Ɓafilipo 1 - Mʉkpanganɨa nɔ Agɔmɛ ɔ Ɨtakɨtakɨ

Pɔlɔ ɔɓokuo Ɓafilipo

¹ Ɨmɨ Pɔlɔ nɔ Tɨmɔtɛɔ, isu ɓabaya ɓɔ Yeso Klisito, isu akɛ tɔnɨtʉmɨɔ ʉbalʉa ngʉwa akɔ inu ɓombi ɓɔ Asɔɓɨɨ ngʉɓa ná ɨkyɛmʉ mɛngana nɔ Yeso Klisito amati ɔ gʉlʉ ɔ Filipo. Tɔnɨtʉmɨɔ inu ɨhɔ kʉ nɔ ɓatataɓasie ɓɔ Kanisa nɔ ɓadɨakɛlɛ.

² Asɔɓɨɨ Aba ngɨyeso, ɨhɔ nɔ Makweso Yeso Klisito, ɓɨnutiyo ɨjɨɔ nɔ majɨɔ-ɛ.

Pɔlɔ anɨtɨa ɓaklisito ngʉɓa anɔ Filipo

³ Ɨmɨ nakɨtosio Asɔɓɨɨ ngɨasɛmɨ ʉbɨba, angbinga ta muɓomu ngɨa nakɨnitunguo-ɔɔ.

⁴ Angbinga muɓomu ngɨa nakɨa-ɔɔ nenu anɨtɨa inu ɓaɓomu, ɨmɨ nakɨta Asɔɓɨɨ nɔ ɨgyagya.

⁵ Dɔ inu ná꞉nasalɨa akɔɓɨakɨa Ɨsaʉ yɛta Iɗo, anɨngwa ta akɔ ɓisi ngʉɓɔnanɨ ɓɔ pɛɨ nɔ akɔɓɔya kʉndʉ ɓʉɓʉnʉ ngɨa.

⁶ Ɨmɨ nanɨmbɨa iɗo ɓɔ Asɔɓɨɨ ngɨa a꞉pʉnga tɛa yɛta iɗo ngɨyɛ ati eno, a꞊ɨsɨnganakiso nɔ ɔ꞊ɨndaniso aɓɔya ta akɔ ɓisi ngʉɓa Yeso Klisito a꞊tɔa sina-ɔɔ.

⁷ Ii, akɔ ɨmɨ ya iɗo ɓɔ niɓio nɔ ɨkananja yɔ itungwio ngɨyɛnɛnɨ akʉʉ ɔ inu ɓaɓomu, dɔ nanɨtunguo angbinga ta muɓomu. Inu ɓaɓomu ná ta ɨhɔ nɛmɨ amati ɔ ɨjɨɔ ngɨyɛnɛnɨ gʉtʉ ta ndʉ aka na-ɔɔ a boloko aka, kʉndʉ angbinga ngɨa na꞉ɓiɔ pɔngɔ-ɔɔ muɓoonokie a ɓɛndaniso ɗite ngɨlɔ Ɨsaʉ yɛta Iɗo nɔ nayɔ animaiso ɓʉmʉ.

⁸ Asɔɓɨɨ akɛ a dɛmʉ asɛmɨ asugo ɓɔ, ɨmɨ nanɨkʉnda inu ta ɓaɓomu mʉtɨma ta mʉngana, kʉndʉ Yeso Klisito a꞉nɨkʉnda.

⁹ Nɔ ɨkyɛmʉ ngɨyɛ nakɔnɨta Asɔɓɨɨ ya ɓɔ, ɓʉkʉnda ngʉɓeno, ɓɨsɨnganaka nɔpɛɨ amati ɔ nɨmbɨmbɨanaka ngɨyɛ ingono nɔ pemikiso yaka iɗo,

¹⁰ ambɔ pemiseni yaka ngɨyɔ dada nɔgbɛ. Tɨa kʉɓanɨ, ná꞊ɓio ɓajaɓanakɨɛ, sɔkɔmʉ nɔ ɨɗa akɔ ɓisi ngʉɓa Klisito a꞊tɔa sina-ɔɔ.

