Yakɔbɔ 5 - Mʉkpanganɨa nɔ Agɔmɛ ɔ Ɨtakɨtakɨ

Ikoko nɔ inu ɓombi ɓɔ lɨkyɛmʉ

¹ Anɔkeni-sɨ tɨa ɨtakɨtakɨ ngɨyɛ inu, ɓombi ɓɔ lɨkyɛmʉ. Ndɨeni nɔ maɓuu akɔ yaka yɔ ɓʉkaɓʉkaɨ ngʉɓa ɓanenu anɨkɨa.

² Lɨkyɛmʉ ngɨleno, la tɨa lɨpʉɛ nɔ ɓatoto ɓɔ꞉dya lɨpʉkʉ ngɨleno tɨa kʉ dyanɨ.

³ Ɔlɔ nɔ falanga ngɨyeno a꞉kwa tɨa itu. Itu ngɨyɛnɛnɨ ayɛ, yapananiso ɓɔ ndʉtʉ ngɨyeno ingainga, ya꞊yanaka suo ndʉ yɨsioko nɔ dyaa. Inu, ná꞉momiso ikesi tɨa akɔ ɓisi ɓɔ mupipio.

⁴ Inu, ná꞉yaa alipa ɓombi ɓɔ tɛa ngʉɓa ɓa꞉kɨa tɛa akɔ ɓakʉbaa ngʉɓeno. Ɔkeni tɨa aki ɓa-ɛɛ andɨndɨanaka. Ndɨndɨanaka ngɨyeɓo, yɔɓɔyɔ amachwei kɔ Asɔɓɨɨ, Makwɔɓɨɨ ngɨa Angu tɨa ɓɔyanɨ.

⁵ Inu, ná꞉dya uɓei wɔta uɗo, nɔ, nɔ꞉kwa ɨgyagya akɔ dɔdɔ ngɨa. Nɔ, nɔ꞉pundoo ndʉ ɓanama ngʉɓa ɓaɓɛtaka ɓisi ngʉɓa ɓa꞊ɓʉsɛndaka-ɔɔ.

⁶ Inu, ná꞉kio mʉkɔmbʉ, nɔ, nɔ́꞉maa ɓombi ngʉɓa, ɓa꞉kɨomʉ pɔ ɨkyɛmʉ, nɔ, sɔkɔmʉ ɨɓɔ ɓiwesono pɔ wesono.

Aɓɛtɨa tɔwa yɔ Makwɔɓɨɨ nɔ mʉtɨma wɔta ʉta

⁷ Kʉɓanɨ, inu ɓanduku, ɓieni mʉtɨma ʉta akɔɓɔya ta akɔ ɓisi ngʉɓa Makwɔɓɨɨ a꞊tɔa sina-ɔɔ. Kangeni-sɨ ɨyɛ, mombi ɔ mahʉna aɓɛtɨa-ɔɔ ɨhʉna ngɨangɔ nɔ mʉtɨma wɔta ʉta, aɓɔya ta aka kʉbaa enjo-ɔɔ masɔɔ kɔ dada ata mʉja. Aɓɛtɨa anɨngwa ta aka ʉgbaa ngʉwɔ pɛɨ, nɔ ʉwɔ, mupipio waneyo-ɔɔ.

⁸ Inu, ɓieni mʉtɨma ʉta kʉ nɔ iguegue, dɔ, Makwɔɓɨɨ a tɨa tinene akɔtɔwa.

⁹ Inu ɓanduku, nátɨɓienimʉ andɨndanaka ati eno, dɔ, Asɔɓɨɨ atɨkiomʉ mʉkɔmbʉ ngʉweno. Joji a dɔ tɨa anɔ umongu, tinene akumonio.

¹⁰ Inu ɓanduku, tungueni magbɛ ngʉka ka꞉kwa jɛnɛ ɨgbɛ akɔ ino yɔ Makwɔɓɨɨ, nɛ́na ɓɔ ɓa꞉dya ɓʉkaɓʉkaɨ nɔ mʉtɨma wɔta ʉta. Ɓʉsɨkeni ɨɓɔ, ndʉ isisenio ngɨyɛ nɔ́kwananɔ kpataka.

