Ɓakɔlɔsai 2 - Mʉkpanganɨa nɔ Agɔmɛ ɔ Ɨtakɨtakɨ

¹ Nakʉnda ɓɔ ɨmbɨeni iɗo ɓɔ ɨmɨ, nakɔkɨa tɛa nɔ kɛkɛɛ akʉʉ eno, nɔ akʉʉ ɔ ɓombi ngʉɓa ɓa꞉baya anɔ Laɔdɨkɨa, nɔ akɔ ɓombi ɓaɓomu ngʉɓa, ɓangɔnɛnamʉ.

² Nakʉnda ɓɔ ɓɨsɨka iguegue, nɔ, ɓiɓio ɨkyɛmʉ mɛngana amati ɔ ɓʉkʉnda, nɔ, ɓio nɔ nɨmbɨmbɨanaka ngɨyɛ ingono. Kʉdɔ, ɓapemiso yaka yɔ ɓaɗi ngɨyɛ Asɔɓɨɨ. Ɨsɨ yɔngɔ ɓɔ nɨmbɨa Klisito ingainga,

³ dɔ, ɨjangɨa iɓomu ngɨyɔ nɨmbɨmbɨanaka di di di, ya ɨnayanɨɛ amati ɔ Klisito.

⁴ Nanenu anʉngɨa yaka ngɨyɛ dɔ, mombi pɔ mʉngana atɨnɨpɛtakamʉ, nɔ ɓatɔdʉ ɓɔta manjanja, ngʉɓa ɓeneni ɓakwisiso mombi.

⁵ Gʉtʉ ndʉ na ɗu nenu andʉtʉ, yakamɛngana, ta ta ɨhɔ amʉtɨma. Nɔ ɨmɨ, nanɨkwa ɨgyagya anɨna mʉkyɛndakɨa wɔta ngbingbii ngʉwa ná amati ɔngɔ, nɔ, nɨmaa ɓʉmʉ amati ɔ báya Klisito.

Yeso nangana akɛ enjo uɓei

⁶ Ɛɛ, dɔ inu, nɔ́bayɔ Klisito ndʉ Makweno, ɓieni naɓo tɨta ɨkyɛmʉ mɛngana.

⁷ Akɔkpatanakɨa nɔ ʉpanʉ ngʉwa ɓa꞉nɨpanɨa pɔngɔ, ɓieni nɔ mii amati angɔ, nɔ, ɨmaiseni uɓei ngʉweno akʉʉ angɔ. Ɨmaeni ɓumu amati ɔ báya, nɔ, tosieni Asɔɓɨɨ ʉbɨba.

⁸ Inu-a, kanganieni iɗo, mombi atɨnɨkwisisomʉ nɔ ɓatɔdʉ ɓɔ mʉjɛɛ ngʉɓɔ gbali wɔ ɓombi, nɔ mɨtɨma yɔ madu ngɨyɛ yakyɛndakiso dɔdɔ. Yakamɛngana, madu ngʉkɔnanɨ, kangɔmʉ nɔ ʉpanʉ akʉʉ ɔ Klisito,

⁹ Dɔ, Asɔɓɨɨ a꞉wolo ɨyɔ ta iti amati ɔ ndʉtʉ yɔ ʉbɨba ngɨyɛ Klisito.

¹⁰ Nɔ inu, nɛ́꞉nɨanɨa nɔ ɓuɗo ɓuɓomu akɔɓio ɨkyɛmʉ mɛngana nayɔ. Ɨyɔ akɛ, a Ngama anagaaka ɓʉngama ɓuɓomu, nɔ mɨtɨma yɔ madu iɓomu.

¹¹ Nɔ ɓata, ya akʉʉ ɔ ɓio ɨkyɛmʉ mɛngana nayɔ, ɨyɛ, ná꞉kiiso jɛnɛ-ɔɔ ɨgʉnɨ naɓɔ, sɔkɔmʉ dɔ ɨgʉnɨ yɔ ɓaɓombi. Yakamɛngana, ya ɨgʉnɨ ngɨyɛ yanɨngwa atɨ Klisito, nɔ ɨyɛ ya꞉tɨbwanakiso andʉtʉ ngɨyeso yɔ ɓʉɓɨɓɨ.

¹² Dɔ angbinga ngɨa, ɓa꞉nɨɓatisa pɔngɔ-ɔɔ, ya꞉ɓio apana ɓɔ ɓa꞉nɨhʉna nɔ atɨ Klisito, nɔ, nɔ́꞉chwɛa aɓʉnjaʉ kʉ ɨhɔ nayɔ. Dɔ, ná꞉bayanakɨa akɔ angu ɔ Asɔɓɨɨ ngɨa a꞉mʉjʉkaniso ati ɔ mɨnda.

¹³ Pɛɨ ngɨananɨ, amati ɔ uɓei wɔ mʉtɨma, ná꞉ɓio ndʉ mɨnda akʉʉ ɔ ɓʉɓɨɓɨ ngʉɓeno, nɔ, ná꞉ɓio ɓombi ngʉɓa ɓangɔkiisomʉ ɨgʉnɨ. Yakamɛngana, ɨtakɨtakɨ ngɨyɛ, Asɔɓɨɨ ɔ꞉ninjo tɨa uɓei ɨhɔ nɔ atɨ Klisito, nɔ ɨyɔ, a꞉tɨpaakɨa ɓʉɓɨɓɨ ngʉɓeso isu ɓaɓomu.

