2 Timɔtɛɔ 2 - Mʉkpanganɨa nɔ Agɔmɛ ɔ Ɨtakɨtakɨ

Sʉda wɔ Yeso Klisito

¹ Ngbanga kʉɓanɨ, Ʉwɛ mwanasɛmɨ Tɨmɔtɛɔ, hata aɓio nɔ angu, amati ɔ ɨjɨɔ ngɨyɔ Yeso Klisito.

² Ɨsaʉ ngɨyɛ wɔ꞉ka pɔngɔ nɔɓieni apanɨa apɛɨ ɔ ɓadɛmʉ ɓaja, ʉwɛ, ɨpanɨa tɨa kʉɓanɨ akɔ ɓombi ngʉɓa ɓɔsisekio, nɔ ʉɓa, ɓakwanana tɨa kʉ apanɨa ɓangɛ.

³ Ngbanga kʉndʉ ɨmɨ, ʉwɛ, baya kʉɔ anɨdya ɓʉkaɓʉkaɨ ndʉ sʉda ata iɗo ɔ Yeso Klisito.

⁴ Mombi enjoneni akɔ tɛa yɔ sʉda, nɔ ɔbaya anɨkataa makwangɔ, angɔkumonokiomʉ ɓata yaka yɔ ɓombi ngʉɓa ɓangɔmʉ ɓasʉda.

⁵ Mombi ngɨa anɨchwa bangʉ yɔ magbii, angɛnɨanɨa nɔ mʉkaya, ɔkpatakenimʉ mapanʉ kɔngɔ.

⁶ Mombi ngɨa akɨa tɛa yɔ kʉbaa nɔ angu, ta ɨyɔ akɛ apʉnga nɨdya idyo yɔngɔ.

⁷ Tɨmɔtɛɔ, pemiso yaka ngɨyɛ nanɔwɛ asigio iɗo, dɔ, Makwɔɓɨɨ a꞊nenjo nɨmbɨmbɨanaka apemiso ta iɓomu.

⁸ Tunguo Yeso Klisito. Ɨyɔ, ngɨa a꞉ɓio akɔ ɨfananja yɔ Dawidi, nɔ, a꞉jʉkana akɔ ingwo, Ɨsaʉ yɛta Iɗo ngɨyɛ nakɔɓɨakɨa, ɨyɛnɛnɨ.

⁹ Ya akʉʉ ɔ Ɨsaʉ ngɨyɛnɛnɨ, ɨyɛ, na-ɔɔ anɨdya ɓʉkaɓʉkaɨ, aɓɔya ta nɛmɨ anʉnga nɔ mangbenje ndʉ mombi ata ɓɨɓɨ. Yakamɛngana, mombi pɔ mʉngana, angɔkwananamʉ anʉnga Ɨsaʉ yɔ Asɔɓɨɨ.

¹⁰ Kʉɓanɨ, napɛakɨa ɓʉkaɓʉkaɨ ta ɓuɓomu akʉʉ ɔ iɗo yɔ ɓombi ngʉɓa Asɔɓɨɨ a꞉ɓʉchwa, ambɔ ɨɓɔ ɓɨnɨanɨa nɔ ɓʉhɛa amati ɔ Yeso Klisito, nɔ ʉbɨba wɔ mago nɔ mago.

¹¹ Yaka ngɨyɛ ya ta ingono: Ndʉ tawo ɨhɔ nɔ Klisito, ta꞊dya sina uɓei tɨa kʉ ɨhɔ nayɔ.

¹² Ndʉ tɛmaa ɓʉmʉ, ta꞊dya sina ɓʉngama tɨa kʉ ɨhɔ nayɔ. Tɔmʉtateni, ɨyɔ a꞊tɨtata sina isu, kʉ tatanɨ.

¹³ Isu tɔɓienimʉ akyanakɨa yaka ngɨyɛ takɔsugo, ɨyɔ a꞊kyananakɨa ta kyananakɨanɨ, dɔ ɨyɔ, angɔkwananamʉ akɨa yaka di nɔ ɨyɛ a꞉sugo ɓɔ akɨa.

Mombi ɔ tɛa ngɨa ɛkataa Asɔɓɨɨ

¹⁴ Tɨmɔtɛɔ, tungwiso ɓombi yaka ngɨyɛnɛnɨ ta tungwisoni, nɔ, ɓʉgbɛma apɛɨ ɔ Asɔɓɨɨ ɓɔ, ɓɨsɨa aɗuɗuono akʉʉ ɔ ɨsɨ yɔ mano. Ɨkananja yɔ ɗuɗuono ngɨyɛnɛnɨ, yangɔmʉ nɔ dada pɔ bele. Yakamɛngana, ya꞊kwisiso ɓombi ngʉɓa ɓanʉka ta kwisiso.

¹⁵ Kɨa angu aɓio musisekie apɛɨ ɔ Asɔɓɨɨ, ɓio mombi ɔ tɛa ata muɗo ɨya, angɔkwa soni akʉʉ ɔ tɛa ngɨangɔ. Nɔ ɨya, apanɨa ʉpanʉ wɔ ingono ngʉwa Asɔɓɨɨ ngbingbii.

