Yakɔbɔ 2 - Mʉkpanganɨa nɔ Agɔmɛ ɔ Ɨtakɨtakɨ

Nátɨɓiomʉ nɔ mababa

¹ Inu ɓanduku, inu nánɔ báya akɔ Makwɔɓɨɨ, Yeso Klisito ngɨa anɔ ʉbɨba. Kʉɓanɨ, nátɨnapiokenimʉ ɓombi nɔ mababa.

² Tɨsɨka-sɨ ɓɔ mombi ɔ lɨkyɛmʉ mʉngana anɔ pɛtɛ ɔ ɔlɔ akpɛngbɛ, nɔ kʉ nɔ lɨpʉkʉ lɛta manjanja, ɛkɔ amujonokio ngʉweno. Ajanga mʉngana nɔ lɨpʉkʉ lɔ makaku, ɛka ɨyɔ, kʉ ga ngbuu kʉ inani.

³ Inu, nɔ́bibiso inu ta mombi ngɨa anɔ lɨpʉkʉ lɛta manjanja, ga inu nayɔ ɓɔ: «Ika anuwolo aɨda ngɨyɛ yɔsisekio ayɛ!» Yakamɛngana, nɔ́tɔsigio tɨa ajanga ɓɔ: «Ɨmaa ʉwɛ inani! Ga pɔ ɓɔ ika awolo aigbogboi ngɨyɛ nanapioko-ɔɔ mɨtɨndɨ ayɛ!»

⁴ Ɨkananja yɔ mʉkyananakɨa ngʉwɔnanɨ, yangɔ ndɨ anapionoko nɔ mababa? Nɔ, nángɔmʉ ananɨ tɨa ndʉ ɓajoji ngʉɓa ɓakio yaka nɔ mʉtɨma wɔta ɓɨɓɨ?

⁵ Inu ɓanduku ɓɔ ɓʉkʉnda, ʉkeni yaka ngɨyɛ iɗo: Asɔɓɨɨ a꞉chwa ɓajanga ngʉɓɔ dɔdɔ ngɨa, dɔ ɨɓɔ, ɓiɓio tɨa ɓombi ɓɔ lɨkyɛmʉ amati ɔ báya, nɔ ɓɨdya mʉgyɛndʉ wɔ maɓɨɨ wɔ Ɓʉngama ngʉɓa, a꞉pana jɛnɛ ɓombi ngʉɓa ɓakɨmʉkʉnda.

⁶ Yakamɛngana, inu nánɨna ɓajanga ta ɓʉtʉʉ! Ɨna dɔ, sɔkɔmʉ-sɨ ɓombi ɓɔ lɨkyɛmʉ ingainga aɓɛ, ɓanenu akyananaka nɔ nɨsa nenu apɛɨ ɔ ɓajoji?

⁷ Sɔkɔmʉ-sɨ kʉ ɨɓɔ ɓombi ɓɔ lɨkyɛmʉ ngʉɓɔnanɨ aɓɛ, ɓakɔsɛaka ino yɛta iɗo ngɨyɛ Asɔɓɨɨ a꞉ninjo?

⁸ Mabii kɔ Asɔɓɨɨ kasugo ɓɔ: «Kʉnda mangɛ kʉndʉ wakʉndana ʉwɛ makwɔngɔ», ʉpanʉ wɔ ɓʉngama ʉwɔnanɨ, ndʉ waʉkyananakɨa, ambɔ wɔkɨɔ iɗo nɔgbɛ.

⁹ Yakamɛngana, nɔ́ɓieni anapioko ɓombi nɔ mababa, ambɔ nákɔkɨa ɓʉɓɨɓɨ. Kʉɓanɨ, ʉpanʉ ngʉwɔ Musa wɔmanɔ nenu anɨfa, dɔ, nɔ꞉ʉɗɛɔ ɗɛanɨ.

¹⁰ Tɨa kwananɨ, mombi ɔɓundeni ʉpanʉ ta mʉngana, ambɔ ɔɓundo mapanʉ maɓomu.

¹¹ Dɔ, mombi ngɨa a꞉sugo ɓɔ: «Watɨkɨamʉ ɓuso», kʉ ɨyɔ akɛ a꞉sugo ɓata ɓɔ: «Watɨwamʉ mombi». Kʉdɔ, gʉtʉ wɔkɨenimʉ muso, yakamɛngana, wɔwa mombi, yasugo ɓɔ wɔɓundo ʉpanʉ ɓundoni.

¹² Ʉngakeni yaka, nɔ, ɓieni akɔkyananaka ngbanga ndʉ ɓombi ngʉɓa ɓanɨsa akio mʉkɔmbʉ ngʉweɓo, nɔ ʉpanʉ ngʉwa wachwʉchwakiso aɓubaya.

¹³ Mombi ngɨa angɛnɨamʉ ɨyɔ ɓangɛ ikoko, Asɔɓɨɨ angɔmɨnɨamʉ ɨyɔ ikoko kʉɓanɨ. Yakamɛngana, mombi ngɨa ɨnɨa ɓangɛ ikoko, angɔɓiomʉ sina ɨyɔ nɔ ʉɓá aɓisi ɓɔ mʉkɔmbʉ.

