Luka 1 - Mʉkpanganɨa nɔ Agɔmɛ ɔ Ɨtakɨtakɨ

Akɔ Tiofilo

¹ Ayoo Teofilo, ɓombi ɓaja ɓa꞉kanio atɛndakɨa masaʉ kɔ yaka ngɨyɛ ya꞉kyanakɨa pɔngɔ ati eso.

² Yaka ngɨyɛnɛnɨ, ya ngbanga ta ndʉ aka ɓombi ngʉɓa ɓɛ꞉na nɔ mesu, ɓa꞉tɨngakɨɔ-ɔɔ, anɨngwa amʉkpanganɨa wɔngɔ, nɔ ɨɓɔ, ɓa꞉natana tɨa ɓabaya ɓɔ ɓɨakɨa Ɨsaʉ yɔ Asɔɓɨɨ.

³ Kʉɓanɨ, ndʉ ɨmɨ na꞉kpengbiso yaka ngɨyɛnɛnɨ iɓomu tinetine, anɨngwa ta amʉkpanganɨa wɔngɔ, kʉdɔ, ɨmɨ nɛ꞉na pɔngɔ iɗo ɓɔ, ayoo Teofilo, nɨnatɛndakɨa, nɔ, nɨnabananakisio ɨyɔ, ngbanga ta ndʉ aka ya꞉kyanakɨa-ɔɔ.

⁴ Nɔ꞉kɨɔ ɓanɨ, dɔ, wipemiso ingono yɔ mapanʉ ngʉka ɓa꞉napanɨa pɔngɔ.

Malaika ɔɓɨɔ ɨsaʉ yɔ nɔtanɨa yɔ Yɔanɨ

⁵ Akɔ angbinga ngɨa Hɛlɔdɛ a꞉ɓio-ɔɔ ngama ata mʉja ɔ ihoi yɔ Yudɛa, ya꞉ɓio nɔ kumukumu mʉngana ino ɓɔ Jakalɨa. Ɨyɔ, a꞉ɓio akɔ mudinda wɔ ɓakumukumu ngʉwɔ Abiya. Moi angɔ Alɨsabɛtɨ, a꞉ɓio akɔ anja ngɨyɔ Alɔna, kumukumu ngɨa ata mʉja.

⁶ Ɨɓɔ ɓaɓomu ɓapɨnɨ, ɓa꞉ɓio ngbingbii apɛɨ ɔ Asɔɓɨɨ, nɔ, ɓɔ꞉tɔkyananakɨa mapanʉ maɓomu ngʉka kɔ Makwɔɓɨɨ nɔ kɛkɛɛ.

⁷ Yakamɛngana, ɨɓɔ ɓaɓomu, ɓa꞉ɓio tɨa ɓakʉʉ, nɔ Alɨsabɛtɨ kʉ isude, sɔkɔmʉ nɔ mwana.

⁸ Ɓisi mʉngana, Jakalɨa a꞉ɓio akɔkɨa tɛa ngɨangɔ yɔ ɓukumukumu, apɛɨ ɔ Asɔɓɨɨ, dɔ, tɛa ngɨyɛnɛnɨ, ya꞉ɓio mʉtʉ tɨa akɔ mudinda ngʉweɓo.

⁹ Akpatanakɨa nɔ gbali ɔ tɛa ngɨyɔ ɓakumukumu, ʉgbanda wa꞉mʉkwɨa Jakalɨa akɔkumonio anʉya adʉdʉ, aʉmʉa wɔta tu, amati ɔ ɨkáá yɔ Makwɔɓɨɨ.

¹⁰ Akɔ angbinga ngɨa ɓa꞉ɓio-ɔɔ anʉya adʉdʉ, ambaja ɔ ɓombi ɓaɓomu ɓa꞉ɓio aɓei, anɨta Asɔɓɨɨ.

¹¹ Gagaa ngɨananɨ, malaika wɔ Makwɔɓɨɨ wɔ꞉mijeyo Jakalɨa ga mbʉlɛɛ, nɔ, ɛ꞉maa akɔ ɨkɔndɔ yɔ gue ɔngɔ yɔ ɨda ngɨyɛ yɔ nʉya adʉdʉ ga gba.

¹² Ɨyɛ Jakalɨa a꞉mɨna, ɔ꞉pʉnga mbambanio, nɔ, ɔ꞉kwa ʉɓá.

