Ɓaɛfɛsɔ 3 - Mʉkpanganɨa nɔ Agɔmɛ ɔ Ɨtakɨtakɨ

Pɔlɔ ɔɓɨakɨɔ ɨsaʉ yɔ ɓʉhɛa

¹ Kʉɓanɨ, ɨmɨ Pɔlɔ, nanɨta Asɔɓɨɨ akʉʉ eno. Ɨmɨ ngɨa, na aboloko dɔ nakyananakɨa Yeso Klisito, akʉʉ eno, inu ngʉɓa nángɔmʉ Ɓayuda.

² Nɔ꞉ka pɔngɔ ta ʉkanɨ, ɨsaʉ yɔ tɛa ngɨyɛ Asɔɓɨɨ a꞉nenjo pɔngɔ ɨmɨ, akʉʉ eno, amati ɔ ɨjɨɔ ngɨangɔ.

³ Asɔɓɨɨ a꞉napana pɔngɔ alɨwɔtɔ ɨngbaa yɔ tɛa yɔ ɓaɗi ngɨangɔ, ngbanga ndʉ ananɨ nɔ꞉pʉnga-ɔɔ nenu atɛndakɨa aɓugbi ɓɔngɔ.

⁴ Tɨa kwananɨ, nɔ́ɓieni apopoko ʉbalʉa ngʉwa, na꞉pemiso ta pemisoni ɓɔ, ɨmɨ, nanɨmbɨa yaka yɔ ɓaɗi ngɨyɛ Klisito.

⁵ Asɔɓɨɨ a꞉panamʉ jɛnɛ ɓombi ngʉɓɔ pɛɨ yaka ngɨyɛnɛnɨ. Yakamɛngana, ɓʉɓʉnʉ a꞉ɨpana ɓatitima ɓɔta tu ngʉɓangɔ, nɔ magbɛ kɔ ta tu ngʉkangɔ, ɨngbaa akɔ Mʉtɨma wɔta Tu.

⁶ Yaka yɔ ɓaɗi yɔngɔ yasugo ɓɔ: Ɨngbaa akɔ Ɨsaʉ yɛta Iɗo, ɓombi ngʉɓa ɓangɔmʉ Ɓayuda ɓadya mʉgyɛndɔ wɔ maɓɨɨ ɨhɔ nɔ ʉɓa, ɓa Ɓayuda. Ɓa tɨa ndʉ ndʉtʉ mɛngana, nɔ ɨɓɔ, ɓɛnɨanɨa kʉ nɔ ɨkyɛmʉ ngɨyɛ, Asɔɓɨɨ a꞉panaka amati ɔ Yeso Klisito.

⁷ Asɔɓɨɨ a꞉napɨa ɨmɨ, aɓɨakɨa Ɨsaʉ yɛta Iɗo, ɨngbaa akɔ apɛpɛ wɔ mʉtɨma wɔ ikoko ngɨangɔ, nɔ, akpatanakɨa nɔ tɛa yɔ angu ngɨangɔ.

⁸ Ɨmɨ ngɨa, na bele nɔgbɛ ati wɔ ɓombi ngʉɓa Asɔɓɨɨ a꞉ɓʉchwa, nɛ꞉nɨanɨa nɔ ɨjɨɔ ngɨyɔ Asɔɓɨɨ, aɓɨakɨa mababa kɔ ɓombi ɨsaʉ yɔ ɨjangɨa yɛta kisoɓa ngɨyɔ Klisito.

⁹ Nɔ, anapɨa tɛa yɔ ɓaɗi aɓʉmba, dɔ ɓombi ɓaɓomu, ɓɨmbɨa ɓɔ yakyananakɨa tanɨ. Asɔɓɨɨ ngɨa a꞉kɨa ɓayaka ɓaɓomu, a꞉naya jɛnɛ yaka ngɨyɛnɛnɨ amati angɔ, anɨngwa ta ɨjɛnɛ.

