Ɓakɔlɔsai 3 - Mʉkpanganɨa nɔ Agɔmɛ ɔ Ɨtakɨtakɨ

¹ Dɔ inu, ná꞉jʉkana akɔ ingwo jʉkananɨ ɨhɔ nɔ atɨ Klisito, hateni gɔ tii yaka ngɨyɛ akʉʉ ɔ ɓisi, aki ɨyɔ, Klisito a-ɛɛ ɓawele aɨkɔndɔ yɔ guɔngɔ ngɨyɛ Asɔɓɨɨ.

² Nápɨeni itungwio ngɨyeno akʉʉ ɔ ɓayaka ngʉɓa akʉʉ ɔ ɓisi, sɔkɔmʉ aɓayaka ɓɔ dɔdɔ.

³ Dɔ inu, na꞉wo woni nɔ uɓei ngʉweno wa tɨa ʉnayanɨɛ, ɨhɔ nɔ Klisito amati ɔ Asɔɓɨɨ.

⁴ Angbinga ngɨa Klisito ngɨa a uɓei ngʉweno ingainga ɛ꞊nɨanɨa sina-ɔɔ, kʉdɔ inu, nɛ́꞊nɨanɨa tɨa kʉ ɨhɔ nayɔ amati ɔ ʉbɨba.

Uɓei wɔ ɨjɛnɛ nɔ ʉwɔ ɨtakɨtakɨ

⁵ Kʉɓanɨ, ʉweni mʉsasa wɔ dɔdɔ ngʉwa wa amati eno ta nɨwa. Mʉsasa ngʉwɔnanɨ, wa ndʉ: kɨa ɓuso nɔ yaka yɛta mʉsʉgʉ iɓomu, mʉsasa wɔ likyɛmʉ, mʉsasa wɔ yaka yɛta ɓɨɓɨ, mʉgbʉmʉ, ɨyɛ ya ngbanga nɔ gbʉkʉmakɨa ɓamʉngʉ bɔ majɛjɛ.

⁶ Ɨkananja yɔ mɨkyananakɨa ngɨyɛnɛnɨ akɛ, yaɗuɗuo ʉnganga wɔ Asɔɓɨɨ akʉʉ ɔ ɓombi ngʉɓa ɓa mʉtʉ ɓʉmʉ.

⁷ Jɛnɛ pɛɨ, ɨyɛ ná꞉ɓio-ɔɔ amati ɔ ɓʉɓɨɓɨ, ná꞉kpataka kʉ ɨkananja yɔ mʉkyananakɨa ngʉwɔnanɨ.

⁸ Yakamɛngana, tɨa ɨtakɨtakɨ ngɨyɛ, inu, sɨaneni nɔ mʉkyananakɨa ngʉwɔnanɨ tɨta uɓomu: ʉnganga, ɓʉkaɓʉkaɨ, sɨkanakɨa, lɨsɛa nɔ singekio ɓombi mʉjɛɛ, yatɨchwɛamʉ ɓata amonu keno.

⁹ Mʉjɛɛ watɨnɨanɨamʉ ati eno, dɔ, mombi ngɨa ɨjɛnɛ, ná꞉mʉsɨa sɨanɨ, nɔ, mʉkyananakɨa ngʉwangɔ kʉtaa.

¹⁰ Kʉdɔ, ná꞉pɛnɨa tɨa mombi wɔ ɨtakɨtakɨ. Nɔ mombi wɔ ɨtakɨtakɨ ngɨananɨ, anɨsɨnganaka nenu anecho angbinga muɓomu, akpatanakɨa nɔ isisenio yɔ Asɔɓɨɨ ngɨa a꞉mʉkɨa. Dɔ, mupemiseni iɗo.

¹¹ Kʉɓanɨ, Mugiliki wangɔmʉ ɓata, ga pɔ Muyuda, ga pɔ mombi ngɨa angɔmʉ Muyuda, ga pɔ mombi ngɨa ɓa꞉mukio ɨgʉnɨ, nɔ ɨya, ɓa꞉mukiomʉ ɨgʉnɨ, ga pɔ musenji, ga pɔ mambise, ga pɔ baya, ga pɔ ɨya angɔmʉ baya. Yakamɛngana, Klisito a꞉mɔmaka yaka ngɨyɛnɛnɨ ta iɓomu, nɔ a, amati ɔ yaka ngɨyɛnɛnɨ kʉ iɓomu.