Báya yɛnɨanɨa amʉkyananakɨa

¹⁴ Inu ɓanduku, yanɔ dada nga eno tanɨ, mombi asugo ɓɔ ɨmɨ akɛ nanɔ báya, sɔkɔmʉ ɨpananiso amati ɔ mʉkyananakɨa? Ɨkananja yɔ baya ngɨyɛnɛnɨ, yenjo ndɨ kʉɔ ɓʉhɛa?

¹⁵ Tɨsɨka-sɨ ndʉ nduku ata gue ga pɔ ɨya ata moi, ɔjangɔ ɨpʉkʉ, ga pɔ idyo yɔ masi maɓomu.

¹⁶ Mombi mʉngana ati eno, ɔɓusigio ɓɔ: «Seni kʉ nɔ majɨɔ, pɛnɨeni lɨpʉkʉ lɛta nja, nɔ dyakakeni aka námɔta-ɔɔ!» Yakamɛngana, sɔkɔmʉ nɔ́ɓinjo ɨkyɛmʉ pɔ mɛngana ngɨyɛ, yaɓʉsalɨa aubei ngʉweɓo. Ɨyɛnɛnɨ, yaɓio tɨa nɔ ɨjangɨa nga yeno tanɨ?

¹⁷ Báya ya ɨyɔ, ngbanga kʉɓanɨ. Mombi ngɨa angɔmʉ apananiso báya ngɨangɔ ɨngbaa akɔ mʉkyananakɨa, yasugo ɓɔ báya ngɨangɔ yawo tɨa woni.

¹⁸ Yɛmɔ mombi akwanana asugo ɓɔ: «Ʉwɛ, wanɔ báya, nɔ ɨmɨ, nanɔ mʉkyananakɨa». Kʉdɔ ɨmɨ, na꞊mʉtosio tɨa ɓɔ: «Anapana-sɨ báya ngɨyɛsɔɔ, sɔkɔmʉ nɔ mʉkyananakɨa, nɔ ɨmɨ, nɔnapana tɨa báya ɨngbaa akɔ mʉkyananakɨa ngʉwɔsɛmɨ.»

¹⁹ Ʉwɛ, wa ndɨ nɔ báya ɓɔ Asɔɓɨɨ a ta mʉngana? Ɛɛ ya iɗo. Mɨtɨma yɔ madu yakyɔbaya ɨyɔ kʉɓanɨ, nɔ, ɓɔgʉgʉma nɔ ʉɓá.

²⁰ Ʉwɛ ijangi ngɨyɛ, wandɨ-sɨ kʉ anɨmbɨa ɓɔ báya yɔɓienimʉ nɔ mʉkyananakɨa, ya ɓʉtʉʉ?

²¹ Nɔ ɨngbaa nga yeno tanɨ ɨyɛ kuku ngɨyeso Abalaama, ɛ꞉nɨanɨa-ɔɔ ndʉ mombi ata ngbingbii akɔ mesu kɔ Asɔɓɨɨ? Sɨ ya꞉ɓio ɨngbaa akɔ mʉkyananakɨa ngʉwangɔ, ɨyɛ, a꞉sa-ɔɔ aninjo Asɔɓɨɨ mwana angɔ Isaka ndʉ mutebii akʉʉ ɔ gbɔ́gbɔ.

²² Wanɨna ɓɔ báya ngɨangɔ, yɛ꞉nɨanɨa aɓʉmba, ta ɨngbaa akɔ mʉkyananakɨa. Kʉdɔ, yaka ngɨyɛnɛnɨ a꞉kɨa, yɛ꞉maiso báya ngɨangɔ tɨa ɓʉmʉ nɔgbɛ.

²³ Kʉdɔ, yaka ngɨyɛ Mabii ka꞉sugo ya꞉kyananakɨa asugo ɓɔ: «Abalaama a꞉baya Asɔɓɨɨ, kʉdɔ, Asɔɓɨɨ ɔ꞉mʉsɨka tɨa ndʉ mombi ata ngbingbii, akpatanakɨa nɔ báya ngɨangɔ.» Ɨyɛ, ɓa꞉misoko-ɔɔ ɓɔ awai wɔ Asɔɓɨɨ, yakwa mʉtʉ ɓanɨ.

²⁴ Ɨneni-sɨ ɓɔ, Asɔɓɨɨ akwanana kʉɔ sɨka mombi ndʉ iɓio ngbingbii amesu kangɔ, ɨngbaa akɔ mʉkyananakɨa, sɔkɔmʉ ta akʉʉ ɔ báya ɓʉtʉʉ.

²⁵ Yaka ngɨyɛnɛnɨ, ya꞉kyananakɨa ta ɓanɨ nɔ ɨjangwɛ ngɨa aɓio ino ɓɔ Lahaba. Asɔɓɨɨ a꞉mʉsɨka ndʉ mombi ata ngbingbii, ingbaa akɔ mʉkyananakɨa, ngbinga ngɨa a꞉tɛtɨa-ɔɔ ɓatetete ɓɔ Ɓaɨsalaɛlɛ. Kʉdɔ, ɔ꞉ɓʉɓwanakiso tɨa nɔ ɨngbaa ngayɛmɔ.

²⁶ Ndʉtʉ yɔɓienimʉ nɔ mʉhʉmʉ, ambɔ ya tɨa iwe. Ngbanga kʉɓanɨ, báya ngɨyɛ yangɔmʉ nɔ mʉkyananakɨa, ya tɨa kʉ iwe.