Matayɔ 10 - Mʉkpanganɨa nɔ Agɔmɛ ɔ Ɨtakɨtakɨ

Yeso ɔmɔmɔ ɓatitima tɛkɛɓɛ nɔ ɓapɨnɨ

¹ Yeso ɛ꞉soko ɓakpata ngʉɓangɔ tɛkɛɓɛ nɔ ɓapɨnɨ, nɔ, ɔ꞉ɓinjo angu wɔ chweiso mɨtɨma yɔ madu, nɔ ɨya wɔ heiso migbo yɔ ɓakaɓu, nɔ majangi di di di.

² Mano kɔ ɓatitima ngʉɓɔnanɨ ka ɓɔ: Ya-sɨ Simoni (ɨya ɓamisoko kʉ ɓɔ Pɛtɛlɔ), nɔ manye Andɛlɛa, nɔ Yakɔɓɔ mwana ɔ Jɛbɛdayɔ, nɔ manye Yɔanɨ,

³ nɔ Filipo, nɔ Balatɨmayɔ, nɔ Tɔma, nɔ Matayɔ ngɨa a꞉ɓio ndɔmbɛ, nɔ Yakɔɓɔ mwana Alʉfayɔ, nɔ Tadei,

⁴ nɔ Simoni ngɨa a꞉tɨhata ɨpandasɨ akɔ ihoi ngɨangɔ, nɔ Yuda Ɨsɨkalɨɔta, ɨya aɓio anɨsa agaba Yeso.

Yeso ɔtʉmɔ ɓatitima ngʉɓangɔ tɛkɛɓɛ nɔ ɓapɨnɨ

⁵ Yeso a꞉tʉma ɓatitima tɛkɛɓɛ nɔ ɓapɨnɨ ngʉɓɔnanɨ, nɔ, a꞉ɓinjo ʉpanʉ ɓɔ: «Nátɨsenimʉ atɨ ɓombi ngʉɓa ɓangɔmʉ Ɓayuda. Nɔ, nátɨkumoniomʉ amati ɔ gʉlʉ ɔ Ɓasamalɨa.

⁶ Yakamɛngana, seni ta atɨ Ɓaɨsalaɛlɛ, dɔ, ɨɓɔ ɓa tɨa ndʉ ɓakɔndɔlɔ ngʉɓa yangaa yangaanɨ.

⁷ Nɔ, mʉgyɛndɔ ɓɔ ngbi, ɓɨakɨeni ɓombi ɓɔ: ‹Ɓʉngama ngʉɓɔ akʉʉ ɔ ɓisi, ɓɛ꞉kɔ tɨa tinene.›

⁸ Heiseni ɓombi ɓɔ ɓakaɓu, nɔ, jʉkaniseni mɨnda. Ɓakeɓukeɓu ɓɨgyaɓanakɨa, chweiseni mɨtɨma yɔ madu. Inu, nɛ́꞉nɨanɨa nɔ angu ngɨananɨ akɔ ɨjɨɔ. Kʉɓanɨ, inu, seni akɨa ɓangɛ tɨa kʉ akɔ ɨjɨɔ.

⁹ Amati ɔ ɓakʉgba ngʉɓeno, natɨsɨkamʉ mako kɔ ɓagyɛgyɛ, ga pɔ ɔlɔ, ga pɔ mako kɔ dada.

¹⁰ Mombi atɨsɨkamʉ kʉgba anɨsa nayɔ, ga pɔ ɓakoti ɓapɨnɨ, ga pɔ lɨkpakʉ, ga pɔ mʉɗanga. Dɔ, yɔkwananɔ ɓɔ ɓiminjo mombi ɔ tɛa, idyo ngɨangɔ ta injoni.

¹¹ Akɔ gʉlʉ muɓomu, pɔ ɨkʉmbʉ iɓomu ngɨyɛ náɓɔya-ɔɔ, ɓɔkwonokiseni ta iɗo anɨmbɨa mombi ngɨa ɔkwananɔ nenu atɛtɨa andɔngɔ. Ndʉ námɨna, ɓieni tɨta ananɨ, akɔɓɔya aka nɛsɨnganaka ɓata-ɔɔ nɔ kyɛnda.

