɨa nɔ ngbinga ngɨa ɓombi ɓɔ nɨmbɨmbɨanaka, ɓɛ꞉na-ɔɔ ʉndata.

¹⁷ Kʉɓanɨ, yaka ngɨyɛ ɨgbɛ Yɛlɛmɨa a꞉sugo jɛnɛ, ɨyɛnɛnɨ, ya꞉kyananakɨa:

¹⁸ «Iso yanʉkanɨa anɨngwa anɔ Lama, ndɨa nɔ ndɨndɨanaka yɔbeluo. Lakeli ɨyananɨ akɛ, akɔndɨa ɓana ɓangɔ, ɔ꞉yaa tɨa kʉ ɓɔ ɓɨmʉgbɛma, dɔ, ɓana ɓangɔ ɓɔsio sioni.»

Atɨ Yɛjɛfʉ ɓɔtɔwɔ aki ɓasa-ɛɛ anɔ Misili

¹⁹ Ambise ɔ ingwo yɔ Hɛlɔdɛ, malaika wɔ Makwɔɓɨɨ wɔ꞉mʉchwɛanɨa Yɛjɛfʉ akɔ lɨwɔtɔ, ɨyɔ-sɨ gbɛgbɛ ta inani anɔ Misili.

²⁰ Ga ɨyɔ nayɔ ɓɔ: «Ha gue! Ʉngwa ɨkʉʉ, sɨka atɨ inye ɔ mwana nɔ mwana angɔ, nɔ, tɔeni anɔ Ɨsalaɛlɛ, dɔ, ɓombi ngʉɓa ɓa꞉ɓio pɔngɔ asagɨa anɨwa mwana, ɓa꞉sio pɛ sioni.»

²¹ Kʉdɔ, Yɛjɛfʉ a꞉ngwa ɨkʉʉ, ɔ꞉sɨka atɨ mwana nɔ inye, nɔ, ɓɔ꞉tɔa anɔ Ɨsalaɛlɛ.

²² Yakamɛngana, Yɛjɛfʉ ɔtɔ꞉ka ɓɔ, ɓata ta Alɨkɛlaɔ, ngɨa mwana ɔ Hɛlɔdɛ akɛ, ɔ꞉dyɔ ɓʉngama anɔ Yudɛa ambise ɔ ingwo yɔ ɨsɛ. Kʉdɔ, ɨyɔ Yɛjɛfʉ, ɔ꞉kumo ɓata atɔa inani kʉ kumoni. Ambenigɔ ɓɔ pe, Asɔɓɨɨ a꞉mimbiiso yaka amatɨ ɔ lɨwɔtɔ. Kʉdɔ, ɔ꞉sa yangɔ tɨta anɔ Galilaya.

²³ Inani, a꞉sa awolo amati ɔ gʉlʉ ngɨyɔ Najalɛtɨ, akɔkpatanakɨa nɔ yaka ngɨyɛ magbɛ kɔ Asɔɓɨɨ ka꞉ngaka jɛnɛ ɓɔ: «Ɓa꞊misoko sina ɓɔ Mʉnajalɛtɨ.»