2 Timɔtɛɔ 4 - Mʉkpanganɨa nɔ Agɔmɛ ɔ Ɨtakɨtakɨ

Mapanʉ kɔ mupipio ngʉka kɔ Pɔlɔ

¹ Yaka ngɨyɛ nanɔwɛ anɨta nɔ angu amesu kɔ Asɔɓɨɨ, nɔ Yeso Klisito ngɨa a꞊kio sina mʉkɔmbʉ wɔ ɓombi ngʉɓa ɓa akɔ uɓei, nɔ ʉɓa ɓa꞉sio, nɔ ɨya a꞊chwɛanɨa sina ndʉ ngama, ya ɓɔ:

² ɓɨakɨa Ɨsaʉ yɛta Iɗo nɔ kɛkɛɛ, angbinga ta muɓomu. Gɔga ɓombi ngʉɓa ɓakpataka mapanʉ kɔ mʉjɛɛ, ɓɨsɨa ɓʉɓɨɓɨ, ɓinjo iguegue, nɔ, wɔɓʉpanɨa nɔ mʉtɨma wɔta ʉta.

³ Dɔ, Ya꞊ɓio sina nɔ angbinga mʉngana ɨya, ɓombi ɓangɔkʉnda tii ɓata-ɔɔ anʉka ʉpanʉ wɔ ingono. Yakamɛngana, ɓa꞊ɓio akpataka tɨta mʉsasa ngʉweɓo. Ɓa꞊ɓio ahata ambaja ɔ ɓapananakɨa naɓɔ apanɨa ta yaka ngɨyɛ ɨɓɔ, ɓakʉnda anʉka.

⁴ Ɓangɔɓio tii ɓata anʉka yaka yɔ ingono. Ɓa꞊ɓio akpataka tɨta maduɓa kɔ mʉjɛɛ.

⁵ Yakamɛngana, ʉwɛ pɛpɛ, tayanɨa akɔ lɨngbaa lɔ yaka ta liɓomu. Pɛakɨa ɓʉkaɓʉkaɨ nɔ, wɔɓɨakɨa Ɨsaʉ yɛta Iɗo, nɔ kɨa tɛa ngɨyɛsɔɔ ndʉ baya ɔ Asɔɓɨɨ ta iɗo.

⁶ Dɔ ɨmɨ ingainga, ngbinga ɔndanɔ tɨa ʉndananɨ akɔ uɓei ngʉwɔsɛmɨ anisa aninjonio atɨ Asɔɓɨɨ ndʉ mutebii. Ngbinga ngɨasɛmɨ asɨana nɔ dɔdɔ, ɛkɔ tɨa ɨkanɨ.

⁷ Ɨmɨ, na꞉maaniso agbanga ɔ báya muɗo nɔ nɔ꞉tʉgbʉa bangʉ aɓɔya ta amupipio. Na꞉pɛmakɨa báya pɛmakɨanɨ.

⁸ Tɨa ɨtakɨtakɨ ngɨyɛ, mʉkaya ngʉwɔsɛmɨ ndʉ nganya, wanemɨ aɓɛtaka tɨta ɓɔ gbɛ. Ya mʉkaya wɔ ingono ngʉwa Makwɔɓɨɨ, ngɨa akio mʉkɔmbʉ ngbingbii a꞊nenjo sina akɔ ɓisi ɓɔ mʉkɔmbʉ. Angɔnenjo sina ta ɨmɨ, yakamɛngana, kʉ nɔ ɓombi ɓaɓomu ngʉɓa, ɓakɔɓɛtɨa tɔwa ngɨangɔ nɔ ɓʉkʉnda.

Masaʉ di di di

⁹ Kɨa angu anɨka nɛmɨ agbʉka ta gagaa.

¹⁰ Akʉʉ ɔ kʉnda yaka yɔ dɔdɔ ngɨyɔ ɓʉɓʉnʉ, Dɛmasɨ a꞉nasɨa pɔngɔ ɨmɨ sɨanɨ, nɔ, ɔ꞉sa yangɔ tɨa anɔ Tɛsalɔnɨka. Kɨlɨsasɨ a꞉sa ɨyɔ anɔ Galatɨa, nɔ Tito ɔ꞉sa yangɔ tɨa anɔ Dalamatɨa.

