Yakɔbɔ 3 - Mʉkpanganɨa nɔ Agɔmɛ ɔ Ɨtakɨtakɨ

Pɛmakɨa ʉɗaɗa

¹ Inu ɓanduku, ɓombi ɓaja ati eno, ɓatɨhatamʉ aɓio ɓapananakɨa, dɔ nánɨmbɨa iɗo ɓɔ, isu ɓapananakɨa, ɓa꞊kio sina mʉkɔmbʉ ngʉweso ɓʉkaɨ nɔgbɛ, anagaaka ʉwa wɔ ɓombi ngaɓɔmɔ.

² Isu ɓaɓomu, takyɔkwa nɔ lɨngbaa di di di amati ɔ ɓʉɓɨɓɨ ta kwanɨ. Yɔɓieni nɔ mombi mʉngana ngɨa angɔgbʉsanamʉ ɨyɔ akɔ ʉɗaɗa, ambɔ ɨyɔ, a mombi ata musisekie, ɨya, eneni apɛmanakɨa ndʉtʉ ngɨangɔ iɓomu.

³ Takyɔnapɨa angbaga ɔ uko amonu kɔ falasɨ, dɔ, ɨkyananakɨa ʉpanʉ ngʉwa taɓio nayɔ aninjo, kʉdɔ, takwanana anɨsa nayɔ aki taɓio-ɛɛ akʉnda.

⁴ Kangeni-sɨ lɨngbɔɔ. Gʉtʉ la lɨkpɔkpɔ ta tanɨ, nɔ mahuo kɔlɨtutuo, yakamɛngana, ta mwana ɔ mangamangaa ata bele akɛ, alɨyomoko anisa aki mʉkangʉ aɓio-ɛɛ akʉnda.

⁵ Ʉɗaɗa wa ɨwɔ kʉ ɓanɨ, gʉtʉ ndʉ wa mwana ɔ ʉgbaa wɔ ndʉtʉ ata bele, yakamɛngana, wabɨbana nɔ yaka yɛta ɨkpɔkpɔ bɨbananɨ. Kangeni-sɨ ta anjɛɛ ɔ dyaa ata bele ngɨa akwana anʉya gbondo ata mʉja.

⁶ Ʉɗaɗa wa kʉndʉ dyaa. Nɔ, ɓʉɓɨɓɨ ɓaɓawele ingainga ɨkʉmbʉ amati ɔ ndʉtʉ ngɨyeso, aɨda ngɨyɛnɛnɨ, nɔ ɨyɔ, yakwanana yanakiso ndʉtʉ ta iɓomu. Ʉɗaɗa wakɔɗɛtiso dyaa auɓei ngʉweso ta uɓomu, nɔ dyaa yɔngɔ, yanɨngwa ta aɓʉbɨɨ.

⁷ Ɓombi ɓakwanana nudiso migbo yɔ ɓanama ɓɔ iju iɓomu, yiɓio ɓanoi, sipe nɔ ɓanama ngʉɓa ɓanaɗa ɛsɨ. Nɔ, ɓa꞉ɓʉnapɨa ɛsɨ ɔ ʉpanʉ ngʉweɓo tɨa kʉ napɨanɨ.

⁸ Yakamɛngana, pɛpɛ ta ʉɗaɗa, anɨ dɔ akɛ akwanana nawɔ anapɨa ɛsɨ ɔ ʉpanʉ wangɔ? Ʉɗaɗa wa ɓɨɓɨ, wangɔkatana pɔ bele, nɔ, wanɔ uchongi, ngʉwa, wawa ta asini.

⁹ Takyɔbibiso Makwɔɓɨɨ Aba ngɨyeso, ta nɔ ʉɗaɗa ngʉwɔnanɨ, nɔ tɔgbanga ɓata ɓombi ngʉɓa Asɔɓɨɨ a꞉ɓʉkɨa akɔ isisenio ngɨangɔ, kʉ nɔ ʉɗaɗa ngʉwɔnanɨ.

¹⁰ Yiɓio bibiso kʉndʉ mʉgbanga, yachwɛa ta akɔ moni mʉngana ngʉkɔnanɨ. Inu ɓanduku, yatiɓiomʉ gɔ pɛngɛ ɓanɨ.

¹¹ Ɨkɔ nga yeno tanɨ, ɨyɛ, yakwanana achweiso mipo kɔta maɗo, nɔ ʉka kɔta koi akɔ ihoo mɛngana?

¹² Inu ɓanduku ɓɔsɛmɨ, ɓʉmanga ɓakwanana ndɨ kʉɔ anumo mandima? Ga pɔ ɓʉɓɨsɨ anumo mbalʉ? Ya ngbanga kʉndʉ ɨkɔ ngɨyɛ mipo kɔngɔ ka nɔ mukwe, yangɔkwananamʉ achwɛiso mipo kɔta maɗo.

Nɨmbɨmbɨanaka ngɨyɛ yangwa atɨ Asɔɓɨɨ

¹³ Anɨ-sɨ ati eno, a mombi ɔ nɨmbɨmbɨanaka, nɔ ɨya apemiso yaka? Mombi ɔngɔ, ɨpananiso gɔ mʉtɨma wɔ nudisoniso ɨhɔ nɔ nɨmbɨmbɨanaka, ɨngbaa akɔ mʉkyananakɨa wɔta uɗo ngʉwangɔ.

¹⁴ Yakamɛngana, ndʉ náɓio amati eno nɔ imi ɨhɔ nɔ mʉtɨma wɔta ɓɨɓɨ, nɔ mangoi, nátɨbɨbanamʉ, ga pɔ anicho yaka yɔ ingono anɨka tɨa mʉjɛɛ.

¹⁵ Nɨmbɨmbɨanaka ɨkananja ngɨyɛnɛnɨ, yɔngwamʉ akʉʉ ɔ ɓisi, yakamɛngana, ya ɨyɛ yɔ dɔdɔ, nɔ ɨyɔ ɓombi, nɔ ɨyɔ abɨɨ.

¹⁶ Dɔ, aɨda ngɨyɛ imi yɛta ɓɨɓɨ nɔ ɨwaɨ ya-ɔɔ, wagbʉka ananɨ tɨta mangoi nɔ migbo yɔ ɓʉɓɨɓɨ iɓomu.

¹⁷ Yakamɛngana, nɨmbɨmbɨanaka ngɨyɛ yangwa akʉʉ ɔ ɓisi, apɛɨ ɔ yaka iɓomu ya-sɨ tu, nɔ ya ɓɔ pisi, nɔ majɨɔ, kʉ nɔ nʉkana ati ɔ ɓombi, yanɔ mʉtɨma wɔ ikoko, nɔ mʉkyananakɨa wɔta uɗo. Nɔ ɓata nɨmbɨmbɨanaka ngɨyɛnɛnɨ, yangɔnapiokomʉ ɓombi nɔ mababa, nɔ yangɔmʉ nɔ ɓufili kʉɓanɨ.

¹⁸ Ɓombi ngʉɓa ɓanɔ majɨɔ ati eɓo, ɓakɔhʉnaka kʉ majɨɔ, nɔ masɔɔ ngʉka ɓakʉbuoko ka ingainga uɓei wɔta ngbingbii.