Ɓaɛfɛsɔ 4 - Mʉkpanganɨa nɔ Agɔmɛ ɔ Ɨtakɨtakɨ

Akɔ Yeso Klisito yɛtɔ ɓio ndʉtʉ mɛngana

¹ Ɨmɨ ngɨa, na aboloko dɔ nakyananakɨa Makwɔɓɨɨ. Inu ngʉɓa Asɔɓɨɨ a꞉nisoko, kikiliki, kyɛndakeni ngbanga nɔ nisoko ngɨyɛ Asɔɓɨɨ a꞉nisoko.

² Ɓieni nɔ mʉtɨma wɔ nudisoniso, nɔ, kʉ nɔ majɨɔ, nɔ́ɓio kʉ nɔ mʉtɨma wɔta ʉta masi ta maɓomu. Tʉngbʉanakeni, ati eno, nɔ ɓʉkʉnda.

³ Nɔ ɓata, kieni angu aɓio ta ɨkyɛmʉ mɛngana amati ɔ Mʉtɨma wɔ Asɔɓɨɨ, ʉwa, wanenu anutio majɨɔ ati eno.

⁴ Yanɔ ndʉtʉ mɛngana, Mʉtɨma wɔ ta Tu wa kʉ mʉngana, kʉndʉ yaka ngɨyɛ ná꞉napɨana-ɔɔ mʉtɨma ya kʉ mɛngana, ɨyɛ Asɔɓɨɨ a꞉nisokio.

⁵ Makwɔɓɨɨ ata mʉngana, báya ya kʉ mɛngana nɔ uɓatiso kʉ mʉngana.

⁶ Asɔɓɨɨ ata mʉngana, Ɨsɛ ɔ ɓombi ɓaɓomu, ɨyakɛ akʉʉ ɔ ɓombi ɓaɓomu, nɔ kʉ ɨyɔ akɛ akɨa tɛa ati ɔ ɓombi ɓaɓomu, nɔ, amati ɔ ɓombi ɓaɓomu.

⁷ Yakamɛngana, mombi nɔ mombi ati eso, ɛ꞉nɨanɨa nɔ ɨjɨɔ ngɨangɔ ɓɔ kpɛ, akpatanakɨa nɔ apɛpɛ ngɨa Klisito a꞉minjo, ngbanga nɔ ɓʉkʉnda ngʉɓangɔ.

⁸ Mabii kakɔsugo ɓɔ: «Angbinga ngɨa a꞉ɗeto-ɔɔ akʉʉ, a꞉tʉmbanɨa ɨhɔ nɔ ɓombi ɓɔ boloko. Nɔ, e꞉njekio ɓombi ɓapɛpɛ di di di.»

⁹ Wɔkeni-sɨ ɓɔ «ɨyɔ a꞉ɗeto» yakʉnda asugo tanɨ? Ya ingainga asugo ɓɔ ɨyɔ, a꞉jo a ihoi ngɨa asini ɔ ɨtaka.

¹⁰ Ɛɛ, mombi ngɨananɨ a꞉jo, ɨyɔ mʉngana kʉ ɨyananɨ a꞉ɗeto akʉʉ ɔ ɓisi, dɔ, ihuso ɓisi nɔ dɔdɔ.

¹¹ Ɨyɔ makwɔngɔ akɛ, a꞉chwa ɓombi nga ɓɔmɔ akɔɓio ɓatitima, ɓɔmɔ magbɛ, ɓɔmɔ ɓombi ɓɔ ɓɨakɨa Ɨsaʉ yɛta Iɗo, ɓɔmɔ ɓapɛmakɨa ga pɔ ɓapananakɨa.

¹² Ɨyɔ, a꞉kɨa ɓanɨ dɔ ɓombi ɓɔta tu ɓiɓio ɓɔndanɛ akɨa tɛa yɔ Asɔɓɨɨ, ambɔ ndʉtʉ ngɨyɔ Klisito yɨkɨa ɓʉkʉʉ.

¹³ Kʉɓanɨ, isu ɓaɓomu ɨhɔ, ta꞊natana aɓio ɨkyɛmʉ mɛngana amati ɔ báya, nɔ nɨmbɨa Mwana ɔ Asɔɓɨɨ. Nɔ kʉdɔ, takɨa ɓʉkʉʉ nɔ tɛka ɓatataɓasie, ɓabʉa ɓangɔ ɓɔ ɨyɔ Klisito.

¹⁴ Kʉɓanɨ, tangɔɓio ɓata lɨgbɨtatɨa, adaa ngɨa ihuhu yɔ mapanʉ kɔta gbaɨ, kɛneni katɨndanganakiso-ɔɔ, mapanʉ kɔ ɓombi ɓɔ pɛtanaka nɔ ɓufili, dɔ isu, tɨmbambanio.

¹⁵ Yakamɛngana, tɔngakeni yaka nɔ ingono amati ɓʉkʉnda, takwanana kɨa ɓʉkʉʉ alɨngbaa liɓomu, amati ɔ Klisito ngɨa a mʉtʉ.

¹⁶ Lɨsɨgɨsɨgɨ di di di lɔ ndʉtʉ, lalɨɓotonoke ɨda mɛngana akɔ angu angɔ. Lɨsɨgɨsɨgɨ lɨja lanungakanakiso ndʉtʉ. Nɔ, ngbinga ngɨa magbaa kɔ ndʉtʉ di di di ka-ɔɔ akɨa tɛa ngɨyeɓo, ndʉtʉ yɔpʉnga tɨa kɨa ɓʉkʉʉ, nɔ nɨsɨnganaka ɨyɔ makwɔngɔ, amati ɔ ɓʉkʉnda.