¹¹ Ta꞉tukoo pɔngɔ aka tɨta nɔ Luka. Sɨka Malɨkɔ nɛ꞉ka nayɔ, dɔ, a mombi ngɨa akwanana nɛmɨ asalɨa akɔ tɛa yɔ Asɔɓɨɨ.

¹² Na꞉tʉma pɔngɔ Tikiko anɔ Ɛfɛsɔ.

¹³ Ngbinga ngɨa wa꞊ɓio suo-ɔɔ anɨka, anasɨkɨa koti ngɨa na꞉sɨa anɔ Tɔlɔa, atɨ gue mʉngana ino ɓɔ Kalapʉsɨ. Sɨka kʉ nɔ lɨtaɓʉ, nɔgbɛ ɨlɛ lɔ dada ɓa꞉lɨkɨa nɔ mamba kɔ ɓanama.

¹⁴ Alɛkɨjandɛlɛ ɨya, akyɔkɨa tɛa yɔ abʉgʉʉ, a꞉nakɨa pɔngɔ yaka yɛta ɓɨɓɨ nɔgbɛ. Yaka ngɨyɛnɛnɨ a꞉kɨa, Makwɔɓɨɨ a꞊mutosio ta tosioni.

¹⁵ Ʉwɛ, kanganakɨa nayɔ kanganakɨanɨ, dɔ ɨyɔ, a꞉yaa pɔngɔ yaka ngɨyɛ ta꞉panɨa ta yaa.

¹⁶ Ɨyɛ na꞉pʉnga pɔngɔ-ɔɔ anɨmaa apɛɨ ɔ mʉkɔmbʉ, mombi pɔ mʉngana a꞉nɛkɨamʉ isingo, ɓa꞉nasɨa ta nangana. Asɔɓɨɨ atɨɓʉnapɨamʉ nɔ mʉkɔmbʉ akʉʉ ɔ yaka ngɨyɛnɛnɨ!

¹⁷ Yakamɛngana, Makwɔɓɨɨ a꞉nɛkɨa isingo, nɔ, ɔnenjo angu, dɔ, nɨɓɨakɨa Ɨsaʉ yɛta Iɗo ndʉ aka yɔsisekio-ɔɔ, iɗo ambɔ mababa kɔ ɓombi maɓomu ngʉɓa ɓangɔmʉ Ɓayuda, ɓʉka ta ʉkanɨ. Kʉdɔ, Makwɔɓɨɨ a꞉naɓwanakiso akɔ monu kɔ kingbi.

¹⁸ Makwɔɓɨɨ a꞊naɓwanakiso akɔ tɛa yɛta ɓɨɓɨ iɓomu. Nɔ, a꞊naheiso akɔ yaka yɔ ɓʉngama ngʉɓa ɓa akʉʉ ɔ ɓisi. Makwɔɓɨɨ ɨsɨka ʉbɨba akɔ mago nɔ mago-ɛ. Ya ɓanɨ.

Ɓokuo ngɨyɔ mupipio

¹⁹ Ɓɔkuo atɨ Pelesila nɔ Akila kʉ ɓokuoni, nɔ ufini ngʉwa wɔ Ɔnɛsɨfɔlɔ kʉtaa.

²⁰ Ɛlasɨtɔ ɔ꞉tukoo kʉ anɔ Kolito. Nɔ, na꞉sɨa Tolofimo anɔ Mɨlɛtɔ, dɔ, a꞉ɓio pɛ nɔ kaɓu.

²¹ Kɨa angu anɨka pɛɨ ɔ ngbinga ngɨa ɔ sɛsʉ yɛta ɨja. Atɨ Eubulu, Pʉdɛ nɔ Linu, nɔ Kolodia nɔ ɓanduku ta ɓaɓomu ɓɔ꞉naɓukuo kʉ ɓokuoni.

²² Makwɔɓɨɨ iɓio ɨhɔ nɔwɛ amʉtɨma, nɔ ɨjɨɔ yɔ Asɔɓɨɨ yiɓio ɨhɔ nenu ɓaɓomu-ɛ.