¹² Inu, ná ɓombi ngʉɓa Asɔɓɨɨ a꞉nɨkʉnda, nɔ ʉɓa, a꞉nɨchwa ndʉ ɓombi ɓangɔ ingainga. Kʉɓanɨ, ɓieni nɔ mʉtɨma wɔ ikoko, nɔ mʉtɨma wɔta uɗo, nɔ mʉtɨma wɔ nudisoniso, nɔ mʉtɨma wɔ majɨɔ, nɔ mʉtɨma wɔta ʉta.

¹³ Ndʉ mombi ati eno aɓio nɔ yaka nɔ mangɛ, yanɨta ta anʉkana nɔ kʉ nɨpaanakɨa ati eno, ngbanga kʉndʉ Asɔɓɨɨ a꞉nɨpaakɨa jɛnɛ inu ɓʉɓɨɓɨ.

¹⁴ Akʉʉ ɔ yaka ngɨyɛnɛnɨ iɓomu, ɓieni nɔ ɓʉkʉnda ati eno, dɔ ɓʉkʉnda aɓɛ, ɓanɨkɨa aɓio ɨkyɛmʉ mɛngana.

¹⁵ Majɨɔ ngʉkɔ Klisito kiɓio amati eno, dɔ Asɔɓɨɨ a꞉nisoko aɓio ɨkyɛmʉ mɛngana amati ɔ majɨɔ ngʉkɔnanɨ. Nɔ, mutosieni Asɔɓɨɨ ʉbɨba.

¹⁶ Ɨsaʉ yɔ Klisito yiɓio amati eno, nɔ ɨjangɨa yɔngɔ ta iɓomu. Mombi nɔ mombi ati eno, iɓio ta apananakɨa ɓangɛ, nɔ kʉnɔ gʉganaka nɔ mʉtɨma wɔ pemiso yaka. Mutoisieni Asɔɓɨɨ ʉbɨba nayɔ asʉswanakɨa nɔ mʉtɨma ngʉweno ta uɓomu, yiɓio mambɔ nɔ lɨta kʉ nɔ ɓagele, ɨngbaa akɔ Mʉtɨma wɔta Tu.

¹⁷ Yaka iɓomu ngɨyɛ nákɨa, ga pɔ ɨyɛ náchweiso amonu, kieni ta aino yɔ Makwɔɓɨɨ Yeso, ingainga akɔtosio Asɔɓɨɨ Aba ʉbɨba amati angɔ.

¹⁸ Inu ɓoi, ɓieni asɨ ɔ ʉpanʉ wɔ ɓaɓaʉ ɓeno, ndʉ aka yɔsisekio-ɔɔ akɔ Makwɔɓɨɨ.

¹⁹ Inu ɓague, kʉndeni ɓoi ɓeno, nɔ, nátɨɓiomʉ naɓɔ anyakanakɨa.

²⁰ Inu ɓana, kumeni ɓatɔ ɓeno, nɔ ɓanʉ ɓeno akɔ lɨngbaa lɔ ɓayaka ta liɓomu, dɔ, Makwɔɓɨɨ akʉnda ɓanɨ.

²¹ Inu ɓaba, nátɨdʉakamʉ ɓana ɓeno, dɔ, nátɨɓʉkwisomʉ ndʉtʉ ɓʉgʉtagʉta.

²² Inu ɓabaya, kumeni ɓakwɔɓeno akɔ lɨngbaa lɔ yaka ta liɓomu, ɛsɨ ɨpá aka. Nátɨɓʉkɨamʉ yaka iɗo ta ambɔ ɓa tinene, ndʉ niɓio akɔhata kʉndaniso nɔ ɓombi. Yakamɛngana, ɓukumeni mʉtɨma ta mʉngana, dɔ akɨa ɓanɨ, nákumo Makwɔɓɨɨ.

²³ Ndʉ náɓio akɨa tɛa, kɨeni ta nɔ mʉtɨma wɔta uɗo, ndʉ nákɨa akɔ Makwɔɓɨɨ, sɔkɔmʉ ndʉ niɓio akyananakɨa mombi ɔ dɔdɔ.

²⁴ Ɨmbɨeni iɗo ɓɔ, ná꞊dya mʉgyɛndɔ wɔ maɓɨɨ ngʉwa Makwɔɓɨɨ a꞊ninjo sina ndʉ mʉkaya wɔngɔ. Dɔ Makwɔɓɨɨ ingainga ngɨa, nánayɔ akyananakɨa a Klisito.

²⁵ Ɨna dɔ, mombi ngɨa akɨa ɓʉɓɨɓɨ, a꞊dya kʉ mʉkaya wɔ mʉkyananakɨa ngʉwɔnanɨ wangɔ, dɔ, Asɔɓɨɨ angɔnapiokomʉ ɨyɔ ɓombi nɔ mababa.