¹² Angbinga ngɨa nákumonio-ɔɔ aɨkáá yɔ mombi, sigieni ɓombi ngʉɓa ɓaɓio ananɨ ɓɔ: ‹Majɨɔ kiɓio ɨhɔ nenu!›

¹³ Ɓamakwɔ ɓɔ ɨkáá ngɨyɛnɛnɨ ɓɔnɨkɨeni iɗo, majɨɔ ngʉkeno, kitukoo ananɨ. Yakamɛngana, ɓɔnɨkɨenimʉ iɗo, nɔ́sa inu, nɔ majɨɔ ngʉkeno kʉ nɨsa.

¹⁴ Ɓɔyaeni nenu atɛtɨa, pɔ anʉka yaka ngɨyeno, chwɛeni ananɨ ta chwɛa, nɔ, ɓɛndakeni iɓungu yɔ mɨtɨndɨ ngɨyeno.

¹⁵ Nanenu asigio ingono, ɓisi ngʉɓa Asɔɓɨɨ a꞊kio sina-ɔɔ mʉkɔmbʉ ngʉwɔ ɓombi, mʉkɔmbʉ ngaweɓo wa꞊ɓio ɓʉkaɨ achana ʉwɔ ɓombi ɓɔ Sɔdɔmʉ nɔ Gɔmɔla.

Yeso ɔngakɨɔ ɓatitima yaka akʉʉ ɔ ɓʉkaɓʉkaɨ ngʉɓa sina anɨka

¹⁶ Kanganɨeni! Nanenu atʉma ndʉ ɓakɔndɔlɔ ati ɔ ɓakwei. Kʉɓanɨ, ɓieni nɔ ɓʉgya ndʉ ɓasɨɨ. Nɔ, ɓieni ɓombi ɓɔ majɨɔ ndʉ ɓanjua.

¹⁷ Pɛmanakɨeni pɛmanakɨanɨ, dɔ, ɓombi ɓabi sina nenu apɛɨ ɔ mʉkɔmbʉ. Nɔ, ɓɔ꞊nɨɓɛnda pimbo amati ɔ lɨkáá lɔ nɨta ngɨlɔ Ɓayuda.

¹⁸ Ɓa꞊nɨchɔngɨa sina apɛɨ ɔ ɓangama ɓɔ lihoi, nɔ apɛɨ ɔ ɓangama ɓɔta ɓakpɔkpɔ, akʉʉ ɔ yaka yɛsɛmɨ. Ya꞊kyananakɨa sina ɓanɨ, dɔ inu, ɨnɨanɨeni nɔ angbinga naɓɔ aɓɨakɨa ɨsaʉ ngɨyɛsɛmɨ, nɔ, aɓɨakɨa kʉ nɔ ɓombi ngʉɓa ɓangɔmʉ Ɓayuda.

¹⁹ Angbinga ngɨa ɓa꞊nɨmaiso-ɔɔ apɛɨ ɔ mʉkɔmbʉ, nátɨmbambaniomʉ akʉʉ ɔ yaka ngɨyɛ ná꞊tosio, nɔ ɓɔ ná꞊ɨtosio tanɨ. Dɔ, yaka ngɨyɛ ná꞊ɨtosio, Asɔɓɨɨ a꞊ninjo ɨyɔ, kʉ akɔ angbinga ngɨananɨ.

²⁰ Dɔ, yangɔmʉ inu akɛ, ná꞊yaka, yakamɛngana, Mʉtɨma wɔ Atɔ eno akɛ wa꞊yaka amati eno.

²¹ Angbinga ngɨananɨ, mombi a꞊gaba sina ta manye ɓɔ kpɛ akɔ ingwo. Nɔ, ɨsɛ ɔ mwana, ɔ꞊gaba mwana angɔ. Ɓana ɓa꞊natanɨa ɓɛsɛ ɓeɓo, nɔ, ɓɔ꞊ɓʉgabaka akɔ ingwo.