¹⁰ Tɨa kwananɨ, ɓʉɓʉnʉ ngɨa ɨngbaa akɔ kanisa, a꞉pananiso ɓangama, nɔ ɓombi ɓɔ ʉpanʉ ngʉɓa akʉʉ ɔ ɓisi, nɨmbɨmbɨanaka di di di ngɨangɔ.

¹¹ Ɨyɔ Asɔɓɨɨ, a꞉kɨa yaka ngɨyɛnɛnɨ ɓanɨ, akpatanakɨa nɔ itungwio ngɨangɔ yɔ mago nɔ mago, ɨyɛ ya꞉kyananakɨa amati ɔ Makweso Yeso Klisito.

¹² Amati ɔ nujonokio nɔ Klisito, nɔ kʉ nɔ akʉʉ báya ngɨyɛ ta꞉mʉɓɨnyɨa-ɔɔ, ta ɓwau anɨsɨnganɨa Asɔɓɨɨ ɨngbaa akɔ báya.

¹³ Nɔ ɓata, ɓʉkaɓʉkaɨ ngʉɓa nanɨdya akʉʉ eno, ɓatinitosomʉ báya nɔ mbise. Dɔ, ɓʉkaɓʉkaɨ ngʉɓɔnanɨ, ɓanenu atambanakɨa ɨjangɨa yɔ ʉbɨba.

Ɓʉkʉnda ɓɔta ɓʉja ngʉɓɔ Klisito

¹⁴ Ya akʉʉ ɔ yaka ngɨyɛnɛnɨ, ɨyɛ, nɔgbʉkʉmɨa-ɔɔ nɔ mau apɛɨ ɔ Aba.

¹⁵ Ɨyɔ ngɨa a itindindi yɔ mano kɔ lɨfananja liɓomu ngɨlɛ la ɛsɨ ɔ ɨpá aka, kʉndʉ akʉʉ ɔ ɓisi.

¹⁶ Kʉɓanɨ, nanayɔ anɨta ɓɔ ɨnɨmatɨa angu ɔ Mʉtɨma ngʉwangɔ, dɔ, ɓieni nɔ kɛkɛɛ amati eno, akpatanakɨa nɔ ɨjangɨa yɔ ʉbɨba ngʉwangɔ.

¹⁷ Ɨyɔ Klisito, iwolo amati ɔ mɨtɨma ngɨyeno, ɨngbaa akɔ báya. Nɔ́nɨtɔ ɓɔ ɨmaeni ɓʉmʉ amati ɔ ɓʉkʉnda.

¹⁸ Kʉdɔ, nákwanana anɨmbɨa, inu ɨhɔ nɔ ɓombi ɓɔ Asɔɓɨɨ ɓaɓomu, ɓɔ ɓʉkʉnda ngʉɓɔ Klisito, ɓa ɓʉja ndʉ gbanɨ, nɔ ɓangɔmʉ nɔ mʉyɔ.

¹⁹ Ii, nɛ́꞊mbɨa suo ɓʉkʉnda ngʉɓangɔ ta ɨmbɨanɨ, gʉtʉ ndʉ ɓɔnagaakɔ nɨmbɨmbɨanaka ngɨyɔ ɓombi ɓaɓomu. Kʉdɔ, ná꞊huo nɔ ɨjangɨa iɓomu ngɨyɛ Asɔɓɨɨ.

²⁰ Asɔɓɨɨ akɔkɨa tɛa amati eso nɔ angu mʉja nɔgbɛ. Nɔ tɔmɨteni ɨkyɛmʉ, yɛmɔ akɨa tɨa ɨja anagaaka. Yaɓanɨ, angu ngɨangɔ ata mʉja, ɔnagaakɔ yaka ta iɓomu.

²¹ Asɔɓɨɨ ɨsɨka ʉbɨba amati ɔ Kanisa ngɨangɔ, nɔ, amati ɔ Klisito, aɓangbinga ɓaɓomu, nɔ amago nɔ mago-ɛɛ! Yaɓanɨ.