Yakɔbɔ 1 - Mʉkpanganɨa nɔ Agɔmɛ ɔ Ɨtakɨtakɨ

Ɓokuo

¹ Ɨmɨ Yakɔɓɔ, baya ɔ Asɔɓɨɨ nɔ Yeso Klisito akɛ, nɔnɨtɛndakɨɔ ʉbalʉa ngʉa. Inu, ɨfananja yɔ Asɔɓɨɨ ngɨyɛ, ya꞉nanjana adɔdɔ muɓomu, nɔnɨɓokuo ɓokueni.

Ɓaklisito ɓiɓio nɔ baya nɔ nɨmbɨmbɨanaka

² Inu ɓanduku, likanio di di di lɔ꞊nɨgbʉkeni, lɨ꞊sɨkeni inu ta ndʉ yaka yɔ ɨgyagya yɛta ɨja.

³ Dɔ, nánɨmbɨa iɗo ɓɔ báya ngɨyeno yɔchaneni amati ɔ ikanio, yaninjo inu tɨa kpekeɓu.

⁴ Ɨna dɔ, yɛtɔ ɓɔ kpekeɓu ngɨyeno, ɨkɨa tɛa ngɨangɔ amati eno, kwananɨ, náɓio tɨa ɓombi ɓɔta ɓasisekie alɨngbaa lɔ ɓayaka ta liɓomu, nɔ nángɔjangamʉ ɨkyɛmʉ pɔ mɛngana.

⁵ Mombi mʉngana ati eno, ɔjangeni nɨmbɨmbɨanaka, ɨta Asɔɓɨɨ ngɨa a꞊minjo ɨyɔ, injoni. Dɔ ɨyɔ Asɔɓɨɨ, enjekio ɓombi ɓaɓomu nɔ mʉtɨma mʉngana, sɔkɔmʉ anapɨako ɓombi nɔ mababa.

⁶ Yakamɛngana, yɛtɔ ɓɔ ɨmɨta Asɔɓɨɨ nɔ báya, sɔkɔmʉ nɔ ɓajatwoko. Dɔ, mombi ngɨa akɨa nɔ ɓajatwoko, a ngbanga ndʉ lɨsana lɔ mipo ngɨlɛ mahuo kanalɔ atutuo magbaa maɓomu.

⁷ Ɨkananja yɔ mombi ndʉ ɨyananɨ, atɨtunguomʉ pɔ tunguo ɓɔ ɛnɨanɨa kʉɔ nɔ ɨkyɛmʉ, anɨngwa atɨ Makwɔɓɨɨ.

⁸ Dɔ ɨyɔ, anɔ litungwio ɗepini, tɨa kwananɨ, anatananaka-ɔɔ ndʉ manɨ kɔ ɓapambaa, auɓei ngʉwangɔ.

Ɓajanga nɔ ɓombi ɓɔ lɨkyɛmʉ

⁹ Yɛtɔ ɓɔ nduku ngɨa a ajanga ɨkwa ɨgyagya, dɔ, Asɔɓɨɨ amʉtʉmba tɨa nɔ ɨkʉʉ.

¹⁰ Yakamɛngana, Asɔɓɨɨ adiso mombi ɔ lɨkyɛmʉ nɔ mʉdʉʉ, nɔ, mombi ngɨananɨ achana ta ndʉ ɨyɛ, ɨʉa yakɨɓwana-ɔɔ.

¹¹ Ɨpá yachwɛa nɔ ɓʉnja ɓɔta kisoɓa, yɔmakakiso lɨgbɛɛ, kʉdɔ ɨʉa yɔngɔ yɔɓwana aɨsɨ, nɔ ɓuɗo ɓɔngɔ ɓɔsio. Akɔ mombi ɔ lɨkyɛmʉ ya kʉ ngbanga, a꞊kwa sina nɔ niwo ta amati ɔ tɛa ngɨangɔ.

Asɔɓɨɨ angɔkaniomʉ mombi

¹² Ɨgyagya nɔ mombi ngɨa ɛmaa ɓʉmʉ amati ɔ ikanio! Dɔ ndʉ anagaaka likanio ɓanɨ, kʉdɔ, Asɔɓɨɨ a꞊mʉpɛniso tɨa ɨgaɨ yɔ ɓʉngama, ɨyɛ ya, uɓei wɔ mago nɔ mago. Ɨyɛnɛnɨ, ya mʉkaya ngʉwa Asɔɓɨɨ a꞉panaka jɛnɛ ɨjɛnɛ, akɔ ɓombi ngʉɓa ɓamʉkʉnda.

¹³ Mombi ɔɓieni amati ɔ ikanio, atɨsugomʉ ɓɔ Asɔɓɨɨ akɛ ɔmʉkanio. Dɔ ɨyɔ, angɔkwanana akumonio amati ɔ ikanio yɔ kɨa ɓʉɓɨɓɨ, nɔ ɨyɔmakwɔngɔ, angɔkaniomʉ mombi kʉɓanɨ.

¹⁴ Yakamɛngana, ta mʉsasa wɔta ɓɨɓɨ ngʉwɔ mombi nɔ mombi akɛ, wamʉɗuɗuo, nɔ nayɔ atutuo amati ɔ ikanio.

