Matayɔ 15 - Mʉkpanganɨa nɔ Agɔmɛ ɔ Ɨtakɨtakɨ

Ɓombi ɓɔ dɔdɔ ɓakpataka ta gbali ngɨyeɓo

¹ Mbise ngɨananɨ, Ɓafalisayɔ ɨhɔ nɔ ɓapananakɨa ɓɔ mapanʉ, ɓɔ꞉ngwa anɔ Yelusalɛma, ɓɛ꞉ka agbʉka Yeso, ga ɨɓɔ nayɔ ɓɔ:

² «Ɓakpata ngʉɓɔsɔɔ, ɓangɔkyananakɨa ɨɓɔ gbali ngɨa ɓatataɓasie ɓa꞉tɨsɨa nayɔ, dɔtanɨ? Ɨna-sɨ ɓadyakaka ɨɓɔ ta dyakaka, sɔkɔmʉ ɓɨgyaɓana lɨkɔndɔ.»

³ Ga Yeso naɓɔ ɓɔ: «Andɔ-sɨ inu, ayaka yɔ ɨmanɨ, nákɔɓundo mapanʉ kɔ Asɔɓɨɨ, akɔkyananakɨa ta gbali ngɨyeno?

⁴ Dɔ, Asɔɓɨɨ a꞉sugo ɓɔ: ‹Kumo atɨ atɔ, nɔ anʉ.› Ɔ꞉tɔsugo ɓata kʉ ɓɔ: ‹Mombi ɔgbangeni ɨsɛ, ga pɔ inye, ɓɨmʉwa, ta nɨwa.›

⁵ Yakamɛngana, inu, nákɔpanɨa ɓɔ, mombi ngɨa asigio ɨsɛ, ga pɔ inye, ɓɔ: ‹Ɨkyɛmʉ ngɨyɛ nɔsisekio pɛngɛ ɓɔ nɨnasalɨa nayɔ, nɔɨnapio ɨmɨ tɨa ndʉ apɛpɛ akɔ Asɔɓɨɨ,›

⁶ mombi ngɨananɨ, angɔkwanana tii ɓata akumo atɨ ɨsɛ nɔ inye. Inu, náyapakiso Ɨsaʉ yɔ Asɔɓɨɨ, ayaka yɔ gbali ngɨyeno.

⁷ Inu ɓombi ɓɔ pɛtanaka ngʉɓa! Ambɔ ɨgbɛ Isaya a꞉nisigio gɔ ta ingono ɓɔ:

⁸ ‹Ɨfananja ngɨyɛ, ɓanɛmɨ abibiso ta nɔ monu. Yakamɛngana, amɨtɨma ngɨyeɓo, ɓangɔmʉ tinene nɛmɨ pɔ bele!

⁹ Bibiso ngɨyɛ, ɨɓɔ, ɓasugo ga ɓanɛmɨ abibiso, ya ta ɓʉtʉʉ! Dɔ, mapanʉ ngʉka ɓapanɨa, ya ta gbali ɔ ɓombi.›»

Ɨkyɛmʉ ngɨyɛ yakiiso mombi mʉsʉgʉ

¹⁰ Mbise ɔngɔ, Yeso ɛ꞉soko ambaja, ga ɨyɔ naɓɔ ɓɔ: «Ʉkeni yaka ngɨyɛ, nɔ, nɔipemiso ta iɗo!

¹¹ Ɨkyɛmʉ ngɨyɛ yakumonio amati ɔ monu kɔ mombi, yangɔkwananamʉ nayɔ akiiso mombi mʉsʉgʉ. Yakamɛngana, ta yaka ngɨyɛ yachwɛa amati ɔ monu kɔ mombi, ayɛ, yamukiiso mʉsʉgʉ.»

¹² Kʉdɔ, ɓakpata ngʉɓangɔ ɓa꞉muɓokuo ɓɔ: «Wangɔmʉ ndɨ anɨmbɨa ɓɔ yaka ngɨyɛnɛnɨ wɔsugo, yadyiso Ɓafalisayɔ ikoko amʉtɨma?»

¹³ Ga Yeso naɓɔ ɓɔ: «Ɓʉsɔɔ ɓuɓomu ngʉɓa Aba ngɨasɛmɨ, ɨyakɛ akʉʉ ɔ ɓisi a꞉ɓʉhʉnamʉ, ɓa꞊ɓuɗuo ta ɗuo.

¹⁴ Ɓʉsieni ɨɓɔ Ɓafalisayɔ ngʉɓɔnanɨ ta ananɨ. Ɨɓɔ, ɓa ngbanga ndʉ ɓombi ɓɔ mamɔmɔ ngʉɓa, ɓakɔhata apanaka ɓombi ɓɔ mamɔmɔ ngaɓɔmɔ lɨngbaa. Ndʉ mombi ɔ mamɔmɔ mʉngana, ahata apanaka aɓwangɔ mombi ɔ mamɔmɔ ɨngbaa, ɨɓɔ ɓapɨnɨ ɓaɓomu, ɓabikwa ta amati ɔ ʉpɨa!»

