Ɓaɛfɛsɔ 5 - Mʉkpanganɨa nɔ Agɔmɛ ɔ Ɨtakɨtakɨ

Kyɛndaka amati ɔ ʉwanga

¹ Kʉɓanɨ, inu ná ɓana ngʉɓa Asɔɓɨɨ anaɓɔ akʉnda, kɨeni angu aɓio nɔ mʉkyananakɨa kʉndʉ ʉwangɔ.

² Inu, kʉndaneni kʉndʉ Klisito a꞉tɨkʉnda isu. Nɔ ɨyɔ, e꞉njo uɓei akʉʉ ɔ eso ndʉ apɛpɛ, ga pɔ ndʉ mutebii wɔ imbo yɛta iɗo, ngʉa wanɨkata Asɔɓɨɨ.

³ Inu ná tɨa ɓombi ɓɔ Asɔɓɨɨ. Kʉɓanɨ, yangɔmʉ ɓata iɗo ɓɔ muso, ga pɔ mʉkyananakɨa wɔta mʉsʉgʉ uɓomu nɔ mʉsasa wɔ lɨkyɛmʉ akɔnɨnɨanɨa ati eno.

⁴ Yaka yɔ soni yatɨchwɛamʉ ɓata amonu ngʉkeno pɔ bele, ga pɔ yaka yɔ ɓujangijangi, nɔ ɨyɛ yɛta mʉsʉgʉ. Yakamɛngana, ɓieni ta anɨta Asɔɓɨɨ nɔ nayɔ akɔtosio ʉbɨba.

⁵ Ɛɛ, yɛtɔ ɓɔ ɨmbɨeni iɗo ɓɔ mombi wɔ muso, mombi ata mʉsʉgʉ muɓomu nɔ ɨya wɔ mʉsasa wɔ lɨkyɛmʉ, (ɨyɛnɛnɨ ya ndʉ gbʉkʉmakɨa ɓamʉngʉ ɓɔ majɛjɛ). Mombi muɓomu ngɨa akɔkɨa ɨkananja yɔ ɓayaka ngʉɓɔnɨ, angɔdyamʉ mʉgyɛndɔ wɔ maɓɨɨ wɔ Ɓʉngama ngʉɓɔ Asɔɓɨɨ nɔ Klisito.

⁶ Mombi pɔ mʉngana atɨniɗuɗuomʉ nɔ ɓatɔdʉ ɓɔ majɛjɛ, dɔ akʉʉ ɔ yaka ngɨyɛnɛnɨ, ɨyɛ Asɔɓɨɨ akyoto-ɔɔ ɓʉkaɓʉkaɨ ngʉɓangɔ akʉʉ ɔ ɓombi ngʉɓa ɓakɔjanga nayɔ anʉka ɓanɨ.

⁷ Kʉɓanɨ, nátɨɓienimʉ naɓɔ nɔ lɨbɔmbɔ pɔ bele.

⁸ Jɛnɛ pɛɨ, na꞉ɓio ɓana ɓɔ umomo. Yakamɛngana, ɨtakɨtakɨ ngɨyɛ, na tɨa ɓana ɓɔ ʉwanga amati wɔ Makweso. Ɓieni tɨta nɔ mʉkyananakɨa ngʉwɔ ɓana ɓɔ ʉwanga.

⁹ Dɔ, masɔɔ kɔ ʉwanga ka iɗo iɗo iɓomu, ɓʉngbingbii nɔ ingono.

¹⁰ Kɨeni angu anɨmbɨa ɨkyɛmʉ ngɨyɛ yɛkataa Makwɔɓɨɨ.

¹¹ Nátɨjonokiomʉ nɔ mɨkyananakɨa yɔ umomo, ɨyɛ yangɔnɔtamʉ lipumo. Yakamɛngana, ichweiseni ta aɓʉmba.

¹² Dɔ yaka ngɨyɛ ɓakyɔkɨa aɓaɗi ɓaɗi, ya nɔ soni anʉnga.

¹³ Yakamɛngana, ndʉ yaka yɔngɔ yachwɛa tɨa akɔ ʉwanga, kʉdɔ mʉkyananakɨa wɔngɔ wɛnɨanɨa tɨa kʉ aɓʉmba.

¹⁴ Ɨna dɔ, iɓomu ngɨyɛ ɓaɨchweiso aɓʉmba ɓɔ gbangamu, yɛka tɨa kʉndʉ ʉwanga. Tɨa kwananɨ ya-ɔɔ akɔsugonio ɓɔ: «Ʉwɛ ngɨa wa atɔɔ jʉkana, Nɔ wɛmaa ɓɔ gba ati ɔ mɨnda, kʉdɔ Klisito a꞊napɔya nɔ ʉwanga.»

¹⁵ Kanganakieni iɗo, amʉkyananakɨa ngʉweno. Nátɨɓiomʉ ndʉ lijangi, yakamɛngana ndʉ ɓombi ɓɔ nɨmbɨmbɨanaka.

¹⁶ Ɓeyokeni angbinga ɓeyokoni, dɔ makwaa ka tɨa ɓɨɓɨ.

