Luka 2 - Mʉkpanganɨa nɔ Agɔmɛ ɔ Ɨtakɨtakɨ

Nɔtanɨa yɔ Yeso

¹ Tɨa akɔ angbinga ngɨananɨ, ʉpanʉ wɔ꞉tɔchwɛa atɨ ngama ata mʉja ngɨyɔ Ɓalɔma, Ogisitɛ ɓɔ, ɓɨtɛndakɨa mano kɔ ɓombi ɓaɓomu, amati ɔ ihoi ngɨangɔ.

² Ya꞉ɓio mʉkpanganɨa wɔ tɛndakɨa mano kɔ ɓombi, nɔ, ya꞉kyananakɨa akɔ angbinga ngɨa Kɨlɛnɨɔ a꞉ɓio-ɔɔ ngama ɔ ihoi ngɨyɛ yɔ Silia.

³ Akʉʉ ɔ ʉpanʉ ngʉwɔnanɨ, ɓombi ɓaɓomu ɓa꞉ɓisa tɨa akɔtɛndakiso mano, mombi nɔ mombi kʉ akɔ ɨkʉmbʉ ngɨangɔ.

⁴ Kʉdɔ, Yɛjɛfʉ a꞉ngwa ɨyɔ tɨa kʉɓanɨ anɔ Najalɛtɨ, aihoi yɔ Galilaya. Ɔ꞉tɔsa anɔ Bɛtɛlɛmʉ aihoi yɔ Yudɛa, ɨkʉmbʉ ngɨyɛ aki ngama Dawidi a꞉nɔtanɨa-ɛɛ, dɔ, a꞉ɓio mʉnɔnɔ wɔ Dawidi.

⁵ Ɓa꞉sa akɔtɛndakiso mano ɨhɔ nɔ Malɨa, ngɨa ɓa꞉ɓio ɓɔchwaneni nayɔ, ɨyɔ tɨa nɔ ɓʉa.

⁶ Ʉnɔtʉ wɔ꞉tɔmʉdʉa Malɨa, ɨɓɔ tɨta inani anɔ Bɛtɛlɛmʉ.

⁷ Kʉdɔ, ɔ꞉nɔta tapio ngɨangɔ, mwana ata gue. Ɔ꞉mupokoɓoko nɔ lɨpʉkʉ, nɔ ɔ꞉mukwaiso amati ɔ ikpoko ngɨyɛ ɓa꞉dyakakiso-ɛɛ ɓanama. Dɔ, ɓɛ꞉nɨanɨamʉ nɔ ɨda amati ɔ ɨkáá yɔ ɓabika.

Ɓamalaika ɓɔchwɛanɨɔ Ɓapɛmakɨa ɓɔ ɓanama

⁸ Kʉ amati ɔ ihoi ngɨyɛnɛnɨ, ya꞉ɓio nɔ ɓapɛmakɨa ɓɔ ɓanama ngʉɓa, ɓɔ꞉kunyoko aɓei akɔpɛmakɨa mutunduga wɔ ɓanama ngʉɓeɓo akɔ ɨsa.

⁹ Kʉdɔ, malaika wɔ Asɔɓɨɨ ɔ꞉ɓijeyo, ɛ꞉maa apɛɨ eɓo ga gba, nɔ magou kɔ ʉbɨba ngʉwɔ Makwɔɓɨɨ kɔɓukunguo ga kuu. Ɓɔ꞉kwa ʉɓá nɔgbɛ.

¹⁰ Yakamɛngana, malaika wɔ Asɔɓɨɨ ɔ꞉ɓʉngɨa ɓɔ: «Nátɨkumenimʉ, dɔ, nɛkɔ nenu aɓɨa ɨsaʉ yɛta iɗo ngɨyɛ, ye꞊njo ɓombi ɓaɓomu ɨgyagya yɛta ɨja.