¹¹ Tasugo ɓɔ ya ɨgyagya nɔ ɨkananja yɔ ɓombi ndʉ ʉɓɔnanɨ, dɔ ɨɓɔ ɓa꞉pɛa ɓʉkaɓʉkaɨ pɛanɨ. Nɔ́꞉ka jɛnɛ ɨsaʉ yɔ mʉtɨma wɔta ʉta ngʉwɔ Yɔbɔ ta ʉkanɨ, nɔ nɛ́꞉na ɨjangɨa ngɨyɛ Makwɔɓɨɨ a꞉minjo ambise ɔngɔ. Dɔ, Makwɔɓɨɨ ahuo nɔ ikoko nɔ iɗo iɗo.

¹² Inu ɓanduku, yaka ngɨyɛ yanɔ dada nɔgbɛ ya ɓɔ, nátɨkiomʉ silika! Nátɨkiomʉ silika aino yɔ akʉʉ ɔ ɓisi, ga pɔ ɨyɔ dɔdɔ, ga pɔ aino yɔ ɨkyɛmʉ ngayɛmɔ. Yɛtanɨeni ɓɔ bayeni yaka ɓɔ ii, yiɓi ta ii, ga pɔ asugo ɓɔ haa, yɔɓio tɨa kʉ ɓɔ haa, dɔ, Asɔɓɨɨ atɨnɨnapɨamʉ nɔ mʉkɔmbʉ.

Heiso ɓakaɓu nɔ nɨta Asɔɓɨɨ

¹³ Ndʉ mombi mʉngana ati eno aɓio anɨdya ɓʉkaɓʉkaɨ, ɨta pɨ ta Asɔɓɨɨ. Ndʉ mombi mʉngana ati eno aɓio nɔ ɨgyagya, ɨbibiso Asɔɓɨɨ nɔ ʉmbɔ.

¹⁴ Mombi ɔɓieni nɔ kaɓu ati eno, isoko ɓatataɓasie ɓɔ kanisa, kʉdɔ ɓamɨtɨa Asɔɓɨɨ nɔ ɓɔmʉɗɛa umbundo aino yɔ Makwɔɓɨɨ.

¹⁵ Yɔɓieni ɓɔ ɓɛtɔ Asɔɓɨɨ nɔ báya, mombi ɔ kaɓu ahɛa hɛanɨ. Tɨa kʉɓanɨ, Makwɔɓɨɨ a꞊mɨmaiso, nɔ ɔ꞉kɨeni jɛnɛ ɓʉɓɨɓɨ, ɓa꞊mɨpaakɨa tɨa kʉ ɨpaakɨanɨ.

¹⁶ Kʉɓanɨ, mombi nɔ mombi ati eno atɨnayɨamʉ ɓangɛ ɓʉɓɨɓɨ, nɔ ati eno, mombi nɔ mombi ɨtɨa kʉɔ ɓangɛ dɔ ɓakaɓu ngʉɓeno ɓisio. Nɨta Asɔɓɨɨ nɔ kɛkɛɛ ngɨyɛ mombi ɔ ingono, yanɔ angu nɔgbɛ.

¹⁷ Ɛlɨa a꞉ɓio mombi ngbanga kʉndʉ isu. Ɛ꞉ta Asɔɓɨɨ nɔ kɛkɛɛ ɓɔ ʉgbaá watineyomʉ, nɔ sɔkɔmʉ ʉgbaá wi꞉neyo akɔ dɔdɔ amati ɔ mago kaatʉ nɔ mawi mɛɗɨa.

¹⁸ Kʉdɔ, ɛ꞉ta ɓata, ga ʉgbaá ɓɔ hɔɔ, anɨngwa akʉʉ ɔ ɓisi, nɔ dɔdɔ ɔ꞉chwɛiso masɔɔ ngʉkangɔ.

Aɓwanakiso mombi ngɨa asɨa ɨngbaa

¹⁹ Inu ɓanduku, yɔɓieni ɓɔ mʉngana ati eno ɛngɨtɨa tɨa ɗu nɔ ingono, nɔ mombi nga ɔmɔ ɔ꞉mʉchʉchwakiso inani,

²⁰ ɛɛ, pemiseni ɓɔ mombi ngɨa achʉchwakiso mombi ata ɓɨɓɨ aɨngbaa ngɨyɛ a꞉ɓio ɛngɨtɨeni-ɛɛ, ɨyɔ a꞊heiso uɓei wɔ mombi ngɨananɨ, akɔ ingwo, nɔ akʉʉ ɔ yaka ngɨyɛnɛnɨ, Asɔɓɨɨ a꞊mɨpaakɨa ɓʉɓɨɓɨ ɓʉja nɔgbɛ.