¹³ Yakamɛngana, malaika wɔ Asɔɓɨɨ ɔ꞉musigio ɓɔ: «Watɨkumomʉ Jakalɨa, dɔ, Asɔɓɨɨ ɔ꞉kɔ nɨta ngɨyɛsɔɔ ʉkanɨ. Moi asɔɔ Alɨsabɛtɨ a꞊nanɔtɨa mwana ata gue, nɔ, wa꞊mʉsʉa ino ɓɔ Yɔanɨ.

¹⁴ Nɔ wa꞊ɓio nɔ ɨgyagya nɔ jananakɨa, nɔ ɓata, ɓombi ɓaja ɓa꞊kwa ɨgyagya akɔ nɔtanɨa ngɨangɔ,

¹⁵ dɔ, a꞊ɓio sungo mombi ata mʉja, apɛɨ ɔ Makwɔɓɨɨ. A꞊ngɔmwamʉ sungo ʉkyɛpʉ, pɔ makyɛpʉ ngakɔmɔ kʉta ɓʉkaɓʉkaɨ, a꞊huo sungo nɔ Mʉtɨma wɔta Tu anɨngwa ta aɓʉa ɓɔ inye.

¹⁶ A꞊toiso sungo ɓana ɓɔ Ɨsalaɛlɛ ɓaja atɨ Makwɔɓɨɨ, Asɔɓɨɨ ngɨyeɓo.

¹⁷ A꞊kyɛndaka sungo apɛɨ ɔ Makwɔɓɨɨ ndʉ ɓangapɛɨ, ɔhueni nɔ mʉtɨma nɔ angu kʉndʉ ɨgbɛ Ɛlɨa. Ajonokiso mɨtɨma ngɨyɛ yɔ ɓaba ɨhɔ nɔ ɓana ɓeɓo, nɔ, a꞊toiso sungo ɓombi ngʉɓa ɓangɔkumomʉ Asɔɓɨɨ, akɔ nɨmbɨmbɨanaka ngɨyɛ yɔ ɓombi ɓʉta ngbingbii, ambɔ ɨtambanakɨa Makwɔɓɨɨ, ɓombi ngʉɓa ɓaɓio ɓɔndanɛ nayɔ akɔtɛtɨa.»

¹⁸ Yakamɛngana, Jakalɨa ɔ꞉muɓokuo malaika wɔ Asɔɓɨɨ ɓɔ: «Ɨmanɨ ya꞊nembiiso ɓɔ yaka ngɨyɛnɛnɨ ya ingono? Dɔ ɨmɨ, na tɨa mʉkʉʉ, nɔ, moi asɛmɨ a tɨa mʉkʉʉ nɔgbɛ.»

¹⁹ Kʉdɔ, malaika wɔ Asɔɓɨɨ ɔ꞉mutosio ɓɔ: «Ɨmɨ na Gablieli, ɨmɨ akɛ, nakɨa ɓɛmaɛ apɛɨ ɔ Asɔɓɨɨ, ɨyɔ, ɔ꞉natʉmɔ anɨka nɔwɛ akɔɓɨa ɨsaʉ yɛta iɗo ngɨyɛ.

²⁰ Ɛɛ dɔ, wɔbayɔmʉ yaka ngɨyɛsɛmɨ, wa꞊ɓio ta ijangi, sɔkɔmʉ ayaka, aɓɔya sungo ta akɔ ɓisi ngʉɓa yaka ngɨyɛnɛnɨ ya꞊kɨanɨa-ɔɔ akɔ angbinga ɔngɔ.»

²¹ Angbinga ngɨananɨ, ɓombi ɓa꞉ɓio akɔɓɛtɨa Jakalɨa iyani aɓei. Ndʉ, a꞉ɓio agbalɨa tɨa ndɨɨ amati ɔ Ɨkáá yɔ Asɔɓɨɨ, yɔ꞉pʉnga naɓɔ akɔkyaka.

²² Ɨyɛ ndʉ a꞉chwɛa nayɔ ɓanɨ, ɔ꞉kanio ga aɓusigio yaka, yakamɛngana, sɔkɔmʉ iso yɨ꞉chwɛa. Ɛ꞉ka ananɨ sɔkɔmʉ ɓata ayaka, nɔ panaka yaka tɨa kʉ nɔ lɨkɔndɔ. Kʉdɔ, ɓombi ɓɔ꞉tɔpemiso tɨa ɓɔ, ya ndʉ ɛ꞉nɔ yaka yɛta ɨmbangɛ anɨngwa atɨ Asɔɓɨɨ, inani amati ɔ ʉmʉa wɔta tu.

