2 Timɔtɛɔ 1 - Mʉkpanganɨa nɔ Agɔmɛ ɔ Ɨtakɨtakɨ

Pɔlɔ ɔɓokuo Tɨmɔtɛɔ

¹ Ɨmɨ Pɔlɔ, ngɨa Asɔɓɨɨ a꞉nachwa aɓio titima wɔ Yeso Klisito, nɔtɛndakɨɔ ʉbalʉa ngʉa. Ɨyɔ, a꞉nenjo tɛa yɔ ɓɨakɨa ɓombi ɨsaʉ yɔ uɓei, ngʉwa a꞉tɨpanaka amati ɔ Yeso Klisito.

² Tɨmɔtɛɔ, ʉwɛ ngɨa nanakʉnda nɔgbɛ ndʉ mwana asɛmɨ, nanɔwɛ atɛndakɨa ʉbalʉa ngʉwa. Asɔɓɨɨ Aba nɔ Yeso Klisito Makweso, ɓɨnɛnɨa ikoko, nɔ ɓinutio ɨjɨɔ nɔ majɨɔ-ɛ.

Pɔlɔ akɔtosio Asɔɓɨɨ ʉbɨba

³ Nakɔtosio Asɔɓɨɨ ʉbɨba, ɨyɔ ngɨa ɨmɨ, nanayɔ akyananakɨa nɔ mʉtɨma mʉngana, kʉndʉ aka ɓakuku ɓa꞉kɨa jɛnɛ-ɔɔ. Ɨmɨ, nakɨnatunguo naɓutu nɔ musoti kʉtaa, amati ɔ nɨta sɔkɔmʉ nɔ bɔmbana.

⁴ Nakɔtunguo masoi ngʉka wa꞉njɨlakiso pɔngɔ, kʉdɔ, nakɔtatanɨa nɔgbɛ ɓɔ, tɨnana gɔ pɛngɛ ɓata-sɨ ta ɨnananɨ, dɔ, nɨkwa ɓaka-sɨ kʉɔ ɨmɨ, ɨgyagya ɓɔ chɨnɨchɨnɨ.

⁵ Nakɔtungwoko báya ngɨyɛ, wa꞉baya Yeso Klisito, sɔkɔmʉ nɔ pɛtanaka. Gʉtʉ ta atɨ anʉngwanʉ Lɔɨsɨ, ɨɓɔ nɔ anʉ Ʉnɨkɨ, ɓa꞉ɓio jɛnɛ kʉ nɔ ɨkananja yɔ báya ngɨyɛnɛnɨ. Ɨmɨ, nanɨmbɨa tɨta nɔ ingono ɓɔ, báya ngɨyɛnɛnɨ, ya amati asɔɔ.

Pɔlɔ aninjo Tɨmɔtɛɔ iguegue

⁶ Kʉɓanɨ, nanɔwɛ atungwiso nɔgbɛ ɓɔ, jʉkaniso nɨmbɨmbɨanaka ngɨyɛ Asɔɓɨɨ a꞉nenjo, ɨyɛ wɛ꞉nɨanɨa jɛnɛ nayɔ, ngbinga ngɨa na꞉napɨa-ɔɔ lɨkɔndɔ akʉʉ asɔɔ.

⁷ Dɔ, mʉtɨma ngʉwa Asɔɓɨɨ a꞉tinjo, wangɔmʉ mʉtɨma wɔ ʉɓá, yakamɛngana, ya mʉtɨma wɔ angu, nɔ ɓʉkʉnda, nɔ mʉtɨma wɔ tayanɨa.

⁸ Kʉɓanɨ, watɨkwamʉ soni akɔɓɨakɨa ɨsaʉ yɔ Makweso, nɔ, watɨkwamʉ soni akʉʉ ɔ asɛmɨ ngɨa ɓa꞉nafa pɔngɔ akɔ boloko, dɔ, nanayɔ akɔkyananakɨa. Yakamɛngana, baya anɨdya ɓʉkaɓʉkaɨ ɨhɔ nɛmɨ, akʉʉ Ɨsaʉ yɛta Iɗo, dɔ, Asɔɓɨɨ akɛ anɔwɛ aninjo angu ɔngɔ.

