Ɓakɔlɔsai 4 - Mʉkpanganɨa nɔ Agɔmɛ ɔ Ɨtakɨtakɨ

¹ Inu ɓamakwɔ ɓɔ ɓabaya, nátɨkɨamʉ ɓabaya ngʉɓeno yaka nɔ ɨbaba, bʉkɨeni ta nɔ ɓʉngbingbii, nɔɓieni anɨmbɨa iɗo ɓɔ inu, ná kʉ nɔ Makweno, ɨya akʉʉ ɔ ɓisi.

Pɔlɔ ɔmatɨɔ mapanʉ akʉʉ ɔ nɨta

² Inu, nátɨsɨamʉ nɨta Asɔɓɨɨ nɔ kɛkɛɛ, nɔ, nátɨsɨamʉ tosio Asɔɓɨɨ ʉbɨba.

³ Atɨtɨeni isu Asɔɓɨɨ kʉ ɨtɨanɨ, ambɔ itinjo angbinga ngɨa ɔsisekio aɓɨakɨa Ɨsaʉ ngɨangɔ, nɔ ɓɨakɨa ɓombi yaka yɛta ɨmbangɛ ngɨyɛ Klisito. Dɔ, na iyani aboloko akʉʉ ɔ yaka ngɨyɛnɛnɨ.

⁴ Ɨteni Asɔɓɨɨ ambɔ nɨɓɨakɨa Ɨsaʉ, nɔ, yɔkanɨa ta iɗo, ndʉ aka ya-ɔɔ anɨtanɨa ɓɔ nɨkɨa.

⁵ Inu, ɓieni nɔ mʉkyananakɨa wɔ pemiso yaka apɛɨ wɔ ɓombi ngʉɓa ɓa aɓei wɔ Kanisa, nátɨsɨamʉ angbinga achana ɓʉtʉʉ.

⁶ Yaka ngɨyɛ yaɓio achwɛa amonu ngʉkeno, yiɓio masi maɓomu ta nɔ ɨjɨɔ yɔ Asɔɓɨɨ, nɔ kʉ tɨpɨ, nɔ nɔ́pemiso ɓɔ yɔsisekio tosio mombi yaka tanɨ.

Pɔlɔ ɔmayakɔ maso nɔ ɓɔkuo ɓangɛ

⁷ Tɨta Tikiko akɛ, a꞊ninjekio suo masaʉ ngʉkɔsɛmɨ maɓomu. Ɨyɔ a, nduku eso wɔ ɓʉkʉnda, ɨya takɔkɨa tɛa naɓɔ, nɔ, a mombi ata ngbingbii amati ɔ tɛa yɔ Makwɔɓɨɨ.

⁸ Ɨmɨ, nɔmʉtʉmɔ inani ná꞊ɛɛ, dɔ, ininjo masaʉ ngʉkeso, nɔ nenu, asungo mʉtɨma.

⁹ Nɔɓʉtʉmɔ ɨɓɔ nɔ atɨ mandɛnɔ Onisimo, ɨya, akʉ nduku eso wɔ ɓʉkʉnda, nɔ kʉ mombi ata ngbingbii. Ɨɓɔ akɛ, ɓa꞊ninjo suo masaʉ maɓomu ngʉka ka iyani ta꞊ɛɛ.

¹⁰ Alɨsɨtalɨkɔ ngɨa tanayɔ iyani aboloko, ɔnɨɓokuo kʉ ɓokuoni. Nɔ, Malɨkɔ ngɨa mwana ɔ manye wɔ Balanaba ɔnɨɓokuo kʉ ɓokuoni. (Ɨyɔ, ɨyakɛ, ɓa꞉ninjo pɔngɔ ʉpanʉ akʉʉ angɔ, ɓɔ ɛkeni andɛnɔ, mʉtɛtɨeni iɗo.)

¹¹ Nɔ, Yeso ngɨa aino kʉ ɓɔ Yusuto, ɔnɨɓokuo kʉ ɓokuoni. Amati ɔ Ɓayuda ngʉɓa ɓa꞉baya, ta ɓaatʉ ngʉɓɔnanɨ aɓɛ, ɓakɨa tɛa ɨhɔ nɛmɨ, tɛa ngɨyɔ Ɓʉngama ngʉɓɔ Asɔɓɨɨ. Nɔ, ɓɔɓio nɛmɨ asungo mʉtɨma nɔgbɛ.

¹² Mʉndɛnɔ ngɨa a báya wɔ Yeso Klisito, ino ɓɔ Ɛpafala, ɔnɨɓokuo kʉ ɓokuoni. Ɨyɔ, anɨta Asɔɓɨɨ nɔ kɛkɛɛ akʉʉ eno, iɗo ambɔ ɓieni ɓɛmaɛ ta ɓʉmʉ amati ɔ báya nɔ nɔ́ɓio kʉ ɓasisekie amati ɔ kyananakɨa ɓʉkʉnda ngʉɓɔ Asɔɓɨɨ.

¹³ Ɨmɨ, nanayɔ achwɛa ɓʉdɛmʉ ɨɗo, ɨyɔ agiso angu nɔgbɛ akʉʉ eno, nɔ, akʉʉ ɔ ɓangɛ ngʉɓa ɓa anɔ Laɔdɨkɨa, nɔ ʉɓa ɓa anɔ Hiyelapoli.

¹⁴ Luka, awai eso wɔ ɓʉkʉnda, ɨɓɔ nɔ Dɛma, ɓɔnɨɓokuo kʉ ɓokuoni.

¹⁵ Tɔɓokuo kʉɔ ɓanduku ɓeso ngʉɓa ɓanɔ Laɔdɨkɨa, sɔkɔmʉ nɔ́ɓʉsaa Nɨmɨfa nɔ kanisa ngɨa ajonokio andɔngɔ ambɛnɨ.

¹⁶ Ndʉ ná꞊pipo popoko ʉbalʉa ngʉwa ɓɔ gba inani andɛnɔ, kieni angu muɓomu ɓɔ ɓɨʉpopoko kʉɔ akanisa ngɨa ɔ Laɔdɨkɨa. Nɔ inu, popokeni kʉɔ ʉbalʉa ngʉwɔ kanisa ngɨananɨ.

¹⁷ Mʉɓɨeni Alɨkɨpɔ ɓɔ atɨkɨamʉ tɛa ngɨyɛ Makwɔɓɨi aminjo nɔ majɛjɛ, yakamɛngana, ɨɨkɨa iɗo nɔgbɛ.

¹⁸ Ɨmɨ Pɔlɔ akɛ, nɔ꞉nɨtɛndakɨɔ ʉbalʉa ngʉa nɔ lɨkɔndɔ ngɨlɛsɛmɨ ɓɔ kpɛ. Nɔ꞉nɨtɛndakɨɔ nenu aɓokuo, nɔ nátɨɓʉsaamʉ ɓɔ na-sɨ ta aboloko. Ɨjɨɔ ngɨyɛ Asɔɓɨɨ yiɓio ɨhɔ nenu-ɛ.