²² Ɓombi ɓaɓomu, ɓa꞊nɨyaa akʉʉ ɔ ino yɛsɛmɨ. Yakamɛngana, mombi ngɨa ɛ꞊maa ɓʉmʉ aɓɔya amupipio, ɛ꞊nɨanɨa nɔ ɓʉhɛa.

²³ Ɓɔnɨkyananakeni amati ɔ gʉlʉ mʉngana, nɔ́sa bangʉ agʉlʉ ngakɔmɔ. Nanenu asigio ingono ɓɔ, nángɔpipomʉ achanaka amati ɔ ɓagʉlʉ ɓaɓomu ngʉɓɔ Ɨsalaɛlɛ, Mwana ɔ Mombi angɛkenimʉ.

²⁴ Mwana ɔ balʉa angɔnagaakamʉ mʉpananakɨa ngʉwangɔ. Nɔ, kʉndʉ baya, angɔnagaakamʉ makwɔ ɔ lɨkyɛmʉ.

²⁵ Mwana ɔ balʉa ɔkwananɔ nɨkwa ɨgyagya, ɛkeni ngbanga nɔ mʉpananakɨa ngʉwangɔ. Nɔ, kʉndʉ baya ɔkwananɔ nɨkwa ɨgyagya ɛkeni tɨa kʉ ngbanga nɔ makwɔ ɔ lɨkyɛmʉ. Kʉɓanɨ, ɓɔsʉeni pɛpɛ-sɨ tɨta makwɔ ɔ ɨkáá ino ɓɔ Ɓɛlɛjɛbʉlɨ, ngɛnɛngɛnɛ ndɨ tɨta ɓombi ngʉɓɔ ɨfananja ngɨangɔ?

Mombi ngɨa nɔ́kwananɔ nayɔ akumo

²⁶ Nátɨkwɛnimʉ ʉɓá akʉʉ ɔ ɓombi. Dɔ, yaka yɔ ɓaɗi mɛngana, ɨyɛ yangɔchwɛanɨa sina, aɓʉmba yangɔmʉ. Nɔ, yaka yɛta ɨnayanɨɛ mɛngana, ɨyɛ yangɛmbɨanɨa sina, yangɔmʉ kʉɓanɨ.

²⁷ Iɓomu ngɨyɛ nanenu asigio amati umomo, inu, yɨɓɨakɨeni tɨa ɓisi ɓʉyɛ. Nɔ, iɓomu ngɨyɛ nanenu angakɨa nɔ mʉdyɛkɛdyɛkɛ, inu, ɨtʉɓakɨeni tɨa aɨbamu.

²⁸ Nátɨkwenimʉ ʉɓá akʉʉ ɔ ɓombi. Dɔ, ɓombi ɓeneni ɓawa ɨɓɔ ta ndʉtʉ ɓʉtʉʉ, sɔkɔmʉ pɛpɛ mʉtɨma. Nɔgbɛ, kumeni Asɔɓɨɨ, ngɨa akwanana nɨwa ndʉtʉ, ɨhɔ nɔ mʉtɨma kʉtaa, amati ɔ dyaa ngɨyɛ yangɔmʉ nɔ mupipio.

^29-31 Ɓana ɓɔ ɓanoi ɓapɨnɨ, ɓangɔɓʉgaba ndɨ akɔ mwana ɔ agyɛgyɛ mʉngana? Yakamɛngana, pɔ mʉngana ati eɓo, angɔkwamʉ aɨsɨ, Atɔ eno ɔbayenimʉ. Gʉtʉ ta ndii yɔ mɨtʉ ngɨyeno, Asɔɓɨɨ aɨpoo ta iɓomu ɓɔ sɛ. Ɨnadɔ, akɔ Asɔɓɨɨ, inu, ingainga nánɔ ɨjangɨa achana ɓana ɓɔ ɓanoi ɓaja! Kʉɓanɨ, nátɨkwenimʉ ʉɓá, nɔ ɨkyɛmʉ pɔ mɛngana.

