Yakɔbɔ 4 - Mʉkpanganɨa nɔ Agɔmɛ ɔ Ɨtakɨtakɨ

Akʉnda dɔdɔ ya yaa Asɔɓɨɨ

¹ Ɨbana nɔ mangoi ati eno ka-sɨ anɨka gbanɨ? Yangɔmʉ-sɨ ta akʉʉ ɔ mʉsasa wɔ ndʉtʉ wɔta ɓɨɓɨ ngʉweno, ʉwa, wakɔɓɛndana amati ndʉtʉ ngɨyeno?

² Nákɔtatanɨa nɨanɨa nɔ ɨkyɛmʉ, yakamɛngana, sɔkɔmʉ nɨnɨanɨa nayɔ kʉɓanɨ. Kʉdɔ, yɔnɨtʉma tɨta akɔ mangoi nɔ dʉkana, ɨnadɔ, sɔkɔmʉ nɛnɨanɨa nɔ ɨkyɛmʉ pɔ kʉɓanɨ, dɔ, nángɔmʉ akɔnɨta Asɔɓɨɨ.

³ Nɔ ndʉ nɛ́ta ɨkyɛmʉ, sɔkɔmʉ nɨnɨanɨa nayɔ, ya dɔ nɛ́ta ɓɨɓɨ, ta nɔ itungwio yɔ yananakiso lɨkyɛmʉ akɔ taa yɔ ndʉtʉ ngɨyeno.

⁴ Inu ɓombi ɓɔ janga báya ngʉɓa! Ná ndɨ-sɨ kʉ anɨmbɨa ɓɔ ndʉ waɓio awai ɔ dɔdɔ, ambɔ wa tɨa mʉyaa wɔ Asɔɓɨɨ? Mombi ngɨa akʉnda aɓio awai wɔ dɔdɔ, anatana aɓio tɨa mʉyaa wɔ Asɔɓɨɨ?

⁵ Nátɨnenimʉ ndʉ ya ɓʉtʉʉ, ɨyɛ, Mabii kɔ Asɔɓɨɨ ka-ɔɔ akɔsugo ɓɔ: «Asɔɓɨɨ anɔ imi nɔgbɛ akʉʉ ɔ Mʉtɨma ngʉwa a꞉ʉnapɨa aɓio amati eso.»

⁶ Ɨna dɔ, ɨjɨɔ ngɨyɛ Asɔɓɨɨ a꞉tɨnjo ya ɨja nɔgbɛ, dɔ, ya꞉tɛndanakɨa amati ɔ mabii ɓɔ: «Asɔɓɨɨ a mʉyaa wɔ ɓombi ɓɔ aɗia, yakamɛngana, ɨjɨɔ ngɨangɔ ya akʉʉ ɔ ɓombi ngʉɓa ɓanɔ mʉtɨma wɔ nudisoniso.»

⁷ Kʉɓanɨ inu, napɨaneni ɛsɨ ɔ ʉpanʉ wɔ Asɔɓɨɨ, nɔ, nɔ́yaa Abɨɨ, kʉdɔ ɨyɔ atʉgbʉa tɨa bangʉ ɗu nenu.

⁸ Ɨsɨnganeni tinene nɔ Asɔɓɨɨ, kʉdɔ ɨyɔ, ɛka tɨa kʉ tinene nenu. Gyaɓanakɨeni lɨkɔndɔ ngɨleno, inu, ɓombi ɓɔta ɓɨɓɨ. Gyaɓanakɨeni amɨtɨma ngɨyeno, inu ngʉɓa nanɔ litungwio ɗepini.

⁹ Dyeni ikoko, ɓieni amati ɔ didima nɔ ndɨa. Nácheni nɔa ngɨyeno aɓio tɨa ndɨa, nɔ ɨgyagya ngɨyeno tɨa ikoko.

¹⁰ Disoniseni apɛɨ ɔ Makwɔɓɨɨ, kʉdɔ ɨyɔ, anɨtʉmba tɨa nɔ ɨkʉʉ.

Watɨkiomʉ mʉkɔmbʉ wɔ mangɛ

¹¹ Inu ɓanduku, mombi atɨsigiomʉ mangɛ yaka yɛta ɓɨɓɨ ati eno. Mombi ngɨa asigio mangɛ yaka yɛta ɓɨɓɨ, ga pɔ ɓɔ, ɔkio mʉkɔmbʉ ngʉangɔ, ɨyɔ, akɔsugo yaka yɛta ɓɨɓɨ akʉʉ ɔ ʉpanʉ, nɔ, kio mʉkɔmbʉ wɔngɔ. Ɨna dɔ, wɔkieni mʉkɔmbʉ wɔ ʉpanʉ, ambɔ wangɔmʉ nawɔ akyananakɨa, yakamɛngana, wɔnatanɔ ingainga aɓio tɨa joji wɔ ʉpanʉ.

¹² Ta Asɔɓɨɨ nangana ɓɔ ngbe akɛ e꞉njo ʉpanʉ, nɔ kʉ ɨyɔ akɛ, a juji. Kʉ ɨyɔ nangana akɛ, akwanana heiso ga pɔ yanakiso. Tɨa ʉwɛ ngɨa wakɔkio mʉkɔmbʉ ngʉwɔ mangɛ, wakɔsɨkana ndʉ anɨ?

Yangɔmʉ iɗo akɔɓɛndana ɨgʉngʉ

¹³ Anɔkeni-sɨ tɨa ɨtakɨtakɨ ngɨyɛ inu ngʉɓa nákɔsugo ɓɔ: «Ɓʉɓʉnʉ ga pɔ nekuɓa, tabi suo agʉlʉ sɨpakaa, nɔ, ta꞊kɨa inani igo mɛngana amati ɔ gabanaka, kʉdɔ, tɛ꞊nɨanɨa nɔ ɓagyɛgyɛ.»

¹⁴ Inu, nángɔmʉ anɨmbɨa ɓɔ uɓei ngʉweno wɔ ikuɓa, wa꞊ɓio tanɨ! Dɔ inu, ná ndʉ indindi ngɨyɛ yachwɛanɨa akɔ mwana ɔ angbinga bele, mbise ɔngɔ yɔnanjana.

¹⁵ Nɔ́sisekio pɛngɛ akɔsugo ɓɔ: «Asɔɓɨɨ ɔkʉndeni ɓɔ tiɓio-sɨ kʉ akɔ uɓei, ta꞊kɨa ɓayaka di di di.»

¹⁶ Yakamɛngana, ɨtakɨtakɨ ngɨyɛ nákɔbɨbana nɔ ɓɛndana ɨgʉngʉ. Ɨna dɔ, ɨkananja yɔ yaka ngɨyɛnɛnɨ, ya ɓɨɓɨ.

¹⁷ Kʉɓanɨ, mombi ngɨa ɛmbɨa akɨa yaka yɛta iɗo, nɔ sɔkɔmʉ ɨkɨa, ɔkumonio tɨa aɓʉɓɨɓɨ.