²³ Ndʉ makwaa ngʉkangɔ kɔ tɛa ka꞉sio, ɔ꞉tɔa andɔngɔ.

²⁴ Ambise ɔ makwaa bele, moi angɔ Alɨsabɛtɨ ɔ꞉sio ɓʉa, nɔ, ɔ꞉ɓa ambɛnɨ amati ɔ mayi ɓɔkʉ akɔsugo ɓɔ:

²⁵ «Ɨna yaka ngɨyɛ Makwɔɓɨɨ a꞉nakɨa pɔngɔ, angbinga ngɨa a꞉napɨa-ɔɔ mesu ngʉkangɔ akʉʉ asɛmɨ, nɛmɨ anunguso soni, apɛɨ ɔ ɓombi.»

Ɨsaʉ yɔ nɔtanɨa ngɨyɔ Yeso

²⁶ Ati ngɨa ɓʉa ngʉɓɔ Alɨsabɛtɨ ɓa꞉ɓio-ɔɔ mayi mɛɗɨa, Asɔɓɨɨ ɔ꞉tʉma Gablieli, malaika wangɔ akɔ ɨkʉmbʉ mɛngana, ino ɓɔ Najalɛtɨ amati ɔ ihoi yɔ Galilaya,

²⁷ atɨ mwana ata moi mʉngana ino ɓɔ Malɨa, ɨya, ɓa꞉ɓio ɓɔchwaneni nɔ gue mʉngana ino ɓɔ Yɛjɛfʉ, akɔ anja ngɨyɔ ngama ata mʉja Dawidi.

²⁸ Malaika wɔ Asɔɓɨɨ e꞉joo aka Malɨa a꞉ɓio-ɔɔ, nɔ, ɔ꞉musigio ɓɔ: «Nɔnaɓokuo Malɨa, ʉwɛ ngɨa, wɛ꞉nɨanɨa nɔ ɨjɨɔ ngɨyɔ Asɔɓɨɨ. Makwɔɓɨɨ a ɨhɔ nɔ ʉwɛ.»

²⁹ Yaka ngɨyɛnɛnɨ, ya꞉mbambaniso Malɨa nɔgbɛ, ɔ꞉ɓokuono ɓɔ: «Ɨsɨ yɔ ɓokuo ngɨyɛ ya ɨmanɨ?»

³⁰ Malaika wɔ Asɔɓɨɨ ɔ꞉musigio ɓɔ: «Malɨa, watɨkwamʉ ʉɓá, dɔ ʉwɛ, wɛ꞉nɨanɨa nɔ ɨjɨɔ apɛɨ ɔ Asɔɓɨɨ.

³¹ Ʉwɛ, wa꞊sio suo ɓʉa, nɔ, wa꞊nɔta mwana ata gue, nɔ, wɔ꞊mʉsʉa ino ɓɔ Yeso.

³² A꞊ɓio sungo mombi ata mʉja, nɔ, ɓa꞊misoko sungo ɓɔ Mwana ɔ Asɔɓɨɨ ngɨa Akʉʉ Nɔgbɛ. Asɔɓɨɨ Makwɔɓɨɨ a꞊minjo sungo ɓʉngama kʉndʉ ʉɓɔ ɨsɛngʉʉ Dawidi.

³³ A꞊dya sungo ɓʉngama akɔ anja ngɨa ɔ Yakɔɓɔ amati ɔ mago nɔ mago, nɔ, ɓʉngama ngʉɓangɔ ɓa꞊ngɔɓio sina nɔ mupipio.»

³⁴ Malɨa ɔ꞉muɓokuo malaika wɔ Asɔɓɨɨ aka ɓɔ: «Yaka ngɨyɛnɛnɨ, ya꞊kyananakɨa tanɨ? Dɔ ɨmɨ, na-sɨ ta aunabi.»

³⁵ Malaika ɔ꞉mutosio ɓɔ: «Mʉtɨma wɔta Tu wɛ꞊ka suo akʉʉ asɔɔ, nɔ Asɔɓɨɨ ngɨa Akʉʉ Nɔgbɛ, a꞊nakuto nɔ angu ngɨangɔ ndʉ igoɓi. Tɨa kʉ akʉʉ ɔ yaka ngɨyɛnɛnɨ, mwana ngɨa wa꞊mʉnɔta suo, a꞊ɓio mombi ata tu, nɔ, ɓɔ꞊misoko ɓɔ Mwana ɔ Asɔɓɨɨ.