³² Mombi muɓomu ngɨa, aɓɨnyana apɛɨ wɔ ɓombi ɓɔ, a mʉkpata wɔsɛmɨ, ɨmɨ, na꞊mʉɓɨnyɨa sina ɨyɔ kʉ ɓɨnyɨanɨ, apɛɨ ɔ Aba ngɨasɛmɨ akʉʉ ɔ ɓisi.

³³ Yakamɛngana, ndʉ anatata apɛɨ ɔ ɓombi, ɨmɨ, na꞊mʉtata sina ɨyɔ kʉ apɛɨ ɔ Aba ngɨasɛmɨ akʉʉ ɔ ɓisi.

Yeso ɔsugo ɓɔ ɓombi ɓanagbɔnyonoko

³⁴ Ná ndɨ atunguo ɓɔ nɛ꞉ka aninjo majɨɔ adɔdɔ aka? Ɨmɨ, nɛ꞉kamʉ aninjo majɨɔ, yakamɛngana, nɛ꞉ka adʉaniso ɓombi, amaana ati eɓo!

³⁵ Dɔ, nɛ꞉ka, anagbonyonokiso mwana nɔ ɨsɛ, nɔ, anagbonyonokiso atɨ gwa ata moi nɔ inye, nɔ, anagbonyonokiso atɨ moi ɔ mwana, nɔ inyenguu.

³⁶ Ɓamʉyaa ngʉɓɔ mombi, ɓaɓɨchwɛa suo ta amati ɔ ɨkáá ngɨangɔ.

³⁷ Mombi ɔkʉndeni ɨsɛ, pɔ inye, nɛmɨ anagaaka ɨmɨ, ɨyɔ, ɔsisekiomʉ aɓio mʉkpata wɔsɛmɨ. Nɔ, mombi ɔkʉndeni mwana angɔ ata moi, ga pɔ gwa ata gue, nɛmɨ anagaaka ɨmɨ, ɨyɔ, ɔsisekiomʉ aɓio mʉkpata wɔsɛmɨ kʉɓanɨ.

³⁸ Mombi ɔtʉmbenimʉ ta mʉsalaba ngʉwangɔ ingono, ɨyɔ, ɔsisekiomʉ aɓio mʉkpata wɔsɛmɨ.

³⁹ Mombi ɔhateni aheiso uɓei ngʉwangɔ ɨyɔ makwɔngɔ, aʉyangiso yangisoni. Yakamɛngana, mombi ngɨa ayangiso uɓei ngʉwangɔ akʉʉ asɛmɨ, ɨyɔ akɛ, ɛnɨanɨa nɔ ɓʉhɛa.

Mʉkaya wɔ tɛtɨa ɓakpata ɓɔ Yeso

⁴⁰ Mombi ɔnɨtɛtɨeni inu, ambɔ ɨyɔ ɔnatɛtɨɔ ɨmɨ, tɨa kʉ tɛtɨanɨ. Nɔ, ndʉ mombi anatɛtɨa ɨmɨ, ambɔ ɔtɛtɨɔ tɨa kʉ nɔ mombi ngɨa a꞉natʉma ɨmɨ.

⁴¹ Mombi ɔtɛtɨeni mombi, dɔ, a ɨgbɛ yɔ Asɔɓɨɨ, ɨyɔ, ɛ꞊nɨanɨa nɔ mʉkaya ngbanga nɔ ʉwa ɨgbɛ, ɔsisekio anɨnɨanɨa nawɔ. Nɔ, mombi ɔtɛtɨeni aɓʉangɔ mombi, dɔ, a ngbingbii, ɛ꞊nɨanɨa nɔ mʉkaya ngʉwa ɓombi ɓɔta ngbingbii ɓɔsisekio anɨdya.

⁴² Nanenu asigio ingono ɓɔ, mombi muɓomu ngɨa enjo, gʉtʉ ta ʉpata wɔ mipo kɔta mamwɛ, akɔ mombi ata yaya mʉngana, dɔ, a mʉkpata wɔsɛmɨ, ɨyɔ, a꞊ngɔjangamʉ mʉkaya pɔ janga.»