¹¹ Ɨngbaa akɔ ɨkɔɔ nɔ Yeso Klisito, uɓei ngʉweno wa꞊ɓio uhue nɔ masɔɔ kɔ ɓungbingbii, aninjiso Asɔɓɨɨ ʉbɨba nɔ ɨbɨba.

Ɓʉfɔ Pɔlɔ nɔ Ɨsaʉ yɔkɨa ɓakʉʉ

¹² Inu ɓanduku, nakʉnda ɓɔ ɨmbɨyeni ɨmbɨanɨ ɓɔ yaka ngɨyɛ ya꞉nagbʉka, ya꞉salɨa pɔngɔ ta anɨsɨnganakiso Ɨsaʉ yɛta Iɗo.

¹³ Masɔɔ kɔngɔ ka ɓɔ, ɓombi ɓɔ tɛa ɓaɓomu ngʉɓɔ ɨmbaa yɔ ɓʉngama nɔ ɓombi nga ɓɔmɔ ɓaja kʉtaa, ɓanɨmbɨa iɗo ɓɔ na aboloko dɔ ɨmɨ nakyananakɨa Klisito.

¹⁴ Nɔ uɓei ngʉwa na-ɔɔ iyani aboloko, we꞉njo pɔngɔ ɓanduku ɓaja akɔnapɨana mʉtɨma akɔ Makwɔɓɨɨ, kʉdɔ ɓɔ꞉sɨka tɨa angu nɔgbɛ aɓɨakɨa Ɨsaʉ yɛta Iɗo sɔkɔmʉ nɔ ʉɓá.

¹⁵ Ya ta ingono ɓɔ ati ɔ ɓanduku ngʉɓɔnanɨ, ɓɔmɔ ɓaɓɨakɨa Ɨsaʉ ngɨyɔ Klisito nɔ imi, nɔ amati ɔ mangoi. Yakamɛngana, ɓɔmɔ ɓanayɔ aɓɨakɨa nɔ itungwio yɛta iɗo.

¹⁶ Ɨɓɔ, ɓaɓɨakɨa nɔ ɓʉkʉnda, dɔ ɓanɨmbɨa iɗo ɓɔ Asɔɓɨɨ a꞉nenjo tɛa yɔ ɓɛndanɨa Ɨsaʉ yɛta Iɗo.

¹⁷ Ɨna dɔ, ɨɓɔnanɨ ɓɔmɔ, ɓaɓɨakɨa Ɨsaʉ ngɨyɔ Klisito nɔ ɨwaɨ. Itungwio ngɨyeɓo ya ga, bɨsɨnganakiso gɔ ikoko ngɨyɛsɛmɨ nɔ pɛɨ, iyani na-ɛɛ aboloko.

¹⁸ Ɨyɛnɛnɨ yangɔmʉ pɔ ɨkyɛmʉ! Nanɨkwa ɨgyagya dɔ ɨbɔ ɓaɓomu banɨsɨnganaka ta ɓɨakɨa Ɨsaʉ yɔ Klisito, gʉtʉ itungwio ngɨyeɓo yiɓio iɗo ga pɔ ɓɔ yiɓio ɓɨɓɨ. Nɔ nɛ꞊sɨnganaka ɓata ta nɨkwa ɨgyagya,

¹⁹ dɔ nanɨmbɨa iɗo ɓɔ ɨyɛnɛnɨ ya ɓoonokio ngɨyɛsɛmɨ, akʉʉ ɔ nɨta ngɨyeno nɔ akɔ angu ɔ Mʉtɨma ngʉwɔ Yeso Klisito.

²⁰ Mʉsasa ngʉwa wa amati asɛmɨ, nɔ yaka ngɨyɛ na-ɔɔ anapɨana mʉtɨma, ya ɓɔ ɨmɨ nangɔkwamʉ soni pɔ bele. Yakamɛngana, yiɓio kʉndʉ ɨtakɨtakɨ ngɨyɛ, kʉndʉ akɔ makwaa ngʉka ka꞊nɨka, nanɔ iguegue abibiso Klisito amati asɛmɨ muɓomu, yiɓio ɓɔ na-sɨ kʉ akɔ uɓei, yiɓio gʉtʉ ta ingwo ngɨyɛsɛmɨ.

