Ɓaɛfɛsɔ 6 - Mʉkpanganɨa nɔ Agɔmɛ ɔ Ɨtakɨtakɨ

Ɓana nɔ ɓɛsɛ nɔ ɓinye ɓɨkɨa tanɨ

¹ Ɛɛ, inu ɓana, kumeni ɓatɔ ɓeno nɔ ɓanʉ ɓeno [amati ɔ Makweso], dɔ ɨyɛnɛnɨ ya ngbingbii.

² Ʉpanʉ ngʉwɔnanɨ wɔ pɛɨ, wa nɔ mʉkaya wɔngɔ akɔsugo ɓɔ: «Kumo atɨ atɔ nɔ anʉ,

³ kʉdɔ uɓei ngʉwɔsɔɔ uɓomu wa꞊ɓio ta uɗo, nɔ makwaa ngʉkɔsɔɔ kɛsɨnganaka mata akɔ dɔdɔ ngɨa.»

⁴ Nɔ inu ɓɛsɛ ɓɔ ɓana, natɨyangisomʉ ɓana mɨtɨma. Yakamɛngana, ɓʉpananakɨeni, nɔ́ɓinjo mapanʉ nɔ nɔ́ɓʉkiiso ɓakʉʉ iɗo amati ɔ Makweso.

Baya nɔ makwangɔ ɓakɨa tanɨ

⁵ Inu ɓombi ɓɔ tɛa ʉkeni ɓakwɔɓeno ngʉɓa adɔdɔ aka, nɔ nɔ́ɓʉkumo, nɔ́ɓʉgʉgʉmɨa nɔ mʉtɨma wɔta uɗo, kʉndʉ nákɨa Klisito.

⁶ Nátɨɓʉkyananakɨenimʉ ta akɔ angbinga ngɨa ɓa-ɔɔ nenu akɔkanga, ngbanga ndʉ ɓombi ngʉɓa ɓahata ɓɔ ɓɨɓʉkʉnda. Yakamɛngana, ɓieni ndʉ ɓabaya ɓɔ Klisito. Ʉɓa ɓakɨa ɓʉkʉnda ɓɔ Asɔɓɨɨ nɔ mʉtɨma mʉnga.

⁷ Kɨeni tɛa ngɨyɛnɛnɨ yeɓo nɔ mʉtɨma wɔta uɗo, ndʉ nákɨɨa Makwɔɓɨɨ, sɔkɔmʉ mombi ɔ ɨtaka.

⁸ Ɨmbɨeni ɨmbɨanɨ ɓɔ, mombi nɔ mombi ɛ꞊nɨanɨa sina nɔ mʉkaya ngʉwangɔ alɨkɔndɔ lɔ Makwɔɓɨɨ, akpatanakɨa nɔ mʉkyananakɨa wɔta uɗo ngʉwangɔ, iɓio baya kʉndʉ sɔkɔmʉ baya.

⁹ Nɔ inu ɓakwɔ ɓɔ ɓabaya, kɨeni kʉ yaka mɛngana ngɨyɛnɛnɨ akʉʉ ɔ eɓo, nɔ, nátɨɓʉnokienimʉ. Ɨmbɨeni ɓɔ inu nɔ ɓabaya ɓeno nánɔ ngama ta mʉngana ɨya akʉʉ ɔ ɓisi, ɨya, angɔnapiokomʉ ɓombi nɔ mababa.

Lɨkyɛmʉ lɔ ɗite ngɨlɔ Muklisito

¹⁰ Kʉɓanɨ, hateni aɓio nɔ angu mʉja amati ɔ Makwɔɓɨɨ nɔ amati ɔ angu ata mʉja ngɨangɔ.

¹¹ Inu, sɨkeni lɨkyɛmʉ lɔ ɗite liɓomu ngɨlɛ Asɔɓɨɨ anenu akɔninjo. Kʉdɔ, nákwanana anɨmaa ɓʉmʉ apɛɨ ɔ lipindi ngɨlɔ Mʉnamasa.

¹² Dɔ isu ingainga, tangɔmʉ aɓɛndana ɗite nɔ mombi. Yakamɛngana, isu, taɓɛndana ɗite nɔ Ɓangama ngʉɓa banɔ angu ɔ ɓabɨɨ, nɔ ɓanɔ ʉpanʉ wɔ mɨtɨma yɔ madu, nɔ ɓatataɓasie ɓɔ dɔdɔ ngʉɓa ɓanɔ angu ɔ naɓutu, nɔ madu kɔta ɓʉkaɓʉkaɨ ngʉka kayɛnganaka kʉ gbaɨ amati ɔ lɨkʉɓa lɔ ɓisi.