¹⁷ Tɨa kwananɨ, nátɨɓiomʉ ndʉ lijangi, yakamɛngana, kɨeni angu akɔpemiso ɓɔ Makwɔɓɨɨ akʉnda tanɨ.

¹⁸ Nátɨdamʉamʉ ʉkyɛpʉ, dɔ ɨdamʉ yanɨdangbaniso ta dangbaniso, yakamɛngana, hueni ingainga nɔ Mʉtɨma wɔta Tu.

¹⁹ Yakanakeni ati eno amati ɔ mambɔ nɔ lɨta nɔ ɓagele di di di ngʉɓa Mʉtɨma wɔta Tu wa꞊ɓio nenu apanɨa. Mʉbibiseni Makwɔɓɨɨ nɔ nayɔ asʉswanakɨa amati ɔ mɨtɨma ngɨyeno iɓomu.

²⁰ Angbinga muɓomu mutosieni Asɔɓɨɨ Aba ʉbɨba akɔ lɨngbaa lɔ ɓayaka ta liɓomu, akɔ ino ngɨyɛ Makweso Yeso Klisito.

Atɨ gue nɔ moi ɓakyɛndaka tanɨ

²¹ Mombi nɔ mombi ati eno ɨnapɨana ɛsɨ ɔ ʉpanʉ wɔ mangɛ, akʉʉ ɔ ʉɓá ngʉwa nánawɔ amati ɔ Klisito.

²² Inu ɓoi ɓieni ɛsɨ ɔ ʉpanʉ wɔ ɓaɓaʉ ɓeno kʉndʉ nákyɔkɨa akɔ Makweso Klisito.

²³ Dɔ gue a mʉtʉ ngʉwɔ moi, kʉndʉ Klisito a mʉtʉ ngʉwɔ Kanisa. Kanisa ngɨa a ndʉtʉ ngɨyangɔ, nɔ ɨyɔ akɛ a Muheiso wɔngɔ.

²⁴ Kʉɓanɨ, ɓoi ɓɔkwananɔ akɔɓio ta ɛsɨ ɔ ʉpanʉ wɔ ɓaswaɨ ɓeɓo akɔ lɨngbaa lɔ ɓayaka ta liɓomu, kʉndʉ Kanisa a ɛsɨ ɔ ʉpanʉ wɔ Klisito.

²⁵ Inu ɓague kʉndeni ɓoi ɓeno kʉndʉ Klisito a꞉kʉnda Kanisa, nɔ e꞉njo uɓei ngʉwangɔ akʉʉ ɔngɔ.

²⁶ A꞉kɨa ɓanɨ, iɗo ambɔ kanisa, iɓio mʉkwananɛ apɛɨ ɔ Asɔɓɨɨ, ɨngbaa akɔgyaɓanakɨa nɔ mipo, ɨhɔ kʉ nɔ ɨsaʉ yɔ Asɔɓɨɨ.

²⁷ A꞉kʉnda jɛnɛ ɓanɨ, dɔ kanisa ɨnɨanɨa apɛɨ angɔ nɔ ʉbɨba uɗo ɓɔ jele. Kanisa ngɨa angɔmʉ nɔ ɓʉɓɨɓɨ pɔ mʉngana. Yakamɛngana, Kanisa ngɨa ata tu, ɨya angɔmʉ nɔ ɨɗa, ga pɔ dɛɛ, ga pɔ majangi.

²⁸ Kʉɓanɨ, ɓague ɓɔkwananɔ kʉnda ɓoi ɓeɓo kʉndʉ ndʉtʉ ngɨyeɓo ingainga. Gue ngɨa akʉnda moi angɔ, akɔkʉndana ta ɨyɔ ɓɔ kpɛ.

²⁹ Mombi pɔ mʉngana ati eso angɔkwanana ayaa ndʉtʉ ngɨangɔ. Yakamɛngana, aɨdyakakiso nɔ ɔɨpɛmakɨa, ngbanga kʉndʉ Klisito akɨa akɔ Kanisa.

³⁰ Dɔ isu ta lɨsɨgɨsɨgɨ lɔ ndʉtʉ ngɨangɔ.

³¹ Amati ɔ Mabii ya꞉tɛndanakɨa ɓɔ: «Kʉɓanɨ gue a꞊sɨa atɨ ɨsɛ nɔ inye, nɔ ɔjonokio tɨa nɔ moi angɔ, kʉdɔ ɨɓɔ ɓapɨnɨ ɓaɓomu, ɓa꞊ɓio tɨta ndʉtʉ mɛngana.»

³² Yaka yɛta ɨja yɔ ɓaɗi, ya amati ɔ ʉgbaa wɔ ɨtaɓʉ ngɨyɛnɛnɨ. Ɨmɨ nɔsugo ɓɔ ya akʉʉ ɔ Klisito nɔ Kanisa.

³³ Yakamɛngana, ya kʉɔ akʉʉ ɔ eno: gue muɓomu ɨkʉnda moi angɔ, kʉndʉ akyɔkʉndana ɨyɔ makwɔngɔ nɔ, moi muɓomu ɨkumo swaɨ kʉ kumoni.