¹¹ Dɔ ɓʉɓʉnʉ, amati ɔ gʉlʉ ngɨyɔ Dawidi, Muheiso ngʉweno wɔnɔtanɨɔ, ɨyɔ akɛ, a Klisito Makwɔɓɨɨ.

¹² Ya꞊ɓio nɔ kɔkɔ ngɨa ná꞊mɨmbɨa nayɔ. Ná꞊gbʉka mwana mʉngana mupokoɓoke nɔ lɨpʉkʉ, nɔ mukwaise amati ɔ ikpoko ngɨyɛ ɓadyakakiso-ɛɛ ɓanama.»

¹³ Nɔ gagaa ngɨananɨ, ndiba ɔ ɓamalaika ngʉɓa akʉʉ ɔ ɓisi, ɓɔ꞉mʉgbʉka malaika wɔ Asɔɓɨɨ, ɓɔ꞉pʉnga tʉkʉa Asɔɓɨɨ akɔsugo ɓɔ:

¹⁴ «Ʉbɨba akɔ Asɔɓɨɨ aʉmʉa ngʉwa wa akʉʉ nɔgbɛ, nɔ majɨɔ akɔ dɔdɔ akɔ ɓombi ngʉɓa aɓʉkʉnda!»

¹⁵ Akɔ angbinga ngɨa ɓamalaika ɓɔ Asɔɓɨɨ, ɓa꞉ngwa-ɔɔ atɔa akʉʉ ɔ ɓisi, ɓapɛmakɨa ɓɔ꞉pʉnga yakanaka ati eɓo ɓɔ: «Tɨseni anɔ Bɛtɛlɛmʉ, anɨna yaka ngɨyɛ yɔ꞉kyanakɨɔ inani, ɨyɛ Makwɔɓɨɨ ɔ꞉timbiiso.»

¹⁶ Kʉdɔ, ɓa꞉sa inani ta gagaa, ɓɔ꞉gbʉka Malɨa nɔ Yɛjɛfʉ ɨhɔ nɔ atɨ mwana, ngɨa ata kpala kpala, ɓakwaise amati ɔ ikpoko ngɨyɛ ɓa꞉dyakakiso-ɛɛ ɓanama.

¹⁷ Ambise ɔ nɨna mwana, ɓɔ꞉pʉnga ngaka yaka iɓomu ngɨyɛ ɓa꞉ɓʉɓɨa akʉʉ ɔ mwana ngɨananɨ.

¹⁸ Ɓombi ɓaɓomu ngʉɓa ɓɔ꞉ka yaka ngɨyɛ ɓapɛmakɨa ɓa꞉ɓio naɓɔ angakɨa, yɔ꞉ɓʉkyaka ta kyaka.

¹⁹ Yakamɛngana, Malɨa a꞉ɓio ta atungwoko yaka ngɨyɛnɛnɨ iɓomu, nayɔ anachoko amati ɔ mʉtɨma, nɔ nayɔ apemekiso tinetine.

²⁰ Kʉdɔ, ɓapɛmakɨa ɓa꞉tɔa ɨɓɔ, tɨta akɔbibiso nɔ tʉkʉa Asɔɓɨɨ akʉʉ ɔ yaka kʉ iɓomu ngɨyɛ ɓɔ꞉ka, nɔ nɨna ngbanga ta ndʉ aka ɓa꞉ɓʉngakɨa-ɔɔ.

Ɓenjo Yeso alɨkɔndɔ lɔ Asɔɓɨɨ

²¹ Ɨyɛ ndʉ makwaa ɓɛgɨna ka꞉ndana, nɔ ɓisi ngʉɓɔnanɨ ɓa꞉ɓio-ɔɔ akio mwana ɨgʉnɨ, kʉdɔ, ɓɔ꞉mʉsʉa ino ɓɔ Yeso. Ino ngɨyɛnɛnɨ, ɨyɔ mɛngana ɨyɛ kʉ malaika a꞉mʉsʉa jɛnɛ, pɛɨ ɔ inye asio ɓʉa.

