Ɓafilipo 4 - Mʉkpanganɨa nɔ Agɔmɛ ɔ Ɨtakɨtakɨ

Mapanʉ

¹ Kʉɓanɨ, inu ɓanduku ɓɔ ɓʉkʉnda, nanɔ mʉsasa nɔgbɛ ɓɔ tɨnana gɔ pɛngɛ-sɨ ɓata nenu ta ɨnananɨ. Dɔ ɨmɨ, nanɔ ɨgyagya kʉ nɔ ɨmbʉka akʉʉ eno. Kʉdɔ ɨmɨ, nɔnɨtɔ inu ɓanduku ɓɔ, ɨmaeni ɓʉmʉ amati ɔ Makwɔɓɨɨ.

² Ʉwɛ Ɛwɔdɨa, nɔ ʉwɛ Sɨnɨtɨkɛ, ɨmɨ nɔnikikelekio inu, anʉkana ta iɗo amati ɔ Makwɔɓɨɨ.

³ Ii, kʉ nɔ ʉwɛ ngɨa wakɔkɨa tɛa ɨhɔ nɛmɨ amati ɔ ɓungbingbii, ɨmɨ, nɔnakikelekio akɔsalɨa ɓiga ɓeɓoi ngʉɓɔnanɨ ɓanɨwa ɗite ɨhɔ nɛmɨ akɔ yaka yɔ Ɨsaʉ yɛta Iɗo, ɨhɔ nɔ atɨ Kɛlɛmatɨ nɔ ɓawai ngʉɓeso ɓɔmɔ ɓɔ tɛa, ʉɓa, mano keɓo ɓa꞉kɔtɛndakɨa amati ɔ ɨtaɓu yɔ uɓei.

⁴ Inu, kweni ɨgyagya masi maɓomu ta amati ɔ Makwɔɓɨɨ. Nɔ nɔnɨsigio ɓata, kweni ɨgyagya!

⁵ Iɗo iɗo ngɨyeno yɨmbɨanɨa nɔ ɓombi ɓaɓomu. Makwɔɓɨɨ a tɨa tinene atɔa.

⁶ Nátɨɓiomʉ nɔ ɓatumo aɨngbaa yɔ yaka pɔ mɛngana. Yakamɛngana, akɔ yaka ta iɓomu, ɨteni Asɔɓɨɨ, amati ɔ yaka iɓomu ngɨyɛ nanɔ mʉsasa wɔngɔ, nɔ nayɔ akikelekio, tɨa kʉ nɔ nayɔ atosio ʉbɨba.

⁷ Tɨa kwananɨ, majɨɔ kɔ Asɔɓɨɨ, ʉka kɔnagaakɔ nɨmbɨmbanaka kapɛmakɨa mɨtɨma ngɨyeno nɔ itungwio iɓomu ngɨyeno amati ɔ Yeso Klisito.

⁸ Inu ɓanduku, yaka yɔ mupipio ya ɓɔ: nápɨeni itungwio ngɨyeno akʉʉ ɔ yaka iɓomu ngɨyɛ ingono, ɨyɛ yenjo ʉbɨba, nɔ ɨyɛ, ya ngbingbii, nɔ ɨyɛ, ya iɗo, nɔ ɨyɛ yanɨkataa, nɔ ɨyɛ, yɛtɔ ɓɔ ɓɨɨɓɨnyɨa, nɔ yaka ngɨyɛ iɗo nɔgbɛ, nɔ ɨyɛ yɔsisekio nɔ ʉbɨba.

⁹ Kyananakɨeni yaka iɓomu ngɨyɛ ɓa꞉nɨpanɨa, ɨyɛ nɛ꞉nɨanɨa pɔngɔ nayɔ alɨkɔndɔ lɨsɛmɨ, nɔ iɓomu ngɨyɛ nɔ́꞉ka pɔngɔ nɔ nɨna iyani andamɨ. Tɨa kwananɨ Asɔɓɨɨ ngɨa wɔ majɨɔ a꞊ɓio-ɔɔ ɨhɔ nenu.

Pɔlɔ ɔtosio Ɓafilipo ʉbɨba akʉʉ ɔ apɛpɛ ngɨyeɓo

¹⁰ Ɨmɨ na꞉kwa pɛ ɨgyagya nɔgbɛ amati ɔ Makwɔɓɨɨ, akɔnɨna ɓɔ nɔ́tunguo ɓata nɛmɨ akɔsalɨa. Nangɔmʉ asugo ɓɔ nánaɓʉsaa pɔngɔ ɓʉsaanɨ, yakamɛngana, ya ta dɔ nángɔkɨnɨa suo nɔ ngbinga ngɨa nánapananiso-ɔɔ ɓɔ nákɨa ta nɛmɨ atunguo.