⁹ Ɨyɔ akɛ a꞉tiheiso, nɔ, ɔ꞉tisoko aɓio ɓombi ɓangɔ ɓɔ kpɛ. A꞉kɨamʉ ɓanɨ, akʉʉ ɔ mʉkyananakɨa wɔta uɗo ngʉweso, yakamɛngana, ta ɨyɔ, ingainga akɛ a꞉kwaisio ɓanɨ. Ɨyɛnɛnɨ, ya꞉ɓio ɨjɨɔ ngɨangɔ, ɨyɛ a꞉tinjo amati ɔ Yeso Klisito, ta pɛɨ, ɨyɔ, akɨa dɔdɔ.

¹⁰ Tɨa, ɨtakɨtakɨ ngɨyɛ, ɨjɨɔ ngɨyɛnɛnɨ yɛ꞉nɨanɨa tɨta aɓʉmba, angbinga ngɨa Muheiso ngʉweso Yeso Klisito a꞉chwɛanɨa-ɔɔ. Tɨa ɨyɔ, akɛ a꞉pipo angu wɔ ingwo, nɔ pananiso uɓei ngʉwa, wangɔmʉ nɔ mupipio aɓʉmba, ɨngbaa akɔ Ɨsaʉ yɛta iɗo.

¹¹ Ɨsaʉ yɛta iɗo ngɨyɛnɛnɨ, Asɔɓɨɨ a꞉nemaiso tɨa ɨmɨ, mombi ɔ tʉɓakɨa mʉsɨna wɔngɔ, aɓio ndʉ titima, nɔ mʉpananakɨa.

¹² Ɓʉkaɓʉkaɨ ngʉɓa nanɨdya aboloko aɓɛ, ya akʉʉ yaka ngɨyɛnɛnɨ. Ɨnadɔ, yangɔmʉ nɛmɨ aninjiso soni pɔ bele. Dɔ, nanɨmbɨa ɓɔ mombi ngɨa na꞉mʉbaya a anɨ. Nɔ, na ɓata kʉ anɨmbɨa tɨa iɗo nɔgbɛ ɓɔ, Asɔɓɨɨ anɔ angu mʉja, akɔpɛmakɨa ɨkyɛmʉ ngɨyɛ a꞉nenjo, akɔɓɔya ta akɔ ɓisi ɓɔ Mʉkɔmbʉ.

¹³ Kpataka ta ɨsaʉ yɔ ingono ngɨyɛ na꞉napanɨa. Ɨmaa ɓʉmʉ, amati ɔ báya, nɔ ɓʉkʉnda ngʉɓa tanaɓɔ akɔ Yeso Klisito.

¹⁴ Akɔ angu wɔ Mʉtɨma wɔta Tu ngʉwa wa amati eso, pɛmakɨa Ɨsaʉ yɛta Iɗo ngɨyɛ Asɔɓɨɨ a꞉nenjo pɛmakɨanɨ.

¹⁵ Kʉndʉ wanɨmbɨa, ɓombi ɓaɓomu ngʉɓa ɓa꞉baya amati ɔ ihoi yɔ Ajia, ɓa꞉nasɨa sɨanɨ. Ati ɔ ɓombi ngʉɓɔnanɨ, ya Figelo, nɔ Hɛlɛmɔgɛnɛ.

¹⁶ Makwɔɓɨɨ ɨkɨa ɓaka anja wɔ Ɔnɛsɨfɔlɔ iɗo. Dɔ ɨyɔ, a꞉ɓika ta gagaa nɛmɨ aninjo iguegue, nɔ sɔkɔmʉ ɛna soni, akʉʉ ɔ boloko ngɨasɛmɨ.

¹⁷ Yakamɛngana, ngbinga ngɨa a꞉ɓɔya-ɔɔ akɔ gʉlʉ ɔ Lɔma, a꞉nahata nɔ kɛkɛɛ, akɔɓɔya ta aka a꞉tɔnejeyo-ɔɔ.

¹⁸ Tɛa iɓomu ngɨyɛ a꞉nakɨa anɔ Ɛfɛsɔ, ʉwɛ, wanɨmbɨa ta iɗo nɔgbɛ. Makwɔɓɨɨ ɨmʉkɨa iɗo, anɨnɨanɨa nɔ ikoko ngɨyɛ Asɔɓɨɨ akɔ ɓisi ngʉɓɔnanɨ ɓɔ Mʉkɔmbʉ.