²² Ɨyɛ ndʉ, angbinga ngɨa ɔ mʉgyaɓa ambise ɔ ʉnɔtʉ a꞉ndana, ngbanga ndʉ mapanʉ kɔ Musa ka꞉sugo, Yɛjɛfʉ nɔ Malɨa ɓɔ꞉sa ɨɓɔ nɔ atɨ Yeso anɔ Yelusalɛma, nayɔ akɔninjo apɛɨ ɔ Makwɔɓɨɨ.

²³ Ɓa꞉tɛndakɨa amati ɔ mapanʉ kɔ Makwɔɓɨɨ ɓɔ: «Gwa ata gue muɓomu ngɨa a tapio, ɓa꞊mʉnapɨa di akɔ Makwɔɓɨɨ,

²⁴ nɔ mutebii wɔngɔ, ɓinjo ɓandɛgʉ ɓapɨnɨ, pɔ ɓana ɓɔ ɓanjua ɓapɨnɨ, ngbanga ndʉ ya꞉tɛndanakɨa amati ɔ mapanʉ kɔ Makwɔɓɨɨ.»

Simeoni ɔtosio Asɔɓɨɨ ʉbɨba akʉʉ ɔ Yeso

²⁵ Nɔ tɨa inani anɔ Yelusalɛma, ya꞉ɓio nɔ gue mʉngana ino ɓɔ Simeoni. Gue ngɨananɨ, a꞉ɓio mombi ata ngbingbii nɔ mombi ɔ nɨta Asɔɓɨɨ nɔgbɛ. A꞉ɓio aɓɛtɨa mombi ngɨa a꞊bɨaka sina Ɨsalaɛlɛ masoi, nɔ Mʉtɨma wɔta Tu, wa꞉ɓio amati angɔ.

²⁶ Mʉtɨma wɔta Tu ngʉwɔnanɨ, wa꞉yakanaka nayɔ akɔsugo ɓɔ a꞊ngɔwomʉ, pɛɨ ngɨa ɛna-ɔɔ Klisito ngɨyɔ Makwɔɓɨɨ.

²⁷ Mʉtɨma wɔta Tu wɔ꞉mʉtʉma Simeoni aɨkáá yɔ Asɔɓɨɨ. Ndʉ atɨ ɨsɛ, nɔ inye, ɓɛ꞉ka nɔ mwana Yeso ɓɔ dɔ, ɓɨkyananakɨa yaka ngɨyɛ mapanʉ ka꞉sugo akʉʉ angɔ,

²⁸ kʉdɔ, Simeoni a꞉sio mwana alɨkɔndɔ, ɔ꞉kiokio Asɔɓɨɨ asugo ɓɔ:

²⁹ «Ɨtakɨtakɨ ngɨyɛ, Makwɔɓɨɨ, sɨa gʉtʉ baya asɔɔ aniwo tɨta nɔ majɨɔ, dɔ, agɔmɛ ngɨa wa꞉tinjo ɔkyananakɨɔ tɨa kyananakɨanɨ.

³⁰ Dɔ, mesu ngʉkɔsɛmɨ, kɛ꞉nɔ ɓʉhɛa ngʉɓɔsɔɔ tɨa ɨnanɨ,

³¹ ɓʉhɛa ngʉɓa wa꞉tambanaka jɛnɛ apɛɨ ɔ mesu kɔ ɓombi ɓaɓomu.

³² Ɨyɔ, a ʉwanga akɔpɔya mababa kɔ ɓombi ɨngbaa ngɨyɛsɔɔ, nɔ, ninjo ɓombi ɓɔsɔɔ Ɨsalaɛlɛ ʉbɨba.»

³³ Yaka ngɨyɛ Simeoni a꞉sugo akʉʉ ɔ Yeso, ya꞉mbangɨa atɨ ɨsɛ, nɔ inye mbangɨanɨ.