¹⁵ Kʉɓanɨ, mʉsasa wɔta ɓɨɓɨ ngʉwɔnanɨ wɔkɨeni ɓʉkʉʉ, wanɔta tɨa ɓʉɓɨɓɨ, ndʉ ɓʉɓɨɓɨ ɓɛtɨa, ɓɔnɔta ɨɓɔ tɨa ingwo.

¹⁶ Inu ɓanduku ɓɔ ɓʉkʉnda, mombi atɨnɨpɛtamʉ pɔ bele!

¹⁷ Apɛpɛ ata muɗo muɓomu, nɔ kiɓio ɔ ɨjangɨa muɓomu, akyɔjo anɨngwa ta akʉʉ ɔ ɓisi, atɨ Asɔɓɨɨ Aba ngɨa, akɨa ɓayaka ɓɔta ɓajɛyɛ ɓaɓomu ngʉɓa ɓajɛa akʉʉ ɔ ɓisi. Asɔɓɨɨ ngɨananɨ, angɔnatananaka, ga pɔ amati angɔ, umomo wangɔmʉ pɔ bele.

¹⁸ Ɨngbaa akɔ ʉpanʉ ngʉwangɔ wɔ ingono, ɨyɔ akɛ, a꞉tɨnjo uɓei, akpatanakɨa nɔ ɓʉkʉnda ingainga, dɔ isu tiɓio ndʉ ɓatapio amati ɔ ɓayaka ɓaɓomu ngʉɓangɔ, a꞉ɓʉkɨa.

Yɛtɔ nʉka nɔ kyananakɨa ʉpanʉ wɔ Asɔɓɨɨ

¹⁹ Inu ɓanduku ɓɔ ɓʉkʉnda, ɨmbɨeni iɗo ɓɔ yɔsisekio ɓɔ mombi nɔ mombi iɓio gagaa anʉka yaka, yakamɛngana, atiɓiomʉ gagaa atosio yaka, nɔ nɨkwa ʉnganga.

²⁰ Dɔ, mombi ɔɓieni nɔ ʉnganga, angɔkwananamʉ akɨa yaka yɛta ngbingbii apɛɨ ɔ Asɔɓɨɨ.

²¹ Kʉɓanɨ, sɨaneni nɔ mʉkyananakɨa uɓomu ngʉwɔ ɓʉɓɨɓɨ, nɔ yaka iɓomu ngɨyɔ isikisiki. Bayeni Ɨsaʉ yɛta Iɗo ngɨyɛ Asɔɓɨɨ, a꞉hʉnaka amati eno, nɔ mʉtɨma wɔ majɨɔ, dɔ ɨyɔ ayɛ, yakwanana nenu aheiso.

²² Inu-a, nátɨɓiomʉ amati ɔ ɓujangijangi, ati eno! Kyananakɨeni-sɨ Ɨsaʉ yɔ Asɔɓɨɨ ndʉ aka yɔsisekio-ɔɔ, sɔkɔmʉ anʉka ta nɔ machwei.

²³ Dɔ, mombi ngɨa ɔka yaka ta nʉka, sɔkɔmʉ ɨɨkyananakɨa, a gbanga ndʉ mombi ngɨa akɔkangana mesu amati ɔ ɨkanganɨa, ɛnana ta ndʉ aka a-ɔɔ.

²⁴ Ɨyɛ ndʉ apipo kangana ɓɔ gba, ɔngwɨa kyɛnda, nɔ, ɛpaa ɓɔ mesu ngʉkangɔ kɔ꞉ɓio tanɨ.

²⁵ Yakamɛngana, gwa ngɨa akangaka mapanʉ ngʉkɔ ingono tinetine, ʉka kenjo mombi aɓoonokio, nɔ ngbinga ngɨa akʉka-ɔɔ, ʉkʉɓoto ɓʉmʉ, sɔkɔmʉ ɨkʉɓʉsaa pɔ bele, nɔ, ɔkyananakɨa kʉndʉ aka ka-ɔɔ asugo. Kʉdɔ, ɨkananja yɔ mombi ngɨananɨ, Asɔɓɨɨ amʉkiokio kiokioni, amati ɔ mʉkyananakɨa ngʉwangɔ.

²⁶ Mombi ɔsɨkaneni ɓɔ ɨyɔ akɛ a mombi ɔ ingono amati ɔ báya, nɔ sɔkɔmʉ ɨfana ʉɗaɗa ngʉwangɔ, a ta amati ɔ ɓujangijangi. Báya ngɨangɔ ya ɓʉtʉʉ.

²⁷ Báya ngɨyɛ yɛta iɗo, nɔ ɨyɛ yangɔmʉ nɔ ɨɗa apɛɨ ɔ Asɔɓɨɨ Aba, ya ta asalɨa ɓawee nɔ ɓawoko, ngbinga ngɨa ɓa-ɔɔ amati ɔ ikoko ngɨyeɓo, nɔ, apɛmanakɨa nɔ ɓʉɓɨɓɨ ɓɔ dɔdɔ ngɨa.