¹⁵ Anʉka ɓanɨ, ga Pɛtɛlɔ nayɔ ɓɔ: «Atʉngakɨa-sɨ ɨsɨ yɔ isisenio ngɨyɛnɛnɨ.»

¹⁶ Ga Yeso ɓɔ: «Ɨnɛ! Ambɔ inu ná gɔ ɓata kʉ amati ɔ ɓujangijangi ngʉɓaɓɛ?

¹⁷ Nángɔmʉ ndɨ anɨmbɨa ɓɔ, ɨkyɛmʉ iɓomu ngɨyɛ yakumonio amati ɔ monu, yɔjo amati ɔ ɓʉa, yachwɛa chwɛanɨ?

¹⁸ Yakamɛngana, yaka ngɨyɛ yachwɛa amati ɔ monu kɔ mombi, yangwa ta amati ɔ mʉtɨma ngʉwangɔ. Nɔ, yaka ngɨyɛnɛnɨ, ayɛ, yakwanana nayɔ akiiso mʉsʉgʉ.

¹⁹ Dɔ, amati ɔ mʉtɨma wɔ mombi, yachwɛa itungwiyo yɛta ɓɨɓɨ, maa ɓombi, muso, kɨa bʉjangwɛ, ndiɓo, singekio mʉjɛɛ nɔ ɓanamʉkɔ.

²⁰ Migbo yɔ yaka ngɨyɛnɛnɨ iɓomu, yakikiiso mombi mʉsʉgʉ. Yakamɛngana, mombi ngɨa adyakaka, sɔkɔmʉ ɨgyaɓana lɨkɔndɔ, angɔkwananamʉ ɨyɔ, aɓio mʉsʉgʉ, nɔ ɨngbaa ngɨyɛnɛnɨ.»

Muto ɔ ɓakanana ɔbayanakɨɔ

²¹ Mbise ɔngɔ, atɨ Yeso ɓɔ꞉ngwa ananɨ anɔ Gɛnɛjalɛtɨ, ɓɔ꞉tɔsa tɨa nɔ ʉgbaa mesu akɔ ihoi yɔ Tilo, nɔ Sɨdɔna.

²² Inani, ya꞉ɓio nɔ muto ɓakanana mʉngana ɓɔ. Ɨyɔ, moi ngɨananɨ, ɔ꞉sa ajonokio nɔ Yeso. Ɔ꞉natɨa ga ɨyɔ ɓɔ: «Hii Makwɔɓɨɨ, Mwana ɔ ngama Dawidi, anɛnɨa ɓaka ikoko! Idu yakɔkyananaka mwana ata moi ngɨasɛmɨ, ɓʉkaɨ nɔgbɛ!»

²³ Yakamɛngana, sɔkɔmʉ Yeso ɔ꞉mutosio yaka pɔ bele. Ɓakpata ngʉɓangɔ ɓɛ꞉ka nayɔ akikelekio ɓɔ: «Atɨkponyio baka-sɨ moi ngɨa anesu akpata nɔ ɨpʉmbʉ-a!»

²⁴ Ga ɨyɔ nayɔ ɓɔ: «Asɔɓɨɨ a꞉natʉma ɨmɨ ta atɨ ɓakɔndɔlɔ ngʉɓa ɓa꞉yangaa, amati ɔ ɨnfananja ngɨyɔ Ɓaɨsalaɛlɛ.»

²⁵ Yakamɛngana, ɨyɔ moi ngɨananɨ, ɔ꞉gbʉkʉmɨa ta ananɨ apɛɨ angɔ, nɔ ɔ꞉mɨta ɓɔ: «Hii Makwɔɓɨɨ! Anasalɨa ɓaka salɨanɨ!»

²⁶ Kʉdɔ, Yeso ɔ꞉mutosio ɓɔ: «Yangɔmʉ iɗo asɨka idyo yɔ ɓana, nɔ, wɔɨgisio tɨa ɓɛmva.»

²⁷ Ga moi ngɨananɨ nayɔ ɓɔ: «Iii Makwɔɓɨɨ! Yaɓanɨ. Yakamɛngana, gʉtʉ ta ɓɛmva, ɓa꞉dya pɛpɛ mikinyo yɔ idyo ngɨyɛ, yaɓwanaka ɛsɨ ɔ gbɔ́gbɔ ngɨyɔ ɓamakwɔ ɓeɓo ta dyanɨ.»

²⁸ Yeso ɔ꞉mutosio ɓɔ: «Ɨna ambɔ moi anɔ báya yɛta ɓʉmʉ-e! Yɨkyananakɨa akʉʉ asɔɔ, ngbanga ta ndʉ aka wa-ɔɔ akʉnda.» Ta angbinga ngɨananɨ, gwa ata moi ngɨangɔ, ɔ꞉hɛya ta hɛya.