¹⁴ Nɔ ɨyɔ e꞉bo mʉkɔmbʉ ngʉweso nɔ mabalʉa kɔngɔ ngʉka ɓa꞉tɨnapɨa-ɔɔ nɔ mʉkɔmbʉ kʉtaa. A꞉kɨboko ɨyɛ ɓa꞉mʉɓakaka-ɔɔ akʉʉ ɔ mʉsalaba.

¹⁵ Kʉdɔ, Asɔɓɨɨ a꞉pipo angu ngɨyɔ ɔ ɓaginda, nɔ iyɔ, ɓombi ɓɔ ʉpanʉ, nɔ, ɔ꞉ɓʉpananiso aɓʉmba nɔ naɓo akyɛndakiso ndʉ ɓombi ɓɔ boloko, akɔ ɨgyagya yɔ nagaaka ngɨyɔ Mwana angɔ.

¹⁶ Tɨa kwananɨ, mombi pɔ mʉngana atɨnɨnapɨamʉ nɔ mʉkɔmbʉ, akɔ yaka yɔ ɨkyɛmʉ ngɨyɛ nánɨdya pɔ ɨyɛ nánɨmwa, ga pɔ akʉʉ ɔ ɓisi ɓɔ ʉmbɔ mʉngana ɓɔ, ndʉ ʉmbɔ wɔ uwi akɔchwɛa, ga pɔ, akɔ ɓisi ɓɔ nuhomuo.

¹⁷ Ɨyɛnɛnɨ iɓomu, ya ta ndʉ isisenio yɔ yaka ngɨyɛ ya sina anɨka, yakamɛngana, ingono yɔ yaka, ya ta Klisito ingainga.

¹⁸ Nátɨsɨamʉ mombi pɔ mʉngana nenu ahɨnɨa ɨkyɛmʉ yɔ dada ngɨyɛ nánayɔ. Nɔgbɛ, ɓombi ngʉɓa ɓɛnɨnɨa aɓei ndʉ ɓombi ɓɔ nudisoniso, nɔ ʉɓa, ɓabibiso ɓamalaika, dɔ ɨbɔ, ɓanapɨana mʉtɨma nɔgbɛ akʉʉ ɔ yaka ngɨyɛ ɓanayɔ anɨna ndʉ lɨwɔtɔ. Ɓakyɔsɨkana ndʉ ɓombi ɓɔ dada nɔgbɛ, akpatanakɨa nɔ itungwio ngɨyeɓo, ndʉ ɓombi.

¹⁹ Ɨkananja yɔ ɓombi ngʉɓɔnanɨ, ɓangɔɓotonomʉ nɔ Klisito ngɨa a ndʉ mʉtʉ wɔ ndʉtʉ. Ndʉtʉ iɓomu, yadyakaka iɗo ta akɔ angu ɔ Klisito. Lɨsɨgɨsɨgɨ lɔ ndʉtʉ, nɔ nʉnganganakɨa yɔngɔ lalɨɗetenekie ɨda mɛngana, dɔ, lɨkɨa ɓʉkʉʉ ngbanga nɔ ɓʉkʉnda ɓɔ Asɔɓɨɨ.

Niwo nɔ jʉkana aingwo ɨhɔ nɔ Klisito

²⁰ Inu, ná꞉wo nɔ atɨ Klisito nɔ nángɔmʉ ɓata aɨsɨ ʉpanʉ wɔ mɨtɨma yɔ madu yɔ dɔdɔ. Yɔkwɔ tɨa tanɨ, ɨyɛ ná ɓata-ɔɔ akyɛndaka ngbanga kʉ nɔ ɓombi ɓɔ dɔdɔ ngɨa. Yaka ngɨyɛnɛnɨ yasugo ɓɔ:

²¹ «Watɨsɨkamʉ ɨkyɛmʉ ngɨyɛ», «Watɨkanamʉ ɨkyɛmʉ ngɨyɛ», «Watɨɓotomʉ ɨkyɛmʉ ngɨyɛ».

²² Ya ɨkananja yɔ yaka ngɨyɛ wɔɨɓotokeni, yangɔgbalɨamʉ nɔ chana. Dɔ, ɨyɛnɛnɨ ya ta ʉpanʉ, nɔ mapanʉ kɔ ɓombi ɓɔ dɔdɔ.

²³ Ya ɓanɨ, yaka ngɨyɛnɛnɨ, yɛnɨa ndʉ yaka yɔ mʉtɨma wɔ pemiso yaka, yangwana ingainga ta nɔ ɨtandɛ yɔ ɓombi, nɔ, nudisoniso nɔ ɓio nɔ kɛkɛɛ ngɨa wɔ kyananaka ndʉtʉ, ɓɔ ngbɛmʉngbɛmʉ. Yakamɛngana, ɨkyɛmʉ ngɨyɛ yanangyo mʉsasa wɔ ndʉtʉ yangɔmʉ ananɨ pɔ mɛngana.