2 Timɔtɛɔ 3 - Mʉkpanganɨa nɔ Agɔmɛ ɔ Ɨtakɨtakɨ

Tɛa yɔ Abɨɨ akɔ ɓisi ɓɔ mupipio

¹ Tɨmɔtɛɔ, ɨmbɨa iɗo ɓɔ akɔ makwaa kɔ mupipio, ya꞊ɓio sina nɔ angbinga ata ɓɨɓɨ.

² Dɔ, ɓombi ɓa꞊ɓio nɔ umongu, nɔ mʉsasa wɔ ɓagyɛgyɛ, ɓa꞊ɓio nɔ aɗia, ɨhɔ kʉ nɔ mʉtɨma wɔta ʉja, nɔ ɓa꞊ɓio kʉ asɛaka ino yɔ Asɔɓɨɨ. Ɓa꞊ngɔɓiomʉ ɓata anʉka ɓɛsɛ nɔ ɓenye ɓeɓo, ɓɛ꞊nɨanɨeni nɔ ɨkyɛmʉ, ɓa꞊ngɔtosiomʉ ʉbɨba. Ɓa꞊ngɔɓio nɔ ʉɓá aɓayaka ɓɔ Asɔɓɨɨ.

³ Ɓa꞊ɓio ɓʉkaɓʉkaɨ nɔ ɓangɛ, ɓangɔɓio nɔ ikoko nɔ ɓangɛ, ɓa꞊ɓio ɓombi ɓɔ yakanakɨa ɓangɛ ɓɨɓɨ, ɓombi ɓɔ kyananaka kʉ gbaɨ, nɔ kʉ ɓʉkaɓʉkaɨ, nɔ ɓa꞊ngɔkʉnda yaka yɛta iɗo.

⁴ Ɓa꞊ɓio sina agabaka ɓangɛ, nɔ ɓʉkaɓʉkaɨ, nɔ ɓahuoke nɔ aɗia, nɔ kʉnda ɓʉtɨpɨ ɓɔ dɔdɔ akɔ ɨda yɔ kʉnda Asɔɓɨɨ.

⁵ Ɓa꞊ɓio sina anɨnɨa ndʉ ɓabibiso Asɔɓɨɨ, yakamɛngana, ɓɔ꞊tata angu ngɨangɔ ta tata. Sɨana nɔ ɨkananja yɔ ɓombi ngʉɓɔnanɨ ta sɨana!

⁶ Ati ɔ ɓombi ngʉɓɔnanɨ, yanɔ ʉɓa, ɓakumonokio amati ɔ lɨfananja, nɔ, pɛtaka ɓoi ngʉɓa ɓa ndʉ lijangi, ʉɓa, ɓakɔkɨa ɓʉɓɨɓɨ nɔgbɛ, nɔ ʉɓa migbo yɔ mʉsasa wɔ ndʉtʉ wɔta ɓɨɓɨ yanaɓɔ akyɛndakiso.

⁷ Masi maɓomu, ɓoi ngʉɓɔnanɨ ɓahata apemiso yaka yɔ ɨtakɨtakɨ, yakamɛngana, sɔkɔmʉ ɓɨmbɨa ingono pɔ nɨmbɨa.

⁸ Ɓombi ngʉɓɔnanɨ, ɓapanɨa mapanʉ kɔ majɛjɛ, ɓa ndʉ atɨ Yanɛ nɔ Yambɛlɛ, ngʉɓa ɓa꞉yaa nʉka Musa. Ya ɓombi ngʉɓa itungwio ngɨyeɓo ya ya꞉ngaa yangaanɨ, nɔ báya ngɨyeɓo yangɛmaa ɓata apɛɨ ɔ ikanio.

⁹ Yakamɛngana, nʉkɨa ngɨyeɓo ya꞊ɓio ta ngbinga bele, dɔ, ɓʉjɛka ngʉɓeɓo ɓa꞊chweanɨa tɨta aɓʉmba amesu kɔ ɓombi ɓaɓomu, ngbanga kʉndʉ ya꞉kɨanɨa jɛnɛ nɔ atɨ Yanɛ nɔ Yambɛlɛ.

Ʉpanʉ wɔ mupipio akɔ Tɨmɔtɛɔ

¹⁰ Yakamɛngana ʉwɛ pɛpɛ, wa꞉kpataka mapanʉ ngʉkɔsɛmɨ, nɔ mʉkyananakɨa ngʉwɔsɛmɨ, nɔ yaka ngɨyɛ na꞉ɓio akwaisio akɔ uɓei ngʉwɔsɛmɨ, nɔ, wɔtɔpemiso báya ngɨyɛsɛmɨ, nɔ mʉtɨma wɔta ʉta ngʉwɔsɛmɨ, nɔ kpekeɓu ngɨasɛmɨ.

¹¹ Wanɨmbɨa kyananaka yɛta ɓʉmʉɓʉmʉ, nɔ ɓʉkaɓʉkaɨ ngʉɓa na꞉chanaka amati ɔngɔ anɔ Atiokia, nɔ anɔ Ikonio, nɔ anɔ Lisutila. Na꞉chanaka amati ɔ migbo yɔ ɓʉkaɓʉkaɨ ɨja, yakamɛngana, Makwɔɓɨɨ a꞉naɓwanakiso amati ɔngɔ ta iɓomu.

¹² Yaɓanɨ, ɓombi ɓaɓomu ngʉɓa ɓakʉnda aɓio nɔ uɓei wɔta ngbingbii amati ɔ Yeso Klisito, ɓa꞊ɓʉkyananaka ta kyananakanɨ.

¹³ Yakamɛngana, ɓombi ɓɔta ɓɨɓɨ, nɔ ʉɓɔ mʉjɛɛ, ɓɛ꞊sɨnganaka nɔ kɨa ɓʉɓɨɓɨ tɨta nɔ pɛɨ nɔgbɛ. Ɓa꞊pɛtaka ɓombi, nɔ ɓɔ꞊ɓʉpɛtaka ɨɓɔ tɨa kʉɓanɨ.

¹⁴ Ʉwɛ pɛpɛ, ɓotono ta ɓʉmʉ nɔ yaka ngɨyɛ ɓa꞉napanɨa, nɔ ɨyɛ, wa꞉ɨɓɨnyɨa ɓɔ ya ingono, dɔ wanɨmbɨa ɓɔ anɨ akɛ a꞉napananakɨa jɛnɛ.

¹⁵ Anɨngwa nɔ ɨɓwana ngɨyɛsɔɔ, wanɨmbɨa Mabii kɔta Tu. Ɨkɔ akɛ kanɔwɛ aninjo nɨmbɨmbanaka, nɔ nɔwɛ aɓoiso akɔ ɓʉhɛa ɨngbaa akɔ báya Yeso Klisito.

¹⁶ Mabii kɔta Tu maɓomu, ka꞉tɛndanakɨa nɔ angu ɔ Asɔɓɨɨ, apanɨa ɓombi ingono, nɔ apoɓio mapanʉ kɔ mʉjɛɛ, nɔ agɔga ɓʉɓɨɓɨ, nɔ ayomo ɓombi akyɛndaka amati ɔ ɓungbingbii,

¹⁷ iɗo ambɔ mombi a wɔ Asɔɓɨɨ, iɓio mʉtambanakɨɛ nɔ mʉndanɛ akɔ mʉkyananakɨa wɔta manjanja uɓomu.