³⁶ Ɨnadɔ, nduku asɔɔ Alɨsabɛtɨ, a ɨyɔ tɨa kʉ nɔ ɓʉa ɓɔ mwana ata gue. Gʉtʉ ndʉ a tɨa mʉkʉʉ, ɨyɔ ngɨa, ɓɔ꞉sugo pɔngɔ ɓɔ a isude, a tɨa nɔ ɓʉa ɓɔ mayi mɛɗɨa.

³⁷ Dɔ, yaka ngɨyɛ yakyaka Asɔɓɨɨ, yangɔmʉ pɔ mɛngana.»

³⁸ Ga Malɨa nayɔ ɓɔ: «Ɨmɨ, na baya ɔ Makwɔɓɨɨ, yɨkyananakɨa pɨ akʉʉ asɛmɨ ngbanga ndʉ aka wɔsugo-ɔɔ.» Kʉdɔ, malaika ɔ꞉mʉsɨa.

Malɨa ɔsɔ atɨ Alɨsabɛtɨ

³⁹ Amati ɔ makwaa ngʉkɔnanɨ, Malɨa a꞉ngwɨa kyɛnda ta gagaa, anɨsa aihoi yɔ lɨkpangba amati ɔ ɨkʉmbʉ mɛngana yɔ Yudɛa.

⁴⁰ Ɨyɛ a꞉ɓɔya inani, ɔ꞉kumonio aɨkáá ngɨyɔ Jakalɨa, nɔ, ɔ꞉muɓokuo Alɨsabɛtɨ.

⁴¹ Angbinga ngɨa Alɨsabɛtɨ ɔ꞉ka-ɔɔ ɓokuo ngɨyɛ yɔ Malɨa, mwana ɔ꞉dʉana amati ɔ ɓʉa ngʉɓangɔ. Kʉdɔ, Alɨsabɛtɨ ɔ꞉huo nɔ Mʉtɨma wɔta Tu,

⁴² ɔ꞉tʉɓɨa nɔ isó yɛta ɓʉmʉ ɓɔ: «Asɔɓɨɨ a꞉nakiokio ʉwɛ, anagaa ɓoi kʉ ɓaɓomu, nɔ, ɔkiokio kʉ nɔ mwana ngɨa wa꞊mʉnɔta.

⁴³ Eeɓe! Ɨmɨ na dɔ-sɨ ndʉ anɨ, inye ɔ Makwasɛmɨ anɨka andamɨ?

⁴⁴ Dɔ, ɨyɛ nɔ꞉kɔ iso ngɨyɛsɔɔ, mwana ɔ꞉bʉmbʉɔ nɔ ɨgyagya amati ɔ ɓʉa ngʉɓɔsɛmɨ ɓɔ kpita.

⁴⁵ Ya ɨgyagya akɔ ʉwɛ, dɔ wa꞉baya ɓɔ, yaka ngɨyɛ Makwɔɓɨɨ a꞉nasigio, ya꞊kyananakɨa kyananakɨanɨ.»

Malɨa ɔsʉɔ ɨtá

⁴⁶ Kʉdɔ, Malɨa ɔ꞉sugo ɓɔ: «Mʉtɨma ngʉwɔsɛmɨ wakɔbibiso Makwɔɓɨɨ;

⁴⁷ Ɨmɨ, na muhue nɔ ɨgyagya amʉtɨma akʉʉ ɔ Asɔɓɨɨ, Muheiso ngʉwɔsɛmɨ,

⁴⁸ dɔ, a꞉natunguo pɔngɔ ɨmɨ baya ngɨa a mombi ata ɓʉtʉʉ. Ɨnadɔ, akɔnɨngwa ɨtakɨtakɨ ngɨyɛ, ɓanɔnɔ nɔ ɓanɔnɔ ɓa꞊nasigio sungo tɨta ɓɔ: ‹Asɔɓɨɨ a꞉kiokio moi ngɨa kiokioni.›

⁴⁹ Dɔ, Asɔɓɨɨ ngɨa Angu Nɔgbɛ, a꞉nakɨa ɨmɨ, yaka yɛta ɨja, ino ngɨangɔ ya tu.