³⁴ Simeoni ɔ꞉ɓukiokio, nɔ, ɔ꞉musigio inye Malɨa ɓɔ: «Ɛɛ, Asɔɓɨɨ a꞉mʉchwa mwana ngɨakɛ chwanɨ, dɔ, ɓombi ɓaja amati ɔ Ɨsalaɛlɛ, ɓɛ꞊nɨanɨa sina nɔ mʉkɔmbʉ akɔ yaka yangɔ. Nɔ ɓʉjanana ngaɓɔmɔ, Asɔɓɨɨ a꞊ɓʉbaya kʉ akɔ yaka yangɔ. Nɔ ɓata, ɓombi ɓayaa sina yaka ngɨangɔ ta yaa.

³⁵ Nɔ akʉʉ ɔ yaka yangɔ, ɓombi ɓaja ɓa꞊chweiso sina litungwio lɛta lɨnayanɨɛ lɔ mɨtɨma ngɨleɓo aɓʉmba. Nɔ akɔ ʉwɛ Malɨa, ikoko ya꞊nachweyo sina mʉtɨma ndʉ mapi.»

Ana ɔkwɔ ɨgbɛ

³⁶ Ya꞉ɓio kʉɔ nɔ ɨgbɛ yɔ Asɔɓɨɨ mɛngana, moi ɔngɔ, inani anɔ Yelusalɛma, ino ɓɔ Ana, mwana ɔ Fanʉɛlɨ, muto ɔ Ɓaasɛlɨ. A꞉ɓio tɨa mʉkʉʉ nɔgbɛ. Ɓa꞉kɨa nɔ swaɨ ngɨa ɓa꞉sɨkana nayɔ nɔ ɨɓwana, mago ta mɛɗɨanɛka, kʉdɔ swaɨ ɔ꞉wo.

³⁷ Ɔ꞉ɓio yangɔ tɨta woko, akɔɓɔya mago ɓatɛkɛɓɛ ɓɛgɨna nɔ ɓɔgɨna. Ɔ꞉kɔngwɔmʉ aɨkáá yɔ Asɔɓɨɨ, nayɔ akɔkyananakɨa nɔ musoti kʉndʉ naɓutu. Ɔ꞉taa idyo akɔ angbinga, nɔ, ɔ꞉ɓio ta amati ɔ nɨta Asɔɓɨɨ.

³⁸ Ɨyɔ, ɛ꞉ka tɨa akɔ angbinga ngɨananɨ, ɔ꞉pʉnga bibiso Asɔɓɨɨ akʉʉ ɔ mwana, nɔ nʉngaka ɨsaʉ ngɨyɛ Yeso akɔ ɓombi ngʉɓa, ɓa꞉ɓio akɔɓɛtɨa ɓoonokio ngɨyɔ Yelusalɛma.

Atɨ Yeso ɓɔtɔwɔ anɔ Najalɛtɨ

³⁹ Ndʉ atɨ ɨsɛ nɔ inye ɔ Yeso, ɓa꞉pipo kɨa yaka kʉ iɓomu ngɨyɛ ya꞉tɛndanakɨa amati ɔ mapanʉ kɔ Makwɔɓɨɨ, ɓɔ꞉tɔa ɨhɔ nɔ atɨ Yeso andaɓʉ anɔ Najalɛtɨ, amati ɔ ihoi yɔ Galilaya.

⁴⁰ Mwana ɔ꞉kɨa ɓʉkʉʉ nɔ nɨtatanaka, nɔ, ɔ꞉huo nɔ mʉtɨma wɔ pemiso yaka, nɔ ɨjɨɔ yɔ Asɔɓɨɨ ya꞉ɓio ta ɨhɔ nayɔ.