¹⁶ Watɨkumonokiomʉ yakanaka yɛta ɓʉtʉɓʉtʉʉ, ɨyɛ, yangenjo Asɔɓɨɨ ʉbɨba, dɔ, ɓombi ngʉɓa ɓakɔkɨa ɨkananja yɔ yaka ngɨyɛnɛnɨ, yatito ɓombi anisa tɨa ɗu nɔgbɛ nɔ Asɔɓɨɨ.

¹⁷ Mapanʉ ngʉkeɓo ka ndʉ gbɔlɨ ngɨa akɔpoiso ʉmba wɔ ndʉtʉ. Ati ɔ ɓombi ngʉɓɔnanɨ, ya Hɨmɛnɛɔ nɔ Fɨlɛtɛ.

¹⁸ Ɨɓɔ ɓapɨnɨ, ɓa꞉sɨa ɨsaʉ yɔ ingono sɨanɨ, nɔ, ɓɔ꞉kwisiso báya yɔ ɓombi ɓaja, asugo ga jʉkana akɔ ingwo ngɨyɛ taɓɛtɨa ya꞉kyananakɨa jɛnɛ tɨa kyananakɨanɨ.

¹⁹ Yakamɛngana, muɓumba wɔ ɨkáá wɔta ɓʉmʉ ngʉwa Asɔɓɨɨ a꞉ʉnapɨa, wangɔdʉanakamʉ. Ɨsaʉ ngɨyɛ ɓa꞉ɨtɛndakɨa ananɨ akʉʉ ɔngɔ yasugo ɓɔ, «Makwɔɓɨɨ anɨmbɨa ɓafandɔngɔ», nɔ, «Mombi muɓomu ngɨa asugo ɓɔ a mombi wɔ Asɔɓɨɨ, ɔkwananɔ asɨana nɔ ɓʉɓɨɓɨ.»

²⁰ Amati ɔ ɨkáá yɔ mombi ɔ lɨkyɛmʉ, yanɔ migbo yɔ ɓasanɨ di di di: ʉɓa ɓɔ ɔlɔ, nɔ ʉɓa ɓɔ mako ngakɔmɔ kɔ dada nɔ ʉɓa, ɓaɓʉchɛka akɔ mɨkakaʉ, nɔ ʉɓa ɓɔ tʉmɔ. Yanɔ ɓasanɨ ngʉɓa, ɓakyɔɓʉchweiso ta aɓisi ɓɔ ʉmbɔ wɔta ʉja. Yakamɛngana, ɓasanɨ ngaɓɔmɔ, ɓɔta ɓʉtʉɓʉtʉʉ ɓakyɔsalɨa makwaa ta ɓaɓomu.

²¹ Kʉɓanɨ, mombi ngɨa ɔjaɓanakɨɔ nɔ ɓʉɓɨɓɨ ɓuɓomu ngʉɓa nɔsugo aka, a ngbanga ndʉ sanɨ ngɨa ɓadyakaka amati ɔngɔ, akɔ ʉmbɔ wɔta ʉja. Sanɨ ngɨananɨ, ɓamʉnapɨa ɨyɔ ta ɓɔ kɛlɛ. Tɛa ngayangɔ, yaɓio ta di akɔmakwɔngɔ, aɓio kʉ ɓɔndanɛ aɓɛtɨa salɨa akɔ tɛa iɓomu ngɨyɛ yɛta manjanja.

²² Tɨmɔtɛɔ, watɨkptakamʉ mʉsasa wɔta ɓɨɓɨ ngʉwɔ ɓandambʉ. Kpataka ta yaka yɛta ngbingbii ngɨyɔ báya, nɔ ɓʉkʉnda, nɔ majɨɔ, ɨhɔ nɔ ɓombi ngʉɓa ɓɛkyɛta Makwɔɓɨɨ nɔ mʉtɨma mʉngana.

²³ Watɨkpatakamʉ yakanaka yɛta ɓʉtʉɓʉtʉʉ, ɨyɛ yangɔmʉ nɔ dada. Yaka ngɨyɛnɛnɨ, yachwɛiso ta mangoi.

²⁴ Ɨnadɔ, baya ɔ Makwɔɓɨɨ angɔmʉ mombi ɔ mangoi. Yakamɛngana, ɔkwananɔ aɓio nɔ ɓʉkʉnda nɔ ɓombi ɓaɓomu, ɔkwananɔ apanɨa ɓombi iɗo, nɔ, ɓio nɔ mʉtɨma wɔta ʉta, anɨpaakɨa yakanaka.

²⁵ Baya wɔ Asɔɓɨɨ ɔkwananɔ apanɨa ɓombi ngʉɓa ɓayaa mapanʉ, nɔ mʉtɨma wɔ majɨɔ. Dɔ, adiga Asɔɓɨɨ a꞊ɓʉganɨa gɔ sina pɔ ɨngbaa yɔnacho itungwio yɛta ɓɨɓɨ ngɨyeɓo, nɔ, pemiso ɓata ingono.

²⁶ Kʉdɔ, mʉtɨma wɔ ɓuɓombi watɔwa ɓata amati eɓo, nɔ, ɓɔɓwanaka alɨkɔndɔ lɔ Abɨɨ ngɨa a꞉ɓʉfaniso alipindi, nɔ, akɨa ɓʉkʉnda ngʉɓangɔ.