⁵⁰ A꞊pananiso ikoko ngɨangɔ akɔ ɓanɔnɔ nɔ ɓanɔnɔ, akʉʉ ɔ ɓombi ngʉɓa ɓamukumo.

⁵¹ Ɨkɔndɔ ngɨangɔ, ya꞉kɨa yaka yɛta ɨkpɔkpɔ, A꞉ngbengo ɓombi ngʉɓa, ɓabɨbana amati ɔ mɨtɨma ngɨyeɓo.

⁵² Ɔ꞉diso ɓangama nɔ mʉdʉʉ, nɔ ɓombi ɓɔta ɓʉtʉʉ, ɔ꞉ɓuɗetiso nɔ ɨkʉʉ.

⁵³ Ɔ꞉huso ɓombi ɓɔ taa nɔ lɨkyɛmʉ, nɔ ɓombi ɓɔ lɨkyɛmʉ, ɔ꞉ɓutoiso lɨkɔndɔ ɓʉtʉʉ.

⁵⁴ Ɓabaya ɓangɔ Ɓaɨsalaɛlɛ, ɔ꞉ɓɨkɨa isingo ngbanga kʉndʉ a꞉kɨa jɛnɛ.

⁵⁵ Agɔmɛ nɔ Abalaama ɨhɔ nɔ ɓakuku ngʉɓeso amati ɔ mago nɔ mago.»

⁵⁶ Malɨa a꞉kwaa atɨ Alɨsabɛtɨ, tinetine ndʉ mayi kaatʉ, mbise ɔngɔ, ɔ꞉tɔa andɔngɔ.

Yɔanɨ ɔnɔtanɨɔ

⁵⁷ Ndʉ angbinga ngɨa ɔ Alɨsabɛtɨ akɔnɔta a꞉ndana, ɔ꞉nɔta mwana ata gue.

⁵⁸ Ɨyɛ ɓamabana ɓangɔ, nɔ anja ngɨangɔ, ɓɔ꞉ka ɨsaʉ ngɨyɛnɛnɨ, Makwɔɓɨɨ a꞉pananiso-ɔɔ ɓuɗo ɓɔta ɓʉja ngʉɓangɔ, kʉdɔ, ɓɔ꞉kwa ɨgyagya ɨhɔ nayɔ.

⁵⁹ Makwaa ɓɛgɨna ambise ɔ nɔtanɨa ngɨyɔ mwana, ɓɛ꞉ka nayɔ akiiso ɨgʉnɨ. Nɔ, ɓa꞉ɓio ahata ga ɓamʉsʉa kʉ ino ngɨyɛ ɨsɛ Jakalɨa.

⁶⁰ Yakamɛngana, inye ɔ꞉yaa ta yaa, ga ɨyɔ ɓɔ: «Haa! A꞊ɓio ino ta ɓɔ Yɔanɨ.»

⁶¹ Ga ɨɓɔ nayɔ ɓɔ: «Mombi pɔ mʉngana angɔmʉ nɔ ino ngɨyɛnɛnɨ, akɔ anja ngɨasɔɔ.»

⁶² Kʉdɔ, ɓɔ꞉tɔɓokuo tɨa Jakalɨa ɓɔ꞉ɓieni apanaka yaka tɨta nɔ lɨkɔndɔ, ɓɔ ɓasʉa mwana ino tanɨ.

⁶³ Jakalɨa ɔ꞉ɓusigio ga ɓɨminjo ɨkyɛmʉ ngɨyɛ ɓatɛndakɨɔ-ɔɔ mabii, kʉdɔ, ɔ꞉tɛndakɨa ɓɔ: «A꞊ɓio ino ɓɔ Yɔanɨ.» Yaka ngɨyɛnɛnɨ, yɔ꞉mbangɨa ɓombi ta ɓaɓomu.

⁶⁴ Ta gagaa ngɨananɨ, monu kɔ꞉muɓoonio Jakalɨa, ɔ꞉pʉnga ɓata kʉ yaka, nɔ bibiso Asɔɓɨɨ.

⁶⁵ Kʉdɔ, ya꞉kiso ɓamabana ɓangɔ ɓaɓomu ʉɓá, nɔ ɓombi ɓaɓomu ngʉɓa ɓɔ ihoi yɔ lɨkpangba ngɨlɛ lɔ Yudɛa, ɓɔ꞉pʉnga ayakanaka akʉʉ ɔ ɨsaʉ ngɨyɛnɛnɨ.