Yɛta kyɛndaka tanɨ amati ɔ Klisito

¹⁷ Ɨmɨ, nanenu aɓɨa, nɔ, nɨta akɔ ino yɔ Makweso ɓɔ: Inu, nátɨkyɛndakenimʉ ɓata ndʉ ɓombi ngʉɓa ɓangɔbayanakɨamʉ, dɔ ɨɓɔ, ɓakpataka ta itungwio yɛta gbaɨ ngɨyeɓo.

¹⁸ Itungwio ngɨyeɓo ya nɔ umomo. Ɓangɔmʉ ɨɓɔ nɔ ɨda akɔ uɓei ngʉwɔ Asɔɓɨɨ aninjo. Nɔ, ɓangɔmʉ anɨmbɨa ɨkyɛmʉ pɔ mɛngana, dɔ ɓa kʉ nɔ mʉtʉ wɔta ɓʉmʉ.

¹⁹ Ɨɓɔ, ngʉɓɔnanɨ ɓɔ mɨtɨma yɛta ɓʉmʉ, ɓe꞉njo soni ngɨyeɓo tɨa ɓangɨma, nɔ ɓɔkumonio tɨta amati ɔ mʉkyananakɨa wɔta ɓɨɓɨ ɓɔ ɗamʉ. Nɔ ɓɔgoniso kɨa yaka yɛta ɓɨɓɨ iɓomu tɨa nɔ kɛkɛɛ.

²⁰ Yaka ngɨyɛ ɓa꞉nɨpanɨa pɔngɔ akʉʉ ɔ Klisito ya꞉ɓiomʉ ɓanɨ.

²¹ Inu, nɔ꞉ka ɨsaʉ yangɔ, nɔ angbinga ngɨa na꞉mʉbaya-ɔɔ, ɓombi ɓa꞉nɨpanɨa yaka yɔ ingono ngɨyɛ amati ɔ Yeso.

²² Yɔkwananɔ ɓɔ, sɨaneni nɔ mʉkyananakɨa ngʉweno wɔ ɨjɛnɛ, ʉwa, wakɔpana uɓei ngʉweno wɔ ɨjɛnɛ. Mʉkyananakɨa ngʉwɔnanɨ, nɔ mʉjɛɛ wɔngɔ awɛ watʉma mombi akɔ ingwo.

²³ Kʉɓanɨ, sɨeni Mʉtɨma wɔta Tu wɨnacho uɓei ɔ mɨtɨma ngɨyenɔ nɔ itungwio ngɨyeno, yiɓio tɨa yɔ ɨtakɨtakɨ.

²⁴ Nɔ yɛtɔ ɓɔ ɓieni nɔ uɓei wɔ ɨtakɨtakɨ, ʉwa Asɔɓɨɨ a꞉ʉkɨa akɔ isisenio ngɨyangɔ, amati ɔ ɓʉngbingbii nɔ ɓɔ tu ngʉɓa uɓei ngʉwɔ ingono wakɔchweiso.

²⁵ Kʉɓanɨ, inu, sieni pɛtanaka, nɔ mombi nɔ mombi ati eno, isigio pɨ mangɛ ta yaka ngɨyɛ ingono. Dɔ isu ɓaɓomu, ta tɨta lɨsɨgɨsɨgɨ lɔ ndʉtʉ mɛngana.

²⁶ Nɔ́kweni ʉnganga, nátɨkɨamʉ ɓʉɓɨɓɨ. Nɔ ɨpá yatɨkwamʉ nɔ́ɓieni mʉtɨma ta ɓanɨ ɓɔ sangɨsangɨ.

²⁷ Nátɨsɨamʉ Mʉnamasa ɨda.

²⁸ Nɔ mombi wɔ ndiɓo, atiɓomʉ ɓata. Yakamɛngana, ɨkɨa pɨ tɛa nɔ kpekeɓu nɔ lɨkɔndɔ ngɨlangɔ, dɔ, ɨnɨa nɔ ɨkyɛmʉ ngɨyɛ asalɨa nayɔ ajanga.

²⁹ Yaka yɛta ɓɨɓɨ yatɨchwɛamʉ amati ɔ monu ngʉkeno. Yakamɛngana, ya gɔ pɛngɛ iɗo achweiso ta yaka yɛta iɗo, ɨyɛ ya tʉngbʉa ɓombi mʉtɨma, akpatanakɨa nɔ mʉsasa di di di ngɨyeɓo, nɔ yɔɓinjo ɓiga ngʉɓa ɓanʉka kʉ ɨjɨɔ.

³⁰ Nátɨdyisenimʉ Mʉtɨma wɔta Tu ngʉwɔ Asɔɓɨɨ ikoko. Mʉtɨma ngʉwɔnanɨ, wa ndʉ mupita ngʉwa wapana ɓɔ ɓisi mʉngana, Asɔɓɨɨ a꞊nɨbwanakiso sina aɓʉɓɨɓɨ ta ɓwanakisoni.

³¹ Sɨeni aɓio nɔ mʉtɨma wɔ uchongi sɨanɨ, nɔ mʉtɨma wɔta gbi, nɔ ʉnganga uɓomu, mangoi nɔ lɨsɛa, ɨhɔ nɔ migbo yɔ ɓʉɓɨɓɨ iɓomu, yatiɓiomʉ ati eno.

³² Ɓieni akɨana ta iɗo, nɔ nɔ́ɓio kʉ nɔ ɓʉkʉnda ati eno. Nɔ ɓata, ɨpaanakɨeni ɓʉɓɨɓɨ ati eno kʉndʉ Asɔɓɨɨ a꞉nɨpaakɨa jɛnɛ amati ɔ Klisito.