¹¹ Nangɔmʉ akɔsugo ɓanɨ dɔ na amati ɔ angɨɔ, dɔ ɨmɨ, nɛmbɨana tɨa ɨmbɨananɨ anɨkwa ɨgyagya ta nɔ ɨkyɛmʉ ngɨyɛ naɓio nayɔ.

¹² Ɨmɨ, nɛmbɨana nɔ uɓei wɔ ɓʉyajanga kʉndʉ ʉwɔ ɓio nɔ lɨkyɛmʉ lɨja. Nɔ ɨmɨ, nɛmbɨana tɨa imbɨananɨ anɨkwa ɨgyagya ngbinga muɓomu, nɔ akɔ lɨngbaa lɔ uɓei kʉ liɓomu: niɓio nɔ idyo ɨja kʉndʉ amati ɔ taa, niɓio amati ɔ lɨkyɛmʉ lɨja kʉndʉ amati ɔ angɨɔ.

¹³ Ɨmɨ, nakwanana akɨa ɓayaka ngʉɓɔnanɨ ɓaɓomu, ɨngbaa akɔ Klisito ngɨa anenjo angu.

¹⁴ Ɨna dɔ, inu, ná꞉kɨa pɔngɔ iɗo, anɨdya ikoko ɨhɔ nɛmɨ.

¹⁵ Inu Ɓafilipo ingainga, nánɨmbɨa iɗo ɓɔ, akɔ angbinga ngɨa na꞉ngwa pɔngɔ-ɔɔ aihoi yɔ Makedonia, dɔ nɨpʉnga tɛa yɔ Ɨsaʉ yɛta Iɗo, ta kanisa ngɨyeno nangana akɛ a꞉ɓio ɨhɔ nɛmɨ ɨngbaa akɔninjekenekio.

¹⁶ Kʉndʉ aka na꞉ɓɨɔ pɔngɔ-ɔɔ anɔ Tɛsalɔnɨka, ná꞉ɓinatʉmanakɨa pɔngɔ ɓakiɓio machaa maja, nɛmɨ akɔsalɨa amati ɔ banangɨɔ.

¹⁷ Nátɨnenimʉ ɓɔ nakɔhata anɨnɨanɨa nɔ apɛpɛ alɨkɔndɔ leno, yakamɛngana, nakʉnda ɓɔ ɓieni ɓombi ɓɔ dada amesu kɔ Asɔɓɨɨ.

¹⁸ Na tɨa nɔ ɨkyɛmʉ iɓomu ngɨyɛ nɔkwananɔ pɛngɛ aɓio nayɔ, nɔ ɓata tɨa kʉ lɨja anagaaka. Nɔgbɛ tɨa akɔ apɛpɛ ngɨa ná꞉natʉmɨa pɔngɔ alɨkɔndɔ lɔ Epafolodito. Apɛpɛ ngɨyeno a ndʉ mutebii wɔta umvo tɨpɨ nɔ ʉwa wɛkataa Asɔɓɨɨ nɔ ʉwa wabayanɨa amesu kangɔ.

¹⁹ Asɔɓɨɨ ngɨasɛmɨ anɔ ʉbɨba nɔ ikesi iɓomu yangɔ, ɨyɔ akɛ a꞊ninjo ɨkyɛmʉ iɓomu ngɨyɛ ná꞊ɓio nɔ taa yɔngɔ, ɨngbaa akɔ Yeso Klisito.

²⁰ Ʉbɨba wiɓio atɨ Asɔɓɨɨ Aba akɔ mago nɔ mago-ɛ! Yaɓanɨ.

Ɓɔkuo ngɨyɔ mupipio

²¹ Nɔɓokuo ɓombi ɓɔ Asɔɓɨɨ ɓaɓomu ngʉɓɔ Kanisa akɔ ino yɔ Yeso Klisito. Nɔ ɓanduku ngʉɓa ta ɨhɔ naɓɔ aka, ɓɔnɨɓokuo kʉ ɓokuoni.

²² Ɓombi ɓɔ Asɔɓɨɨ ɓaɓomu, nɔ nɔgbɛ ʉɓa ɓa akɔ ɨmbaa yɔ ngama Kaɨsalɨ ngɨa ɔ Ɓalɔma aka, ɓɔnɨɓokuo kʉ ɓokuoni.

²³ Ɨjɨɔ ngɨyɔ Makweso Yeso Klisito yiɓio ɨhɔ nenu amɨtɨma ɓaɓomu-ɛ.