²¹ Dɔ akɔ ɨmɨ, aɓio akɔ uɓei ya Klisito, nɔ ingwo ya tɨa ɨjangɨa.

²² Yakamɛngana, yɛtanɨeni ɓɔ nɨsɨnganaka-sɨ akɔɓio ta auɓei wɔ ndʉtʉ, ya ingainga akʉʉ ɔ tɛa ngɨyɛsɛmɨ, kʉɓanɨ nangɔmʉ anɨmbɨa ɓɔ nasɨka ɨmanɨ ɓɔ kpɛ.

²³ Lɨngbaa lɔ yaka ɗepini di di di lanɛmɨ aɗuɗuo. Nakʉnda pɛngɛ ɓɔ nɨsɨana gɔ nɔ uɓei ngʉwa, dɔ niɓio tɨa ɨhɔ nɔ Klisito, yaka ngɨyɛ ya pɛngɛ iɗo nɔgbɛ, ɨyɛnɛnɨ.

²⁴ Yakamɛngana, tɨa akɔ yaka yeno, ya gɔ pɛngɛ iɗo nɔgbɛ ɓɔ niɓio-sɨ kʉ auɓei wɔ ndʉtʉ.

²⁵ Ɨmɨ, nanɨmbɨa iɗo ɓɔ, na꞊ɓio-sɨ ta auɓei. Na꞊ɓio ɨhɔ nenu ɓaɓomu, nenu akɔsalɨa anɨsɨnganaka, nɔ aɓio nɔ ɨgyagya amati ɔ báya.

²⁶ Kʉɓanɨ, angbinga ngɨa na꞊tɔa suo ɓata aɓio ɨhɔ nenu, ná꞊ɓio suo tɨa nɔ ɨmbʉka nɔgbɛ aɓio ɨkyɛmʉ mɛngana amati ɔ Yeso Klisito, akʉʉ yaka ngɨyɛ akɨa amati asɛmɨ.

²⁷ Ɓieni pɛpɛ dɔ ta nɔ mʉkyananakɨa wɔta uɗo, akpatanakɨa nɔ Ɨsaʉ yɛta Iɗo ngɨyɔ Klisito. Ambɔ nɛkeni pɔ yɔmɔ nenu akanga, ga pɔ ɓɔ nangɔmʉ-ɔɔ, nʉka-pɨ ɨsaʉ ta ɓɔ, inu ná ɓɛmaɛ ɓʉmʉ amati ɔ itungwio mɛngana. Nɔ inu ɓaɓomu náɓɛndaniso ɗite mʉtɨma mʉngana, akʉʉ ɔ báya ngɨyɛ Ɨsaʉ yɛta Iɗo.

²⁸ Nátɨkumenimʉ ɓamʉyaa ɓeno pɔ bele. Nɔ ɨyɛnɛnɨ ya isisenio andaɓʉ ɓɔ ɨɓɔ ɓayangaa yangaanɨ. Yakamɛngana, akɔ inu, ɨyɛnɛnɨ ya isisenio yɔ ɓʉhɛa anɨngwa atɨ Asɔɓɨɨ.

²⁹ Dɔ Asɔɓɨɨ a꞉ninjo inu akyananakɨa Klisito aɨjɨɔ, sɔkɔmʉ ta nayɔ abáya, yakamɛngana, kʉ nɔ nɨɗya ɓʉkaɓʉkaɨ ɨhɔ nayɔ.

³⁰ Ɨtakɨtakɨ ngɨyɛ, ná tɨa aɓɛndaniso ɗite ngɨlɛnɛnɨ ɨhɔ nɛmɨ. Aɓʉpɛɨ ɓɔngɔ, na꞉ɓɛndaniso ɗite ngɨlɛnɛnɨ a mesu keno, nɔ nánɨmbɨa iɗo ɓɔ na-sɨ ta amati.