Yeso ɔtukoo anɔ Yelusalɛma amati ɔ ɨkáá yɔ Asɔɓɨɨ

⁴¹ Atɨ ɨsɛ nɔ inye ɔ Yeso, ɓa꞉tɨsa mago maɓomu anɔ Yelusalɛma, akɔ ʉmbɔ wɔ chwɛa abubaya.

⁴² Tɨa ndʉ Yeso a꞉ndaniso mago tɛkɛɓɛ nɔ kapɨnɨ, ɓɔ꞉sa anɔ Yelusalɛma aʉmbɔ, kʉndʉ ya꞉ɓio gbali ngɨyeɓo.

⁴³ Ndʉ ʉmbɔ wa꞉sio ɓɔ gba, ɓɔ꞉tɔa ɨɓɔ tɨa kʉ tɔanɨ. Yakamɛngana, mwana ngɨyeɓo Yeso, a꞉tukoo ta anɔ Yelusalɛma, sɔkɔmʉ atɨ ɨsɛ nɔ inye ɓɛ꞉mbɨa.

⁴⁴ Ɨɓɔ, atunguo ga ya ndʉ Yeso ɔ꞉sɔ nɔ ɓombi ngʉɓa ɓa꞉kyɛndaka ɨhɔ naɓɔ. Ɓɛ꞉saakɨa kyɛnda ɓɔ tɛ tɛ tɛ, nayɔ ahata ati ɔ anja ngɨyeɓo, nɔ ati ɔ ɓawai ɓeɓo.

⁴⁵ Yakamɛngana, sɔkɔmʉ ɓɔ꞉mɨna. Kʉdɔ, ɓɔ꞉tɔa ɓata nayɔ ahata ta anɔ Yelusalɛma.

⁴⁶ Ambise ɔ makwaa kaatʉ, ɓɔ꞉tɔmijeyo amati ɔ ɨkáá yɔ Asɔɓɨɨ, ɓawele ati ɔ ɓapananakɨa ɓɔ mapanʉ, ɨyɔ, naɓɔ anʉka, nɔ, naɓɔ aɓokuoko yaka.

⁴⁷ Ɓombi ɓaɓomu ɓɔ꞉kwa ɨjɨma akɔ yaka ngɨyɛ a꞉ɓio anʉnga nɔ tosio.

⁴⁸ Akɔ angbinga ngɨa ɨsɛ nɔ inye, ɓa꞉mɨna-ɔɔ, yɔ꞉ɓʉmbangɨa, kʉdɔ, inye ɔ꞉muɓokuo ɓɔ: «Mwana asɛmɨ, wa꞉tɨkɨa pɛ ɓanɨ, dɔtanɨ? Isu, nɔ atɔ tɔ꞉mbambanio mbambanioni nɔwɛ akɔhata.»

⁴⁹ Ɔ꞉ɓutosio ɓɔ: «Nánɛmɨ ahatɨa ɨmanɨ? Námbɨ ndɨ anɨmbɨa ɓɔ nɔsisekio ɓio amati ɔ ɨkáá ngɨyɛ yɔ abaa ngɨasɛmɨ?»

⁵⁰ Yakamɛngana, sɔkɔmʉ ɓɔ꞉pemiso ɨsɨ yɔ yaka ngɨyɛnɛnɨ a꞉ɓʉngɨa.

⁵¹ Ɔ꞉tɔa ɨhɔ naɓɔ anɔ Najalɛtɨ, nɔ, ɔɓio ta akɨa yaka ngɨyɛ ɓanayɔ asigio. Inye ɔ꞉ɓoso yaka ngɨyɛnɛnɨ, iɓomu ta amati ɔ mʉtɨma.

⁵² Yeso ɛ꞉sɨnganaka akɨa ɓakʉʉ andʉtʉ nɔ kʉ anɨmbɨmbɨanaka, nɔ, ɔɓio anɨkataa Asɔɓɨɨ, ɨhɔ nɔ ɓombi kʉtaa.