¹³ Tɨa kʉɓanɨ, potoneni nɔ lɨkyɛmʉ lɔ ɗite liɓomu ngɨlɛ Asɔɓɨɨ. Kʉdɔ, ɓisi ɓʉta ɓɨɓɨ ɓɛkeni, nákwanana nɨmaa nɔ ɓɛndana nɔ mʉnamasa. Kʉdɔ ambise ɔ agbanga ngɨananɨ, nɛ꞊maa ɓʉmʉ sɔkɔmʉ aka nákwa-ɔɔ.

¹⁴ Tɨa kʉɓanɨ, inu, ɨmaeni ta ɓʉmʉ, sangeni ingono ndʉ muki wɔ ɨɓʉnɨ ngʉweno, nɔ pɛnɨa ɓʉngbingbii ndʉ ɨpapɨ yɔ uko apɛmakɨa ɨgʉngʉ.

¹⁵ Ɓieni nɔ kɛkɛɛ anɨsa akɔɓɨakɨa Ɨsaʉ yɛta Iɗo ngɨyɔ majɨɔ, ndʉ ɨyɛ ɓapɛnɨa-ɔɔ lɨkpakʉ amɨtɨndɨ.

¹⁶ Angbinga muɓomu, ɓieni nɔ báya ndʉ kɔpɨ ngɨyeno, anibo liyeti lɔ dyaa liɓomu ngɨlɔ Mʉnamasa.

¹⁷ Pɛnɨeni ɓʉhɛa ndʉ ɨgaɨ yɔ ɗite yɔ uko, nɔ Ɨsaʉ ngɨyɛ Asɔɓɨɨ ndʉ mbɔtɨa ngɨa Mʉtɨma wɔta Tu waninjo.

Ɓaklisito ɓatɨsɨamʉ nɨta Asɔɓɨɨ

¹⁸ Ɓieni amati ɔ nɨta Asɔɓɨɨ nɔ nayɔ akikelekio akɔ lɨngbaa lɔ ɓayaka ta ɓaɓomu, ta ndʉ aka Mʉtɨma wɔta Tu wanɨpananakɨa-ɔɔ. Nátɨkwamʉ ɨjɨma, nɔ, nátɨbʉmbanamʉ. Inu, ɨteni Asɔɓɨɨ nɔ kɛkɛɛ akʉʉ ɔ ɓombi ngʉɓa ɓamʉbaya.

¹⁹ Anɛtɨeni kʉɔ ɨmɨ, ɓɔ Asɔɓɨɨ ɨnenjo ɓaka yaka ngɨyɛ yɔkwananɔ angbinga ngɨa na-ɔɔ apanɨa. Iɗo ambɔ, niɓio akɔɓɨakɨa yaka yɔ ɓaɗi ngɨyɛ Ɨsaʉ yɛta Iɗo sɔkɔmʉ nɔ ʉɓa.

²⁰ Ɨmɨ, na titima wɔ Ɨsaʉ yɛta Iɗo ngɨyɛnɛnɨ, gʉtʉ ndʉ na iyani aboloko. Anɛtɨeni Asɔɓɨɨ ɓɔ niɓio akɔɓɨakɨa Ɨsaʉ ta ndʉ aka yɔsisekio-ɔɔ, sɔkɔmʉ nɔ ʉɓá pɔ bele.

Ɓokuo yɔ mupipio

²¹ Inu ɓanduku, Tikiko, nduku eso wɔ ɓʉkʉnda, nɔ ɨyakɛ a mombi ɔ ingono akɔ tɛa yɔ Makwɔɓɨɨ, akwanana nenu aninjekio masaʉ ngʉkɔsɛmɨ maɓomu, kʉdɔ, nápemiso ɓɔ ubei ngʉwɔsɛmɨ wa tanɨ.

²² Ɨyɔ ingainga akɛ nɔmʉtʉmɔ inani ná-ɛɛ, dɔ ɨnɨsungo mʉtɨma nɔ, nenu aɓɨa ɓɔ ta iyani tɨa tanɨ.

²³ Asɔɓɨɨ aba nɔ Makweso Yeso Klisito ɓitio ɓanduku ɓaɓomu majɨɔ nɔ ɓɔɓinjo ɓʉkʉnda, ɨhɔ nɔ báya.

²⁴ Ɨjɨɔ ngɨyɛ Asɔɓɨɨ yiɓio nenu ɓaɓomu ngʉɓa nákʉnda Makweso Yeso Klisito nɔ ɓʉkʉnda ngʉɓɔ mago nɔ mago.