⁶⁶ Ɓombi ɓaɓomu ngʉɓa ɓɔ꞉ka yaka ngɨyɛnɛnɨ, ɓɔ꞉tunguo amɨtɨma nɔ ɓokuono ɓɔ: «Yaka yɔ mwana ngɨa ya꞊ɓio dɔ-sɨ tanɨ?» Dɔ, ɨkɔndɔ yɔ Makwɔɓɨɨ ya꞉ɓio akʉʉ angɔ ta ingono.

Jakalɨa ɔsʉɔ ɨyɔ kʉ ɨtá

⁶⁷ Jakalɨa ɨsɛ ɔ Yɔanɨ, ɔ꞉huo nɔ Mʉtɨma wɔta Tu, kʉdɔ, ɔ꞉pʉnga ngaka yaka anɨka atɨ Asɔɓɨɨ akɔsugo ɓɔ:

⁶⁸ «Makwɔɓɨɨ ɨsɨka ʉbɨba, Asɔɓɨɨ ngɨakɛ ɔ ɓana ɓɔ Ɨsalaɛlɛ, dɔ, a꞉tunguo anja ngɨangɔ, nɔ, ɔ꞉muchweiso abubaya.

⁶⁹ A꞉tɨtʉmɨa Muheiso ngʉwɔ angu amati ɔ anja ngɨa ɔ baya angɔ, ngama Dawidi

⁷⁰ Kʉndʉ a꞉ngaka jɛnɛ ɨngbaa akɔ monu kɔ magbɛ ngʉkangɔ kɔta tu ɓɔ:

⁷¹ ‹Muheiso ngɨa anesu aɓwanakiso alɨkɔndɔ lɔ ɓanamasa ngʉɓeso, nɔ alɨkɔndɔ lɔ ɓamʉyaa ngʉɓeso ɓaɓomu.

⁷² A꞉kɨa ɓakuku ngʉɓeso iɗo, nɔ, ɔ꞉tunguo agɔmɛ ngɨangɔ ata tu,

⁷³ ɨyɔ Asɔɓɨɨ akɛ, a꞉kio jɛnɛ agɔmɛ nɔ kuku ngɨyeso Abalaama ɓɔ:

⁷⁴ a꞊tɨɓwanakiso sina alɨkɔndɔ lɔ ɓanamasa ngʉɓeso, ambɔ tɨmʉkyananakɨa sɔkɔmʉ nɔ ʉɓá.

⁷⁵ Nɔ, kyɛndaka apɛɨ angɔ aɓungbingbii, sɔkɔmʉ akɨa ɓʉɓɨɓɨ amati ɔ uɓei ngʉweso kʉ uɓomu.

⁷⁶ Nɔ ʉwɛ, mwana asɛmɨ, ɓa꞊nesoko sungo ɓɔ ɨgbɛ yɔ Asɔɓɨɨ ngɨa Akʉʉ Nɔgbɛ, dɔ, wa꞊kyɛndaka sina apɛɨ ɔ Makwɔɓɨɨ, atambanaka lɨngbaa ngɨlangɔ.

⁷⁷ Nɔ, animbiiso ɓombi ɓɔ Makwɔɓɨɨ a꞊ɓuheiso sungo heisoni, naɓɔ anɨpaakɨa ɓʉɓɨɓɨ ngʉɓeɓo.

⁷⁸ Dɔ, Asɔɓɨɨ ngɨyeso anɔ ikoko kʉ nɔ mʉtɨma wɔta uɗo nɔgbɛ, a꞊tɨpɔya sungo ʉwanga anɨngwa akʉʉ, ngbanga ndʉ magou kɔ ɨpá.

⁷⁹ Akɔpɔya ɓombi ngʉɓa ɓa amati ɔ umomo, nɔ ʉɓa, ɓa amati ɔ ingwo, ambɔ ɨkyɛndakiso mɨtɨndɨ ngɨyeso akɔ ɨngbaa yɔ majɨɔ.›»

⁸⁰ Mwana a꞉kɨa ɓʉkʉʉ, kʉ nɔ nɨtatanaka amʉtɨma. Nɔ, ɔ꞉ɓio ta amukengu, akɔɓɔya ta akɔ ɓisi ngʉɓa a꞉chwɛanɨa-ɔɔ aɓʉmba apɛɨ ɔ ɓana ɓɔ Ɨsalaɛlɛ.