Yeso ɔheiso ɓombi ɓɔ ɓakaɓu ɓaja

²⁹ Ambise ɔngɔ, Yeso a꞉ngwa ananɨ, ɔ꞉chana ɨngbaa anɔ ambamba wɔ ipuu ngɨyɔ Galilaya. Ɔ꞉tɔɗeto akʉʉ ɔ ɨkpangba, nɔ, ɔ꞉wolo ga jikomu.

³⁰ Ɓambaja ɓɔ ɓombi ɓaja, ɓɔ꞉mɨkɨa nɔ ɓombi ɓɔ majangi, nɔ ɓombi ɓɔ mamɔmɔ, ɓajikɛsɨ, nɔ lijangi, ɨhɔ nɔ ɓombi ɓɔ ɓakaɓu ngaɓɔmɔ ɓaja. Ɓombi ngʉɓɔnanɨ ɓaɓomu, ɓɛ꞉ka naɓɔ apɛɨ ɔ Yeso. Ɨyɔ, Yeso ɔ꞉ɓʉheiso ta heiso.

³¹ Ɨɓɔ, ɓambaja ɓɔ ɓombi ngʉɓɔnanɨ, yɔ꞉ɓʉmbangɨa nɔgbɛ, akɔnɨna ɓɔ lijangi lɔpʉngɔ yaka, nɔ ɓombi ɓɔ majangi ahɛya, ɓajikɛsɨ akyɛndaka, nɔ ɓombi ɓɔ mamɔmɔ, ɓata anɨna. Kʉdɔ, ɓa꞉pʉnga abibiso Asɔɓɨɨ ngɨyɔ Ɓaɨsalaɛlɛ.

Yeso ɔdyakakiso ɓombi ɛlɔfʉ ɓɔgɨna

³² Kʉdɔ, Yeso e꞉soko ɓakpata ngʉɓangɔ nɔ ɔ꞉ɓusigio ɓɔ: «Nanɨnɨa ɓombi ngʉɓa ɓaɓomu ikoko, dɔ, ya tɨa makwaa kaatʉ aka ɓa-ɔɔ ɨhɔ nɛmɨ aka, ɨnadɔ ɓangɔ tii pɔ nɔ ɨkyɛmʉ yɛta ɨdyɛ. Ɨmɨ, nangɔmʉ akʉnda naɓo ananjaniso nɔ taa, dɔ, ɓatɨsamʉ ahɔmwanaka anɔ ɨngbaa, kʉyayɛ.»

³³ Ɓakpata ɓɔ꞉mutosio ɓɔ: «Amusungati ngʉwa, isu, tagbʉka idyo ɨja ɓanɨ gbanɨ, ɨyɛ, tadyakakakiso nayɔ ɓombi ɓapɛ ɓɔ?»

³⁴ Yeso ɔ꞉ɓuɓokuo ɓɔ: «Nánɔ mɨkatɨ ɨpɨtanɨ?» Ɓɔ꞉mutosio ɓɔ: «Tanɔ mɨkatɨ mɛɗɨanɛka, nɔ mikpekpe yɔ ɓana ɓɔ sipe.»

³⁵ Ga Yeso nɔ ɓombi ngʉɓɔnanɨ ɓaɓomu ɓɔ, ɓiwoloko aɨsɨ.

³⁶ Ɔ꞉sɨka mɨkatɨ mɛɗɨanɛka, nɔ sipe ngɨyɛnɛnɨ, ɔ꞉tosio Asɔɓɨɨ ʉbɨba, nɔ, ɔ꞉ɨɓunjoko, nɔ, e꞉njekio ɓakpata ɓɔ ɓɨpakɨa tɨa ambaja ɔ ɓombi.

³⁷ Ɨɓɔ, ta ɓaɓomu ɓɔ sɛ, ɓɔ꞉dyakaka, nɔ, ɓɔ꞉motoo. Ligbiti lɔngɔ ngɨlɛ la꞉tukoo, ɓɔ꞉lɨmɔmaka, nɔ, lɔ꞉huoko litumo mɛɗɨanɛka ɓɔ kyɛkyɛɛ.

³⁸ Ɓombi ngʉɓa ɓa꞉dyakaka, ɓa꞉ɓio ɓague ɛlɔfʉ ɓɔgɨna, sɔkɔmʉ apoo ɓoi nɔ ɓana.

³⁹ Ɨyɛ ndʉ Yeso, e꞉njo ɓombi ngʉɓɔnanɨ kyɛnda, ɔ꞉ɗeto amati ɔ ɨngbɔɔ, nɔ, ɓɔ꞉sa mesu akɔ ihoi yɔ Magadanɨ.